ততিযসঙ্গীতিকথা

তিস্সোপি খো মহাব্রহ্মা ব্রহ্মলোকতো চৰিত্ৰা মোগ্গলিব্রাহ্মণস্স গেহে পটিসন্ধিং অগ্গহেসি. সিগ্গৰত্থেরোপি তস্স পটিসন্ধিগ্গহণতো পভুতি সত্ত ৰস্সানি ব্রাহ্মণস্স গেহং পিণ্ডায পাৰিসি. একদিৰসম্পি উল়ুঙ্কমত্তং ৰা যাগুং কটচ্ছুমত্তং ৰা ভত্তং নালত্থ. সত্তন্নং পন ৰস্সানং অচ্চযেন একদিৰসং ‘‘অতিচ্ছথ, ভন্তে’’তি ৰচনমত্তং অলত্থ. তংদিৰসমেৰ ব্রাহ্মণোপি বহিদ্ধা কিঞ্চি করণীযং কত্ৰা আগচ্ছন্তো পটিপথে থেরং দিস্ৰা, ‘‘ভো পব্বজিত, অম্হাকং গেহং অগমিত্থা’’তি আহ. ‘‘আম, ব্রাহ্মণ, অগমিম্হা’’তি. ‘‘অপি কিঞ্চি লভিত্থা’’তি? ‘‘আম, ব্রাহ্মণ, লভিম্হা’’তি. সো গেহং গন্ত্ৰা পুচ্ছি – ‘‘তস্স পব্বজিতস্স কিঞ্চি অদত্থা’’তি? ‘‘ন কিঞ্চি অদম্হা’’তি. ব্রাহ্মণো দুতিযদিৰসে ঘরদ্ৰারেযেৰ নিসীদি ‘‘অজ্জ পব্বজিতং মুসাৰাদেন নিগ্গহেস্সামী’’তি. থেরো দুতিযদিৰসে ব্রাহ্মণস্স ঘরদ্ৰারং সম্পত্তো. ব্রাহ্মণো থেরং দিস্ৰাৰ এৰমাহ – ‘‘তুম্হে হিয্যো অম্হাকং গেহে কিঞ্চি অলদ্ধাযেৰ ‘লভিম্হা’তি অৰোচুত্থ. ৰট্টতি নু খো তুম্হাকং মুসাৰাদো’’তি! থেরো আহ – ‘‘মযং, ব্রাহ্মণ, তুম্হাকং গেহে সত্ত ৰস্সানি ‘অতিচ্ছথা’তি ৰচনমত্তম্পি অলভিত্ৰা হিয্যো ‘অতিচ্ছথা’তি ৰচনমত্তং লভিম্হ; অথেতং পটিসন্থারং উপাদায এৰমৰোচুম্হা’’তি.

ব্রাহ্মণো চিন্তেসি – ‘‘ইমে পটিসন্থারমত্তম্পি লভিত্ৰা ‘লভিম্হা’তি পসংসন্তি, অঞ্ঞং কিঞ্চি খাদনীযং ভোজনীযং লভিত্ৰা কস্মা ন পসংসন্তী’’তি পসীদিত্ৰা অত্তনো অত্থায পটিযাদিতভত্ততো কটচ্ছুমত্তং ভিক্খং তদুপিযঞ্চ ব্যঞ্জনং দাপেত্ৰা ‘‘ইমং ভিক্খং সব্বকালং তুম্হে লভিস্সথা’’তি আহ. সো পুনদিৰসতো পভুতি উপসঙ্কমন্তস্স থেরস্স উপসমং দিস্ৰা ভিয্যোসোমত্তায পসীদিত্ৰা থেরং নিচ্চকালং অত্তনো ঘরে ভত্তৰিস্সগ্গকরণত্থায যাচি. থেরো অধিৰাসেত্ৰা দিৰসে দিৰসে ভত্তকিচ্চং কত্ৰা গচ্ছন্তো থোকং থোকং বুদ্ধৰচনং কথেত্ৰা গচ্ছতি. সোপি খো মাণৰকো সোল়সৰস্সুদ্দেসিকোযেৰ তিণ্ণং ৰেদানং পারগূ অহোসি. ব্রহ্মলোকতো আগতসুদ্ধসত্তস্স আসনে ৰা সযনে ৰা অঞ্ঞো কোচি নিসজ্জিতা ৰা নিপজ্জিতা ৰা নত্থি. সো যদা আচরিযঘরং গচ্ছতি, তদাস্স মঞ্চপীঠং সেতেন ৰত্থেন পটিচ্ছাদেত্ৰা লগ্গেত্ৰা ঠপেন্তি. থেরো চিন্তেসি – ‘‘সমযো দানি মাণৰকং পব্বাজেতুং, চিরঞ্চ মে ইধাগচ্ছন্তস্স, ন চ কাচি মাণৰকেন সদ্ধিং কথা উপ্পজ্জতি. হন্দ দানি ইমিনা উপাযেন পল্লঙ্কং নিস্সায উপ্পজ্জিস্সতী’’তি গেহং গন্ত্ৰা যথা তস্মিং গেহে ঠপেত্ৰা মাণৰকস্স পল্লঙ্কং অঞ্ঞং ন কিঞ্চি আসনং দিস্সতি তথা অধিট্ঠাসি. ব্রাহ্মণস্স গেহজনো থেরং দিস্ৰা অঞ্ঞং কিঞ্চি আসনং অপস্সন্তো মাণৰকস্স পল্লঙ্কং অত্থরিত্ৰা থেরস্স অদাসি. নিসীদি থেরো পল্লঙ্কে. মাণৰকোপি খো তঙ্খণঞ্ঞেৰ আচরিযঘরা আগম্ম থেরং অত্তনো পল্লঙ্কে নিসিন্নং দিস্ৰা কুপিতো অনত্তমনো ‘‘কো মম পল্লঙ্কং সমণস্স পঞ্ঞপেসী’’তি আহ.

থেরো ভত্তকিচ্চং কত্ৰা ৰূপসন্তে মাণৰকস্স চণ্ডিক্কভাৰে এৰমাহ – ‘‘কিং পন ত্ৰং, মাণৰক, কিঞ্চি মন্তং জানাসী’’তি? মাণৰকো ‘‘ভো পব্বজিত, মযি দানি মন্তে অজানন্তে অঞ্ঞে কে জানিস্সন্তী’’তি ৰত্ৰা, থেরং পুচ্ছি – ‘‘তুম্হে পন মন্তং জানাথা’’তি? ‘‘পুচ্ছ, মাণৰক, পুচ্ছিত্ৰা সক্কা জানিতু’’ন্তি. অথ খো মাণৰকো তীসু ৰেদেসু সনিঘণ্ডুকেটুভেসু সাক্খরপ্পভেদেসু ইতিহাসপঞ্চমেসু যানি যানি গণ্ঠিট্ঠানানি, যেসং যেসং নযং নেৰ অত্তনা পস্সতি নাপিস্স আচরিযো অদ্দস, তেসু তেসু থেরং পুচ্ছি. থেরো ‘‘পকতিযাপি তিণ্ণং ৰেদানং পারগূ, ইদানি পন পটিসম্ভিদাপ্পত্তো, তেনস্স নত্থি তেসং পঞ্হানং ৰিস্সজ্জনে ভারো’’তি তাৰদেৰ তে পঞ্হে ৰিস্সজ্জেত্ৰা মাণৰকং আহ – ‘‘মাণৰক, অহং তযা বহুং পুচ্ছিতো; অহম্পি দানি তং একং পঞ্হং পুচ্ছামি, ব্যাকরিস্সসি মে’’তি? ‘‘আম, ভো পব্বজিত, পুচ্ছ ব্যাকরিস্সামী’’তি. থেরো চিত্তযমকে ইমং পঞ্হং পুচ্ছি –

‘‘যস্স চিত্তং উপ্পজ্জতি ন নিরুজ্ঝতি তস্স চিত্তং নিরুজ্ঝিস্সতি নুপ্পজ্জিস্সতি; যস্স ৰা পন চিত্তং নিরুজ্ঝিস্সতি নুপ্পজ্জিস্সতি তস্স চিত্তং উপ্পজ্জতি ন নিরুজ্ঝতী’’তি?

মাণৰো উদ্ধং ৰা অধো ৰা হরিতুং অসক্কোন্তো ‘‘কিং নাম, ভো পব্বজিত, ইদ’’ন্তি আহ. ‘‘বুদ্ধমন্তো নামাযং, মাণৰা’’তি. ‘‘সক্কা পনাযং, ভো, ময্হম্পি দাতু’’ন্তি. ‘‘সক্কা মাণৰ, অম্হেহি গহিতপব্বজ্জং গণ্হন্তস্স দাতু’’ন্তি. ততো মাণৰো মাতাপিতরো উপসঙ্কমিত্ৰা আহ – ‘‘অযং পব্বজিতো বুদ্ধমন্তং নাম জানাতি, ন চ অত্তনো সন্তিকে অপব্বজিতস্স দেতি, অহং এতস্স সন্তিকে পব্বজিত্ৰা মন্তং উগ্গণ্হিস্সামী’’তি.

অথস্স মাতাপিতরো ‘‘পব্বজিত্ৰাপি নো পুত্তো মন্তে গণ্হতু, গহেত্ৰা পুনাগমিস্সতী’’তি মঞ্ঞমানা ‘‘উগ্গণ্হ, পুত্তা’’তি অনুজানিংসু. থেরো দারকং পব্বাজেত্ৰা দ্ৰত্তিংসাকারকম্মট্ঠানং তাৰ আচিক্খি. সো তত্থ পরিকম্মং করোন্তো নচিরস্সেৰ সোতাপত্তিফলে পতিট্ঠহি. ততো থেরো চিন্তেসি – ‘‘সামণেরো সোতাপত্তিফলে পতিট্ঠিতো, অভব্বো দানি সাসনতো নিৰত্তিতুং. সচে পনস্সাহং কম্মট্ঠানং ৰড্ঢেত্ৰা কথেয্যং, অরহত্তং পাপুণেয্য, অপ্পোস্সুক্কো ভৰেয্য বুদ্ধৰচনং গহেতুং, সমযো দানি নং চণ্ডৰজ্জিত্থেরস্স সন্তিকং পেসেতু’’ন্তি. ততো আহ – ‘‘এহি ত্ৰং, সামণের, থেরস্স সন্তিকং গন্ত্ৰা বুদ্ধৰচনং উগ্গণ্হ. মম ৰচনেন তঞ্চ আরোগ্যং পুচ্ছ; এৰঞ্চ ৰদেহি – ‘উপজ্ঝাযো মং, ভন্তে, তুম্হাকং সন্তিকং পহিণী’তি. ‘কো নাম তে উপজ্ঝাযো’তি চ ৰুত্তে ‘সিগ্গৰত্থেরো নাম, ভন্তে’তি ৰদেয্যাসি. ‘অহং কো নামা’তি ৰুত্তে এৰং ৰদেয্যাসি – ‘মম উপজ্ঝাযো, ভন্তে, তুম্হাকং নামং জানাতী’’’তি.

‘‘এৰং, ভন্তে’’তি খো তিস্সো সামণেরো থেরং অভিৰাদেত্ৰা পদক্খিণং কত্ৰা অনুপুব্বেন চণ্ডৰজ্জিত্থেরস্স সন্তিকং গন্ত্ৰা ৰন্দিত্ৰা একমন্তং অট্ঠাসি. থেরো সামণেরং পুচ্ছি – ‘‘কুতো আগতোসী’’তি? ‘‘উপজ্ঝাযো মং, ভন্তে, তুম্হাকং সন্তিকং পহিণী’’তি. ‘‘কো নাম তে উপজ্ঝাযো’’তি? ‘‘সিগ্গৰত্থেরো নাম, ভন্তে’’তি. ‘‘অহং কো নামা’’তি? ‘‘মম উপজ্ঝাযো, ভন্তে, তুম্হাকং নামং জানাতী’’তি. ‘‘পত্তচীৰরং দানি পটিসামেহী’’তি. ‘‘সাধু, ভন্তে’’তি সামণেরো পত্তচীৰরং পটিসামেত্ৰা পুনদিৰসে পরিৰেণং সম্মজ্জিত্ৰা উদকদন্তপোনং উপট্ঠাপেসি. থেরো তস্স সম্মজ্জিতট্ঠানং পুন সম্মজ্জি. তং উদকং ছড্ডেত্ৰা অঞ্ঞং উদকং আহরি. তঞ্চ দন্তকট্ঠং অপনেত্ৰা অঞ্ঞং দন্তকট্ঠং গণ্হি. এৰং সত্ত দিৰসানি কত্ৰা সত্তমে দিৰসে পুন পুচ্ছি. সামণেরো পুনপি পুব্বে কথিতসদিসমেৰ কথেসি. থেরো ‘‘সো ৰতাযং ব্রাহ্মণো’’তি সঞ্জানিত্ৰা ‘‘কিমত্থং আগতোসী’’তি আহ. ‘‘বুদ্ধৰচনং উগ্গণ্হত্থায, ভন্তে’’তি. থেরো ‘‘উগ্গণ্হ দানি, সামণেরা’’তি ৰত্ৰা পুন দিৰসতো পভুতি বুদ্ধৰচনং পট্ঠপেসি. তিস্সো সামণেরোৰ হুত্ৰা, ঠপেত্ৰা ৰিনযপিটকং সব্বং বুদ্ধৰচনং উগ্গণ্হি সদ্ধিং অট্ঠকথায. উপসম্পন্নকালে পন অৰস্সিকোৰ সমানো তিপিটকধরো অহোসি. আচরিযুপজ্ঝাযা মোগ্গলিপুত্ততিস্সত্থেরস্স হত্থে সকলং বুদ্ধৰচনং পতিট্ঠাপেত্ৰা যাৰতাযুকং ঠত্ৰা পরিনিব্বাযিংসু. মোগ্গলিপুত্ততিস্সত্থেরোপি অপরেন সমযেন কম্মট্ঠানং ৰড্ঢেত্ৰা অরহত্তপ্পত্তো বহূনং ধম্মৰিনযং ৰাচেসি.

