সন্থতচতুক্কভেদকথা

৬১-৬২. এৰং ভগৰা পটিপন্নকস্স ভিক্খুনো রক্খণত্থং সত্ততিদ্ৰিসতচতুক্কানি নীহরিত্ৰা ‘‘ইদানি যে অনাগতে পাপভিক্খূ ‘সন্থতং ইমং ন কিঞ্চি উপাদিন্নকং উপাদিন্নকেন ফুসতি, কো এত্থ দোসো’তি সঞ্চিচ্চ লেসং ওড্ডেস্সন্তি, তেসং সাসনে পতিট্ঠা এৰ ন ভৰিস্সতী’’তি দিস্ৰা তেসু সত্ততিদ্ৰিসতচতুক্কেসু একমেকং চতুক্কং চতূহি সন্থতাদিভেদেহি ভিন্দিত্ৰা দস্সেন্তো ভিক্খুপচ্চত্থিকা মনুস্সিত্থিং ভিক্খুস্স সন্তিকে আনেত্ৰা ৰচ্চমগ্গেন পস্সাৰমগ্গেন মুখেন অঙ্গজাতং অভিনিসীদেন্তি সন্থতায অসন্থতস্সাতিআদিমাহ.

তত্থ সন্থতায অসন্থতস্সাতিআদীসু সন্থতায ইত্থিযা ৰচ্চমগ্গেন পস্সাৰমগ্গেন মুখেন অসন্থতস্স ভিক্খুস্স অঙ্গজাতং অভিনিসীদেন্তীতি ইমিনা নযেন যোজনা ৰেদিতব্বা. তত্থ সন্থতা নাম যস্সা তীসু মগ্গেসু যো কোচি মগ্গো পলিৰেঠেত্ৰা ৰা অন্তো ৰা পৰেসেত্ৰা যেন কেনচি ৰত্থেন ৰা পণ্ণেন ৰা ৰাকপট্টেন ৰা চম্মেন ৰা তিপুসীসাদীনং পট্টেন ৰা পটিচ্ছন্নো. সন্থতো নাম যস্স অঙ্গজাতং তেসংযেৰ ৰত্থাদীনং যেন কেনচি পটিচ্ছন্নং. তত্থ উপাদিন্নকেন ৰা অনুপাদিন্নকং ঘট্টিযতু, অনুপাদিন্নকেন ৰা উপাদিন্নকং, অনুপাদিন্নকেন ৰা অনুপাদিন্নকং, উপাদিন্নকেন ৰা উপাদিন্নকং, সচে যত্তকে পৰিট্ঠে পারাজিকং হোতীতি ৰুত্তং, তত্তকং পৰিসতি, সব্বত্থ সাদিযন্তস্স পারাজিকক্খেত্তে পারাজিকং; থুল্লচ্চযক্খেত্তে থুল্লচ্চযং, দুক্কটক্খেত্তে দুক্কটমেৰ হোতি. সচে ইত্থিনিমিত্তং খাণুং কত্ৰা সন্থতং, খাণুং ঘট্টেন্তস্স দুক্কটং. সচে পুরিসনিমিত্তং খাণুং কত্ৰা সন্থতং, খাণুং পৰেসেন্তস্স দুক্কটং. সচে উভযং খাণুং কত্ৰা সন্থতং, খাণুনা খাণুং ঘট্টেন্তস্স দুক্কটং. সচে ইত্থিনিমিত্তে ৰেল়ুনল়পব্বাদীনং কিঞ্চি পক্খিত্তং, তস্স হেট্ঠাভাগং চেপি ফুসন্তো তিলফলমত্তং পৰেসেতি, পারাজিকং. উপরিভাগং চেপি উভোসু পস্সেসু একপস্সং চেপি ফুসন্তো পৰেসেতি, পারাজিকং. চত্তারিপি পস্সানি অফুসন্তো পৰেসেত্ৰা তস্স তলং চেপি ফুসতি, পারাজিকং. যদি পন পস্সেসু ৰা তলে ৰা অফুসন্তো আকাসগতমেৰ কত্ৰা পৰেসেত্ৰা নীহরতি, দুক্কটং. বহিদ্ধা খাণুকে ফুসতি দুক্কটমেৰ. যথা চ ইত্থিনিমিত্তে ৰুত্তং, এৰং সব্বত্থ লক্খণং ৰেদিতব্বন্তি.

সন্থতচতুক্কভেদকথা নিট্ঠিতা.