পঠমগাথাসঙ্গণিকং

সত্তনগরেসু পঞ্ঞত্তসিক্খাপদৰণ্ণনা

৩৩৫. একংসং চীৰরং কত্ৰাতি একস্মিং অংসকূটে চীৰরং কত্ৰা; সাধুকং উত্তরাসঙ্গং কত্ৰাতি অত্থো. পগ্গণ্হিত্ৰান অঞ্জলিন্তি দসনখসমোধানসমুজ্জলং অঞ্জলিং উক্খিপিত্ৰা. আসীসমানরূপো ৰাতি পচ্চাসীসমানরূপো ৰিয. কিস্স ত্ৰং ইধ মাগতোতি কেন কারণেন কিমত্থং পত্থযমানো ত্ৰং ইধ আগতো. কো এৰমাহ? সম্মাসম্বুদ্ধো. কং এৰমাহ? আযস্মন্তং উপালিং. ইতি আযস্মা উপালি ভগৰন্তং উপসঙ্কমিত্ৰা ‘‘দ্ৰীসু ৰিনযেসূ’’তি ইমং গাথং পুচ্ছি. অথস্স ভগৰা ‘‘ভদ্দকো তে উম্মঙ্গো’’তিআদীনি ৰত্ৰা তং ৰিস্সজ্জেসি. এস নযো সব্বত্থ. ইতি ইমে সব্বপঞ্হে বুদ্ধকালে উপালিত্থেরো পুচ্ছি. ভগৰা ব্যাকাসি. সঙ্গীতিকালে পন মহাকস্সপত্থেরো পুচ্ছি. উপালিত্থেরো ব্যাকাসি.

তত্থ ভদ্দকো তে উম্মঙ্গোতি ভদ্দকা তে পঞ্হা; পঞ্হা হি অৰিজ্জন্ধকারতো উম্মুজ্জিত্ৰা ঠিতত্তা ‘‘উম্মঙ্গো’’তি ৰুচ্চতি. তগ্ঘাতি কারণত্থে নিপাতো. যস্মা মং পুচ্ছসি, তস্মা তে অহমক্খিস্সন্তি অত্থো. সম্পটিচ্ছনত্থে ৰা, ‘‘তগ্ঘা’’তি হি ইমিনা ৰচনং সম্পটিচ্ছিত্ৰা অক্খিস্সন্তি আহ. ‘‘সমাদহিত্ৰা ৰিসিব্বেন্তি, সামিসেন, সসিত্থক’’ন্তি ইমানি তীণিযেৰ সিক্খাপদানি ভগ্গেসু পঞ্ঞত্তানি.

চতুৰিপত্তিৰণ্ণনা

৩৩৬. যং তং পুচ্ছিম্হাতি যং ত্ৰং অপুচ্ছিম্হা. অকিত্তযীতি অভাসি. নোতি অম্হাকং. তং তং ব্যাকতন্তি যং যং পুট্ঠং, তং তদেৰ ব্যাকতং. অনঞ্ঞথাতি অঞ্ঞথা অকত্ৰা ব্যাকতং.

যে দুট্ঠুল্লা সা সীলৰিপত্তীতি এত্থ কিঞ্চাপি সীলৰিপত্তি নাম পঞ্হে নত্থি, অথ খো দুট্ঠুল্লং ৰিস্সজ্জেতুকামতাযেতং ৰুত্তং. চতূসু হি ৰিপত্তীসু দুট্ঠুল্লং একায ৰিপত্তিযা সঙ্গহিতং, অদুট্ঠুল্লং তীহি ৰিপত্তীহি সঙ্গহিতং. তস্মা ‘‘যে দুট্ঠুল্লা সা সীলৰিপত্তী’’তি ৰত্ৰা তমেৰ ৰিত্থারতো দস্সেতুং ‘‘পারাজিকং সঙ্ঘাদিসেসো সীলৰিপত্তীতি ৰুচ্চতী’’তি আহ.

ইদানি তিস্সন্নং ৰিপত্তীনং ৰসেন অদুট্ঠুল্লং দস্সেতুং ‘‘থুল্লচ্চয’’ন্তিআদিমাহ. তত্থ যো চাযং, অক্কোসতি হসাধিপ্পাযোতি ইদং দুব্ভাসিতস্স ৰত্থুদস্সনত্থং ৰুত্তং.