তেন খো পন সমযেন বিন্দুসারস্স রঞ্ঞো একসতপুত্তা অহেসুং. তে সব্বে অসোকো অত্তনা সদ্ধিং একমাতিকং তিস্সকুমারং ঠপেত্ৰা ঘাতেসি. ঘাতেন্তো চ চত্তারি ৰস্সানি অনভিসিত্তোৰ রজ্জং কারেত্ৰা চতুন্নং ৰস্সানং অচ্চযেন তথাগতস্স পরিনিব্বানতো দ্ৰিন্নং ৰস্সসতানং উপরি অট্ঠারসমে ৰস্সে সকলজম্বুদীপে একরজ্জাভিসেকং পাপুণি. অভিসেকানুভাৰেন চস্স ইমা রাজিদ্ধিযো আগতা – মহাপথৰিযা হেট্ঠা যোজনপ্পমাণে আণা পৰত্ততি; তথা উপরি আকাসে অনোতত্তদহতো অট্ঠহি কাজেহি সোল়স পানীযঘটে দিৰসে দিৰসে দেৰতা আহরন্তি, যতো সাসনে উপ্পন্নসদ্ধো হুত্ৰা অট্ঠ ঘটে ভিক্খুসঙ্ঘস্স অদাসি, দ্ৰে ঘটে সট্ঠিমত্তানং তিপিটকধরভিক্খূনং, দ্ৰে ঘটে অগ্গমহেসিযা অসন্ধিমিত্তায, চত্তারো ঘটে অত্তনা পরিভুঞ্জি; দেৰতাএৰ হিমৰন্তে নাগলতাদন্তকট্ঠং নাম অত্থি সিনিদ্ধং মুদুকং রসৰন্তং তং দিৰসে দিৰসে আহরন্তি, যেন রঞ্ঞো চ মহেসিযা চ সোল়সন্নঞ্চ নাটকিত্থিসহস্সানং সট্ঠিমত্তানঞ্চ ভিক্খুসহস্সানং দেৰসিকং দন্তপোনকিচ্চং নিপ্পজ্জতি. দেৰসিকমেৰ চস্স দেৰতা অগদামলকং অগদহরীতকং সুৰণ্ণৰণ্ণঞ্চ গন্ধরসসম্পন্নং অম্বপক্কং আহরন্তি. তথা ছদ্দন্তদহতো পঞ্চৰণ্ণনিৰাসনপাৰুরণং পীতকৰণ্ণহত্থপুচ্ছনপটকং দিব্বঞ্চ পানকং আহরন্তি. দেৰসিকমেৰ পনস্স ন্হানগন্ধং অনুৰিলেপনগন্ধং পারুপনত্থায অসুত্তমযিকং সুমনপুপ্ফপটং মহারহঞ্চ অঞ্জনং নাগভৰনতো নাগরাজানো আহরন্তি. ছদ্দন্তদহেৰ উট্ঠিতস্স সালিনো নৰ ৰাহসহস্সানি দিৰসে দিৰসে সুকা আহরন্তি. মূসিকা নিত্থুসকণে করোন্তি, একোপি খণ্ডতণ্ডুলো ন হোতি, রঞ্ঞো সব্বট্ঠানেসু অযমেৰ তণ্ডুলো পরিভোগং গচ্ছতি. মধুমক্খিকা মধুং করোন্তি. কম্মারসালাসু অচ্ছা কূটং পহরন্তি. করৰীকসকুণা আগন্ত্ৰা মধুরস্সরং ৰিকূজন্তা রঞ্ঞো বলিকম্মং করোন্তি.

ইমাহি ইদ্ধীহি সমন্নাগতো রাজা একদিৰসং সুৰণ্ণসঙ্খলিকবন্ধনং পেসেত্ৰা চতুন্নং বুদ্ধানং অধিগতরূপদস্সনং কপ্পাযুকং কাল়ং নাম নাগরাজানং আনযিত্ৰা সেতচ্ছত্তস্স হেট্ঠা মহারহে পল্লঙ্কে নিসীদাপেত্ৰা অনেকসতৰণ্ণেহি জলজ থলজপুপ্ফেহি সুৰণ্ণপুপ্ফেহি চ পূজং কত্ৰা সব্বালঙ্কারপটিমণ্ডিতেহি সোল়সহি নাটকিত্থিসহস্সেহি সমন্ততো পরিক্খিপিত্ৰা ‘‘অনন্তঞাণস্স তাৰ মে সদ্ধম্মৰরচক্কৰত্তিনো সম্মাসম্বুদ্ধস্স রূপং ইমেসং অক্খীনং আপাথং করোহী’’তি ৰত্ৰা তেন নিম্মিতং সকলসরীরৰিপ্পকিণ্ণপুঞ্ঞপ্পভাৰনিব্বত্তাসীতানুব্যঞ্জনপটিমণ্ডিতদ্ৰত্তিংসমহাপুরিসলক্খণসস্সিরীকতায ৰিকসিতকমলুপ্পলপুণ্ডরীকপটিমণ্ডিতমিৰ সলিলতলং তারাগণরস্মিজালৰিসদৰিপ্ফুরিতসোভাসমুজ্জলিতমিৰ গগনতলং নীলপীতলোহিতাদিভেদৰিচিত্রৰণ্ণরংসিৰিনদ্ধব্যামপ্পভাপরিক্খেপৰিলাসিতায সঞ্চাপ্পভানুরাগইন্দধনুৰিজ্জুলতাপরিক্খিত্তমিৰ কনকগিরিসিখরং নানাৰিরাগৰিমলকেতুমালাসমুজ্জলিতচারুমত্থকসোভং নযনরসাযতনমিৰ ব্রহ্মদেৰমনুজনাগযক্খগণানং বুদ্ধরূপং পস্সন্তো সত্ত দিৰসানি অক্খিপূজং নাম অকাসি.

রাজা কির অভিসেকং পাপুণিত্ৰা তীণিযেৰ সংৰচ্ছরানি বাহিরকপাসণ্ডং পরিগ্গণ্হি. চতুত্থে সংৰচ্ছরে বুদ্ধসাসনে পসীদি. তস্স কির পিতা বিন্দুসারো ব্রাহ্মণভত্তো অহোসি, সো ব্রাহ্মণানঞ্চ ব্রাহ্মণজাতিযপাসণ্ডানঞ্চ পণ্ডরঙ্গপরিব্বাজকাদীনং সট্ঠিসহস্সমত্তানং নিচ্চভত্তং পট্ঠপেসি. অসোকোপি পিতরা পৰত্তিতং দানং অত্তনো অন্তেপুরে তথেৰ দদমানো একদিৰসং সীহপঞ্জরে ঠিতো তে উপসমপরিবাহিরেন আচারেন ভুঞ্জমানে অসংযতিন্দ্রিযে অৰিনীতইরিযাপথে দিস্ৰা চিন্তেসি – ‘‘ঈদিসং দানং উপপরিক্খিত্ৰা যুত্তট্ঠানে দাতুং ৰট্টতী’’তি. এৰং চিন্তেত্ৰা অমচ্চে আহ – ‘‘গচ্ছথ, ভণে, অত্তনো অত্তনো সাধুসম্মতে সমণব্রাহ্মণে অন্তেপুরং অতিহরথ, দানং দস্সামা’’তি. অমচ্চা ‘‘সাধু, দেৰা’’তি রঞ্ঞো পটিস্সুণিত্ৰা তে তে পণ্ডরঙ্গপরিব্বাজকাজীৰকনিগণ্ঠাদযো আনেত্ৰা ‘‘ইমে, মহারাজ, অম্হাকং অরহন্তো’’তি আহংসু.

অথ রাজা অন্তেপুরে উচ্চাৰচানি আসনানি পঞ্ঞপেত্ৰা ‘‘আগচ্ছন্তূ’’তি ৰত্ৰা আগতাগতে আহ – ‘‘অত্তনো অত্তনো পতিরূপে আসনে নিসীদথা’’তি. তেসু একচ্চে ভদ্দপীঠকেসু, একচ্চে ফলকপীঠকেসু নিসীদিংসু. তে দিস্ৰা রাজা ‘‘নত্থি নেসং অন্তো সারো’’তি ঞত্ৰা তেসং অনুরূপং খাদনীযং ভোজনীযং দত্ৰা উয্যোজেসি.

এৰং গচ্ছন্তে কালে একদিৰসং রাজা সীহপঞ্জরে ঠিতো অদ্দস নিগ্রোধসামণেরং রাজঙ্গণেন গচ্ছন্তং দন্তং গুত্তং সন্তিন্দ্রিযং ইরিযাপথসম্পন্নং. কো পনাযং নিগ্রোধো নাম? বিন্দুসাররঞ্ঞো জেট্ঠপুত্তস্স সুমনরাজকুমারস্স পুত্তো.

তত্রাযং অনুপুব্বিকথা –

বিন্দুসাররঞ্ঞো কির দুব্বলকালেযেৰ অসোককুমারো অত্তনা লদ্ধং উজ্জেনীরজ্জং পহায আগন্ত্ৰা সব্বনগরং অত্তনো হত্থগতং কত্ৰা সুমনরাজকুমারং অগ্গহেসি. তংদিৰসমেৰ সুমনস্স রাজকুমারস্স সুমনা নাম দেৰী পরিপুণ্ণগব্ভা অহোসি. সা অঞ্ঞাতকৰেসেন নিক্খমিত্ৰা অৰিদূরে অঞ্ঞতরং চণ্ডালগামং সন্ধায গচ্ছন্তী জেট্ঠকচণ্ডালস্স গেহতো অৰিদূরে অঞ্ঞতরস্মিং নিগ্রোধরুক্খে অধিৰত্থায দেৰতায ‘‘ইতো এহি, সুমনে’’তি ৰদন্তিযা সদ্দং সুত্ৰা তস্সা সমীপং গতা. দেৰতা অত্তনো আনুভাৰেন একং সালং নিম্মিনিত্ৰা ‘‘এত্থ ৰসাহী’’তি অদাসি. সা তং সালং পাৰিসি. গতদিৰসেযেৰ চ পুত্তং ৰিজাযি. সা তস্স নিগ্রোধদেৰতায পরিগ্গহিতত্তা ‘‘নিগ্রোধো’’ ত্ৰেৰ নামং অকাসি. জেট্ঠকচণ্ডালো দিট্ঠদিৰসতো পভুতি তং অত্তনো সামিধীতরং ৰিয মঞ্ঞমানো নিবদ্ধৰত্তং পট্ঠপেসি. রাজধীতা তত্থ সত্ত ৰস্সানি ৰসি. নিগ্রোধকুমারোপি সত্তৰস্সিকো জাতো. তদা মহাৰরুণত্থেরো নাম একো অরহা দারকস্স হেতুসম্পদং দিস্ৰা রক্খিত্ৰা তত্থ ৰিহরমানো ‘‘সত্তৰস্সিকো দানি দারকো, কালো নং পব্বাজেতু’’ন্তি চিন্তেত্ৰা রাজধীতায আরোচাপেত্ৰা নিগ্রোধকুমারং পব্বাজেসি. কুমারো খুরগ্গেযেৰ অরহত্তং পাপুণি. সো একদিৰসং পাতোৰ সরীরং জগ্গিত্ৰা আচরিযুপজ্ঝাযৰত্তং কত্ৰা পত্তচীৰরমাদায ‘‘মাতুউপাসিকায গেহদ্ৰারং গচ্ছামী’’তি নিক্খমি. মাতুনিৰাসনট্ঠানঞ্চস্স দক্খিণদ্ৰারেন নগরং পৰিসিত্ৰা নগরমজ্ঝেন গন্ত্ৰা পাচীনদ্ৰারেন নিক্খমিত্ৰা গন্তব্বং হোতি.

