১. আকাসুক্খিপিযত্থেরঅপদানং

১. ‘‘সুৰণ্ণৰণ্ণং সিদ্ধত্থং, গচ্ছন্তং অন্তরাপণে;

জলজগ্গে দুৰে গয্হ, উপাগচ্ছিং নরাসভং.

২. ‘‘একঞ্চ পুপ্ফং পাদেসু, বুদ্ধসেট্ঠস্স নিক্খিপিং;

একঞ্চ পুপ্ফং পগ্গয্হ, আকাসে উক্খিপিং অহং.

৩. ‘‘চতুন্নৰুতিতো কপ্পে, যং পুপ্ফমভিরোপযিং;

দুগ্গতিং নাভিজানামি, পুপ্ফদানস্সিদং ফলং.

৪. ‘‘ইতো ছত্তিংসকপ্পম্হি, একো আসিং মহীপতি;

অন্তলিক্খকরো নাম, চক্কৰত্তী মহব্বলো.

৫. ‘‘পটিসম্ভিদা চতস্সো, ৰিমোক্খাপি চ অট্ঠিমে;

ছল়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা আকাসুক্খিপিযো থেরো ইমা গাথাযো অভাসিত্থাতি.

আকাসুক্খিপিযত্থেরস্সাপদানং পঠমং.