অব্ভাচিক্খন্তীতি ‘‘তথাহং ভগৰতা ধম্মং দেসিতং আজানামী’’তি ৰদন্তা অব্ভাচিক্খন্তি.

অযং সা আজীৰৰিপত্তিসম্মতাতি অযং ছহি সিক্খাপদেহি সঙ্গহিতা আজীৰৰিপত্তি নাম চতুত্থা ৰিপত্তি সম্মতাতি এত্তাৰতা ‘‘অদুট্ঠুল্ল’’ন্তি ইদং ৰিস্সজ্জিতং হোতি.

ইদানি ‘‘যে চ যাৰততিযকা’’তি পঞ্হং ৰিস্সজ্জেতুং ‘‘একাদসা’’তিআদিমাহ.

ছেদনকাদিৰণ্ণনা

৩৩৭. যস্মা পন ‘‘যে চ যাৰততিযকা’’তি অযং পঞ্হো ‘‘একাদস যাৰততিযকা’’তি এৰং সঙ্খাৰসেন ৰিস্সজ্জিতো, তস্মা সঙ্খানুসন্ধিৰসেনেৰ ‘‘কতি ছেদনকানী’’তিআদিকে অঞ্ঞে অন্তরাপঞ্হে পুচ্ছি. তেসং ৰিস্সজ্জনত্থং ‘‘ছ ছেদনকানী’’তিআদি ৰুত্তং. তত্থ ‘‘একং ভেদনকং, একং উদ্দালনকং, সোদস জানন্তি পঞ্ঞত্তা’’তি ইদমেৰ অপুব্বং. সেসং মহাৰগ্গে ৰিভত্তমেৰ. যং পনেতং অপুব্বং তত্থ একং ভেদনকন্তি সূচিঘরং. একং উদ্দালনকন্তি তূলোনদ্ধমঞ্চপীঠং. সোদসাতি সোল়স. জানন্তি পঞ্ঞত্তাতি ‘‘জান’’ন্তি এৰং ৰত্ৰা পঞ্ঞত্তা, তে এৰং ৰেদিতব্বা – ‘‘জানং সঙ্ঘিকং লাভং পরিণতং অত্তনো পরিণামেয্য, জানং পুব্বুপগতং ভিক্খুং অনুপখজ্জ নিসজ্জং কপ্পেয্য, জানং সপ্পাণকং উদকং তিণং ৰা মত্তিকং ৰা সিঞ্চেয্য ৰা সিঞ্চাপেয্য ৰা, জানং ভিক্খুনিপরিপাচিতং পিণ্ডপাতং ভুঞ্জেয্য, জানং আসাদনাপেক্খো ভুত্তস্মিং পাচিত্তিযং, জানং সপ্পাণকং উদকং পরিভুঞ্জেয্য, জানং যথাধম্মং নিহতাধিকরণং, জানং দুট্ঠুল্লং আপত্তিং পটিচ্ছাদেয্য, জানং ঊনৰীসতিৰস্সং পুগ্গলং উপসম্পাদেয্য, জানং থেয্যসত্থেন সদ্ধিং, জানং তথাৰাদিনা ভিক্খুনা অকতানুধম্মেন, জানং তথানাসিতং সমণুদ্দেসং, জানং সঙ্ঘিকং লাভং পরিণতং পুগ্গলস্স পরিণামেয্য, জানং পারাজিকং ধম্মং অজ্ঝাপন্নং ভিক্খুনিং নেৰ অত্তনা পটিচোদেয্য, জানং চোরিং ৰজ্ঝং ৰিদিতং অনপলোকেত্ৰা, জানং সভিক্খুকং আরামং অনাপুচ্ছা পৰিসেয্যা’’তি.

অসাধারণাদিৰণ্ণনা

৩৩৮. ইদানি ‘‘সাধারণং অসাধারণ’’ন্তি ইমং পুরিমপঞ্হং ৰিস্সজ্জেন্তো ‘‘ৰীসং দ্ৰে সতানী’’তিআদিমাহ. তত্থ ভিক্খুনীহি অসাধারণেসু ছ সঙ্ঘাদিসেসাতি ৰিস্সট্ঠি, কাযসংসগ্গো, দুট্ঠুল্লং, অত্তকাম, কুটি, ৰিহারোতি. দ্ৰে অনিযতেহি অট্ঠাতি দ্ৰীহি অনিযতেহি সদ্ধিং অট্ঠ ইমে.

