(২) পারাজিকাদিপঞ্হাৰণ্ণনা

৪৮০. ছিদ্দং তস্মিং ঘরে নত্থীতি অযং পঞ্হা দুস্সকুটিআদীনি সন্থতপেয্যালঞ্চ সন্ধায ৰুত্তা.

তেলং মধুং ফাণিতন্তি গাথা লিঙ্গপরিৰত্তং সন্ধায ৰুত্তা.

নিস্সগ্গিযেনাতি গাথা পরিণামনং সন্ধায ৰুত্তা. যো হি সঙ্ঘস্স পরিণতলাভতো একং চীৰরং অত্তনো, একং অঞ্ঞস্সাতি দ্ৰে চীৰরানি ‘‘একং ময্হং, একং তস্স দেহী’’তি একপযওগেন পরিণামেতি, সো নিস্সগ্গিযপাচিত্তিযঞ্চেৰ সুদ্ধিকপাচিত্তিযঞ্চ একতো আপজ্জতি.

কম্মঞ্চ তং কুপ্পেয্য ৰগ্গপচ্চযাতি অযং পঞ্হা দ্ৰাদসযোজনপমাণেসু বারাণসিআদীসু নগরেসু গামসীমং সন্ধায ৰুত্তা.

পদৰীতিহারমত্তেনাতি গাথা সঞ্চরিত্তং সন্ধায ৰুত্তা, অত্থোপি চস্সা সঞ্চরিত্তৰণ্ণনাযমেৰ ৰুত্তো.

সব্বানি তানি নিস্সগ্গিযানীতি অযং পঞ্হা অঞ্ঞাতিকায ভিক্খুনিযা ধোৰাপনং সন্ধায ৰুত্তা. সচে হি তিণ্ণম্পি চীৰরানং কাকঊহদনং ৰা কদ্দমমক্খিতং ৰা কণ্ণং গহেত্ৰা ভিক্খুনী উদকেন ধোৰতি, ভিক্খুস্স কাযগতানেৰ নিস্সগ্গিযানি হোন্তি.

সরণগমনম্পি ন তস্স অত্থীতি সরণগমনউপসম্পদাপি নত্থি. অযং পন পঞ্হা মহাপজাপতিযা উপসম্পদং সন্ধায ৰুত্তা.

হনেয্য অনরিযং মন্দোতি তঞ্হি ইত্থিং ৰা পুরিসং ৰা অনরিযং হনেয্য. অযং পঞ্হা লিঙ্গপরিৰত্তেন ইত্থিভূতং পিতরং পুরিসভূতঞ্চ মাতরং সন্ধায ৰুত্তা.

ন তেনানন্তরং ফুসেতি অযং পঞ্হা মিগসিঙ্গতাপসসীহকুমারাদীনং ৰিয তিরচ্ছানমাতাপিতরো সন্ধায ৰুত্তা.

অচোদযিত্ৰাতি গাথা দূতেনুপসম্পদং সন্ধায ৰুত্তা. চোদযিত্ৰাতি গাথা পণ্ডকাদীনং উপসম্পদং সন্ধায ৰুত্তা. কুরুন্দিযং পন ‘‘পঠমগাথা অট্ঠ অসম্মুখাকম্মানি, দুতিযা অনাপত্তিকস্স কম্মং সন্ধায ৰুত্তা’’তি আগতং.

ছিন্দন্তস্স আপত্তীতি ৰনপ্পতিং ছিন্দন্তস্স পারাজিকং, তিণলতাদিং ছিন্দন্তস্স পাচিত্তিযং, অঙ্গজাতং ছিন্দন্তস্স থুল্লচ্চযং. ছিন্দন্তস্স অনাপত্তীতি কেসে চ নখে চ ছিন্দন্তস্স অনাপত্তি. ছাদেন্তস্স আপত্তীতি অত্তনো আপত্তিং ছাদেন্তস্স অঞ্ঞেসং ৰা আপত্তিং. ছাদেন্তস্স অনাপত্তীতি গেহাদীনি ছাদেন্তস্স অনাপত্তি.

সচ্চং ভণন্তোতি গাথায ‘‘সিখরণীসি উভতোব্যঞ্জনাসী’’তি সচ্চং ভণন্তো গরুকং আপজ্জতি, সম্পজানমুসাৰাদে পন মুসা ভাসতো লহুকাপত্তি হোতি, অভূতারোচনে মুসা ভণন্তো গরুকং আপজ্জতি, ভূতারোচনে সচ্চং ভাসতো লহুকাপত্তি হোতীতি.