২. মোরহত্থিযত্থেরঅপদানং

৯. ‘‘মোরহত্থং গহেত্ৰান, উপেসিং লোকনাযকং;

পসন্নচিত্তো সুমনো, মোরহত্থমদাসহং.

১০. ‘‘ইমিনা মোরহত্থেন, চেতনাপণিধীহি চ;

নিব্বাযিংসু তযো অগ্গী, লভামি ৰিপুলং সুখং.

১১. ‘‘অহো বুদ্ধো অহো ধম্মো, অহো নো সত্থুসম্পদা;

দত্ৰানহং মোরহত্থং, লভামি ৰিপুলং সুখং.

১২. ‘‘তিযগ্গী [তিধগ্গী (স্যা. ক.), তিৰগ্গী (পী.)] নিব্বুতা ময্হং, ভৰা সব্বে সমূহতা;

সব্বাসৰা পরিক্খীণা, নত্থি দানি পুনব্ভৰো.

১৩. ‘‘একতিংসে ইতো কপ্পে, যং দানমদদিং তদা;

দুগ্গতিং নাভিজানামি, মোরহত্থস্সিদং ফলং.

১৪. ‘‘কিলেসা ঝাপিতা ময্হং…পে… ৰিহরামি অনাসৰো.

১৫. ‘‘স্ৰাগতং ৰত মে আসি…পে… কতং বুদ্ধস্স সাসনং.

১৬. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা মোরহত্থিযো থেরো ইমা গাথাযো

অভাসিত্থাতি.

মোরহত্থিযত্থেরস্সাপদানং দুতিযং.