নিস্সগ্গিযানি দ্ৰাদসাতি –

ধোৰনঞ্চ পটিগ্গহো, কোসেয্যসুদ্ধদ্ৰেভাগা;

ছব্বস্সানি নিসীদনং, দ্ৰে লোমা পঠমো পত্তো;

ৰস্সিকা আরঞ্ঞকেন চাতি – ইমে দ্ৰাদস.

দ্ৰেৰীসতি খুদ্দকাতি –

সকলো ভিক্খুনীৰগ্গো, পরম্পরঞ্চ ভোজনং;

অনতিরিত্তং অভিহটং, পণীতঞ্চ অচেলকং;

ঊনং দুট্ঠুল্লছাদনং.

মাতুগামেন সদ্ধিঞ্চ, যা চ অনিক্খন্তরাজকে;

সন্তং ভিক্খুং অনাপুচ্ছা, ৰিকালে গামপ্পৰেসনা.

নিসীদনে চ যা সিক্খা, ৰস্সিকা যা চ সাটিকা;

দ্ৰাৰীসতি ইমা সিক্খা, খুদ্দকেসু পকাসিতাতি.

ভিক্খূহি অসাধারণেসুপি সঙ্ঘম্হা দস নিস্সরেতি ‘‘সঙ্ঘম্হা নিস্সারীযতী’’তি এৰং ৰিভঙ্গে ৰুত্তা, মাতিকাযং পন ‘‘নিস্সারণীযং সঙ্ঘাদিসেস’’ন্তি এৰং আগতা দস. নিস্সগ্গিযানি দ্ৰাদসাতি ভিক্খুনিৰিভঙ্গে ৰিভত্তানি নিস্সগ্গিযানেৰ. খুদ্দকাপি তত্থ ৰিভত্তখুদ্দকা এৰ. তথা চত্তারো পাটিদেসনীযা, ইতি সতঞ্চেৰ তিংসঞ্চ সিক্খা ৰিভঙ্গে ভিক্খুনীনং ভিক্খূহি অসাধারণা. সেসং ইমস্মিং সাধারণাসাধারণৰিস্সজ্জনে উত্তানমেৰ.

ইদানি ৰিপত্তিযো চ ‘‘যেহি সমথেহি সম্মন্তী’’তি ইদং পঞ্হং ৰিস্সজ্জেন্তো অট্ঠেৰ পারাজিকাতিআদিমাহ. তত্থ দুরাসদাতি ইমিনা তেসং সপ্পটিভযতং দস্সেতি. কণ্হসপ্পাদযো ৰিয হি এতে দুরাসদা দুরূপগমনা দুরাসজ্জনা, আপজ্জিযমানা মূলচ্ছেদায সংৰত্তন্তি. তালৰত্থুসমূপমাতি সব্বং তালং উদ্ধরিত্ৰা তালস্স ৰত্থুমত্তকরণেন সমূপমা. যথা ৰত্থুমত্তকতো তালো ন পুন পাকতিকো হোতি, এৰং ন পুন পাকতিকা হোন্তি.

এৰং সাধারণং উপমং দস্সেত্ৰা পুন একেকস্স ৰুত্তং উপমং দস্সেন্তো পণ্ডুপলাসোতিআদিমাহ. অৰিরুল়্হী ভৰন্তি তেতি যথা এতে পণ্ডুপলাসাদযো পুনহরিতাদিভাৰেন অৰিরুল়্হিধম্মা হোন্তি; এৰং পারাজিকাপি পুন পকতিসীলাভাৰেন অৰিরুল়্হিধম্মা হোন্তীতি অত্থো. এত্তাৰতা ‘‘ৰিপত্তিযো চ যেহি সমথেহি সম্মন্তী’’তি এত্থ ইমা তাৰ অট্ঠ পারাজিকৰিপত্তিযো কেহিচি সমথেহি ন সম্মন্তীতি এৰং দস্সিতং হোতি. যা পন ৰিপত্তিযো সম্মন্তি, তা দস্সেতুং তেৰীসতি সঙ্ঘাদিসেসাতিআদি ৰুত্তং. তত্থ তীহি সমথেহীতি সব্বসঙ্গাহিকৰচনমেতং. সঙ্ঘাদিসেসা হি দ্ৰীহি সমথেহি সম্মন্তি, ন তিণৰত্থারকেন. সেসা তীহিপি সম্মন্তি.

