১০. মঞ্চদাযকত্থেরঅপদানং

১৮৪. ‘‘পরিনিব্বুতে কারুণিকে, সিদ্ধত্থে লোকনাযকে;

ৰিত্থারিকে পাৰচনে, দেৰমানুসসক্কতে.

১৮৫. ‘‘চণ্ডালো আসহং তত্থ, আসন্দিপীঠকারকো;

তেন কম্মেন জীৰামি, তেন পোসেমি দারকে.

১৮৬. ‘‘আসন্দিং সুকতং কত্ৰা, পসন্নো সেহি পাণিভি;

সযমেৰুপগন্ত্ৰান, ভিক্খুসঙ্ঘস্সদাসহং.

১৮৭. ‘‘তেন কম্মেন সুকতেন, চেতনাপণিধীহি চ;

জহিত্ৰা মানুসং দেহং, তাৰতিংসমগচ্ছহং.

১৮৮. ‘‘দেৰলোকগতো সন্তো, মোদামি তিদসে গণে;

সযনানি মহগ্ঘানি, নিব্বত্তন্তি যদিচ্ছকং.

১৮৯. ‘‘পঞ্ঞাসক্খত্তুং দেৰিন্দো, দেৰরজ্জমকারযিং;

অসীতিক্খত্তুং রাজা চ, চক্কৰত্তী অহোসহং.

১৯০. ‘‘পদেসরজ্জং ৰিপুলং, গণনাতো অসঙ্খিযং;

সুখিতো যসৰা হোমি, মঞ্চদানস্সিদং ফলং.

১৯১. ‘‘দেৰলোকা চৰিত্ৰান, এমি চে মানুসং ভৰং;

মহারহা সুসযনা, সযমেৰ ভৰন্তি মে.

১৯২. ‘‘অযং পচ্ছিমকো ময্হং, চরিমো ৰত্ততে ভৰো;

অজ্জাপি সযনে কালে [সযনকালে (স্যা.)], সযনং উপতিট্ঠতি.

১৯৩. ‘‘চতুন্নৰুতিতো কপ্পে, যং দানমদদিং তদা;

দুগ্গতিং নাভিজানামি, মঞ্চদানস্সিদং ফলং.

১৯৪. ‘‘কিলেসা ঝাপিতা ময্হং…পে… ৰিহরামি অনাসৰো.

১৯৫. ‘‘স্ৰাগতং ৰত মে আসি…পে… কতং বুদ্ধস্স সাসনং.

১৯৬. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা মঞ্চদাযকো থেরো ইমা গাথাযো

অভাসিত্থাতি.

মঞ্চদাযকত্থেরস্সাপদানং দসমং.

ভদ্দালিৰগ্গো বাচত্তালীসমো.