৪. মধুমংসদাযকত্থেরঅপদানং

১০৬. ‘‘নগরে বন্ধুমতিযা, সূকরিকো অহোসহং;

উক্কোটং রন্ধযিত্ৰান [উক্কোটকং রন্ধযিত্ৰা (সী. স্যা.)], মধুমংসম্হি [মধুসপ্পিম্হি (পী.), মধুং মংসম্হি (ক.)] ওকিরিং.

১০৭. ‘‘সন্নিপাতং অহং গন্ত্ৰা, একং পত্তং গহেসহং;

পূরযিত্ৰান তং পত্তং, ভিক্খুসঙ্ঘস্সদাসহং.

১০৮. ‘‘যোত্থ থেরতরো ভিক্খু, নিয্যাদেসি মমং তদা;

ইমিনা পত্তপূরেন, লভস্সু ৰিপুলং সুখং.

১০৯. ‘‘দুৰে সম্পত্তিযো ভুত্ৰা, সুক্কমূলেন চোদিতো;

পচ্ছিমে ৰত্তমানম্হি, কিলেসে ঝাপযিস্সতি.

১১০. ‘‘তত্থ চিত্তং পসাদেত্ৰা, তাৰতিংসমগচ্ছহং;

তত্থ ভুত্ৰা পিৰিত্ৰা চ, লভামি ৰিপুলং সুখং.

১১১. ‘‘মণ্ডপে রুক্খমূলে ৰা, পুব্বকম্মং অনুস্সরিং;

অন্নপানাভিৰস্সো মে, অভিৰস্সতি তাৰদে.

১১২. ‘‘ইদং পচ্ছিমকং ময্হং, চরিমো ৰত্ততে ভৰো;

ইধাপি অন্নপানং মে, ৰস্সতে সব্বকালিকং.

১১৩. ‘‘তেনেৰ মধুদানেন [মংসদানেন (সী. পী.)], সন্ধাৰিত্ৰা ভৰে অহং;

সব্বাসৰে পরিঞ্ঞায, ৰিহরামি অনাসৰো.

১১৪. ‘‘একনৰুতিতো কপ্পে, যং দানমদদিং তদা;

দুগ্গতিং নাভিজানামি, মধুদানস্সিদং ফলং.

১১৫. ‘‘কিলেসা ঝাপিতা ময্হং…পে… ৰিহরামি অনাসৰো.

১১৬. ‘‘স্ৰাগতং ৰত মে আসি…পে… কতং বুদ্ধস্স সাসনং.

১১৭. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা মধুমংসদাযকো থেরো ইমা গাথাযো অভাসিত্থাতি.

মধুমংসদাযকত্থেরস্সাপদানং চতুত্থং.