দ্ৰে উপোসথা দ্ৰে পৰারণাতি ইদং ভিক্খূনঞ্চ ভিক্খুনীনঞ্চ ৰসেন ৰুত্তং. ৰিভত্তিমত্তদস্সনেনেৰ চেতং ৰুত্তং, ন সমথেহি ৰূপসমনৰসেন. ভিক্খুউপোসথো, ভিক্খুনিউপোসথো, ভিক্খুপৰারণা, ভিক্খুনিপৰারণাতি ইমাপি হি চতস্সো ৰিভত্তিযো; ৰিভজনানীতি অত্থো. চত্তারি কম্মানীতি অধম্মেনৰগ্গাদীনি উপোসথকম্মানি. পঞ্চেৰ উদ্দেসা চতুরো ভৰন্তি অনঞ্ঞথাতি ভিক্খূনং পঞ্চ উদ্দেসা ভিক্খুনীনং চতুরো ভৰন্তি, অঞ্ঞথা ন ভৰন্তি; ইমা অপরাপি ৰিভত্তিযো. আপত্তিক্খন্ধা চ ভৰন্তি সত্ত, অধিকরণানি চত্তারীতি ইমা পন ৰিভত্তিযো সমথেহি সম্মন্তি, তস্মা সত্তহি সমথেহীতিআদিমাহ. অথ ৰা ‘‘দ্ৰে উপোসথা দ্ৰে পৰারণা চত্তারি কম্মানি পঞ্চেৰ উদ্দেসা চতুরো ভৰন্তি, অনঞ্ঞথা’’তি ইমাপি চতস্সো ৰিভত্তিযো নিস্সায ‘‘নস্সন্তেতে ৰিনস্সন্তেতে’’তিআদিনা নযেন যা আপত্তিযো আপজ্জন্তি, তা যস্মা ৰুত্তপ্পকারেহেৰ সমথেহি সম্মন্তি, তস্মা তংমূলকানং আপত্তীনং সমথদস্সনত্থম্পি তা ৰিভত্তিযো ৰুত্তাতি ৰেদিতব্বা. কিচ্চং একেনাতি কিচ্চাধিকরণং একেন সমথেন সম্মতি.

পারাজিকাদিআপত্তিৰণ্ণনা

৩৩৯. এৰং পুচ্ছানুক্কমেন সব্বপঞ্হে ৰিস্সজ্জেত্ৰা ইদানি ‘‘আপত্তিক্খন্ধা চ ভৰন্তি সত্তা’’তি এত্থ সঙ্গহিতআপত্তিক্খন্ধানং পচ্চেকং নিব্বচনমত্তং দস্সেন্তো পারাজিকন্তিআদিমাহ. তত্থ পারাজিকন্তি গাথায অযমত্থো – যদিদং পুগ্গলাপত্তিসিক্খাপদপারাজিকেসু আপত্তিপারাজিকং নাম ৰুত্তং, তং আপজ্জন্তো পুগ্গলো যস্মা পরাজিতো পরাজযমাপন্নো সদ্ধম্মা চুতো পরদ্ধো ভট্ঠো নিরঙ্কতো চ হোতি, অনিহতে তস্মিং পুগ্গলে পুন উপোসথপ্পৰারণাদিভেদো সংৰাসো নত্থি. তেনেতং ইতি ৰুচ্চতীতি তেন কারণেন এতং আপত্তিপারাজিকন্তি ৰুচ্চতি. অযঞ্হেত্থ সঙ্খেপত্থো – যস্মা পরাজিতো হোতি তেন, তস্মা এতং পারাজিকন্তি ৰুচ্চতি.