তেন চ সমযেন অসোকো ধম্মরাজা পাচীনদিসাভিমুখো সীহপঞ্জরে চঙ্কমতি. তঙ্খণঞ্ঞেৰ নিগ্রোধো রাজঙ্গণং সম্পাপুণি সন্তিন্দ্রিযো সন্তমানসো যুগমত্তং পেক্খমানো. তেন ৰুত্তং – ‘‘একদিৰসং রাজা সীহপঞ্জরে ঠিতো অদ্দস নিগ্রোধসামণেরং রাজঙ্গণেন গচ্ছন্তং দন্তং গুত্তং সন্তিন্দ্রিযং ইরিযাপথসম্পন্ন’’ন্তি. দিস্ৰা পনস্স এতদহোসি – ‘‘অযং জনো সব্বোপি ৰিক্খিত্তচিত্তো ভন্তমিগপ্পটিভাগো. অযং পন দারকো অৰিক্খিত্তচিত্তো অতিৰিয চস্স আলোকিতৰিলোকিতং সমিঞ্জনপসারণঞ্চ সোভতি. অদ্ধা এতস্স অব্ভন্তরে লোকুত্তরধম্মো ভৰিস্সতী’’তি রঞ্ঞো সহ দস্সনেনেৰ সামণেরে চিত্তং পসীদি, পেমং সণ্ঠহি. কস্মা? পুব্বে হি কির পুঞ্ঞকরণকালে এস রঞ্ঞো জেট্ঠভাতা ৰাণিজকো অহোসি. ৰুত্তম্পি হেতং –

‘‘পুব্বে ৰ সন্নিৰাসেন, পচ্চুপ্পন্নহিতেন ৰা;

এৰং তং জাযতে পেমং, উপ্পলং ৰ যথোদকে’’তি. (জা. ১.২.১৭৪);

অথ রাজা সঞ্জাতপেমো সবহুমানো ‘‘এতং সামণেরং পক্কোসথা’’তি অমচ্চে পেসেসি. ‘‘তে অতিচিরাযন্তী’’তি পুন দ্ৰে তযো পেসেসি – ‘‘তুরিতং আগচ্ছতূ’’তি. সামণেরো অত্তনো পকতিযা এৰ অগমাসি. রাজা পতিরূপমাসনং ঞত্ৰা ‘‘নিসীদথা’’তি আহ. সো ইতো চিতো চ ৰিলোকেত্ৰা ‘‘নত্থি দানি অঞ্ঞে ভিক্খূ’’তি সমুস্সিতসেতচ্ছত্তং রাজপল্লঙ্কং উপসঙ্কমিত্ৰা পত্তগ্গহণত্থায রঞ্ঞো আকারং দস্সেসি. রাজা তং পল্লঙ্কসমীপং উপগচ্ছন্তংযেৰ দিস্ৰা চিন্তেসি – ‘‘অজ্জেৰ দানি অযং সামণেরো ইমস্স গেহস্স সামিকো ভৰিস্সতী’’তি সামণেরো রঞ্ঞো হত্থে পত্তং দত্ৰা পল্লঙ্কং অভিরুহিত্ৰা নিসীদি. রাজা অত্তনো অত্থায সম্পাদিতং সব্বং যাগুখজ্জকভত্তৰিকতিং উপনামেসি. সামণেরো অত্তনো যাপনীযমত্তকমেৰ সম্পটিচ্ছি. ভত্তকিচ্চাৰসানে রাজা আহ – ‘‘সত্থারা তুম্হাকং দিন্নোৰাদং জানাথা’’তি? ‘‘জানামি, মহারাজ, একদেসেনা’’তি. ‘‘তাত, ময্হম্পি নং কথেহী’’তি. ‘‘সাধু, মহারাজা’’তি রঞ্ঞো অনুরূপং ধম্মপদে অপ্পমাদৰগ্গং অনুমোদনত্থায অভাসি.

রাজা পন ‘‘অপ্পমাদো অমতপদং, পমাদো মচ্চুনো পদ’’ন্তি সুত্ৰাৰ ‘‘অঞ্ঞাতং, তাত, পরিযোসাপেহী’’তি আহ. অনুমোদনাৰসানে চ ‘‘অট্ঠ তে, তাত, ধুৰভত্তানি দম্মী’’তি আহ. সামণেরো আহ – ‘‘এতানি অহং উপজ্ঝাযস্স দম্মি, মহারাজা’’তি. ‘‘কো অযং, তাত, উপজ্ঝাযো নামা’’তি? ‘‘ৰজ্জাৰজ্জং দিস্ৰা চোদেতা সারেতা চ, মহারাজা’’তি. ‘‘অঞ্ঞানিপি তে, তাত, অট্ঠ দম্মী’’তি. ‘‘এতানি আচরিযস্স দম্মি, মহারাজা’’তি. ‘‘কো অযং, তাত, আচরিযো নামা’’তি? ‘‘ইমস্মিং সাসনে সিক্খিতব্বকধম্মেসু পতিট্ঠাপেতা, মহারাজা’’তি. ‘‘সাধু, তাত, অঞ্ঞানিপি তে অট্ঠ দম্মী’’তি. ‘‘এতানিপি ভিক্খুসঙ্ঘস্স দম্মি, মহারাজা’’তি. ‘‘কো অযং, তাত, ভিক্খুসঙ্ঘো নামা’’তি? ‘‘যং নিস্সায, মহারাজ, অম্হাকং আচরিযুপজ্ঝাযানঞ্চ মম চ পব্বজ্জা চ উপসম্পদা চা’’তি. রাজা ভিয্যোসো মত্তায তুট্ঠচিত্তো আহ – ‘‘অঞ্ঞানিপি তে, তাত, অট্ঠ দম্মী’’তি. সামণেরো ‘‘সাধূ’’তি সম্পটিচ্ছিত্ৰা পুনদিৰসে দ্ৰত্তিংস ভিক্খূ গহেত্ৰা রাজন্তেপুরং পৰিসিত্ৰা ভত্তকিচ্চমকাসি. রাজা ‘‘অঞ্ঞেপি দ্ৰত্তিংস ভিক্খূ তুম্হেহি সদ্ধিং স্ৰে ভিক্খং গণ্হন্তূ’’তি এতেনেৰ উপাযেন দিৰসে দিৰসে ৰড্ঢাপেন্তো সট্ঠিসহস্সানং ব্রাহ্মণপরিব্বাজকাদীনং ভত্তং উপচ্ছিন্দিত্ৰা অন্তোনিৰেসনে সট্ঠিসহস্সানং ভিক্খূনং নিচ্চভত্তং পট্ঠপেসি নিগ্রোধত্থেরে গতেনেৰ পসাদেন. নিগ্রোধত্থেরোপি রাজানং সপরিসং তীসু সরণেসু পঞ্চসু চ সীলেসু পতিট্ঠাপেত্ৰা বুদ্ধসাসনে পোথুজ্জনিকেন পসাদেন অচলপ্পসাদং কত্ৰা পতিট্ঠাপেসি. পুন রাজা অসোকারামং নাম মহাৰিহারং কারেত্ৰা সট্ঠিসহস্সানং ভিক্খূনং নিচ্চভত্তং পট্ঠপেসি. সকলজম্বুদীপে চতুরাসীতিযা নগরসহস্সেসু চতুরাসীতিৰিহারসহস্সানি কারাপেসি চতুরাসীতিসহস্সচেতিযপটিমণ্ডিতানি ধম্মেনেৰ, নো অধম্মেন.

একদিৰসং কির রাজা অসোকারামে মহাদানং দত্ৰা সট্ঠিসহস্সভিক্খুসঙ্ঘস্স মজ্ঝে নিসজ্জ সঙ্ঘং চতূহি পচ্চযেহি পৰারেত্ৰা ইমং পঞ্হং পুচ্ছি – ‘‘ভন্তে, ভগৰতা দেসিতধম্মো নাম কিত্তকো হোতী’’তি? ‘‘অঙ্গতো, মহারাজ, নৰঙ্গানি, খন্ধতো চতুরাসীতিধম্মক্খন্ধসহস্সানী’’তি. রাজা ধম্মে পসীদিত্ৰা ‘‘একেকং ধম্মক্খন্ধং একেকৰিহারেন পূজেস্সামী’’তি একদিৰসমেৰ ছন্নৰুতিকোটিধনং ৰিসজ্জেত্ৰা অমচ্চে আণাপেসি – ‘‘এথ, ভণে, একমেকস্মিং নগরে একমেকং ৰিহারং কারাপেন্তা চতুরাসীতিযা নগরসহস্সেসু চতুরাসীতিৰিহারসহস্সানি কারাপেথা’’তি. সযঞ্চ অসোকারামে অসোকমহাৰিহারত্থায কম্মং পট্ঠপেসি. সঙ্ঘো ইন্দগুত্তত্থেরং নাম মহিদ্ধিকং মহানুভাৰং খীণাসৰং নৰকম্মাধিট্ঠাযকং অদাসি. থেরো যং যং ন নিট্ঠাতি তং তং অত্তনো আনুভাৰেন নিট্ঠাপেসি. এৰম্পি তীহি সংৰচ্ছরেহি ৰিহারকম্মং নিট্ঠাপেসি. একদিৰসমেৰ সব্বনগরেহি পণ্ণানি আগমিংসু.

অমচ্চা রঞ্ঞো আরোচেসুং – ‘‘নিট্ঠিতানি, দেৰ, চতুরাসীতিৰিহারসহস্সানী’’তি. রাজা নগরে ভেরিং চরাপেসি – ‘‘ইতো সত্তন্নং দিৰসানং অচ্চযেন ৰিহারমহো ভৰিস্সতি. সব্বে অট্ঠ সীলঙ্গানি সমাদিযিত্ৰা অন্তোনগরে চ বহিনগরে চ ৰিহারমহং পটিযাদেন্তূ’’তি. ততো সত্তন্নং দিৰসানং অচ্চযেন সব্বালঙ্কারৰিভূসিতায অনেকসতসহস্সসঙ্খ্যায চতুরঙ্গিনিযা সেনায পরিৰুতো দেৰলোকে অমরৰতিযা রাজধানিযা সিরিতো অধিকতরসস্সিরীকং ৰিয নগরং কাতুকামেন উস্সাহজাতেন মহাজনেন অলঙ্কতপটিযত্তং নগরং অনুৰিচরন্তো ৰিহারং গন্ত্ৰা ভিক্খুসঙ্ঘস্স মজ্ঝে অট্ঠাসি.

তস্মিঞ্চ খণে সন্নিপতিতা অসীতি ভিক্খুকোটিযো অহেসুং, ভিক্খুনীনঞ্চ ছন্নৰুতিসতসহস্সানি. তত্থ খীণাসৰভিক্খূযেৰ সতসহস্সসঙ্খ্যা অহেসুং. তেসং এতদহোসি – ‘‘সচে রাজা অত্তনো অধিকারং অনৰসেসং পস্সেয্য অতিৰিয বুদ্ধসাসনে পসীদেয্যা’’তি. ততো লোকৰিৰরণং নাম পাটিহারিযং অকংসু. রাজা অসোকারামে ঠিতোৰ চতুদ্দিসা অনুৰিলোকেন্তো সমন্ততো সমুদ্দপরিযন্তং জম্বুদীপং পস্সতি চতুরাসীতিঞ্চ ৰিহারসহস্সানি উল়ারায ৰিহারমহপূজায ৰিরোচমানানি. সো তং ৰিভূতিং পস্সমানো উল়ারেন পীতিপামোজ্জেন সমন্নাগতো ‘‘অত্থি পন অঞ্ঞস্সপি কস্সচি এৰরূপং পীতিপামোজ্জং উপ্পন্নপুব্ব’’ন্তি চিন্তেন্তো ভিক্খুসঙ্ঘং পুচ্ছি – ‘‘ভন্তে, অম্হাকং লোকনাথস্স দসবলস্স সাসনে কো মহাপরিচ্চাগং পরিচ্চজি. কস্স পরিচ্চাগো মহন্তোতি? ভিক্খুসঙ্ঘো মোগ্গলিপুত্ততিস্সত্থেরস্স ভারং অকাসি. থেরো আহ – ‘‘মহারাজ, দসবলস্স সাসনে পচ্চযদাযকো নাম তযা সদিসো ধরমানেপি তথাগতে ন কোচি অহোসি, তৰেৰ পরিচ্চাগো মহা’’তি. রাজা থেরস্স ৰচনং সুত্ৰা উল়ারেন পীতিপামোজ্জেন নিরন্তরং ফুট্ঠসরীরো হুত্ৰা চিন্তেসি – ‘‘নত্থি কির মযা সদিসো পচ্চযদাযকো, ময্হং কির পরিচ্চাগো মহা, অহং কির দেয্যধম্মেন সাসনং পগ্গণ্হামি. কিং পনাহং এৰং সতি সাসনস্স দাযাদো হোমি, ন হোমী’’তি. ততো ভিক্খুসঙ্ঘং পুচ্ছি – ‘‘ভৰামি নু খো অহং, ভন্তে, সাসনস্স দাযাদো’’তি?

ততো মোগ্গলিপুত্ততিস্সত্থেরো রঞ্ঞো ইদং ৰচনং সুত্ৰা রাজপুত্তস্স মহিন্দস্স উপনিস্সযসম্পত্তিং সম্পস্সমানো ‘‘সচে অযং কুমারো পব্বজিস্সতি সাসনস্স অতিৰিয ৰুড্ঢি ভৰিস্সতী’’তি চিন্তেত্ৰা রাজানং এতদৰোচ – ‘‘ন খো, মহারাজ, এত্তাৰতা সাসনস্স দাযাদো হোতি; অপিচ খো পচ্চযদাযকোতি ৰা উপট্ঠাকোতি ৰা সঙ্খ্যং গচ্ছতি. যোপি হি, মহারাজ, পথৰিতো যাৰ ব্রহ্মলোকপরিমাণং পচ্চযরাসিং দদেয্য সোপি ‘সাসনে দাযাদো’তি সঙ্খ্যং ন গচ্ছতী’’তি. ‘‘অথ কথং চরহি, ভন্তে, সাসনস্স দাযাদো হোতী’’তি? ‘‘যো হি কোচি, মহারাজ, অড্ঢো ৰা দলিদ্দো ৰা অত্তনো ওরসং পুত্তং পব্বাজেতি – অযং ৰুচ্চতি, মহারাজ, দাযাদো সাসনস্সা’’তি.

এৰং ৰুত্তে অসোকো রাজা ‘‘অহং কির এৰরূপং পরিচ্চাগং কত্ৰাপি নেৰ সাসনস্স দাযাদভাৰং পত্তো’’তি সাসনে দাযাদভাৰং পত্থযমানো ইতো চিতো চ ৰিলোকেত্ৰা অদ্দস মহিন্দকুমারং অৰিদূরে ঠিতং. দিস্ৰানস্স এতদহোসি – ‘‘কিঞ্চাপি অহং ইমং কুমারং তিস্সকুমারস্স পব্বজিতকালতো পভুতি ওপরজ্জে ঠপেতুকামো, অথ খো ওপরজ্জতোপি পব্বজ্জাৰ উত্তমা’’তি. ততো কুমারং আহ – ‘‘সক্খসি ত্ৰং, তাত, পব্বজিতু’’ন্তি? কুমারো পকতিযাপি তিস্সকুমারস্স পব্বজিতকালতো পভুতি পব্বজিতুকামোৰ রঞ্ঞো ৰচনং সুত্ৰা অতিৰিয পামোজ্জজাতো হুত্ৰা আহ – ‘‘পব্বজামি, দেৰ, মং পব্বাজেত্ৰা তুম্হে সাসনদাযাদা হোথা’’তি.

