৩-৭. অঞ্ঞাসিকোণ্ডঞ্ঞত্থেরঅপদানং

৫৯৬. ‘‘পদুমুত্তরসম্বুদ্ধং, লোকজেট্ঠং ৰিনাযকং;

বুদ্ধভূমিমনুপ্পত্তং, পঠমং অদ্দসং অহং.

৫৯৭. ‘‘যাৰতা বোধিযা মূলে, যক্খা সব্বে সমাগতা;

সম্বুদ্ধং পরিৰারেত্ৰা, ৰন্দন্তি পঞ্জলীকতা.

৫৯৮. ‘‘সব্বে দেৰা তুট্ঠমনা, আকাসে সঞ্চরন্তি তে;

বুদ্ধো অযং অনুপ্পত্তো, অন্ধকারতমোনুদো.

৫৯৯. ‘‘তেসং হাসপরেতানং, মহানাদো অৰত্তথ;

কিলেসে ঝাপযিস্সাম, সম্মাসম্বুদ্ধসাসনে.

৬০০. ‘‘দেৰানং গিরমঞ্ঞায, ৰাচাসভিমুদীরিহং;

হট্ঠো হট্ঠেন চিত্তেন, আদিভিক্খমদাসহং.

৬০১. ‘‘মম সঙ্কপ্পমঞ্ঞায, সত্থা লোকে অনুত্তরো;

দেৰসঙ্ঘে নিসীদিত্ৰা, ইমা গাথা অভাসথ.

৬০২. ‘‘‘সত্তাহং অভিনিক্খম্ম, বোধিং অজ্ঝগমং অহং;

ইদং মে পঠমং ভত্তং, ব্রহ্মচারিস্স যাপনং.

৬০৩. ‘‘‘তুসিতা হি ইধাগন্ত্ৰা, যো মে ভিক্খং উপানযি;

তমহং কিত্তযিস্সামি, সুণোথ মম ভাসতো.

৬০৪. ‘‘‘তিংসকপ্পসহস্সানি [তিংসমত্তে কপ্পসগস্সে (স্যা. ক.)], দেৰরজ্জং করিস্সতি;

সব্বে দেৰে অভিভোত্ৰা, তিদিৰং আৰসিস্সতি.

৬০৫. ‘‘‘দেৰলোকা চৰিত্ৰান, মনুস্সত্তং গমিস্সতি;

সহস্সধা চক্কৰত্তী, তত্থ রজ্জং করিস্সতি.

৬০৬. ‘‘‘কপ্পসতসহস্সম্হি, ওক্কাককুলসম্ভৰো;

গোতমো নাম গোত্তেন, সত্থা লোকে ভৰিস্সতি.

৬০৭. ‘‘‘তিদসা সো চৰিত্ৰান, মনুস্সত্তং গমিস্সতি;

অগারা পব্বজিত্ৰান, ছব্বস্সানি ৰসিস্সতি.

৬০৮. ‘‘‘ততো সত্তমকে ৰস্সে, বুদ্ধো সচ্চং কথেস্সতি;

কোণ্ডঞ্ঞো নাম নামেন, পঠমং সচ্ছিকাহিতি’.

৬০৯. ‘‘নিক্খন্তেনানুপব্বজিং, পধানং সুকতং মযা;

কিলেসে ঝাপনত্থায, পব্বজিং অনগারিযং.

৬১০. ‘‘অভিগন্ত্ৰান সব্বঞ্ঞূ, বুদ্ধো লোকে সদেৰকে;

ইসিনামে মিগারঞ্ঞে [ইমিনা মে মহারঞ্ঞং (স্যা.), ইমিনা মে মিগারঞ্ঞং (ক.)], অমতভেরিমাহনি.

৬১১. ‘‘সো দানি পত্তো অমতং, সন্তিপদমনুত্তরং;

সব্বাসৰে পরিঞ্ঞায, ৰিহরামি অনাসৰো.

৬১২. ‘‘পটিসম্ভিদা চতস্সো, ৰিমোক্খাপি চ অট্ঠিমে;

ছল়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা অঞ্ঞাসিকোণ্ডঞ্ঞো [অঞ্ঞাতকোণ্ডঞ্ঞো (সী.), অঞ্ঞা কোণ্ডঞ্ঞো (স্যা.)] থেরো ইমা

গাথাযো অভাসিত্থাতি.

অঞ্ঞাসিকোণ্ডঞ্ঞত্থেরস্সাপদানং সত্তমং.