১. ভিক্খদাযকত্থেরঅপদানং

১. ‘‘সুৰণ্ণৰণ্ণং সম্বুদ্ধং, আহুতীনং পটিগ্গহং;

পৰরা [পৰনা (স্যা.)] অভিনিক্খন্তং, ৰনা নিব্বনমাগতং [ৰানা নিব্বানমাগতং (স্যা.)].

২. ‘‘কটচ্ছুভিক্খং পাদাসিং, সিদ্ধত্থস্স মহেসিনো;

পঞ্ঞায উপসন্তস্স, মহাৰীরস্স তাদিনো.

৩. ‘‘পদেনানুপদাযন্তং [পদেনানুপদাযন্তো (সী. স্যা.)], নিব্বাপেন্তে মহাজনং;

উল়ারা ৰিত্তি মে জাতা, বুদ্ধে আদিচ্চবন্ধুনে [ৰিত্তি মে পাহুনা তাৰ, বুদ্ধস্সাদিচ্চবন্ধুনো (স্যা.)].

৪. ‘‘চতুন্নৰুতিতো কপ্পে, যং দানমদদিং তদা;

দুগ্গতিং নাভিজানামি, ভিক্খাদানস্সিদং ফলং.

৫. ‘‘সত্তাসীতিম্হিতো কপ্পে, মহারেণু সনামকা;

সত্তরতনসম্পন্না, সত্তেতে চক্কৰত্তিনো.

৬. ‘‘পটিসম্ভিদা চতস্সো, ৰিমোক্খাপি চ অট্ঠিমে;

ছল়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা ভিক্খদাযকো থেরো ইমা গাথাযো অভাসিত্থাতি.

ভিক্খদাযকত্থেরস্সাপদানং পঠমং.