(১) অৰিপ্পৰাসপঞ্হাৰণ্ণনা

৪৭৯. সেদমোচনগাথাসু অসংৰাসোতি উপোসথপৰারণাদিনা সংৰাসেন অসংৰাসো. সম্ভোগো একচ্চো তহিং ন লব্ভতীতি অকপ্পিযসম্ভোগো ন লব্ভতি, নহাপনভোজনাদিপটিজগ্গনং পন মাতরাযেৰ কাতুং লব্ভতি. অৰিপ্পৰাসেন অনাপত্তীতি সহগারসেয্যায অনাপত্তি. পঞ্হা মেসা কুসলেহি চিন্তিতাতি এসা পঞ্হা কুসলেহি পণ্ডিতেহি চিন্তিতা. অস্সা ৰিস্সজ্জনং দারকমাতুযা ভিক্খুনিযা ৰেদিতব্বং, তস্সা হি পুত্তং সন্ধাযেতং ৰুত্তন্তি.

অৰিস্সজ্জিতগাথা গরুভণ্ডং সন্ধায ৰুত্তা, অত্থো পনস্সা গরুভণ্ডৰিনিচ্ছযে ৰুত্তোযেৰ.

দস পুগ্গলে ন ৰদামীতি সেনাসনক্খন্ধকে ৰুত্তে দস পুগ্গলে ন ৰদামি. একাদস ৰিৰজ্জিযাতি যে মহাখন্ধকে একাদস ৰিৰজ্জনীযপুগ্গলা ৰুত্তা, তেপি ন ৰদামি. অযং পঞ্হা নগ্গং ভিক্খুং সন্ধায ৰুত্তা.

কথং নু সিক্খায অসাধারণোতি পঞ্হা নহাপিতপুব্বকং ভিক্খুং সন্ধায ৰুত্তা. অযঞ্হি খুরভণ্ডং পরিহরিতুং ন লভতি, অঞ্ঞে লভন্তি; তস্মা সিক্খায অসাধারণো.

তং পুগ্গলং কতমং ৰদন্তি বুদ্ধাতি অযং পঞ্হা নিম্মিতবুদ্ধং সন্ধায ৰুত্তা.

অধোনাভিং ৰিৰজ্জিযাতি অধোনাভিং ৰিৰজ্জেত্ৰা. অযং পঞ্হা যং তং অসীসকং কবন্ধং, যস্স উরে অক্খীনি চেৰ মুখঞ্চ হোতি, তং সন্ধায ৰুত্তা.

ভিক্খু সঞ্ঞাচিকায কুটিন্তি অযং পঞ্হা তিণচ্ছাদনং কুটিং সন্ধায ৰুত্তা. দুতিযপঞ্হা সব্বমত্তিকামযং কুটিং সন্ধায ৰুত্তা.

আপজ্জেয্য গরুকং ছেজ্জৰত্থুন্তি অযং পঞ্হা ৰজ্জপটিচ্ছাদিকং ভিক্খুনিং সন্ধায ৰুত্তা. দুতিযপঞ্হা পণ্ডকাদযো অভব্বপুগ্গলে সন্ধায ৰুত্তা. একাদসপি হি তে গিহিভাৰেযেৰ পারাজিকং পত্তা.

ৰাচাতি ৰাচায অনালপন্তো. গিরং নো চ পরে ভণেয্যাতি ‘‘ইতি ইমে সোস্সন্তী’’তি পরপুগ্গলে সন্ধায সদ্দম্পি ন নিচ্ছারেয্য. অযং পঞ্হা ‘‘সন্তিং আপত্তিং নাৰিকরেয্য, সম্পজানমুসাৰাদস্স হোতী’’তি ইমং মুসাৰাদং সন্ধায ৰুত্তা. তস্স হি ভিক্খুনো অধম্মিকায পটিঞ্ঞায তুণ্হীভূতস্স নিসিন্নস্স মনোদ্ৰারে আপত্তি নাম নত্থি. যস্মা পন আৰিকাতব্বং ন আৰিকরোতি, তেনস্স ৰচীদ্ৰারে অকিরিযতো অযং আপত্তি সমুট্ঠাতীতি ৰেদিতব্বা.

সঙ্ঘাদিসেসা চতুরোতি অযং পঞ্হা অরুণুগ্গে গামন্তরপরিযাপন্নং নদিপারং ওক্কন্তভিক্খুনিং সন্ধায ৰুত্তা, সা হি সকগামতো পচ্চূসসমযে নিক্খমিত্ৰা অরুণুগ্গমনকালে ৰুত্তপ্পকারং নদিপারং ওক্কন্তমত্তাৰ রত্তিৰিপ্পৰাসগামন্তরনদিপারগণম্হাওহীযনলক্খণেন একপ্পহারেনেৰ চতুরো সঙ্ঘাদিসেসে আপজ্জতি.

সিযা আপত্তিযো নানাতি অযং পঞ্হা একতোউপসম্পন্না দ্ৰে ভিক্খুনিযো সন্ধায ৰুত্তা. তাসু হি ভিক্খূনং সন্তিকে একতোউপসম্পন্নায হত্থতো গণ্হন্তস্স পাচিত্তিযং, ভিক্খুনীনং সন্তিকে একতোউপসম্পন্নায হত্থতো গণ্হন্তস্স দুক্কটং.

চতুরো জনা সংৰিধাযাতি আচরিযো চ তযো চ অন্তেৰাসিকা ছমাসকং ভণ্ডং অৰহরিংসু, আচরিযস্স সাহত্থিকা তযো মাসকা, আণত্তিযাপি তযোৰ তস্মা থুল্লচ্চযং আপজ্জতি, ইতরেসং সাহত্থিকো একেকো, আণত্তিকা পঞ্চাতি তস্মা পারাজিকং আপজ্জিংসু. অযমেত্থ সঙ্খেপো. ৰিত্থারো পন অদিন্নাদানপারাজিকে সংৰিদাৰহারৰণ্ণনাযং ৰুত্তো.