(৩) পাচিত্তিযাদিপঞ্হাৰণ্ণনা

৪৮১. অধিট্ঠিতন্তি গাথা নিস্সগ্গিযচীৰরং অনিস্সজ্জিত্ৰা পরিভুঞ্জন্তং সন্ধায ৰুত্তা.

অত্থঙ্গতে সূরিযেতি গাথা রোমন্থকং সন্ধায ৰুত্তা.

ন রত্তচিত্তোতি গাথায অযমত্থো – রত্তচিত্তো মেথুনধম্মপারাজিকং আপজ্জতি. থেয্যচিত্তো অদিন্নাদানপারাজিকং, পরং মরণায চেতেন্তো মনুস্সৰিগ্গহপারাজিকং, সঙ্ঘভেদকো পন ন রত্তচিত্তো ন চ পন থেয্যচিত্তো ন চাপি সো পরং মরণায চেতযি, সলাকং পনস্স দেন্তস্স হোতি ছেজ্জং, পারাজিকং হোতি, সলাকং পটিগ্গণ্হন্তস্স ভেদকানুৰত্তকস্স থুল্লচ্চযং.

গচ্ছেয্য অড্ঢযোজনন্তি অযং পঞ্হা সুপ্পতিট্ঠিতনিগ্রোধসদিসং এককুলস্স রুক্খমূলং সন্ধায ৰুত্তা.

কাযিকানীতি অযং গাথা সম্বহুলানং ইত্থীনং কেসে ৰা অঙ্গুলিযো ৰা একতো গণ্হন্তং সন্ধায ৰুত্তা.

ৰাচসিকানীতি অযং গাথা ‘‘সব্বা তুম্হে সিখরণিযো’’তিআদিনা নযেন দুট্ঠুল্লভাণিং সন্ধায ৰুত্তা.

তিস্সিত্থিযো মেথুনং তং ন সেৰেতি তিস্সো ইত্থিযো ৰুত্তা, তাসুপি যং তং মেথুনং নাম, তং ন সেৰতি. তযো পুরিসেতি তযো পুরিসেপি উপগন্ত্ৰা মেথুনং ন সেৰতি. তযো অনরিযপণ্ডকেতি উভতোব্যঞ্জনসঙ্খাতে তযো অনরিযে তযো চ পণ্ডকেতি ইমেপি ছ জনে উপগন্ত্ৰা মেথুনং ন সেৰতি. ন চাচরে মেথুনং ব্যঞ্জনস্মিন্তি অনুলোমপারাজিকৰসেনপি মেথুনং নাচরতি. ছেজ্জং সিযা মেথুনধম্মপচ্চযাতি সিযা মেথুনধম্মপচ্চযা পারাজিকন্তি. অযং পঞ্হা অট্ঠৰত্থুকং সন্ধায ৰুত্তা, তস্সা হি মেথুনধম্মস্স পুব্বভাগং কাযসংসগ্গং আপজ্জিতুং ৰাযমন্তিযা মেথুনধম্মপচ্চযা ছেজ্জং হোতি.

মাতরং চীৰরন্তি অযং গাথা পিট্ঠিসমযে ৰস্সিকসাটিকত্থং সতুপ্পাদকরণং সন্ধায ৰুত্তা. ৰিনিচ্ছযো পনস্সা ৰস্সিকসাটিকসিক্খাপদৰণ্ণনাযমেৰ ৰুত্তো.

কুদ্ধো আরাধকো হোতীতি গাথা তিত্থিযৰত্তং সন্ধায ৰুত্তা. তিত্থিযো হি ৰত্তং পূরযমানো তিত্থিযানং ৰণ্ণে ভঞ্ঞমানে কুদ্ধো আরাধকো হোতি, ৰত্থুত্তযস্স ৰণ্ণে ভঞ্ঞমানে কুদ্ধো গারয্হো হোতীতি তত্থেৰস্সা ৰিত্থারো ৰুত্তো. দুতিযগাথাপি তমেৰ সন্ধায ৰুত্তা.