তেন চ সমযেন রাজধীতা সঙ্ঘমিত্তাপি তস্মিংযেৰ ঠানে ঠিতা হোতি. তস্সা চ সামিকো অগ্গিব্রহ্মা নাম কুমারো যুৰরাজেন তিস্সকুমারেন সদ্ধিং পব্বজিতো হোতি. রাজা তং দিস্ৰা আহ – ‘‘ত্ৰম্পি, অম্ম, পব্বজিতুং সক্খসী’’তি? ‘‘সাধু, তাত, সক্কোমী’’তি. রাজা পুত্তানং মনং লভিত্ৰা পহট্ঠচিত্তো ভিক্খুসঙ্ঘং এতদৰোচ – ‘‘ভন্তে, ইমে দারকে পব্বাজেত্ৰা মং সাসনে দাযাদং করোথা’’তি. সঙ্ঘো রঞ্ঞো ৰচনং সম্পটিচ্ছিত্ৰা কুমারং মোগ্গলিপুত্ততিস্সত্থেরেন উপজ্ঝাযেন মহাদেৰত্থেরেন চ আচরিযেন পব্বাজেসি. মজ্ঝন্তিকত্থেরেন আচরিযেন উপসম্পাদেসি. তদা কির কুমারো পরিপুণ্ণৰীসতিৰস্সোৰ হোতি. সো তস্মিংযেৰ উপসম্পদসীমমণ্ডলে সহ পটিসম্ভিদাহি অরহত্তং পাপুণি. সঙ্ঘমিত্তাযপি রাজধীতায আচরিযা আযুপালিত্থেরী নাম, উপজ্ঝাযা পন ধম্মপালিত্থেরী নাম অহোসি. তদা সঙ্ঘমিত্তা অট্ঠারসৰস্সা হোতি. তং পব্বজিতমত্তং তস্মিংযেৰ সীমমণ্ডলে সিক্খায পতিট্ঠাপেসুং. উভিন্নং পব্বজিতকালে রাজা ছব্বস্সাভিসেকো হোতি.

অথ মহিন্দত্থেরো উপসম্পন্নকালতো পভুতি অত্তনো উপজ্ঝাযস্সেৰ সন্তিকে ধম্মঞ্চ ৰিনযঞ্চ পরিযাপুণন্তো দ্ৰেপি সঙ্গীতিযো আরূল়্হং তিপিটকসঙ্গহিতং সাট্ঠকথং সব্বং থেরৰাদং তিণ্ণং ৰস্সানং অব্ভন্তরে উগ্গহেত্ৰা অত্তনো উপজ্ঝাযস্স অন্তেৰাসিকানং সহস্সমত্তানং ভিক্খূনং পামোক্খো অহোসি. তদা অসোকো ধম্মরাজা নৰৰস্সাভিসেকো হোতি. রঞ্ঞো পন অট্ঠৰস্সাভিসেককালেযেৰ কোন্তপুত্ততিস্সত্থেরো ব্যাধিপটিকম্মত্থং ভিক্খাচারৰত্তেন আহিণ্ডন্তো পসতমত্তং সপ্পিং অলভিত্ৰা ব্যাধিবলেন পরিক্খীণাযুসঙ্খারো ভিক্খুসঙ্ঘং অপ্পমাদেন ওৰদিত্ৰা আকাসে পল্লঙ্কেন নিসীদিত্ৰা তেজোধাতুং সমাপজ্জিত্ৰা পরিনিব্বাযি. রাজা তং পৰত্তিং সুত্ৰা থেরস্স সক্কারং কত্ৰা ‘‘মযি নাম রজ্জং কারেন্তে এৰং ভিক্খূনং পচ্চযা দুল্লভা’’তি নগরস্স চতূসু দ্ৰারেসু পোক্খরণিযো কারাপেত্ৰা ভেসজ্জস্স পূরাপেত্ৰা দাপেসি.

তেন কির সমযেন পাটলিপুত্তস্স চতূসু দ্ৰারেসু চত্তারি সতসহস্সানি, সভাযং সতসহস্সন্তি দিৰসে দিৰসে পঞ্চসতসহস্সানি রঞ্ঞো উপ্পজ্জন্তি. ততো রাজা নিগ্রোধত্থেরস্স দেৰসিকং সতসহস্সং ৰিসজ্জেসি. বুদ্ধস্স চেতিযে গন্ধমালাদীহি পূজনত্থায সতসহস্সং. ধম্মস্স সতসহস্সং, তং ধম্মধরানং বহুস্সুতানং চতুপচ্চযত্থায উপনীযতি. সঙ্ঘস্স সতসহস্সং, চতূসু দ্ৰারেসু ভেসজ্জত্থায সতসহস্সং. এৰং সাসনে উল়ারো লাভসক্কারো নিব্বত্তি.

তিত্থিযা পরিহীনলাভসক্কারা অন্তমসো ঘাসচ্ছাদনম্পি অলভন্তা লাভসক্কারং পত্থযমানা সাসনে পব্বজিত্ৰা সকানি সকানি দিট্ঠিগতানি ‘‘অযং ধম্মো, অযং ৰিনযো’’তি দীপেন্তি. পব্বজ্জং অলভমানাপি সযমেৰ মুণ্ডেত্ৰা কাসাযানি ৰত্থানি অচ্ছাদেত্ৰা ৰিহারেসু ৰিচরন্তা উপোসথম্পি পৰারণম্পি সঙ্ঘকম্মম্পি গণকম্মম্পি পৰিসন্তি. ভিক্খূ তেহি সদ্ধিং উপোসথং ন করোন্তি. তদা মোগ্গলিপুত্ততিস্সত্থেরো ‘‘উপ্পন্নং দানি ইদং অধিকরণং, তং নচিরস্সেৰ কক্খল়ং ভৰিস্সতি. ন খো পনেতং সক্কা ইমেসং মজ্ঝে ৰসন্তেন ৰূপসমেতু’’ন্তি মহিন্দত্থেরস্স গণং নীয্যাতেত্ৰা অত্তনা ফাসুৰিহারেন ৰিহরিতুকামো অহোগঙ্গপব্বতং অগমাসি. তেপি খো তিত্থিযা ভিক্খুসঙ্ঘেন ধম্মেন ৰিনযেন সত্থুসাসনেন নিগ্গয্হমানাপি ধম্মৰিনযানুলোমায পটিপত্তিযা অসণ্ঠহন্তা অনেকরূপং সাসনস্স অব্বুদঞ্চ মলঞ্চ কণ্টকঞ্চ সমুট্ঠাপেসুং. কেচি অগ্গিং পরিচরন্তি, কেচি পঞ্চাতপেন তাপেন্তি, কেচি আদিচ্চং অনুপরিৰত্তন্তি, কেচি ‘‘ধম্মঞ্চ ৰিনযঞ্চ ৰোভিন্দিস্সামা’’তি পগ্গণ্হিংসু. তদা ভিক্খুসঙ্ঘো ন তেহি সদ্ধিং উপোসথং ৰা পৰারণং ৰা অকাসি. অসোকারামে সত্তৰস্সানি উপোসথো উপচ্ছিজ্জি. রঞ্ঞোপি এতমত্থং আরোচেসুং. রাজা একং অমচ্চং আণাপেসি – ‘‘ৰিহারং গন্ত্ৰা অধিকরণং ৰূপসমেত্ৰা উপোসথং কারাপেহী’’তি. অমচ্চো রাজানং পটিপুচ্ছিতুং অৰিসহন্তো অঞ্ঞে অমচ্চে উপসঙ্কমিত্ৰা আহ – ‘‘রাজা মং ‘ৰিহারং গন্ত্ৰা অধিকরণং ৰূপসমেত্ৰা উপোসথং কারাপেহী’তি পহিণি. কথং নু খো অধিকরণং ৰূপসম্মতী’’তি? তে আহংসু – ‘‘মযং এৰং সল্লক্খেম – ‘যথা নাম পচ্চন্তং ৰূপসমেন্তা চোরে ঘাতেন্তি, এৰমেৰ যে উপোসথং ন করোন্তি, তে মারেতুকামো রাজা ভৰিস্সতী’’’তি. অথ সো অমচ্চো ৰিহারং গন্ত্ৰা ভিক্খুসঙ্ঘং সন্নিপাতেত্ৰা আহ – ‘‘অহং রঞ্ঞা ‘উপোসথং কারাপেহী’তি পেসিতো. করোথ দানি, ভন্তে, উপোসথ’’ন্তি. ভিক্খূ ‘‘ন মযং তিত্থিযেহি সদ্ধিং উপোসথং করোমা’’তি আহংসু. অথ অমচ্চো থেরাসনতো পট্ঠায অসিনা সীসানি পাতেতুং আরদ্ধো.

অদ্দসা খো তিস্সত্থেরো তং অমচ্চং তথা ৰিপ্পটিপন্নং. তিস্সত্থেরো নাম ন যো ৰা সো ৰা, রঞ্ঞো একমাতিকো ভাতা তিস্সকুমারো নাম, তং কির রাজা পত্তাভিসেকো ওপরজ্জে ঠপেসি. সো একদিৰসং ৰনচারং গতো অদ্দস মহন্তং মিগসঙ্ঘং চিত্তকীল়ায কীল়ন্তং. দিস্ৰানস্স এতদহোসি – ‘‘ইমে তাৰ তিণভক্খা মিগা এৰং কীল়ন্তি, ইমে পন সমণা রাজকুলে পণীতানি ভোজনানি ভুঞ্জিত্ৰা মুদুকাসু সেয্যাসু সযমানা কিং নাম কীল়িতং ন কীল়িস্সন্তী’’তি! সো ততো আগন্ত্ৰা ইমং অত্তনো ৰিতক্কং রঞ্ঞো আরোচেসি. রাজা ‘‘অট্ঠানে কুক্কুচ্চাযিতং কুমারেন! হন্দ, নং এৰং সঞ্ঞাপেস্সামী’’তি একদিৰসং কেনচি কারণেন কুদ্ধো ৰিয হুত্ৰা ‘‘এহি সত্তদিৰসেন রজ্জং সম্পটিচ্ছ, ততো তং ঘাতেস্সামী’’তি মরণভযেন তজ্জেত্ৰা তমত্থং সঞ্ঞাপেসি. সো কির কুমারো ‘‘সত্তমে মং দিৰসে মারেস্সতী’’তি ন চিত্তরূপং ন্হাযি, ন ভুঞ্জি, ন সুপি, অতিৰিয লূখসরীরো অহোসি. ততো নং রাজা পুচ্ছি – ‘‘কিস্স ত্ৰং এৰরূপো জাতো’’তি? ‘‘মরণভযেন, দেৰা’’তি. ‘‘অরে, ত্ৰং নাম পরিচ্ছিন্নমরণং সম্পস্সমানো ৰিস্সত্থো ন কীল়সি? ভিক্খূ অস্সাসপস্সাসনিবদ্ধং মরণং পেক্খমানা কথং কীল়িস্সন্তী’’তি! ততো পভুতি কুমারো সাসনে পসীদি.

সো পুন একদিৰসং মিগৰং নিক্খমিত্ৰা অরঞ্ঞে অনুৰিচরমানো অদ্দস যোনকমহাধম্মরক্খিতত্থেরং অঞ্ঞতরেন হত্থিনাগেন সালসাখং গহেত্ৰা বীজিযমানং নিসিন্নং. দিস্ৰা পামোজ্জজাতো চিন্তেসি – ‘‘কদা নু খো অহম্পি অযং মহাথেরো ৰিয পব্বজেয্যং! সিযা নু খো সো দিৰসো’’তি. থেরো তস্সাসযং ৰিদিত্ৰা তস্স পস্সন্তস্সেৰ আকাসে উপ্পতিত্ৰা অসোকারামে পোক্খরণিযা উদকতলে ঠত্ৰা চীৰরঞ্চ উত্তরাসঙ্গঞ্চ আকাসে লগ্গেত্ৰা ন্হাযিতুং আরদ্ধো.

কুমারো থেরস্সানুভাৰং দিস্ৰা অতিৰিয পসন্নো ‘‘অজ্জেৰ পব্বজিস্সামী’’তি নিৰত্তিত্ৰা রঞ্ঞো আরোচেসি – ‘‘পব্বজিস্সামহং, দেৰা’’তি. রাজা অনেকপ্পকারং যাচিত্ৰাপি তং নিৰত্তেতুং অসক্কোন্তো অসোকারামগমনীযমগ্গং অলঙ্কারাপেত্ৰা কুমারং ছণৰেসং গাহাপেত্ৰা অলঙ্কতায সেনায পরিৰারাপেত্ৰা ৰিহারং নেসি. ‘‘যুৰরাজা কির পব্বজিস্সতী’’তি সুত্ৰা বহূ ভিক্খূ পত্তচীৰরানি পটিযাদেসুং. কুমারো পধানঘরং গন্ত্ৰা মহাধম্মরক্খিতত্থেরস্সেৰ সন্তিকে পব্বজি সদ্ধিং পুরিসসতসহস্সেন. কুমারস্স পন অনুপব্বজিতানং গণনপরিচ্ছেদো নত্থি. কুমারো রঞ্ঞো চতুৰস্সাভিসেককালে পব্বজিতো. অথঞ্ঞোপি রঞ্ঞো ভাগিনেয্যো সঙ্ঘমিত্তায সামিকো অগ্গিব্রহ্মা নাম কুমারো অত্থি. সঙ্ঘমিত্তা তং পটিচ্চ একমেৰ পুত্তং ৰিজাযি. সোপি ‘‘যুৰরাজা পব্বজিতো’’তি সুত্ৰা রাজানং উপসঙ্কমিত্ৰা – ‘‘অহম্পি, দেৰ, পব্বজিস্সামী’’তি যাচি. ‘‘পব্বজ, তাতা’’তি চ রঞ্ঞা অনুঞ্ঞাতো তংদিৰসমেৰ পব্বজি.

