৮. উত্তিযত্থেরঅপদানং

১৬৯. ‘‘চন্দভাগানদীতীরে, সুসুমারো অহং তদা;

সগোচরপ্পসুতোহং [সভোজনপসুতাহং (স্যা. ক.)], নদীতিত্থং অগচ্ছহং.

১৭০. ‘‘সিদ্ধত্থো তম্হি সমযে, সযম্ভূ অগ্গপুগ্গলো;

নদিং তরিতুকামো সো, নদীতিত্থং উপাগমি.

১৭১. ‘‘উপাগতে চ [উপাগতম্হি (স্যা. ক.)] সম্বুদ্ধে, অহম্পি তত্থুপাগমিং;

উপগন্ত্ৰান সম্বুদ্ধং, ইমং ৰাচং উদীরযিং.

১৭২. ‘‘‘অভিরূহ মহাৰীর, তারেস্সামি অহং তুৰং;

পেত্তিকং ৰিসযং ময্হং, অনুকম্প মহামুনি’.

১৭৩. ‘‘মম উগ্গজ্জনং সুত্ৰা, অভিরূহি মহামুনি;

হট্ঠো হট্ঠেন চিত্তেন, তারেসিং লোকনাযকং.

১৭৪. ‘‘নদিযা পারিমে তীরে, সিদ্ধত্থো লোকনাযকো;

অস্সাসেসি মমং তত্থ, অমতং পাপুণিস্সসি.

১৭৫. ‘‘তম্হা কাযা চৰিত্ৰান, দেৰলোকং আগচ্ছহং;

দিব্বসুখং অনুভৰিং, অচ্ছরাহি পুরক্খতো.

১৭৬. ‘‘সত্তক্খত্তুঞ্চ দেৰিন্দো, দেৰরজ্জমকাসহং;

তীণিক্খত্তুং চক্কৰত্তী, মহিযা ইস্সরো অহুং.

১৭৭. ‘‘ৰিৰেকমনুযুত্তোহং, নিপকো চ সুসংৰুতো;

ধারেমি অন্তিমং দেহং, সম্মাসম্বুদ্ধসাসনে.

১৭৮. ‘‘চতুন্নৰুতিতো কপ্পে, তারেসিং যং নরাসভং;

দুগ্গতিং নাভিজানামি, তরণায ইদং ফলং.

১৭৯. ‘‘পটিসম্ভিদা চতস্সো, ৰিমোক্খাপি চ অট্ঠিমে;

ছল়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা উত্তিযো [উত্তিরিযো (সী.)] থেরো ইমা গাথাযো অভাসিত্থাতি.

উত্তিযত্থেরস্সাপদানং অট্ঠমং.