অন্তরপেয্যালং

কতিপুচ্ছাৰারৰণ্ণনা

২৭১. ইদানি আপত্তিআদিকোট্ঠাসেসু কোসল্লজননত্থং ‘‘কতি আপত্তিযো’’তিআদিনা নযেন মাতিকং ঠপেত্ৰা নিদ্দেসপ্পটিনিদ্দেসৰসেন ৰিভঙ্গো ৰুত্তো.

তত্থ কতি আপত্তিযোতি মাতিকায চ ৰিভঙ্গে চ আগতাপত্তিপুচ্ছা. এস নযো দুতিযপদেপি. কেৰলঞ্হেত্থ আপত্তিযো এৰ রাসিৰসেন খন্ধাতি ৰুত্তা. ৰিনীতৰত্থূনীতি তাসং আপত্তীনং ৰিনযপুচ্ছা; ‘‘ৰিনীতং ৰিনযো ৰূপসমো’’তি ইদঞ্হি অত্থতো একং, ৰিনীতানিযেৰ ৰিনীতৰত্থূনীতি অযমেত্থ পদত্থো. ইদানি যেসু সতি আপত্তিযো হোন্তি, অসতি ন হোন্তি, তে দস্সেতুং ‘‘কতি অগারৰা’’তি পুচ্ছাদ্ৰযং. ৰিনীতৰত্থূনীতি অযং পন তেসং অগারৰানং ৰিনযপুচ্ছা. যস্মা পন তা আপত্তিযো ৰিপত্তিং আপত্তা নাম নত্থি, তস্মা ‘‘কতি ৰিপত্তিযো’’তি অযং আপত্তীনং ৰিপত্তিভাৰপুচ্ছা. কতি আপত্তিসমুট্ঠানানীতি তাসংযেৰ আপত্তীনং সমুট্ঠানপুচ্ছা. ৰিৰাদমূলানি অনুৰাদমূলানীতি ইমা ‘‘ৰিৰাদাধিকরণং অনুৰাদাধিকরণ’’ন্তি আগতানং ৰিৰাদানুৰাদানং মূলপুচ্ছা. সারণীযা ধম্মাতি ৰিৰাদানুৰাদমূলানং অভাৰকরধম্মপুচ্ছা. ভেদকরৰত্থূনীতি অযং ‘‘ভেদনসংৰত্তনিকং ৰা অধিকরণ’’ন্তিআদীসু ৰুত্তভেদকরণপুচ্ছা. অধিকরণানীতি ভেদকরৰত্থূসু সতি উপ্পজ্জনধম্মপুচ্ছা. সমথাতি তেসংযেৰ ৰূপসমনধম্মপুচ্ছা. পঞ্চ আপত্তিযোতি মাতিকায আগতৰসেন ৰুত্তা. সত্তাতি ৰিভঙ্গে আগতৰসেন.

আরকা এতেহি রমতীতি আরতি; ভুসা ৰা রতি আরতি. ৰিনা এতেহি রমতীতি ৰিরতি. পচ্চেকং পচ্চেকং ৰিরমতীতি পটিৰিরতি. ৰেরং মণতি ৰিনাসেতীতি ৰেরমণী. ন এতায এতে আপত্তিক্খন্ধা করীযন্তীতি অকিরিযা. যং এতায অসতি আপত্তিক্খন্ধকরণং উপ্পজ্জেয্য, তস্স পটিপক্খতো অকরণং. আপত্তিক্খন্ধঅজ্ঝাপত্তিযা পটিপক্খতো অনজ্ঝাপত্তি. ৰেলনতো ৰেলা; চলযনতো ৰিনাসনতোতি অত্থো. নিয্যানং সিনোতি বন্ধতি নিৰারেতীতি সেতু. আপত্তিক্খন্ধানমেতং অধিৰচনং. সো সেতু এতায পঞ্ঞত্তিযা হঞ্ঞতীতি সেতুঘাতো. সেসৰিনীতৰত্থুনিদ্দেসেসুপি এসেৰ নযো.

বুদ্ধে অগারৰাদীসু যো বুদ্ধে ধরমানে উপট্ঠানং ন গচ্ছতি, পরিনিব্বুতে চেতিযট্ঠানং বোধিট্ঠানং ন গচ্ছতি, চেতিযং ৰা বোধিং ৰা ন ৰন্দতি, চেতিযঙ্গণে সছত্তো সউপাহনো চরতি, নত্থেতস্স বুদ্ধে গারৰোতি ৰেদিতব্বো. যো পন সক্কোন্তোযেৰ ধম্মস্সৰনং ন গচ্ছতি, সরভঞ্ঞং ন ভণতি, ধম্মকথং ন কথেতি, ধম্মস্সৰনগ্গং ভিন্দিত্ৰা গচ্ছতি, ৰিক্খিত্তো ৰা অনাদরো ৰা নিসীদতি, নত্থেতস্স ধম্মে গারৰো. যো থেরনৰমজ্ঝিমেসু চিত্তীকারং ন পচ্চুপট্ঠাপেতি, উপোসথাগারৰিতক্কমাল়কাদীসু কাযপ্পাগব্ভিযং দস্সেতি, যথাৰুড্ঢং ন ৰন্দতি, নত্থেতস্স সঙ্ঘে গারৰো. তিস্সো সিক্খা সমাদায অসিক্খমানোযেৰ পন সিক্খায অগারৰোতি ৰেদিতব্বো. পমাদে চ সতিৰিপ্পৰাসে তিট্ঠমানোযেৰ অপ্পমাদলক্খণং অব্রূহযমানো অপ্পমাদে অগারৰোতি ৰেদিতব্বো. তথা আমিসপ্পটিসন্থারং ধম্মপ্পটিসন্থারন্তি ইমং দুৰিধং পটিসন্থারং অকরোন্তোযেৰ পটিসন্থারে অগারৰোতি ৰেদিতব্বো. গারৰনিদ্দেসে ৰুত্তৰিপরিযাযেন অত্থো ৰেদিতব্বো.

