৪. পুপ্ফচ্ছদনিযত্থেরঅপদানং

২৬. ‘‘সুনন্দো নাম নামেন, ব্রাহ্মণো মন্তপারগূ;

অজ্ঝাযকো যাচযোগো, ৰাজপেয্যং অযাজযি.

২৭. ‘‘পদুমুত্তরো লোকৰিদূ, অগ্গো কারুণিকো ইসি;

জনতং অনুকম্পন্তো, অম্বরে চঙ্কমী তদা.

২৮. ‘‘চঙ্কমিত্ৰান সম্বুদ্ধো, সব্বঞ্ঞূ লোকনাযকো;

মেত্তায অফরি সত্তে, অপ্পমাণে [অপ্পমাণং (সী. স্যা.)] নিরূপধি.

২৯. ‘‘ৰণ্টে ছেত্ৰান পুপ্ফানি, ব্রাহ্মণো মন্তপারগূ;

সব্বে সিস্সে সমানেত্ৰা, আকাসে উক্খিপাপযি.

৩০. ‘‘যাৰতা নগরং আসি, পুপ্ফানং ছদনং তদা;

বুদ্ধস্স আনুভাৰেন, সত্তাহং ন ৰিগচ্ছথ.

৩১. ‘‘তেনেৰ সুক্কমূলেন, অনুভোত্ৰান সম্পদা;

সব্বাসৰে পরিঞ্ঞায, তিণ্ণো লোকে ৰিসত্তিকং.

৩২. ‘‘একারসে কপ্পসতে, পঞ্চতিংসাসু খত্তিযা;

অম্বরংসসনামা তে, চক্কৰত্তী মহব্বলা.

৩৩. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা পুপ্ফচ্ছদনিযো থেরো ইমা গাথাযো অভাসিত্থাতি.

পুপ্ফচ্ছদনিযত্থেরস্সাপদানং চতুত্থং.