৩. খম্ভকতৰগ্গৰণ্ণনা

৫৯৬-৮. খম্ভকতো নাম কটিযং হত্থং ঠপেত্ৰা কতখম্ভো. ওগুণ্ঠিতোতি সসীসং পারুতো.

৬০০. উক্কুটিকাযাতি এত্থ উক্কুটিকা ৰুচ্চতি পণ্হিযো উক্খিপিত্ৰা অগ্গপাদেহি ৰা, অগ্গপাদে ৰা উক্খিপিত্ৰা পণ্হীহিযেৰ ৰা ভূমিং ফুসন্তস্স গমনং. করণৰচনং পনেত্থ ৰুত্তলক্খণমেৰ.

৬০১. দুস্সপল্লত্থিকাযাতি এত্থ আযোগপল্লত্থিকাপি দুস্সপল্লত্থিকা এৰ.

৬০২. সক্কচ্চন্তি সতিং উপট্ঠপেত্ৰা.

৬০৩. আকিরন্তেপীতি পিণ্ডপাতং দেন্তেপি. পত্তসঞ্ঞীতি পত্তে সঞ্ঞং কত্ৰা.

৬০৪. সমসূপকো নাম যত্থ ভত্তস্স চতুত্থভাগপ্পমাণো সূপো হোতি. মুগ্গসূপো মাসসূপোতি এত্থ কুলত্থাদীহি কতসূপাপি সঙ্গহং গচ্ছন্তিযেৰাতি মহাপচ্চরিযং ৰুত্তং. রসরসেতি এত্থ ঠপেত্ৰা দ্ৰে সূপে অৰসেসানি ওলোণীসাকসূপেয্যমচ্ছরসমংসরসাদীনি রসরসাতি ৰেদিতব্বানি. তং রসরসং বহুম্পি গণ্হন্তস্স অনাপত্তি.

৬০৫. সমতিত্তিকন্তি সমপুণ্ণং সমভরিতং. থূপীকতং পিণ্ডপাতং পটিগ্গণ্হাতি, আপত্তি দুক্কটস্সাতি এত্থ থূপীকতো নাম পত্তস্স অন্তোমুখৰট্টিলেখং অতিক্কমিত্ৰা কতো; পত্তে পক্খিত্তো রচিতো পূরিতোতি অত্থো. এৰং কতং অগহেত্ৰা অন্তোমুখৰট্টিলেখাসমপ্পমাণো গহেতব্বো.

তত্থ থূপীকতং নাম ‘‘পঞ্চহি ভোজনেহি কত’’ন্তি অভযত্থেরো আহ. তিপিটকচূল়নাগত্থেরো পন ‘‘পিণ্ডপাতো নাম যাগুপি ভত্তম্পি খাদনীযম্পি চুণ্ণপিণ্ডোপি দন্তকট্ঠম্পি দসিকসুত্তম্পী’’তি ইদং সুত্তং ৰত্ৰা দসিকসুত্তম্পি থূপীকতং ন ৰট্টতীতি আহ. তেসং ৰাদং সুত্ৰা ভিক্খূ রোহণং গন্ত্ৰা চূল়সুমনত্থেরং পুচ্ছিংসু – ‘‘ভন্তে থূপীকতপিণ্ডপাতো কেন পরিচ্ছিন্নো’’তি? তেসঞ্চ থেরানং ৰাদং আরোচেসুং. থেরো সুত্ৰা আহ – ‘‘অহো, চূল়নাগো সাসনতো ভট্ঠো, অহং এতস্স সত্তক্খত্তুং ৰিনযং ৰাচেন্তো ন কদাচি এৰং অৰচং, অযং কুতো লভিত্ৰা এৰং ৰদসী’’তি. ভিক্খূ থেরং যাচিংসু – ‘‘কথেথ দানি, ভন্তে, কেন পরিচ্ছিন্নো’’তি? ‘‘যাৰকালিকেনাৰুসো’’তি থেরো আহ. তস্মা যংকিঞ্চি যাগুভত্তং ৰা ফলাফলং ৰা আমিসজাতিকং সমতিত্তিকমেৰ গহেতব্বং. তঞ্চ খো অধিট্ঠানুপগেন পত্তেন, ইতরেন পন থূপীকতম্পি ৰট্টতি. যামকালিকসত্তাহকালিকযাৰজীৰিকানি পন অধিট্ঠানুপগপত্তেপি থূপীকতানি ৰট্টন্তি. দ্ৰীসু পত্তেসু ভত্তং গহেত্ৰা একস্মিং পূরেত্ৰা ৰিহারং পেসেতুং ৰট্টতীতি মহাপচ্চরিযং পন ৰুত্তং. যং পত্তে পক্খিপিযমানং পূৰউচ্ছুখণ্ডফলাফলাদি হেট্ঠা ওরোহতি, তং থূপীকতং নাম ন হোতি. পূৰৰটংসকং ঠপেত্ৰা পিণ্ডপাতং দেন্তি, থূপীকতমেৰ হোতি. পুপ্ফৰটংসকতক্কোলকটুকফলাদিৰটংসকে পন ঠপেত্ৰা দিন্নং থূপীকতং ন হোতি. ভত্তস্স উপরি থালকং ৰা পত্তং ৰা ঠপেত্ৰা পূরেত্ৰা গণ্হাতি, থূপীকতং নাম ন হোতি. কুরুন্দিযম্পি ৰুত্তং – ‘‘থালকে ৰা পণ্ণে ৰা পক্খিপিত্ৰা তং পত্তমত্থকে ঠপেত্ৰা দেন্তি, পাটেক্কভাজনং ৰট্টতী’’তি.

ইধ অনাপত্তিযং গিলানো ন আগতো, তস্মা গিলানস্সপি থূপীকতং ন ৰট্টতি. সব্বত্থ পন পটিগ্গহেতুমেৰ ন ৰট্টতি. পটিগ্গহিতং পন সুপটিগ্গহিতমেৰ হোতি, পরিভুঞ্জিতুং ৰট্টতীতি.

ততিযো ৰগ্গো.