সঙ্ঘাদিসেসন্তিআদি গাথা যা ভিক্খুনী অৰস্সুতাৰ অৰস্সুতস্স পুরিসস্স হত্থতো পিণ্ডপাতং গহেত্ৰা মনুস্সমংসলসুণপণীতভোজনসেসঅকপ্পিযমংসেহি সদ্ধিং ওমদ্দিত্ৰা অজ্ঝোহরতি, তং সন্ধায ৰুত্তা.

একো উপসম্পন্নো একো অনুপসম্পন্নোতি গাথা আকাসগতং সন্ধায ৰুত্তা. সচে হি দ্ৰীসু সামণেরেসু একো ইদ্ধিযা কেসগ্গমত্তম্পি পথৰিং মুঞ্চিত্ৰা নিসিন্নো হোতি, সো অনুপসম্পন্নো নাম হোতি. সঙ্ঘেনাপি আকাসে নিসীদিত্ৰা ভূমিগতস্স কম্মং ন কাতব্বং. সচে করোতি, কুপ্পতি.

অকপ্পকতন্তি গাথা অচ্ছিন্নচীৰরকং ভিক্খুং সন্ধায ৰুত্তা. তস্মিংযেৰ চস্সা সিক্খাপদে ৰিত্থারেন ৰিনিচ্ছযোপি ৰুত্তো.

ন দেতি ন পটিগ্গণ্হাতীতি নাপি উয্যোজিকা দেতি, ন উয্যোজিতা তস্সা হত্থতো গণ্হাতি. পটিগ্গহো তেন ন ৰিজ্জতীতি তেনেৰ কারণেন উয্যোজিকায হত্থতো উয্যোজিতায পটিগ্গহো ন ৰিজ্জতি. আপজ্জতি গরুকন্তি এৰং সন্তেপি অৰস্সুতস্স হত্থতো পিণ্ডপাতগ্গহণে উয্যোজেন্তী সঙ্ঘাদিসেসাপত্তিং আপজ্জতি. তঞ্চ পরিভোগপচ্চযাতি তঞ্চ পন আপত্তিং আপজ্জমানা তস্সা উয্যোজিতায পরিভোগপচ্চযা আপজ্জতি. তস্সা হি ভোজনপরিযোসানে উয্যোজিকায সঙ্ঘাদিসেসো হোতীতি. দুতিযগাথা তস্সাযেৰ উদকদন্তপোনগ্গহণে উয্যোজনং সন্ধায ৰুত্তা.

ন ভিক্খুনী নো চ ফুসেয্য ৰজ্জন্তি সত্তরসকেসু হি অঞ্ঞতরং আপত্তিং আপজ্জিত্ৰা অনাদরিযেন ছাদযমানাপি ভিক্খুনী ছাদনপচ্চযা ৰজ্জং ন ফুসতি, অঞ্ঞং নৰং আপত্তিং নাপজ্জতি, পটিচ্ছন্নায ৰা অপ্পটিচ্ছন্নায ৰা আপত্তিযা পক্খমানত্তমেৰ লভতি. অযং পন ভিক্খুনীপি ন হোতি, সাৰসেসঞ্চ গরুকং আপজ্জিত্ৰা ছাদেত্ৰা ৰজ্জং ন ফুসতি. পঞ্হা মেসা কুসলেহি চিন্তিতাতি অযং কির পঞ্হা উক্খিত্তকভিক্খুং সন্ধায ৰুত্তা. তেন হি সদ্ধিং ৰিনযকম্মং নত্থি, তস্মা সো সঙ্ঘাদিসেসং আপজ্জিত্ৰা ছাদেন্তো ৰজ্জং ন ফুসতীতি.

সেদমোচনগাথাৰণ্ণনা নিট্ঠিতা.