১. সোভিতত্থেরঅপদানং

১. ‘‘পদুমুত্তরো নাম জিনো, লোকজেট্ঠো নরাসভো;

মহতো জনকাযস্স, দেসেতি অমতং পদং.

২. ‘‘তস্সাহং ৰচনং সুত্ৰা, ৰাচাসভিমুদীরিতং [ৰাচাসভিমুদীরযিং (?)];

অঞ্জলিং পগ্গহেত্ৰান, একগ্গো আসহং তদা.

৩. ‘‘যথা সমুদ্দো উদধীনমগ্গো, নেরূ নগানং পৰরো সিলুচ্চযো;

তথেৰ যে চিত্তৰসেন ৰত্তরে, ন বুদ্ধঞাণস্স কলং উপেন্তি তে.

৪. ‘‘ধম্মৰিধিং [ধম্মে ৰিধিং (সী.)] ঠপেত্ৰান, বুদ্ধো কারুণিকো ইসি;

ভিক্খুসঙ্ঘে নিসীদিত্ৰা, ইমা গাথা অভাসথ.

৫. ‘‘‘যো সো ঞাণং পকিত্তেসি, বুদ্ধম্হি লোকনাযকে;

কপ্পানং সতসহস্সং, দুগ্গতিং ন গমিস্সতি.

৬. ‘‘‘কিলেসে ঝাপযিত্ৰান, একগ্গো সুসমাহিতো;

সোভিতো নাম নামেন, হেস্সতি সত্থু সাৰকো’.

৭. ‘‘পঞ্ঞাসে কপ্পসহস্সে, সত্তেৰাসুং যসুগ্গতা [সমুগ্গতা (স্যা.)];

সত্তরতনসম্পন্না, চক্কৰত্তী মহব্বলা.

৮. ‘‘কিলেসা ঝাপিতা ময্হং, ভৰা সব্বে সমূহতা;

তিস্সো ৰিজ্জা অনুপ্পত্তা, কতং বুদ্ধস্স সাসনং.

৯. ‘‘পটিসম্ভিদা চতস্সো, ৰিমোক্খাপি চ অট্ঠিমে;

ছল়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা সোভিতো থেরো ইমা গাথাযো অভাসিত্থাতি.

সোভিতত্থেরস্সাপদানং পঠমং.