৪. সক্কচ্চৰগ্গৰণ্ণনা

৬০৬. সক্কচ্চন্তি এত্থাপি অসক্কচ্চং পটিগ্গহণেযেৰ আপত্তি, পটিগ্গহিতং পন সুপটিগ্গহিতমেৰ. সক্কচ্চন্তি চ পত্তসঞ্ঞীতি চাতি উভযং ৰুত্তনযমেৰ.

৬০৮. সপদানন্তি তত্থ তত্থ ওধিং অকত্ৰা অনুপটিপাটিযা. সমসূপকে ৰত্তব্বং ৰুত্তমেৰ.

৬১০. থূপকতোতি মত্থকতো; ৰেমজ্ঝতোতি অত্থো.

৬১১. পটিচ্ছাদেত্ৰা দেন্তীতি মাঘাতসমযাদীসু পটিচ্ছন্নং ব্যঞ্জনং কত্ৰা দেন্তি. ৰিঞ্ঞত্তিযং ৰত্তব্বং নত্থি.

৬১৪. উজ্ঝানসঞ্ঞীসিক্খাপদেপি গিলানো ন মুচ্চতি.

৬১৫. নাতিমহন্তো কবল়োতি মযূরণ্ডং অতিমহন্তং, কুক্কুটণ্ডং অতিখুদ্দকং, তেসং ৰেমজ্ঝপ্পমাণো. খজ্জকেতি এত্থ মূলখাদনীযাদি সব্বং গহেতব্বং.

চতুত্থো ৰগ্গো.