এৰং অনুপব্বজিতো, উল়ারৰিভৰেন খত্তিযজনেন;

রঞ্ঞো কনিট্ঠভাতা, তিস্সত্থেরোতি ৰিঞ্ঞেয্যো.

সো তং অমচ্চং তথা ৰিপ্পটিপন্নং দিস্ৰা চিন্তেসি – ‘‘ন রাজা থেরে মারাপেতুং পহিণেয্য; অদ্ধা ইমস্সেৰেতং অমচ্চস্স দুগ্গহিতং ভৰিস্সতী’’তি গন্ত্ৰা সযং তস্স আসন্নে আসনে নিসীদি. সো থেরং সঞ্জানিত্ৰা সত্থং নিপাতেতুং অৰিসহন্তো গন্ত্ৰা রঞ্ঞো আরোচেসি – ‘‘অহং, দেৰ, উপোসথং কাতুং অনিচ্ছন্তানং এত্তকানং নাম ভিক্খূনং সীসানি পাতেসিং; অথ অয্যস্স তিস্সত্থেরস্স পটিপাটি সম্পত্তা, কিন্তি করোমী’’তি? রাজা সুত্ৰাৰ – ‘‘অরে! কিং পন, ত্ৰং, মযা ভিক্খূ ঘাতেতুং পেসিতো’’তি তাৰদেৰ সরীরে উপ্পন্নদাহো হুত্ৰা ৰিহারং গন্ত্ৰা থেরে ভিক্খূ পুচ্ছি – ‘‘অযং, ভন্তে, অমচ্চো মযা অনাণত্তোৰ এৰং অকাসি, কস্স নু খো ইমিনা পাপেন ভৰিতব্ব’’ন্তি? একচ্চে থেরা, ‘‘অযং তৰ ৰচনেন অকাসি, তুয্হেতং পাপ’’ন্তি আহংসু. একচ্চে ‘‘উভিন্নম্পি ৰো এতং পাপ’’ন্তি আহংসু. একচ্চে এৰমাহংসু – ‘‘কিং পন তে, মহারাজ, অত্থি চিত্তং ‘অযং গন্ত্ৰা ভিক্খূ ঘাতেতূ’’’তি? ‘‘নত্থি, ভন্তে, কুসলাধিপ্পাযো অহং পেসেসিং – ‘সমগ্গো ভিক্খুসঙ্ঘো উপোসথং করোতূ’’’তি. ‘‘সচে ত্ৰং কুসলাধিপ্পাযো, নত্থি তুয্হং পাপং, অমচ্চস্সেৰেতং পাপ’’ন্তি. রাজা দ্ৰেল়্হকজাতো আহ – ‘‘অত্থি নু খো, ভন্তে, কোচি ভিক্খু মমেতং দ্ৰেল়্হকং ছিন্দিত্ৰা সাসনং পগ্গহেতুং সমত্থো’’তি? ‘‘অত্থি, মহারাজ, মোগ্গলিপুত্ততিস্সত্থেরো নাম, সো তে ইমং দ্ৰেল়্হকং ছিন্দিত্ৰা সাসনং পগ্গণ্হিতুং সমত্থো’’তি. রাজা তদহেৰ চত্তারো ধম্মকথিকে একেকভিক্খুসহস্সপরিৰারে, চত্তারো চ অমচ্চে একেকপুরিসসহস্সপরিৰারে ‘‘থেরং গণ্হিত্ৰা আগচ্ছথা’’তি পেসেসি. তে গন্ত্ৰা ‘‘রাজা পক্কোসতী’’তি আহংসু. থেরো নাগচ্ছি. দুতিযম্পি খো রাজা অট্ঠ ধম্মকথিকে, অট্ঠ চ অমচ্চে সহস্সসহস্সপরিৰারেযেৰ পেসেসি – ‘‘‘রাজা, ভন্তে, পক্কোসতী’তি ৰত্ৰা গণ্হিত্ৰাৰ আগচ্ছথা’’তি. তে তথেৰ আহংসু. দুতিযম্পি থেরো নাগচ্ছি. রাজা থেরে পুচ্ছি – ‘‘অহং, ভন্তে, দ্ৰিক্খত্তুং পহিণিং; কস্মা থেরো নাগচ্ছতী’’তি? ‘‘‘রাজা পক্কোসতী’তি ৰুত্তত্তা, মহারাজ, নাগচ্ছতি. এৰং পন ৰুত্তে আগচ্ছেয্য ‘সাসনং, ভন্তে, ওসীদতি, অম্হাকং সাসনং পগ্গহত্থায সহাযকা হোথা’’’তি. অথ রাজা তথা ৰত্ৰা সোল়স ধম্মকথিকে, সোল়স চ অমচ্চে সহস্সসহস্সপরিৰারে পেসেসি. ভিক্খূ চ পটিপুচ্ছি – ‘‘মহল্লকো নু খো, ভন্তে, থেরো দহরো নু খো’’তি? ‘‘মহল্লকো, মহারাজা’’তি. ‘‘ৰয্হং ৰা সিৰিকং ৰা অভিরুহিস্সতি, ভন্তে’’তি? ‘‘নাভিরুহিস্সতি, মহারাজা’’তি. ‘‘কুহিং, ভন্তে, থেরো ৰসতী’’তি? ‘‘উপরি গঙ্গায, মহারাজা’’তি. রাজা আহ – ‘‘তেন হি, ভণে, নাৰাসঙ্ঘাটং বন্ধিত্ৰা তত্থেৰ থেরং নিসীদাপেত্ৰা দ্ৰীসুপি তীরেসু আরক্খং সংৰিধায থেরং আনেথা’’তি. ভিক্খূ চ অমচ্চা চ থেরস্স সন্তিকং গন্ত্ৰা রঞ্ঞো সাসনং আরোচেসুং.

থেরো সুত্ৰা ‘‘যং খো অহং মূলতো পট্ঠায সাসনং পগ্গণ্হিস্সামীতি পব্বজিতোম্হি. অযং দানি মে সো কালো অনুপ্পত্তো’’তি চম্মখণ্ডং গণ্হিত্ৰাৰ উট্ঠহি. অথ ‘‘থেরো স্ৰে পাটলিপুত্তং সম্পাপুণিস্সতী’’তি রত্তিভাগে রাজা সুপিনং অদ্দস. এৰরূপো সুপিনো অহোসি – ‘‘সব্বসেতো হত্থিনাগো আগন্ত্ৰা রাজানং সীসতো পট্ঠায পরামসিত্ৰা দক্খিণহত্থে অগ্গহেসী’’তি. পুনদিৰসে রাজা সুপিনজ্ঝাযকে পুচ্ছি – ‘‘মযা এৰরূপো সুপিনো দিট্ঠো, কিং মে ভৰিস্সতী’’তি? একো তং, ‘‘মহারাজ, সমণনাগো দক্খিণহত্থে গণ্হিস্সতী’’তি. অথ রাজা তাৰদেৰ ‘‘থেরো আগতো’’তি সুত্ৰা গঙ্গাতীরং গন্ত্ৰা নদিং ওতরিত্ৰা অব্ভুগ্গচ্ছন্তো জাণুমত্তে উদকে থেরং সম্পাপুণিত্ৰা থেরস্স নাৰাতো ওতরন্তস্স হত্থং অদাসি. থেরো রাজানং দক্খিণহত্থে অগ্গহেসি. তং দিস্ৰা অসিগ্গাহা ‘‘থেরস্স সীসং পাতেস্সামা’’তি কোসতো অসিং অব্বাহিংসু. কস্মা? এতং কির চারিত্তং রাজকুলেসু – ‘‘যো রাজানং হত্থে গণ্হতি তস্স অসিনা সীসং পাতেতব্ব’’ন্তি. রাজা ছাযংযেৰ দিস্ৰা আহ – ‘‘পুব্বেপি অহং ভিক্খূসু ৰিরদ্ধকারণা অস্সাদং ন ৰিন্দামি, মা খো থেরে ৰিরজ্ঝিত্থা’’তি. থেরো পন কস্মা রাজানং হত্থে অগ্গহেসীতি? যস্মা রঞ্ঞা পঞ্হং পুচ্ছনত্থায পক্কোসাপিতো তস্মা ‘‘অন্তেৰাসিকো মে অয’’ন্তি অগ্গহেসি.

রাজা থেরং অত্তনো উয্যানং নেত্ৰা বাহিরতো তিক্খত্তুং পরিৰারাপেত্ৰা আরক্খং ঠপেত্ৰা সযমেৰ থেরস্স পাদে ধোৰিত্ৰা তেলেন মক্খেত্ৰা থেরস্স সন্তিকে নিসীদিত্ৰা ‘‘পটিবলো নু খো থেরো মম কঙ্খং ছিন্দিত্ৰা উপ্পন্নং অধিকরণং ৰূপসমেত্ৰা সাসনং পগ্গণ্হিতু’’ন্তি ৰীমংসনত্থায ‘‘অহং, ভন্তে, একং পাটিহারিযং দট্ঠুকামো’’তি আহ. ‘‘কতরং পাটিহারিযং দট্ঠুকামোসি, মহারাজা’’তি? ‘‘পথৰীকম্পনং, ভন্তে’’তি. ‘‘সকলপথৰীকম্পনং দট্ঠুকামোসি, মহারাজ, পদেসপথৰীকম্পন’’ন্তি? ‘‘কতরং পনেত্থ, ভন্তে, দুক্কর’’ন্তি? ‘‘কিং নু খো, মহারাজ, কংসপাতিযা উদকপুণ্ণায সব্বং উদকং কম্পেতুং দুক্করং; উদাহু উপড্ঢ’’ন্তি? ‘‘উপড্ঢং, ভন্তে’’তি. ‘‘এৰমেৰ খো, মহারাজ, পদেসপথৰীকম্পনং দুক্কর’’ন্তি. ‘‘তেন হি, ভন্তে, পদেসপথৰীকম্পনং পস্সিস্সামী’’তি. ‘‘তেন হি, মহারাজ, সমন্ততো যোজনে পুরত্থিমায দিসায একেন চক্কেন সীমং অক্কমিত্ৰা রথো তিট্ঠতু; দক্খিণায দিসায দ্ৰীহি পাদেহি সীমং অক্কমিত্ৰা অস্সো তিট্ঠতু; পচ্ছিমায দিসায একেন পাদেন সীমং অক্কমিত্ৰা পুরিসো তিট্ঠতু; উত্তরায দিসায উপড্ঢভাগেন সীমং অক্কমিত্ৰা একা উদকপাতি তিট্ঠতূ’’তি. রাজা তথা কারাপেসি. থেরো অভিঞ্ঞাপাদকং চতুত্থজ্ঝানং সমাপজ্জিত্ৰা ততো ৰুট্ঠায ‘‘রাজা পস্সতূ’’তি যোজনপ্পমাণপথৰীচলনং অধিট্ঠহি. পুরত্থিমায দিসায রথস্স অন্তোসীমায ঠিতো পাদোৰ চলি, ইতরো ন চলি. এৰং দক্খিণপচ্ছিমদিসাসু অস্সপুরিসানং অন্তোসীমায ঠিতপাদাযেৰ চলিংসু, উপড্ঢুপড্ঢং সরীরঞ্চ. উত্তরদিসায উদকপাতিযাপি অন্তোসীমায ঠিতং উপড্ঢভাগগতমেৰ উদকং চলি, অৰসেসং নিচ্চলমহোসীতি. রাজা তং পাটিহারিযং দিস্ৰা ‘‘সক্খতি দানি থেরো সাসনং পগ্গণ্হিতু’’ন্তি নিট্ঠং গন্ত্ৰা অত্তনো কুক্কুচ্চং পুচ্ছি – ‘‘অহং, ভন্তে, একং অমচ্চং ‘ৰিহারং গন্ত্ৰা অধিকরণং ৰূপসমেত্ৰা উপোসথং কারাপেহী’তি পহিণিং, সো ৰিহারং গন্ত্ৰা এত্তকে ভিক্খূ জীৰিতা ৰোরোপেসি, এতং পাপং কস্স হোতী’’তি?

‘‘কিং পন তে, মহারাজ, অত্থি চিত্তং ‘অযং ৰিহারং গন্ত্ৰা ভিক্খূ ঘাতেতূ’’’তি? ‘‘নত্থি, ভন্তে’’তি. ‘‘সচে তে, মহারাজ, নত্থি এৰরূপং চিত্তং, নত্থি তুয্হং পাপ’’ন্তি. অথ থেরো রাজানং এতমত্থং ইমিনা সুত্তেন সঞ্ঞাপেসি – ‘‘চেতনাহং, ভিক্খৰে, কম্মং ৰদামি. চেতযিত্ৰা কম্মং করোতি – কাযেন ৰাচায মনসা’’তি (অ. নি. ৬.৬৩).

তমেৰত্থং পরিদীপেতুং তিত্তিরজাতকং (জা. ১.৪.৭৫) আহরি – ‘‘অতীতে, মহারাজ, দীপকতিত্তিরো তাপসং পুচ্ছি –

‘ঞাতকো নো নিসিন্নোতি, বহু আগচ্ছতী জনো;

পটিচ্চ কম্মং ফুসতি, তস্মিং মে সঙ্কতে মনো’তি.