২৭২. ৰিৰাদমূলনিদ্দেসে ‘‘সত্থরিপি অগারৰো’’তিআদীনং বুদ্ধে অগারৰাদীসু ৰুত্তনযেনেৰ অত্থো ৰেদিতব্বো. অপ্পতিস্সোতি অনীচৰুত্তি; ন সত্থারং জেট্ঠকং কত্ৰা ৰিহরতি. অজ্ঝত্তং ৰাতি অত্তনো সন্তানে ৰা অত্তনো পক্খে ৰা; সকায পরিসাযাতি অত্থো. বহিদ্ধা ৰাতি পরসন্তানে ৰা পরপক্খে ৰা. তত্র তুম্হেতি তস্মিং অজ্ঝত্তবহিদ্ধাভেদে সপরসন্তানে ৰা সপরপরিসায ৰা. পহানায ৰাযমেয্যাথাতি মেত্তাভাৰনাদীহি নযেহি পহানত্থং ৰাযমেয্যাথ; মেত্তাভাৰনাদিনযেন হি তং অজ্ঝত্তম্পি বহিদ্ধাপি পহীযতি. অনৰস্সৰাযাতি অপ্পৰত্তিভাৰায.

সন্দিট্ঠিপরামাসীতি সকমেৰ দিট্ঠিং পরামসতি; যং অত্তনা দিট্ঠিগতং গহিতং, ইদমেৰ সচ্চন্তি গণ্হাতি. আধানগ্গাহীতি দল়্হগ্গাহী.

২৭৩. অনুৰাদমূলনিদ্দেসো কিঞ্চাপি ৰিৰাদমূলনিদ্দেসেনেৰ সমানো, অথ খো অট্ঠারস ভেদকরৰত্থূনি নিস্সায ৰিৰদন্তানং কোধূপনাহাদযো ৰিৰাদমূলানি. তথা ৰিৰদন্তা পন সীলৰিপত্তিআদীসু অঞ্ঞতরৰিপত্তিং আপজ্জিত্ৰা ‘‘অসুকো ভিক্খু অসুকং নাম ৰিপত্তিং আপন্নো’’তি ৰা, ‘‘পারাজিকং আপন্নোসি, সঙ্ঘাদিসেসং আপন্নোসী’’তি ৰা অনুৰদন্তি. এৰং অনুৰদন্তানং কোধূপনাহাদযো অনুৰাদমূলানীতি অযমেত্থ ৰিসেসো.

২৭৪. সারণীযধম্মনিদ্দেসে মেত্তচিত্তেন কতং কাযকম্মং মেত্তং কাযকম্মং নাম. আৰি চেৰ রহো চাতি সম্মুখা চ পরম্মুখা চ. তত্থ নৰকানং চীৰরকম্মাদীসু সহাযভাৰগমনং সম্মুখা মেত্তং কাযকম্মং নাম. থেরানং পন পাদধোৰনবীজনৰাতদানাদিভেদম্পি সব্বং সামীচিকম্মং সম্মুখা মেত্তং কাযকম্মং নাম. উভযেহিপি দুন্নিক্খিত্তানং দারুভণ্ডাদীনং তেসু অৰমঞ্ঞং অকত্ৰা অত্তনা দুন্নিক্খিত্তানং ৰিয পটিসামনং পরম্মুখা মেত্তং কাযকম্মং নাম. অযম্পি ধম্মো সারণীযোতি অযং মেত্তাকাযকম্মসঙ্খাতো ধম্মো সরিতব্বো সতিজনকো; যো নং করোতি, তং পুগ্গলং; যেসং কতো হোতি, তে পসন্নচিত্তা ‘‘অহো সপ্পুরিসো’’তি অনুস্সরন্তীতি অধিপ্পাযো. পিযকরণোতি তং পুগ্গলং সব্রহ্মচারীনং পিযং করোতি. গরুকরণোতি তং পুগ্গলং সব্রহ্মচারীনং গরুং করোতি. সঙ্গহাযাতিআদীসু সব্রহ্মচারীহি সঙ্গহেতব্বভাৰায. তেহি সদ্ধিং অৰিৰাদায সমগ্গভাৰায একীভাৰায চ সংৰত্ততি.

