খন্ধকপুচ্ছাৰারো

পুচ্ছাৰিস্সজ্জনাৰণ্ণনা

৩২০. উপসম্পদং পুচ্ছিস্সন্তি উপসম্পদক্খন্ধকং পুচ্ছিস্সং. সনিদানং সনিদ্দেসন্তি নিদানেন চ নিদ্দেসেন চ সদ্ধিং পুচ্ছিস্সামি. সমুক্কট্ঠপদানং কতি আপত্তিযোতি যানি তত্থ সমুক্কট্ঠানি উত্তমানি পদানি ৰুত্তানি, তেসং সমুক্কট্ঠপদানং উত্তমপদানং সঙ্খেপতো কতি আপত্তিযো হোন্তীতি. যেন যেন হি পদেন যা যা আপত্তি পঞ্ঞত্তা, সা সা তস্স তস্স পদস্স আপত্তীতি ৰুচ্চতি. তেন ৰুত্তং ‘‘সমুক্কট্ঠপদানং কতি আপত্তিযো’’তি. দ্ৰে আপত্তিযোতি ঊনৰীসতিৰস্সং উপসম্পাদেন্তস্স পাচিত্তিযং, সেসেসু সব্বপদেসু দুক্কটং.

তিস্সোতি ‘‘নস্সন্তেতে ৰিনস্সন্তেতে, কো তেহি অত্থো’’তি ভেদপুরেক্খারানং উপোসথকরণে থুল্লচ্চযং, উক্খিত্তকেন সদ্ধিং উপোসথকরণে পাচিত্তিযং, সেসেসু দুক্কটন্তি এৰং উপোসথক্খন্ধকে তিস্সো আপত্তিযো. একাতি ৰস্সূপনাযিকক্খন্ধকে একা দুক্কটাপত্তিযেৰ.

তিস্সোতি ভেদপুরেক্খারস্স পৰারযতো থুল্লচ্চযং, উক্খিত্তকেন সদ্ধিং পাচিত্তিযং, সেসেসু দুক্কটন্তি এৰং পৰারণাক্খন্ধকেপি তিস্সো আপত্তিযো.

তিস্সোতি ৰচ্ছতরিং উগ্গহেত্ৰা মারেন্তানং পাচিত্তিযং, রত্তেন চিত্তেন অঙ্গজাতছুপনে থুল্লচ্চযং, সেসেসু দুক্কটন্তি এৰং চম্মসংযুত্তেপি তিস্সো আপত্তিযো. ভেসজ্জক্খন্ধকেপি সমন্তা দ্ৰঙ্গুলে থুল্লচ্চযং, ভোজ্জযাগুযা পাচিত্তিযং, সেসেসু দুক্কটন্তি এৰং তিস্সো আপত্তিযো.

কথিনং কেৰলং পঞ্ঞত্তিমেৰ, নত্থি তত্থ আপত্তি. চীৰরসংযুত্তে কুসচীরৰাকচীরেসু থুল্লচ্চযং, অতিরেকচীৰরে নিস্সগ্গিযং, সেসেসু দুক্কটন্তি ইমা তিস্সো আপত্তিযো.

চম্পেয্যকে একা দুক্কটাপত্তিযেৰ. কোসম্বক-কম্মক্খন্ধক-পারিৰাসিকসমুচ্চযক্খন্ধকেসুপি একা দুক্কটাপত্তিযেৰ.

সমথক্খন্ধকে ছন্দদাযকো খিয্যতি, খিয্যনকং পাচিত্তিযং, সেসেসু দুক্কটন্তি ইমা দ্ৰে আপত্তিযো. খুদ্দকৰত্থুকে অত্তনো অঙ্গজাতং ছিন্দতি, থুল্লচ্চযং, রোমট্ঠে পাচিত্তিযং, সেসেসু দুক্কটন্তি ইমা তিস্সো আপত্তিযো. সেনাসনক্খন্ধকে গরুভণ্ডৰিস্সজ্জনে থুল্লচ্চযং, সঙ্ঘিকা ৰিহারা নিক্কড্ঢনে পাচিত্তিযং, সেসেসু দুক্কটন্তি ইমা তিস্সো আপত্তিযো.

সঙ্ঘভেদেভেদকানুৰত্তকানং থুল্লচ্চযং, গণভোজনে পাচিত্তিযন্তি ইমা দ্ৰে আপত্তিযো. সমাচারং পুচ্ছিস্সন্তি ৰুত্তে ৰত্তক্খন্ধকে একা দুক্কটাপত্তিযেৰ. সা সব্বৰত্তেসু অনাদরিযেন হোতি. তথা পাতিমোক্খট্ঠপনে. ভিক্খুনিক্খন্ধকে অপ্পৰারণায পাচিত্তিযং, সেসেসু দুক্কটন্তি দ্ৰে আপত্তিযো. পঞ্চসতিকসত্তসতিকেসু কেৰলং ধম্মো সঙ্গহং আরোপিতো, নত্থি তত্থ আপত্তীতি.

খন্ধকপুচ্ছাৰারৰণ্ণনা নিট্ঠিতা.