তাপসো আহ – ‘অত্থি পন তে চিত্তং মম সদ্দেন চ রূপদস্সনেন চ আগন্ত্ৰা এতে পক্খিনো বজ্ঝন্তু ৰা হঞ্ঞন্তু ৰা’তি? ‘নত্থি, ভন্তে’তি তিত্তিরো আহ. ততো নং তাপসো সঞ্ঞাপেসি – ‘সচে তে নত্থি চিত্তং, নত্থি পাপং; চেতযন্তমেৰ হি পাপং ফুসতি, নাচেতযন্তং.

‘ন পটিচ্চ কম্মং ফুসতি, মনো চে নপ্পদুস্সতি;

অপ্পোস্সুক্কস্স ভদ্রস্স, ন পাপমুপলিম্পতী’’’তি.

এৰং থেরো রাজানং সঞ্ঞাপেত্ৰা তত্থেৰ রাজুয্যানে সত্ত দিৰসানি ৰসন্তো রাজানং সমযং উগ্গণ্হাপেসি. রাজা সত্তমে দিৰসে অসোকারামে ভিক্খুসঙ্ঘং সন্নিপাতাপেত্ৰা সাণিপাকারং পরিক্খিপাপেত্ৰা সাণিপাকারন্তরে নিসিন্নো একলদ্ধিকে একলদ্ধিকে ভিক্খূ একতো একতো কারাপেত্ৰা একমেকং ভিক্খুসমূহং পক্কোসাপেত্ৰা পুচ্ছি – ‘‘কিংৰাদী সম্মাসম্বুদ্ধো’’তি? ততোসস্সতৰাদিনো ‘‘সস্সতৰাদী’’তি আহংসু. একচ্চসস্সতিকা…পে… অন্তানন্তিকা… অমরাৰিক্খেপিকা… অধিচ্চসমুপ্পন্নিকা… সঞ্ঞীৰাদা… অসঞ্ঞীৰাদা… নেৰসঞ্ঞীনাসঞ্ঞীৰাদা … উচ্ছেদৰাদা… দিট্ঠধম্মনিব্বানৰাদা ‘‘দিট্ঠধম্মনিব্বানৰাদী’’তি আহংসু. রাজা পঠমমেৰ সমযস্স উগ্গহিতত্তা ‘‘নযিমে ভিক্খূ, অঞ্ঞতিত্থিযা ইমে’’তি ঞত্ৰা তেসং সেতকানি ৰত্থানি দত্ৰা উপ্পব্বাজেসি. তে সব্বেপি সট্ঠিসহস্সা অহেসুং.

অথঞ্ঞে ভিক্খূ পক্কোসাপেত্ৰা পুচ্ছি – ‘‘কিংৰাদী, ভন্তে, সম্মাসম্বুদ্ধো’’তি? ‘‘ৰিভজ্জৰাদী, মহারাজা’’তি. এৰং ৰুত্তে রাজা থেরং পুচ্ছি – ‘‘ৰিভজ্জৰাদী, ভন্তে, সম্মাসম্বুদ্ধো’’তি? ‘‘আম, মহারাজা’’তি. ততো রাজা ‘‘সুদ্ধং দানি, ভন্তে, সাসনং; করোতু ভিক্খুসঙ্ঘো উপোসথ’’ন্তি আরক্খং দত্ৰা নগরং পাৰিসি.

সমগ্গো সঙ্ঘো সন্নিপতিত্ৰা উপোসথং অকাসি. তস্মিং সন্নিপাতে সট্ঠি ভিক্খুসতসহস্সানি অহেসুং. তস্মিং সমাগমে মোগ্গলিপুত্ততিস্সত্থেরো পরপ্পৰাদং মদ্দমানো কথাৰত্থুপ্পকরণং অভাসি. ততো সট্ঠিসতসহস্সসঙ্খ্যেসু ভিক্খূসু উচ্চিনিত্ৰা তিপিটকপরিযত্তিধরানং পভিন্নপটিসম্ভিদানং তেৰিজ্জাদিভেদানং ভিক্খূনং সহস্সমেকং গহেত্ৰা যথা মহাকস্সপত্থেরো চ কাকণ্ডকপুত্তো যসত্থেরো চ ধম্মঞ্চ ৰিনযঞ্চ সঙ্গাযিংসু; এৰমেৰ ধম্মঞ্চ ৰিনযঞ্চ সঙ্গাযন্তো সব্বং সাসনমলং ৰিসোধেত্ৰা ততিযসঙ্গীতিং অকাসি. সঙ্গীতিপরিযোসানে অনেকপ্পকারং পথৰী অকম্পিত্থ. অযং সঙ্গীতি নৰহি মাসেহি নিট্ঠিতা. যা লোকে –

কতা ভিক্খুসহস্সেন, তস্মা সহস্সিকাতি চ;

পুরিমা দ্ৰে উপাদায, ততিযাতি চ ৰুচ্চতীতি.

অযং ততিযসঙ্গীতি.

এত্তাৰতা চ ‘‘কেনাভত’’ন্তি এতস্স পঞ্হস্স ৰিস্সজ্জনত্থং যং অৰোচুম্হ – ‘‘জম্বুদীপে তাৰ উপালিত্থেরমাদিং কত্ৰা আচরিযপরম্পরায যাৰ ততিযসঙ্গীতি তাৰ আভতং. তত্রাযং আচরিযপরম্পরা –

‘‘উপালি দাসকো চেৰ, সোণকো সিগ্গৰো তথা;

তিস্সো মোগ্গলিপুত্তো চ, পঞ্চেতে ৰিজিতাৰিনো.

‘‘পরম্পরায ৰিনযং, দীপে জম্বুসিরিৰ্হযে;

অচ্ছিজ্জমানমানেসুং, ততিযো যাৰ সঙ্গহো’’তি.

তস্সত্থো পকাসিতোৰ হোতি.

ততিযসঙ্গহতো পন উদ্ধং ইমং দীপং মহিন্দাদীহি আভতং. মহিন্দতো উগ্গহেত্ৰা কঞ্চি কালং অরিট্ঠত্থেরাদীহি আভতং. ততো যাৰজ্জতনা তেসংযেৰ অন্তেৰাসিকপরম্পরভূতায আচরিযপরম্পরায আভতন্তি ৰেদিতব্বং. যথাহু পোরাণা –

‘‘ততো মহিন্দো ইট্টিযো, উত্তিযো সম্বলো তথা;

ভদ্দনামো চ পণ্ডিতো.

‘‘এতে নাগা মহাপঞ্ঞা, জম্বুদীপা ইধাগতা;

ৰিনযং তে ৰাচযিংসু, পিটকং তম্বপণ্ণিযা.

‘‘নিকাযে পঞ্চ ৰাচেসুং, সত্ত চেৰ পকরণে;

ততো অরিট্ঠো মেধাৰী, তিস্সদত্তো চ পণ্ডিতো.

‘‘ৰিসারদো কাল়সুমনো, থেরো চ দীঘনামকো;

দীঘসুমনো চ পণ্ডিতো.

‘‘পুনদেৰ কাল়সুমনো, নাগত্থেরো চ বুদ্ধরক্খিতো;

তিস্সত্থেরো চ মেধাৰী, দেৰত্থেরো চ পণ্ডিতো.

‘‘পুনদেৰ সুমনো মেধাৰী, ৰিনযে চ ৰিসারদো;

বহুস্সুতো চূল়নাগো, গজোৰ দুপ্পধংসিযো.

‘‘ধম্মপালিতনামো চ, রোহণে সাধুপূজিতো;

তস্স সিস্সো মহাপঞ্ঞো, খেমনামো তিপেটকো.

‘‘দীপে তারকরাজাৰ, পঞ্ঞায অতিরোচথ;

উপতিস্সো চ মেধাৰী, ফুস্সদেৰো মহাকথী.

‘‘পুনদেৰ সুমনো মেধাৰী, পুপ্ফনামো বহুস্সুতো;

মহাকথী মহাসিৰো, পিটকে সব্বত্থ কোৰিদো.

‘‘পুনদেৰ উপালি মেধাৰী, ৰিনযে চ ৰিসারদো;

মহানাগো মহাপঞ্ঞো, সদ্ধম্মৰংসকোৰিদো.

‘‘পুনদেৰ অভযো মেধাৰী, পিটকে সব্বত্থ কোৰিদো;

তিস্সত্থেরো চ মেধাৰী, ৰিনযে চ ৰিসারদো.

‘‘তস্স সিস্সো মহাপঞ্ঞো, পুপ্ফনামো বহুস্সুতো;

সাসনং অনুরক্খন্তো, জম্বুদীপে পতিট্ঠিতো.

‘‘চূল়াভযো চ মেধাৰী, ৰিনযে চ ৰিসারদো;

তিস্সত্থেরো চ মেধাৰী, সদ্ধম্মৰংসকোৰিদো.

‘‘চূল়দেৰো চ মেধাৰী, ৰিনযে চ ৰিসারদো;

সিৰত্থেরো চ মেধাৰী, ৰিনযে সব্বত্থ কোৰিদো.

‘‘এতে নাগা মহাপঞ্ঞা, ৰিনযঞ্ঞূ মগ্গকোৰিদা;

ৰিনযং দীপে পকাসেসুং, পিটকং তম্বপণ্ণিযা’’তি.

তত্রাযং অনুপুব্বিকথা – মোগ্গলিপুত্ততিস্সত্থেরো কির ইমং ততিযধম্মসঙ্গীতিং কত্ৰা এৰং চিন্তেসি – ‘‘কত্থ নু খো অনাগতে সাসনং সুপ্পতিট্ঠিতং ভৰেয্যা’’তি? অথস্স উপপরিক্খতো এতদহোসি – ‘‘পচ্চন্তিমেসু খো জনপদেসু সুপ্পতিট্ঠিতং ভৰিস্সতী’’তি. সো তেসং তেসং ভিক্খূনং ভারং কত্ৰা তে তে ভিক্খূ তত্থ তত্থ পেসেসি. মজ্ঝন্তিকত্থেরং কস্মীরগন্ধাররট্ঠং পেসেসি – ‘‘ত্ৰং এতং রট্ঠং গন্ত্ৰা এত্থ সাসনং পতিট্ঠাপেহী’’তি. মহাদেৰত্থেরং তথেৰ ৰত্ৰা মহিংসকমণ্ডলং পেসেসি. রক্খিতত্থেরং ৰনৰাসিং. যোনকধম্মরক্খিতত্থেরং অপরন্তকং. মহাধম্মরক্খিতত্থেরং মহারট্ঠং. মহারক্খিতত্থেরং যোনকলোকং. মজ্ঝিমত্থেরং হিমৰন্তদেসভাগং. সোণত্থেরঞ্চ উত্তরত্থেরঞ্চ সুৰণ্ণভূমিং. অত্তনো সদ্ধিৰিহারিকং মহিন্দত্থেরং ইট্টিযত্থেরেন উত্তিযত্থেরেন সম্বলত্থেরেন ভদ্দসালত্থেরেন চ সদ্ধিং তম্বপণ্ণিদীপং পেসেসি – ‘‘তুম্হে তম্বপণ্ণিদীপং গন্ত্ৰা এত্থ সাসনং পতিট্ঠাপেথা’’তি. সব্বেপি তং তং দিসাভাগং গচ্ছন্তা অত্তপঞ্চমা অগমংসু ‘‘পচ্চন্তিমেসু জনপদেসু পঞ্চৰগ্গো গণো অলং উপসম্পদকম্মাযা’’তি মঞ্ঞমানা.

তেন খো পন সমযেন কস্মীরগন্ধাররট্ঠে সস্সপাকসমযে অরৰাল়ো নাম নাগরাজা করকৰস্সং নাম ৰস্সাপেত্ৰা সস্সং হরাপেত্ৰা মহাসমুদ্দং পাপেতি. মজ্ঝন্তিকত্থেরো পন পাটলিপুত্ততো ৰেহাসং অব্ভুগ্গন্ত্ৰা হিমৰতি অরৰাল়দহস্স উপরি ওতরিত্ৰা অরৰাল়দহপিট্ঠিযং চঙ্কমতিপি তিট্ঠতিপি নিসীদতিপি সেয্যম্পি কপ্পেতি. নাগমাণৰকা তং দিস্ৰা অরৰাল়স্স নাগরাজস্স আরোচেসুং – ‘‘মহারাজ, একো ছিন্নভিন্নপটধরো ভণ্ডু কাসাৰৰসনো অম্হাকং উদকং দূসেতী’’তি. নাগরাজা তাৰদেৰ কোধাভিভূতো নিক্খমিত্ৰা থেরং দিস্ৰা মক্খং অসহমানো অন্তলিক্খে অনেকানি ভিংসনকানি নিম্মিনি. ততো ততো ভুসা ৰাতা ৰাযন্তি, রুক্খা ছিজ্জন্তি, পব্বতকূটানি পতন্তি, মেঘা গজ্জন্তি, ৰিজ্জুলতা নিচ্ছরন্তি, অসনিযো ফলন্তি, ভিন্নং ৰিয গগনতলং উদকং পগ্ঘরতি. ভযানকরূপা নাগকুমারা সন্নিপতন্তি. সযম্পি ধূমাযতি, পজ্জলতি, পহরণৰুট্ঠিযো ৰিস্সজ্জেতি. ‘‘কো অযং মুণ্ডকো ছিন্নভিন্নপটধরো’’তিআদীহি ফরুসৰচনেহি থেরং সন্তজ্জেসি. ‘‘এথ গণ্হথ হনথ নিদ্ধমথ ইমং সমণ’’ন্তি নাগবলং আণাপেসি. থেরো সব্বং তং ভিংসনকং অত্তনো ইদ্ধিবলেন পটিবাহিত্ৰা নাগরাজানং আহ –

‘‘সদেৰকোপি চে লোকো, আগন্ত্ৰা তাসযেয্য মং;

ন মে পটিবলো অস্স, জনেতুং ভযভেরৰং.

