১. সকিংসম্মজ্জকত্থেরঅপদানং

১. ‘‘ৰিপস্সিনো ভগৰতো, পাটলিং বোধিমুত্তমং;

দিস্ৰাৰ তং পাদপগ্গং, তত্থ চিত্তং পসাদযিং.

২. ‘‘সম্মজ্জনিং গহেত্ৰান, বোধিং সম্মজ্জি তাৰদে;

সম্মজ্জিত্ৰান তং বোধিং, অৰন্দিং পাটলিং অহং.

৩. ‘‘তত্থ চিত্তং পসাদেত্ৰা, সিরে কত্ৰান অঞ্জলিং;

নমস্সমানো তং বোধিং, গঞ্ছিং পটিকুটিং অহং.

৪. ‘‘তাদিমগ্গেন গচ্ছামি, সরন্তো বোধিমুত্তমং;

অজগরো মং পীল়েসি, ঘোররূপো মহব্বলো.

৫. ‘‘আসন্নে মে কতং কম্মং, ফলেন তোসযী মমং;

কল়েৰরং মে গিলতি, দেৰলোকে রমামহং.

৬. ‘‘অনাৰিলং মম চিত্তং, ৰিসুদ্ধং পণ্ডরং সদা;

সোকসল্লং ন জানামি, চিত্তসন্তাপনং মম.

৭. ‘‘কুট্ঠং গণ্ডো কিলাসো চ, অপমারো ৰিতচ্ছিকা;

দদ্দু কণ্ডু চ মে নত্থি, ফলং সম্মজ্জনাযিদং [সম্মজ্জনে ইদং (সী.)].

৮. ‘‘সোকো চ পরিদেৰো চ, হদযে মে ন ৰিজ্জতি;

অভন্তং উজুকং চিত্তং, ফলং সম্মজ্জনাযিদং.

৯. ‘‘সমাধীসু ন মজ্জামি [সমাধীসু ন সজ্জামি (সী.), সমাধিং পুন পজ্জামি (স্যা)], ৰিসদং হোতি মানসং;

যং যং সমাধিমিচ্ছামি, সো সো সম্পজ্জতে মমং.

১০. ‘‘রজনীযে ন রজ্জামি, অথো দুস্সনিযেসু [দোসনিযেসু (সী. স্যা. ক.)] চ;

মোহনীযে ন মুয্হামি, ফলং সম্মজ্জনাযিদং.

১১. ‘‘একনৰুতিতো [একনৰুতে ইতো (সী. স্যা.)] কপ্পে, যং কম্মমকরিং তদা;

দুগ্গতিং নাভিজানামি, ফলং সম্মজ্জনাযিদং.

১২. ‘‘কিলেসা ঝাপিতা ময্হং, ভৰা সব্বে সমূহতা;

নাগোৰ বন্ধনং ছেত্ৰা, ৰিহরামি অনাসৰো.

১৩. ‘‘স্ৰাগতং ৰত মে আসি, মম বুদ্ধস্স সন্তিকে;

তিস্সো ৰিজ্জা অনুপ্পত্তা, কতং বুদ্ধস্স সাসনং.

১৪. ‘‘পটিসম্ভিদা চতস্সো, ৰিমোক্খাপি চ অট্ঠিমে;

ছল়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা সকিংসম্মজ্জকো থেরো ইমা গাথাযো

অভাসিত্থাতি.

সকিংসম্মজ্জকত্থেরস্সাপদানং পঠমং.