৯. বিল়ালিদাযকত্থেরঅপদানং

৫৩. ‘‘হিমৰন্তস্সাৰিদূরে, ৰসামি পণ্ণসন্থরে;

ঘাসেসু গেধমাপন্নো, সেয্যসীলো চহং [সেযসীলোৰহং (স্যা. ক.)] তদা.

৫৪. ‘‘খণন্তালু [খণমালু (স্যা.)] কলম্বানি, বিল়ালিতক্কলানি চ;

কোলং ভল্লাতকং বিল্লং, আহত্ৰা পটিযাদিতং.

৫৫. ‘‘পদুমুত্তরো লোকৰিদূ, আহুতীনং পটিগ্গহো;

মম সঙ্কপ্পমঞ্ঞায, আগচ্ছি মম সন্তিকং.

৫৬. ‘‘উপাগতং মহানাগং, দেৰদেৰং নরাসভং;

বিল়ালিং পগ্গহেত্ৰান, পত্তম্হি ওকিরিং অহং.

৫৭. ‘‘পরিভুঞ্জি মহাৰীরো, তোসযন্তো মমং তদা;

পরিভুঞ্জিত্ৰান সব্বঞ্ঞূ, ইমং গাথং অভাসথ.

৫৮. ‘‘‘সকং চিত্তং পসাদেত্ৰা, বিল়ালিং মে অদা তুৰং;

কপ্পানং সতসহস্সং, দুগ্গতিং নুপপজ্জসি’.

৫৯. ‘‘চরিমং ৰত্ততে ময্হং, ভৰা সব্বে সমূহতা;

ধারেমি অন্তিমং দেহং, সম্মাসম্বুদ্ধসাসনে.

৬০. ‘‘চতুপঞ্ঞাসিতো কপ্পে, সুমেখলিযসৰ্হযো;

সত্তরতনসম্পন্নো, চক্কৰত্তী মহব্বলো.

৬১. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা বিল়ালিদাযকো থেরো ইমা গাথাযো অভাসিত্থাতি.

বিল়ালিদাযকত্থেরস্সাপদানং নৰমং.