‘‘সচেপি ত্ৰং মহিং সব্বং, সসমুদ্দং সপব্বতং;

উক্খিপিত্ৰা মহানাগ, খিপেয্যাসি মমূপরি.

‘‘নেৰ মে সক্কুণেয্যাসি, জনেতুং ভযভেরৰং;

অঞ্ঞদত্থু তৰেৰস্স, ৰিঘাতো উরগাধিপা’’তি.

এৰং ৰুত্তে নাগরাজা ৰিহতানুভাৰো নিপ্ফলৰাযামো দুক্খী দুম্মনো অহোসি. তং থেরো তঙ্খণানুরূপায ধম্মিযা কথায সন্দস্সেত্ৰা সমাদপেত্ৰা সমুত্তেজেত্ৰা সম্পহংসেত্ৰা তীসু সরণেসু পঞ্চসু চ সীলেসু পতিট্ঠাপেসি সদ্ধিং চতুরাসীতিযা নাগসহস্সেহি. অঞ্ঞেপি বহূ হিমৰন্তৰাসিনো যক্খা চ গন্ধব্বা চ কুম্ভণ্ডা চ থেরস্স ধম্মকথং সুত্ৰা সরণেসু চ সীলেসু চ পতিট্ঠহিংসু. পঞ্চকোপি যক্খো সদ্ধিং ভরিযায যক্খিনিযা পঞ্চহি চ পুত্তসতেহি পঠমে ফলে পতিট্ঠিতো. অথাযস্মা মজ্ঝন্তিকত্থেরো সব্বেপি নাগযক্খরক্খসে আমন্তেত্ৰা এৰমাহ –

‘‘মা দানি কোধং জনযিত্থ, ইতো উদ্ধং যথা পুরে;

সস্সঘাতঞ্চ মা কত্থ, সুখকামা হি পাণিনো;

করোথ মেত্তং সত্তেসু, ৰসন্তু মনুজা সুখ’’ন্তি.

তে সব্বেপি ‘‘সাধু ভন্তে’’তি থেরস্স পটিস্সুণিত্ৰা যথানুসিট্ঠং পটিপজ্জিংসু. তংদিৰসমেৰ চ নাগরাজস্স পূজাসমযো হোতি. অথ নাগরাজা অত্তনো রতনমযং পল্লঙ্কং আহরাপেত্ৰা থেরস্স পঞ্ঞপেসি. নিসীদি থেরো পল্লঙ্কে. নাগরাজাপি থেরং বীজযমানো সমীপে অট্ঠাসি. তস্মিং খণে কস্মীরগন্ধাররট্ঠৰাসিনো আগন্ত্ৰা থেরং দিস্ৰা ‘‘অম্হাকং নাগরাজতোপি থেরো মহিদ্ধিকতরো’’তি থেরমেৰ ৰন্দিত্ৰা নিসিন্না. থেরো তেসং আসীৰিসোপমসুত্তং কথেসি. সুত্তপরিযোসানে অসীতিযা পাণসহস্সানং ধম্মাভিসমযো অহোসি, কুলসতসহস্সং পব্বজি. ততো পভুতি চ কস্মীরগন্ধারা যাৰজ্জতনা কাসাৰপজ্জোতা ইসিৰাতপটিৰাতা এৰ.

গন্ত্ৰা কস্মীরগন্ধারং, ইসি মজ্ঝন্তিকো তদা;

দুট্ঠং নাগং পসাদেত্ৰা, মোচেসি বন্ধনা বহূতি.

মহাদেৰত্থেরোপি মহিংসকমণ্ডলং গন্ত্ৰা দেৰদূতসুত্তং কথেসি. সুত্তপরিযোসানে চত্তালীস পাণসহস্সানি ধম্মচক্খুং পটিলভিংসু, চত্তালীসংযেৰ পাণসহস্সানি পব্বজিংসু.

গন্ত্ৰান রট্ঠং মহিংসং, মহাদেৰো মহিদ্ধিকো;

চোদেত্ৰা দেৰদূতেহি, মোচেসি বন্ধনা বহূতি.

রক্খিতত্থেরো পন ৰনৰাসিং গন্ত্ৰা আকাসে ঠত্ৰা অনমতগ্গপরিযাযকথায ৰনৰাসিকে পসাদেসি. কথাপরিযোসানে পনস্স সট্ঠিসহস্সানং ধম্মাভিসমযো অহোসি. সত্ততিসহস্সমত্তা পব্বজিংসু, পঞ্চৰিহারসতানি পতিট্ঠহিংসু. এৰং সো তত্থ সাসনং পতিট্ঠাপেসি.

গন্ত্ৰান রক্খিতত্থেরো, ৰনৰাসিং মহিদ্ধিকো;

অন্তলিক্খে ঠিতো তত্থ, দেসেসি অনমতগ্গিযন্তি.

যোনকধম্মরক্খিতত্থেরোপি অপরন্তকং গন্ত্ৰা অগ্গিক্খন্ধোপমসুত্তন্তকথায অপরন্তকে পসাদেত্ৰা সত্ততি পাণসহস্সানি ধম্মামতং পাযেসি. খত্তিযকুলতো এৰ পুরিসসহস্সানি পব্বজিংসু, সমধিকানি চ ছ ইত্থিসহস্সানি. এৰং সো তত্থ সাসনং পতিট্ঠাপেসি.

অপরন্তং ৰিগাহিত্ৰা, যোনকো ধম্মরক্খিতো;

অগ্গিক্খন্ধোপমেনেত্থ, পসাদেসি জনে বহূতি.

মহাধম্মরক্খিতত্থেরো পন মহারট্ঠং গন্ত্ৰা মহানারদকস্সপজাতককথায মহারট্ঠকে পসাদেত্ৰা চতুরাসীতি পাণসহস্সানি মগ্গফলেসু পতিট্ঠাপেসি. তেরসসহস্সানি পব্বজিংসু. এৰং সো তত্থ সাসনং পতিট্ঠাপেসি.

মহারট্ঠং ইসি গন্ত্ৰা, সো মহাধম্মরক্খিতো;

জাতকং কথযিত্ৰান, পসাদেসি মহাজনন্তি.

মহারক্খিতত্থেরোপি যোনকরট্ঠং গন্ত্ৰা কাল়কারামসুত্তন্তকথায যোনকলোকং পসাদেত্ৰা সত্ততিসহস্সাধিকস্স পাণসতসহস্সস্স মগ্গফলালঙ্কারং অদাসি. সন্তিকে চস্স দসসহস্সানি পব্বজিংসু. এৰং সোপি তত্থ সাসনং পতিট্ঠাপেসি.

যোনরট্ঠং তদা গন্ত্ৰা, সো মহারক্খিতো ইসি;

কাল়কারামসুত্তেন তে পসাদেসি যোনকেতি.

মজ্ঝিমত্থেরো পন কস্সপগোত্তত্থেরেন অল়কদেৰত্থেরেন দুন্দুভিস্সরত্থেরেন মহাদেৰত্থেরেন চ সদ্ধিং হিমৰন্তদেসভাগং গন্ত্ৰা ধম্মচক্কপ্পৰত্তনসুত্তন্তকথায তং দেসং পসাদেত্ৰা অসীতিপাণকোটিযো মগ্গফলরতনানি পটিলাভেসি. পঞ্চপি চ থেরা পঞ্চ রট্ঠানি পসাদেসুং. একমেকস্স সন্তিকে সতসহস্সমত্তা পব্বজিংসু. এৰং তে তত্থ সাসনং পতিট্ঠাপেসুং.

গন্ত্ৰান মজ্ঝিমত্থেরো, হিমৰন্তং পসাদযি;

যক্খসেনং পকাসেন্তো, ধম্মচক্কপৰত্তনন্তি.

সোণত্থেরোপি সদ্ধিং উত্তরত্থেরেন সুৰণ্ণভূমিং অগমাসি. তেন চ সমযেন তত্থ একা রক্খসী সমুদ্দতো নিক্খমিত্ৰা রাজকুলে জাতে জাতে দারকে খাদতি. তংদিৰসমেৰ চ রাজকুলে একো দারকো জাতো হোতি. মনুস্সা থেরং দিস্ৰা ‘‘রক্খসানং সহাযকো এসো’’তি মঞ্ঞমানা আৰুধানি গহেত্ৰা থেরং পহরিতুকামা আগচ্ছন্তি. থেরো ‘‘কিং তুম্হে আৰুধহত্থা আগচ্ছথা’’তি আহ. তে আহংসু – ‘‘রাজকুলে জাতে জাতে দারকে রক্খসা খাদন্তি, তেসং তুম্হে সহাযকা’’তি. থেরো ‘‘ন মযং রক্খসানং সহাযকা, সমণা নাম মযং ৰিরতা পাণাতিপাতা…পে… ৰিরতা মজ্জপানা একভত্তিকা সীলৰন্তো কল্যাণধম্মা’’তি আহ. তস্মিংযেৰ চ খণে সা রক্খসী সপরিৰারা সমুদ্দতো নিক্খমি ‘‘রাজকুলে দারকো জাতো তং খাদিস্সামী’’তি. মনুস্সা তং দিস্ৰা ‘‘এসা, ভন্তে, রক্খসী আগচ্ছতী’’তি ভীতা ৰিরৰিংসু. থেরো রক্খসেহি দিগুণে অত্তভাৰে নিম্মিনিত্ৰা তেহি অত্তভাৰেহি তং রক্খসিং সপরিসং মজ্ঝে কত্ৰা উভোসু পস্সেসু পরিক্খিপি. তস্সা সপরিসায এতদহোসি – ‘‘অদ্ধা ইমেহি ইদং ঠানং লদ্ধং ভৰিস্সতি. মযং পন ইমেসং ভক্খা ভৰিস্সামা’’তি. সব্বে রক্খসা ভীতা ৰেগসা পলাযিংসু. থেরোপি তে যাৰ অদস্সনং তাৰ পলাপেত্ৰা দীপস্স সমন্ততো রক্খং ঠপেসি. তস্মিঞ্চ সমযে সন্নিপতিতং মহাজনকাযং ব্রহ্মজালসুত্তন্তকথায পসাদেত্ৰা সরণেসু চ সীলেসু চ পতিট্ঠাপেসি. সট্ঠিসহস্সানং পনেত্থ ধম্মাভিসমযো অহোসি. কুলদারকানং অড্ঢুড্ঢানি সহস্সানি পব্বজিংসু, কুলধীতানং দিযড্ঢসহস্সং. এৰং সো তত্থ সাসনং পতিট্ঠাপেসি. ততো পভুতি রাজকুলে জাতদারকানং সোণুত্তরনামমেৰ করোন্তি.

সুৰণ্ণভূমিং গন্ত্ৰান, সোণুত্তরা মহিদ্ধিকা;

পিসাচে নিদ্ধমেত্ৰান, ব্রহ্মজালং অদেসিসুন্তি.

মহিন্দত্থেরো পন ‘‘তম্বপণ্ণিদীপং গন্ত্ৰা সাসনং পতিট্ঠাপেহী’’তি উপজ্ঝাযেন চ ভিক্খুসঙ্ঘেন চ অজ্ঝিট্ঠো চিন্তেসি – ‘‘কালো নু খো মে তম্বপণ্ণিদীপং গন্তুং নো’’তি. অথস্স ৰীমংসতো ‘‘ন তাৰ কালো’’তি অহোসি. কিং পনস্স দিস্ৰা এতদহোসি? মুটসিৰরঞ্ঞো মহল্লকভাৰং. ততো চিন্তেসি – ‘‘অযং রাজা মহল্লকো, ন সক্কা ইমং গণ্হিত্ৰা সাসনং পগ্গহেতুং. ইদানি পনস্স পুত্তো দেৰানংপিযতিস্সো রজ্জং কারেস্সতি. তং গণ্হিত্ৰা সক্কা ভৰিস্সতি সাসনং পগ্গহেতুং. হন্দ যাৰ সো সমযো আগচ্ছতি, তাৰ ঞাতকে ওলোকেম. পুন দানি মযং ইমং জনপদং আগচ্ছেয্যাম ৰা ন ৰা’’তি. সো এৰং চিন্তেত্ৰা উপজ্ঝাযঞ্চ ভিক্খুসঙ্ঘঞ্চ ৰন্দিত্ৰা অসোকারামতো নিক্খম্ম তেহি ইট্টিযাদীহি চতূহি থেরেহি সঙ্ঘমিত্তায পুত্তেন সুমনসামণেরেন ভণ্ডুকেন চ উপাসকেন সদ্ধিং রাজগহনগরপরিৰত্তকেন দক্খিণাগিরিজনপদে চারিকং চরমানো ঞাতকে ওলোকেন্তো ছ মাসে অতিক্কামেসি. অথানুপুব্বেন মাতু নিৰেসনট্ঠানং ৰেদিসনগরং নাম সম্পত্তো. অসোকো কির কুমারকালে জনপদং লভিত্ৰা উজ্জেনিং গচ্ছন্তো ৰেদিসনগরং পত্ৰা ৰেদিসসেট্ঠিস্স ধীতরং অগ্গহেসি. সা তংদিৰসমেৰ গব্ভং গণ্হিত্ৰা উজ্জেনিযং মহিন্দকুমারং ৰিজাযি. কুমারস্স চুদ্দসৰস্সকালে রাজা অভিসেকং পাপুণি. সা তস্স মাতা তেন সমযেন ঞাতিঘরে ৰসতি. তেন ৰুত্তং – ‘‘অথানুপুব্বেন মাতু নিৰেসনট্ঠানং ৰেটিসনগরং নাম সম্পত্তো’’তি.

