উপোসথাদিপুচ্ছাৰিস্সজ্জনা

৩৩২. ‘‘উপোসথকম্মস্স কো আদী’’তিআদীনং পুচ্ছানং ৰিস্সজ্জনে সামগ্গী আদীতি ‘‘উপোসথং করিস্সামা’’তি সীমং সোধেত্ৰা ছন্দপারিসুদ্ধিং আহরিত্ৰা সন্নিপতিতানং কাযসামগ্গী আদি. কিরিযা মজ্ঝেতি পুব্বকিচ্চং কত্ৰা পাতিমোক্খওসারণকিরিযা মজ্ঝে. নিট্ঠানং পরিযোসানন্তি ‘‘তত্থ সব্বেহেৰ সমগ্গেহি সম্মোদমানেহি অৰিৰদমানেহি সিক্খিতব্ব’’ন্তি ইদং পাতিমোক্খনিট্ঠানং পরিযোসানং. পৰারণাকম্মস্স সামগ্গী আদীতি ‘‘পৰারণং করিস্সামা’’তি সীমং সোধেত্ৰা ছন্দপৰারণং আহরিত্ৰা সন্নিপতিতানং কাযসামগ্গী আদি. কিরিযা মজ্ঝেতি পৰারণাঞত্তি চ পৰারণাকথা চ মজ্ঝে, সঙ্ঘনৰকস্স ‘‘পস্সন্তো পটিকরিস্সামী’’তি ৰচনং পরিযোসানং. তজ্জনীযকম্মাদীসু ৰত্থু নাম যেন ৰত্থুনা কম্মারহো হোতি, তং ৰত্থু. পুগ্গলোতি যেন তং ৰত্থু কতং, সো পুগ্গলো. কম্মৰাচা পরিযোসানন্তি ‘‘কতং সঙ্ঘেন ইত্থন্নামস্স ভিক্খুনো তজ্জনীযকম্মং, খমতি সঙ্ঘস্স, তস্মা তুণ্হী, এৰমেতং ধারযামী’’তি এৰং তস্সা তস্সা কম্মৰাচায অৰসানৰচনং পরিযোসানং. সেসং সব্বত্থ উত্তানমেৰাতি

উপোসথাদিপুচ্ছাৰিস্সজ্জনাৰণ্ণনা নিট্ঠিতা.

অত্থৰসপকরণাৰণ্ণনা

৩৩৪. অত্থৰসপকরণে – দস অত্থৰসেতিআদীসু যং ৰত্তব্বং তং পঠমপারাজিকৰণ্ণনাযমেৰ ৰুত্তং. যং সঙ্ঘসুট্ঠু তং সঙ্ঘফাসূতিআদীসু উপরিমং উপরিমং পদং হেট্ঠিমস্স হেট্ঠিমস্স পদস্স অত্থো.

অত্থসতং ধম্মসতন্তিআদিম্হি পন যদেতং দসসু পদেসু একেকং মূলং কত্ৰা দসক্খত্তুং যোজনায পদসতং ৰুত্তং. তত্থ পচ্ছিমস্স পচ্ছিমস্স পদস্স ৰসেন অত্থসতং পুরিমস্স পুরিমস্স ৰসেন ধম্মসতং ৰেদিতব্বং. অথ ৰা যে দস অত্থৰসে পটিচ্চ তথাগতেন সাৰকানং সিক্খাপদং পঞ্ঞত্তং, যে পুব্বে পঠমপারাজিকৰণ্ণনাযং ‘‘তত্থ সঙ্ঘসুট্ঠুতা নাম সঙ্ঘস্স সুট্ঠুভাৰো ‘সুট্ঠু দেৰা’তি আগতট্ঠানে ৰিয ‘সুট্ঠু ভন্তে’তি ৰচনসম্পটিচ্ছনভাৰো, যো চ তথাগতস্স ৰচনং সম্পটিচ্ছতি, তস্স তং দীঘরত্তং হিতায সুখায হোতি, তস্মা সঙ্ঘস্স ‘সুট্ঠু ভন্তে’তি মম ৰচনসম্পটিচ্ছনত্থং পঞ্ঞপেস্সামি অসম্পটিচ্ছনে আদীনৰং সম্পটিচ্ছনে চ আনিসংসং দস্সেত্ৰা ন বলক্কারেন অভিভৰিত্ৰাতি এতমত্থং আৰিকরোন্তো আহ – সঙ্ঘসুট্ঠুতাযা’’তি এৰমাদিনা নযেন ৰণ্ণিতা, তেসং ইধ দসক্খত্তুং আগতত্তা অত্থসতং তদত্থজোতকানঞ্চ পদানং ৰসেন ধম্মসতং ৰেদিতব্বং. ইদানি অত্থজোতকানং নিরুত্তীনং ৰসেন নিরুত্তিসতং, ধম্মভূতানং নিরুত্তীনং ৰসেন নিরুত্তিসতন্তি দ্ৰে নিরুত্তিসতানি, অত্থসতে ঞাণসতং, ধম্মসতে ঞাণসতং, দ্ৰীসু নিরুত্তিসতেসু দ্ৰে ঞাণসতানীতি চত্তারি ঞাণসতানি চ ৰেদিতব্বানি.

‘‘অত্থসতং ধম্মসতং, দ্ৰে নিরুত্তিসতানি;

চত্তারি ঞাণসতানি, অত্থৰসে পকরণে’’তি.

ইতি হি যং ৰুত্তং, ইদমেতং পটিচ্চ ৰুত্তন্তি.

ইতি সমন্তপাসাদিকায ৰিনযসংৰণ্ণনায

মহাৰগ্গৰণ্ণনা নিট্ঠিতা.