দুতিযগাথাযপি ব্যঞ্জনং অনাদিযিত্ৰা অত্থমত্তমেৰ দস্সেতুং সঙ্ঘোৰ দেতি পরিৰাসন্তিআদি ৰুত্তং. অযং পনেত্থ অত্থো – ইমং আপত্তিং আপজ্জিত্ৰা ৰুট্ঠাতুকামস্স যং তং আপত্তিৰুট্ঠানং তস্স আদিম্হি চেৰ পরিৰাসদানত্থায আদিতো সেসে মজ্ঝে মানত্তদানত্থায মূলাযপটিকস্সনেন ৰা সহ মানত্তদানত্থায, অৰসানে অব্ভানত্থায চ সঙ্ঘো ইচ্ছিতব্বো, ন হেত্থ একম্পি কম্মং ৰিনা সঙ্ঘেন সক্কা কাতুন্তি সঙ্ঘো, আদিম্হি চেৰ সেসে চ ইচ্ছিতব্বো অস্সাতি সঙ্ঘাদিসেসো.

ততিযগাথায অনিযতো ন নিযতোতি যস্মা ন নিযতো, তস্মা অনিযতো অযমাপত্তিক্খন্ধোতি অত্থো. কিং কারণা ন নিযতোতি? অনেকংসিকতং পদং, যস্মা ইদং সিক্খাপদং অনেকংসেন কতন্তি অত্থো. কথং অনেকংসেন? তিণ্ণমঞ্ঞতরং ঠানং, তিণ্ণং ধম্মানং অঞ্ঞতরেন কারেতব্বোতি হি তত্থ ৰুত্তং, তস্মা ‘‘অনিযতো’’তি পৰুচ্চতি, সো আপত্তিক্খন্ধো অনিযতোতি ৰুচ্চতি. যথা চ তিণ্ণং অঞ্ঞতরং ঠানং, এৰং দ্ৰিন্নং ধম্মানং অঞ্ঞতরং ঠানং যত্থ ৰুত্তং, সোপি অনিযতো এৰ.

চতুত্থগাথায অচ্চযো তেন সমো নত্থীতি দেসনাগামিনীসু অচ্চযেসু তেন সমো থূলো অচ্চযো নত্থি, তেনেতং ইতি ৰুচ্চতি; থূলত্তা অচ্চযস্স এতং থুল্লচ্চযন্তি ৰুচ্চতীতি অত্থো.

পঞ্চমগাথায নিস্সজ্জিত্ৰান দেসেতি তেনেতন্তি নিস্সজ্জিত্ৰা দেসেতব্বতো নিস্সগ্গিযন্তি ৰুচ্চতীতি অত্থো.

ছট্ঠগাথায পাতেতি কুসলং ধম্মন্তি সঞ্চিচ্চ আপজ্জন্তস্স কুসলধম্মসঙ্খাতং কুসলচিত্তং পাতেতি, তস্মা পাতেতি চিত্তন্তি পাচিত্তিযং. যং পন চিত্তং পাতেতি, তং যস্মা অরিযমগ্গং অপরজ্ঝতি, চিত্তসম্মোহকারণঞ্চ হোতি, তস্মা ‘‘অরিযমগ্গং অপরজ্ঝতি, চিত্তসম্মোহনট্ঠান’’ন্তি চ ৰুত্তং.

পাটিদেসনীযগাথাসু ‘‘গারয্হং আৰুসো ধম্মং আপজ্জি’’ন্তি ৰুত্তগারয্হভাৰকারণদস্সনত্থমেৰ ভিক্খু অঞ্ঞাতকো সন্তোতিআদি ৰুত্তং. পটিদেসেতব্বতো পন সা আপত্তি পাটিদেসনীযাতি ৰুচ্চতি.

দুক্কটগাথায অপরদ্ধং ৰিরদ্ধঞ্চ খলিতন্তি সব্বমেতং ‘‘যঞ্চ দুক্কট’’ন্তি এত্থ ৰুত্তস্স দুক্কটস্স পরিযাযৰচনং. যঞ্হি দুট্ঠু কতং ৰিরূপং ৰা কতং, তং দুক্কটং. তং পনেতং যথা সত্থারা ৰুত্তং; এৰং অকতত্তা অপরদ্ধং, কুসলং ৰিরজ্ঝিত্ৰা পৰত্তত্তা ৰিরদ্ধং, অরিযৰত্তপটিপদং অনারুল়্হত্তা খলিতং. যং মনুস্সো করেতি ইদং পনস্স ওপম্মনিদস্সনং. তস্সত্থো – যথা হি যং লোকে মনুস্সো আৰি ৰা যদি ৰা রহো পাপং করোতি, তং দুক্কটন্তি পৰেদেন্তি; এৰমিদম্পি বুদ্ধপ্পটিকুট্ঠেন লামকভাৰেন পাপং, তস্মা দুক্কটন্তি ৰেদিতব্বং.