সম্পত্তঞ্চ পন থেরং দিস্ৰা থেরমাতা দেৰী পাদেসু সিরসা ৰন্দিত্ৰা ভিক্খং দত্ৰা থেরং অত্তনা কতং ৰেদিসগিরিমহাৰিহারং নাম আরোপেসি. থেরো তস্মিং ৰিহারে নিসিন্নো চিন্তেসি – ‘‘অম্হাকং ইধ কত্তব্বকিচ্চং নিট্ঠিতং, সমযো নু খো ইদানি লঙ্কাদীপং গন্তু’’ন্তি. ততো চিন্তেসি – ‘‘অনুভৰতু তাৰ মে পিতরা পেসিতং অভিসেকং দেৰানংপিযতিস্সো, রতনত্তযগুণঞ্চ সুণাতু, ছণত্থঞ্চ নগরতো নিক্খমিত্ৰা মিস্সকপব্বতং অভিরুহতু, তদা তং তত্থ দক্খিস্সামা’’তি. অথাপরং একমাসং তত্থেৰ ৰাসং কপ্পেসি. মাসাতিক্কমেন চ জেট্ঠমূলমাসপুণ্ণমাযং উপোসথদিৰসে সন্নিপতিতা সব্বেপি – ‘‘কালো নু খো অম্হাকং তম্বপণ্ণিদীপং গমনায, উদাহু নো’’তি মন্তযিংসু. তেনাহু পোরাণা –

‘‘মহিন্দো নাম নামেন, সঙ্ঘত্থেরো তদা অহু;

ইট্টিযো উত্তিযো থেরো, ভদ্দসালো চ সম্বলো.

‘‘সামণেরো চ সুমনো, ছল়ভিঞ্ঞো মহিদ্ধিকো;

ভণ্ডুকো সত্তমো তেসং, দিট্ঠসচ্চো উপাসকো;

ইতি হেতে মহানাগা, মন্তযিংসু রহোগতা’’তি.

তদা সক্কো দেৰানমিন্দো মহিন্দত্থেরং উপসঙ্কমিত্ৰা এতদৰোচ – ‘‘কালঙ্কতো, ভন্তে, মুটসিৰরাজা; ইদানি দেৰানংপিযতিস্সমহারাজা রজ্জং কারেতি. সম্মাসম্বুদ্ধেন চ তুম্হে ব্যাকতা – ‘অনাগতে মহিন্দো নাম ভিক্খু তম্বপণ্ণিদীপং পসাদেস্সতী’তি. তস্মাতিহ ৰো, ভন্তে, কালো দীপৰরং গমনায; অহম্পি ৰো সহাযো ভৰিস্সামী’’তি. কস্মা পন সক্কো এৰমাহ? ভগৰা কিরস্স বোধিমূলেযেৰ বুদ্ধচক্খুনা লোকং ৰোলোকেত্ৰা অনাগতে ইমস্স দীপস্স সম্পত্তিং দিস্ৰা এতমত্থং আরোচেসি – ‘‘তদা ত্ৰম্পি সহাযো ভৰেয্যাসী’’তি চ আণাপেসি. তস্মা এৰমাহ. থেরো তস্স ৰচনং সম্পটিচ্ছিত্ৰা অত্তসত্তমো ৰেটিসকপব্বতা ৰেহাসং উপ্পতিত্ৰা অনুরাধপুরস্স পুরত্থিমদিসায মিস্সকপব্বতে পতিট্ঠহি. যং পনেতরহি ‘‘চেতিযপব্বতো’’তিপি সঞ্জানন্তি. তেনাহু পোরাণা –

‘‘ৰেটিসগিরিম্হি রাজগহে, ৰসিত্ৰা তিংসরত্তিযো;

কালোৰ গমনস্সাতি, গচ্ছাম দীপমুত্তমং.

‘‘পল়ীনা জম্বুদীপা তে, হংসরাজাৰ অম্বরে;

এৰমুপ্পতিতা থেরা, নিপতিংসু নগুত্তমে.

‘‘পুরতো পুরসেট্ঠস্স, পব্বতে মেঘসন্নিভে;

পতিংসু সীলকূটম্হি, হংসাৰ নগমুদ্ধনী’’তি.

এৰং ইট্টিযাদীহি সদ্ধিং আগন্ত্ৰা পতিট্ঠহন্তো চ আযস্মা মহিন্দত্থেরো সম্মাসম্বুদ্ধস্স পরিনিব্বানতো দ্ৰিন্নং ৰস্সসতানং উপরি ছত্তিংসতিমে ৰস্সে ইমস্মিং দীপে পতিট্ঠহীতি ৰেদিতব্বো. অজাতসত্তুস্স হি অট্ঠমে ৰস্সে সম্মাসম্বুদ্ধো পরিনিব্বাযি. তস্মিংযেৰ ৰস্সে সীহকুমারস্স পুত্তো তম্বপণ্ণিদীপস্স আদিরাজা ৰিজযকুমারো ইমং দীপমাগন্ত্ৰা মনুস্সাৰাসং অকাসি. জম্বুদীপে উদযভদ্দস্স চুদ্দসমে ৰস্সে ইধ ৰিজযো কালমকাসি. উদযভদ্দস্স পঞ্চদসমে ৰস্সে পণ্ডুৰাসুদেৰো নাম ইমস্মিং দীপে রজ্জং পাপুণি. তত্থ নাগদাসকরঞ্ঞো ৰীসতিমে ৰস্সে ইধ পণ্ডুৰাসুদেৰো কালমকাসি. তস্মিংযেৰ চ ৰস্সে অভযো নাম রাজকুমারো ইমস্মিং দীপে রজ্জং পাপুণি. তত্থ সুসুনাগরঞ্ঞো সত্তরসমে ৰস্সে ইধ অভযরঞ্ঞো ৰীসতিৰস্সানি পরিপূরিংসু. অথ অভযস্স ৰীসতিমে ৰস্সে পণ্ডুকাভযো নাম দামরিকো রজ্জং অগ্গহেসি. তত্থ কাল়াসোকস্স সোল়সমে ৰস্সে ইধ পণ্ডুকস্স সত্তরসৰস্সানি পরিপূরিংসু. তানি হেট্ঠা একেন ৰস্সেন সহ অট্ঠারস হোন্তি. তত্থ চন্দগুত্তস্স চুদ্দসমে ৰস্সে ইধ পণ্ডুকাভযো কালমকাসি. মুটসিৰরাজা রজ্জং পাপুণি. তত্থ অসোকধম্মরাজস্স সত্তরসমে ৰস্সে ইধ মুটসিৰরাজা কালমকাসি. দেৰানম্পিযতিস্সো রজ্জং পাপুণি. পরিনিব্বুতে চ সম্মাসম্বুদ্ধে অজাতসত্তু চতুৰীসতি ৰস্সানি রজ্জং কারেসি. উদযভদ্দো সোল়স, অনুরুদ্ধো চ মুণ্ডো চ অট্ঠ, নাগদাসকো চতুৰীসতি, সুসুনাগো অট্ঠারস, তস্সেৰ পুত্তো কাল়াসোকো অট্ঠৰীসতি, ততো তস্স পুত্তকা দস ভাতুকরাজানো দ্ৰেৰীসতি ৰস্সানি রজ্জং কারেসুং. তেসং পচ্ছতো নৰ নন্দা দ্ৰেৰীসতিমেৰ, চন্দগুত্তো চতুৰীসতি, বিন্দুসারো অট্ঠৰীসতি. তস্সাৰসানে অসোকো রজ্জং পাপুণি. তস্স পুরে অভিসেকা চত্তারি অভিসেকতো অট্ঠারসমে ৰস্সে ইমস্মিং দীপে মহিন্দত্থেরো পতিট্ঠিতো. এৰমেতেন রাজৰংসানুসারেন ৰেদিতব্বমেতং – ‘‘সম্মাসম্বুদ্ধস্স পরিনিব্বানতো দ্ৰিন্নং ৰস্সসতানং উপরি ছত্তিংসতিমে ৰস্সে ইমস্মিং দীপে পতিট্ঠহী’’তি.

তস্মিঞ্চ দিৰসে তম্বপণ্ণিদীপে জেট্ঠমূলনক্খত্তং নাম হোতি. রাজা নক্খত্তং ঘোসাপেত্ৰা ‘‘ছণং করোথা’’তি অমচ্চে চ আণাপেত্ৰা চত্তালীসপুরিসসহস্সপরিৰারো নগরম্হা নিক্খমিত্ৰা যেন মিস্সকপব্বতো তেন পাযাসি মিগৰং কীল়িতুকামো. অথ তস্মিং পব্বতে অধিৰত্থা একা দেৰতা ‘‘রঞ্ঞো থেরে দস্সেস্সামী’’তি রোহিতমিগরূপং গহেত্ৰা অৰিদূরে তিণপণ্ণানি খাদমানা ৰিয চরতি. রাজা তং দিস্ৰা ‘‘অযুত্তং দানি পমত্তং ৰিজ্ঝিতু’’ন্তি জিযং ফোটেসি. মিগো অম্বত্থলমগ্গং গহেত্ৰা পলাযিতুং আরভি. রাজা পিট্ঠিতো পিট্ঠিতো অনুবন্ধন্তো অম্বত্থলমেৰ অভিরুহি. মিগোপি থেরানং অৰিদূরে অন্তরধাযি. মহিন্দত্থেরো রাজানং অৰিদূরে আগচ্ছন্তং দিস্ৰা ‘‘মমংযেৰ রাজা পস্সতু, মা ইতরে’’তি অধিট্ঠহিত্ৰা ‘‘তিস্স, তিস্স, ইতো এহী’’তি আহ. রাজা সুত্ৰা চিন্তেসি – ‘‘ইমস্মিং দীপে জাতো মং ‘তিস্সা’তি নামং গহেত্ৰা আলপিতুং সমত্থো নাম নত্থি. অযং পন ছিন্নভিন্নপটধরো ভণ্ডু কাসাৰৰসনো মং নামেন আলপতি, কো নু খো অযং ভৰিস্সতি মনুস্সো ৰা অমনুস্সো ৰা’’তি? থেরো আহ –

‘‘সমণা মযং মহারাজ, ধম্মরাজস্স সাৰকা;

তৰেৰ অনুকম্পায, জম্বুদীপা ইধাগতা’’তি.

তেন চ সমযেন দেৰানম্পিযতিস্সমহারাজা চ অসোকধম্মরাজা চ অদিট্ঠসহাযকা হোন্তি. দেৰানম্পিযতিস্সমহারাজস্স চ পুঞ্ঞানুভাৰেন ছাতপব্বতপাদে একম্হি ৰেল়ুগুম্বে তিস্সো ৰেল়ুযট্ঠিযো রথযট্ঠিপ্পমাণা উপ্পজ্জিংসু – একা লতাযট্ঠি নাম, একা পুপ্ফযট্ঠি নাম, একা সকুণযট্ঠি নাম. তাসু লতাযট্ঠি রজতৰণ্ণা হোতি, তং অলঙ্করিত্ৰা উপ্পন্নলতা কঞ্চনৰণ্ণা খাযতি. পুপ্ফযট্ঠিযং পন নীলপীতলোহিতোদাতকাল়ৰণ্ণানি পুপ্ফানি সুৰিভত্তৰণ্টপত্তকিঞ্জক্খানি হুত্ৰা খাযন্তি. সকুণযট্ঠিযং হংসকুক্কুটজীৰজীৰকাদযো সকুণা নানপ্পকারানি চ চতুপ্পদানি সজীৰানি ৰিয খাযন্তি. ৰুত্তম্পি চেতং দীপৰংসে –

‘‘ছাতপব্বতপাদম্হি, ৰেল়ুযট্ঠী তযো অহু;

সেতা রজতযট্ঠীৰ, লতা কঞ্চনসন্নিভা.

‘‘নীলাদি যাদিসং পুপ্ফং, পুপ্ফযট্ঠিম্হি তাদিসং;

সকুণা সকুণযট্ঠিম্হি, সরূপেনেৰ সণ্ঠিতা’’তি.

সমুদ্দতোপিস্স মুত্তামণিৰেল়ুরিযাদি অনেকৰিহিতং রতনং উপ্পজ্জি. তম্বপণ্ণিযং পন অট্ঠ মুত্তা উপ্পজ্জিংসু – হযমুত্তা, গজমুত্তা, রথমুত্তা, আমলকমুত্তা, ৰলযমুত্তা, অঙ্গুলিৰেঠকমুত্তা, ককুধফলমুত্তা, পাকতিকমুত্তাতি. সো তা চ যট্ঠিযো তা চ মুত্তা অঞ্ঞঞ্চ বহুং রতনং অসোকস্স ধম্মরঞ্ঞো পণ্ণাকারত্থায পেসেসি. অসোকো পসীদিত্ৰা তস্স পঞ্চ রাজককুধভণ্ডানি পহিণি – ছত্তং, চামরং, খগ্গং, মোল়িং, রতনপাদুকং, অঞ্ঞঞ্চ অভিসেকত্থায বহুৰিধং পণ্ণাকারং; সেয্যথিদং – সঙ্খং, গঙ্গোদকং, ৰড্ঢমানং, ৰটংসকং, ভিঙ্গারং, নন্দিযাৰট্টং, সিৰিকং, কঞ্ঞং, কটচ্ছুং, অধোৰিমং দুস্সযুগং, হত্থপুঞ্ছনং, হরিচন্দনং, অরুণৰণ্ণমত্তিকং, অঞ্জনং, হরীতকং, আমলকন্তি. ৰুত্তম্পি চেতং দীপৰংসে –

‘‘ৰালবীজনিমুণ্হীসং, ছত্তং খগ্গঞ্চ পাদুকং;

ৰেঠনং সারপামঙ্গং, ভিঙ্গারং নন্দিৰট্টকং.

‘‘সিৰিকং সঙ্খং ৰটংসঞ্চ, অধোৰিমং ৰত্থকোটিকং;