মেত্তং ৰচীকম্মন্তিআদীসু দেৰত্থেরো তিস্সত্থেরোতি এৰং পগ্গয্হ ৰচনং সম্মুখা মেত্তং ৰচীকম্মং নাম. ৰিহারে অসন্তে পন তং পটিপুচ্ছন্তস্স ‘‘কুহিং অম্হাকং দেৰত্থেরো, কুহিং অম্হাকং তিস্সত্থেরো, কদা নু খো আগমিস্সতী’’তি এৰং মমাযনৰচনং পরম্মুখা মেত্তং ৰচীকম্মং নাম. মেত্তাসিনেহসিনিদ্ধানি পন নযনানি উম্মীলেত্ৰা পসন্নেন মুখেন ওলোকনং সম্মুখা মেত্তং মনোকম্মং নাম. ‘‘দেৰত্থেরো তিস্সত্থেরো অরোগো হোতু, অপ্পাবাধো’’তি সমন্নাহরণং পরম্মুখা মেত্তং মনোকম্মং নাম.

অপ্পটিৰিভত্তভোগীতি নেৰ আমিসং পটিৰিভজিত্ৰা ভুঞ্জতি, ন পুগ্গলং. যো হি ‘‘এত্তকং পরেসং দস্সামি, এত্তকং অত্তনা ভুঞ্জিস্সামি, এত্তকং ৰা অসুকস্স চ অসুকস্স চ দস্সামি, এত্তকং অত্তনা ভুঞ্জিস্সামী’’তি ৰিভজিত্ৰা ভুঞ্জতি, অযং পটিৰিভত্তভোগী নাম. অযং পন এৰং অকত্ৰা আভতং পিণ্ডপাতং থেরাসনতো পট্ঠায দত্ৰা গহিতাৰসেসং ভুঞ্জতি. ‘‘সীলৰন্তেহী’’তি ৰচনতো দুস্সীলস্স অদাতুম্পি ৰট্টতি, সারণীযধম্মপূরকেন পন সব্বেসং দাতব্বমেৰাতি ৰুত্তং. গিলান-গিলানুপট্ঠাক-আগন্তুক-গমিকচীৰরকম্মাদিপসুতানং ৰিচেয্য দাতুম্পি ৰট্টতি. ন হি এতে ৰিচিনিত্ৰা দেন্তেন পুগ্গলৰিভাগো কতো হোতি, ঈদিসানঞ্হি কিচ্ছলাভত্তা ৰিসেসো কাতব্বোযেৰাতি অযং করোতি.

অখণ্ডানীতিআদীসু যস্স সত্তসু আপত্তিক্খন্ধেসু আদিম্হি ৰা অন্তে ৰা সিক্খাপদং ভিন্নং হোতি, তস্স সীলং পরিযন্তে ছিন্নসাটকো ৰিয খণ্ডং নাম. যস্স পন ৰেমজ্ঝে ভিন্নং, তস্স মজ্ঝে ছিদ্দসাটকো ৰিয ছিদ্দং নাম হোতি. যস্স পটিপাটিযা দ্ৰে তীণি ভিন্নানি, তস্স পিট্ঠিযং ৰা কুচ্ছিযং ৰা উট্ঠিতেন ৰিসভাগৰণ্ণেন কাল়রত্তাদীনং অঞ্ঞতরসরীরৰণ্ণা গাৰী ৰিয সবলং নাম হোতি. যস্স অন্তরন্তরা ভিন্নানি, তস্স অন্তরন্তরা ৰিসভাগৰণ্ণবিন্দুৰিচিত্রা গাৰী ৰিয কম্মাসং নাম হোতি. যস্স পন সব্বেন সব্বং অভিন্নানি সীলানি, তস্স তানি সীলানি অখণ্ডানি অচ্ছিদ্দানি অসবলানি অকম্মাসানি নাম হোন্তি. তানি পনেতানি ভুজিস্সভাৰকরণতো ভুজিস্সানি. ৰিঞ্ঞূহি পসত্থত্তা ৰিঞ্ঞুপ্পসত্থানি. তণ্হাদিট্ঠীহি অপরামট্ঠত্তা অপরামট্ঠানি. উপচারসমাধিং অপ্পনাসমাধিং ৰা সংৰত্তযন্তীতি সমাধিসংৰত্তনিকানীতি ৰুচ্চন্তি. সীলসামঞ্ঞগতো ৰিহরতীতি তেসু তেসু দিসাভাগেসু ৰিহরন্তেহি কল্যাণসীলেহি ভিক্খূহি সদ্ধিং সমানভাৰূপগতসীলো ৰিহরতি.

যাযং দিট্ঠীতি মগ্গসম্পযুত্তা সম্মাদিট্ঠি. অরিযাতি নিদ্দোসা. নিয্যাতীতি নিয্যানিকা. তক্করস্সাতি যো তথাকারী হোতি, তস্স. দুক্খক্খযাযাতি সব্বদুক্খস্স খযত্থং. সেসং যাৰ সমথভেদপরিযোসানা উত্তানত্থমেৰ.

কতিপুচ্ছাৰারৰণ্ণনা নিট্ঠিতা.