দুব্ভাসিতগাথায দুব্ভাসিতং দুরাভট্ঠন্তি দুট্ঠু আভট্ঠং ভাসিতং লপিতন্তি দুরাভট্ঠং. যং দুরাভট্ঠং, তং দুব্ভাসিতন্তি অত্থো. কিঞ্চ ভিয্যো? সংকিলিট্ঠঞ্চ যং পদং, সংকিলিট্ঠং যস্মা তং পদং হোতীতি অত্থো. তথা যঞ্চ ৰিঞ্ঞূ গরহন্তি, যস্মা চ নং ৰিঞ্ঞূ গরহন্তীতি অত্থো. তেনেতং ইতি ৰুচ্চতীতি তেন সংকিলিট্ঠভাৰেন চ ৰিঞ্ঞুগরহনেনাপি চ এতং ইতি ৰুচ্চতি; ‘‘দুব্ভাসিত’’ন্তি এৰং ৰুচ্চতীতি অত্থো.

সেখিযগাথায ‘‘আদি চেতং চরণঞ্চা’’তিআদিনা নযেন সেখস্স সন্তকভাৰং দীপেতি. তস্মা সেখস্স ইদং সেখিযন্তি অযমেত্থ সঙ্খেপত্থো. ইদং ‘‘গরুকলহুকঞ্চাপী’’তিআদিপঞ্হেহি অসঙ্গহিতস্স ‘‘হন্দ ৰাক্যং সুণোম তে’’তি ইমিনা পন আযাচনৰচনেন সঙ্গহিতস্স অত্থস্স দীপনত্থং ৰুত্তন্তি ৰেদিতব্বং.

ছন্নমতিৰস্সতীতিআদিম্হিপি এসেৰ নযো. তত্থ ছন্নমতিৰস্সতীতি গেহং তাৰ তিণাদীহি অচ্ছন্নং অতিৰস্সতি. ইদং পন আপত্তিসঙ্খাতং গেহং ছন্নং অতিৰস্সতি; মূলাপত্তিঞ্হি ছাদেন্তো অঞ্ঞং নৰং আপত্তিং আপজ্জতি. ৰিৰটং নাতিৰস্সতীতি গেহং তাৰ অৰিৰটং সুচ্ছন্নং নাতিৰস্সতি. ইদং পন আপত্তিসঙ্খাতং গেহং ৰিৰটং নাতিৰস্সতি; মূলাপত্তিঞ্হি ৰিৰরন্তো দেসনাগামিনিং দেসেত্ৰা ৰুট্ঠানগামিনিতো ৰুট্ঠহিত্ৰা সুদ্ধন্তে পতিট্ঠাতি. আযতিং সংৰরন্তো অঞ্ঞং আপত্তিং নাপজ্জতি. তস্মা ছন্নং ৰিৰরেথাতি তেন কারণেন দেসনাগামিনিং দেসেন্তো ৰুট্ঠানগামিনিতো চ ৰুট্ঠহন্তো ছন্নং ৰিৰরেথ. এৰং তং নাতিৰস্সতীতি এৰঞ্চেতং ৰিৰটং নাতিৰস্সতীতি অত্থো.

গতি মিগানং পৰনন্তি অজ্ঝোকাসে ব্যগ্ঘাদীহি পরিপাতিযমানানং মিগানং পৰনং রুক্খাদিগহনং অরঞ্ঞং গতি পটিসরণং হোতি, তং পত্ৰা তে অস্সাসন্তি. এতেনেৰ নযেন আকাসো পক্খীনং গতি. অৰস্সং উপগমনট্ঠেন পন ৰিভৰো গতি ধম্মানং, সব্বেসম্পি সঙ্খতধম্মানং ৰিনাসোৰ তেসং গতি. ন হি তে ৰিনাসং অগচ্ছন্তা ঠাতুং সক্কোন্তি. সুচিরম্পি ঠত্ৰা পন নিব্বানং অরহতো গতি, খীণাসৰস্স অরহতো অনুপাদিসেসনিব্বানধাতু একংসেন গতীতি অত্থো.

পঠমগাথাসঙ্গণিকৰণ্ণনা নিট্ঠিতা.