চোদনাকণ্ডং

অনুৰিজ্জককিচ্চৰণ্ণনা

৩৬০-৩৬১. ইদানি এৰং উপ্পন্নায চোদনায ৰিনযধরেন কত্তব্বকিচ্চং দস্সেতুং অনুৰিজ্জকেনাতিআদি আরদ্ধং. তত্থ দিট্ঠং দিট্ঠেনাতি গাথায অযমত্থো – একেনেকো মাতুগামেন সদ্ধিং একট্ঠানতো নিক্খমন্তো ৰা পৰিসন্তো ৰা দিট্ঠো, সো তং পারাজিকেন চোদেতি, ইতরো তস্স দস্সনং অনুজানাতি. তং পন দস্সনং পটিচ্চ পারাজিকং ন উপেতি, ন পটিজানাতি. এৰমেত্থ যং তেন দিট্ঠং, তং তস্স ‘‘দিট্ঠো মযা’’তি ইমিনা দিট্ঠৰচনেন সমেতি. যস্মা পন ইতরো তং দস্সনং পটিচ্চ দোসং ন পটিজানাতি, তস্মা অসুদ্ধপরিসঙ্কিতো হোতি; অমূলকপরিসঙ্কিতোতি অত্থো. তস্স পুগ্গলস্স ‘‘সুদ্ধো অহ’’ন্তি পটিঞ্ঞায তেন সদ্ধিং উপোসথো কাতব্বো. সেসগাথাদ্ৰযেপি এসেৰ নযো. সেসং সব্বত্থ উত্তানমেৰাতি.

অনুৰিজ্জককিচ্চৰণ্ণনা নিট্ঠিতা.

চোদকপুচ্ছাৰিস্সজ্জনাৰণ্ণনা

৩৬২-৩৬৩. চোদনায কো আদীতিআদিপুচ্ছানং ৰিস্সজ্জনে সচ্চে চ অকুপ্পে চাতি সচ্চে পতিট্ঠাতব্বং অকুপ্পে চ. যং কতং ৰা ন কতং ৰা, তদেৰ ৰত্তব্বং, ন চ চোদকে ৰা অনুৰিজ্জকে ৰা সঙ্ঘে ৰা কোপো উপ্পাদেতব্বো. ওতিণ্ণানোতিণ্ণং জানিতব্বন্তি ওতিণ্ণঞ্চ অনোতিণ্ণঞ্চ ৰচনং জানিতব্বং. তত্রাযং জাননৰিধি – এত্তকা চোদকস্স পুব্বকথা, এত্তকা পচ্ছিমকথা, এত্তকা চুদিতকস্স পুব্বকথা, এত্তকা পচ্ছিমকথাতি জানিতব্বা. চোদকস্স পমাণং গণ্হিতব্বং, চুদিতকস্স পমাণং গণ্হিতব্বং, অনুৰিজ্জকস্স পমাণং গণ্হিতব্বং, অনুৰিজ্জকো অপ্পমত্তকম্পি অহাপেন্তো ‘‘আৰুসো সমন্নাহরিত্ৰা উজুং কত্ৰা আহরা’’তি ৰত্তব্বো, সঙ্ঘেন এৰং পটিপজ্জিতব্বং. যেন ধম্মেন যেন ৰিনযেন যেন সত্থুসাসনেন তং অধিকরণং ৰূপসম্মতীতি এত্থ ধম্মোতি ভূতং ৰত্থু. ৰিনযোতি চোদনা চেৰ সারণা চ. সত্থুসাসনন্তি ঞত্তিসম্পদা চেৰ অনুস্সাৰনসম্পদা চ. এতেন হি ধম্মেন চ ৰিনযেন চ সত্থুসাসনেন চ অধিকরণং ৰূপসমতি, তস্মা অনুৰিজ্জকেন ভূতেন ৰত্থুনা চোদেত্ৰা আপত্তিং সারেত্ৰা ঞত্তিসম্পদায চেৰ অনুস্সাৰনসম্পদায চ তং অধিকরণং ৰূপসমেতব্বং, অনুৰিজ্জকেন এৰং পটিপজ্জিতব্বং. সেসমেত্থ উত্তানমেৰ.

৩৬৪. উপোসথো কিমত্থাযাতিআদিপুচ্ছাৰিস্সজ্জনম্পি উত্তানমেৰ. অৰসানগাথাসু থেরে চ পরিভাসতীতি অৰমঞ্ঞং করোন্তো ‘‘কিং ইমে জানন্তী’’তি পরিভাসতি. খতো উপহতিন্দ্রিযোতি তায ছন্দাদিগামিতায তেন চ পরিভাসনেন অত্তনা অত্তনো খতত্তা খতো. সদ্ধাদীনঞ্চ ইন্দ্রিযানং উপহতত্তা উপহতিন্দ্রিযো. নিরযং গচ্ছতি দুম্মেধো, ন চ সিক্খায গারৰোতি সো খতো উপহতিন্দ্রিযো পঞ্ঞায অভাৰতো দুম্মেধো তীসু সিক্খাসু অসিক্খনতো ন চ সিক্খায গারৰো কাযস্স ভেদা নিরযমেৰ উপগচ্ছতি, তস্মা ন চ আমিসং নিস্সায…পে… যথা ধম্মো তথা করেতি. তস্সত্থো ন চ আমিসং নিস্সায করে, চুদিতকচোদকেসু হি অঞ্ঞতরেন দিন্নং চীৰরাদিআমিসং গণ্হন্তো আমিসং নিস্সায করোতি, এৰং ন করেয্য. ন চ নিস্সায পুগ্গলন্তি ‘‘অযং মে উপজ্ঝাযো ৰা আচরিযো ৰা’’তিআদিনা নযেন ছন্দাদীহি গচ্ছন্তো পুগ্গলং নিস্সায করোতি, এৰং ন করেয্য. অথ খো উভোপেতে ৰিৰজ্জেত্ৰা যথা ধম্মো ঠিতো, তথেৰ করেয্যাতি.

উপকণ্ণকং জপ্পতীতি ‘‘এৰং কথেহি, মা এৰং কথযিত্থা’’তি কণ্ণমূলে মন্তেতি. জিম্হং পেক্খতীতি দোসমেৰ গৰেসতি. ৰীতিহরতীতি ৰিনিচ্ছযং হাপেতি. কুম্মগ্গং পটিসেৰতীতি আপত্তিং দীপেতি.

অকালেন চ চোদেতীতি অনোকাসে অনজ্ঝিট্ঠোৰ চোদেতি. পুব্বাপরং ন জানাতীতি পুরিমকথঞ্চ পচ্ছিমকথঞ্চ ন জানাতি.

অনুসন্ধিৰচনপথং ন জানাতীতি কথানুসন্ধিৰিনিচ্ছযানুসন্ধিৰসেন ৰচনং ন জানাতি. সেসং সব্বত্থ উত্তানমেৰাতি.

চোদনাকণ্ডৰণ্ণনা নিট্ঠিতা.