৯. সালপুপ্ফদাযকত্থেরঅপদানং

৬০. ‘‘মিগরাজা তদা আসিং, অভিজাতো সুকেসরী;

গিরিদুগ্গং গৰেসন্তো, অদ্দসং লোকনাযকং.

৬১. ‘‘অযং নু খো মহাৰীরো, নিব্বাপেতি মহাজনং;

যংনূনাহং উপাসেয্যং, দেৰদেৰং নরাসভং.

৬২. ‘‘সাখং সালস্স ভঞ্জিত্ৰা, সকোসং পুপ্ফমাহরিং;

উপগন্ত্ৰান সম্বুদ্ধং, অদাসিং পুপ্ফমুত্তমং.

৬৩. ‘‘একনৰুতিতো কপ্পে, যং পুপ্ফমভিরোপযিং;

দুগ্গতিং নাভিজানামি, পুপ্ফদানস্সিদং ফলং.

৬৪. ‘‘ইতো চ নৰমে কপ্পে, ৰিরোচনসনামকা;

তযো আসিংসু রাজানো, চক্কৰত্তী মহব্বলা.

৬৫. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা সালপুপ্ফদাযকো থেরো ইমা গাথাযো অভাসিত্থাতি.

সালপুপ্ফদাযকত্থেরস্সাপদানং নৰমং.