৪. পহারসিক্খাপদৰণ্ণনা

৪৪৯. চতুত্থে – পহারং দেন্তীতি ‘‘আৰুসো পীঠকং পঞ্ঞপেথ, পাদধোৰনং আহরথা’’তিআদীনি ৰত্ৰা তথা অকরোন্তানং পহারং দেন্তি.

৪৫১. পহারং দেতি আপত্তি পাচিত্তিযস্সাতি এত্থ পহরিতুকামতায পহারে দিন্নে সচেপি মরতি পাচিত্তিযমেৰ. পহারেন হত্থো ৰা পাদো ৰা ভিজ্জতি, সীসং ৰা ভিন্নং হোতি, পাচিত্তিযমেৰ. ‘‘যথাযং সঙ্ঘমজ্ঝে ন ৰিরোচতি, তথা নং করোমী’’তি এৰং ৰিরূপকরণাধিপ্পাযেন কণ্ণং ৰা নাসং ৰা ছিন্দতি, দুক্কটং.

৪৫২. অনুপসম্পন্নস্সাতি গহট্ঠস্স ৰা পব্বজিতস্স ৰা ইত্থিযা ৰা পুরিসস্স ৰা অন্তমসো তিরচ্ছানগতস্সাপি পহারং দেতি, দুক্কটং. সচে পন রত্তচিত্তো ইত্থিং পহরতি, সঙ্ঘাদিসেসো.

৪৫৩. কেনচি ৰিহেঠিযমানোতি মনুস্সেন ৰা তিরচ্ছানগতেন ৰা ৰিহেঠিযমানো. মোক্খাধিপ্পাযোতি ততো অত্তনো মোক্খং পত্থযমানো. পহারং দেতীতি কাযকাযপটিবদ্ধনিস্সগ্গিযানং অঞ্ঞতরেন পহারং দেতি, অনাপত্তি. সচেপি অন্তরামগ্গে চোরং ৰা পচ্চত্থিকং ৰা ৰিহেঠেতুকামং দিস্ৰা ‘‘উপাসক, এত্থেৰ তিট্ঠ, মা আগমী’’তি ৰত্ৰা ৰচনং অনাদিযিত্ৰা আগচ্ছন্তং ‘‘গচ্ছ রে’’তি মুগ্গরেন ৰা সত্থকেন ৰা পহরিত্ৰা যাতি, সো চে তেন পহারেন মরতি, অনাপত্তিযেৰ. ৰাল়মিগেসুপি এসেৰ নযো. সেসমেত্থ উত্তানমেৰ. সমুট্ঠানাদীনি পনস্স পঠমপারাজিকসদিসানি, ইদং পন দুক্খৰেদনন্তি.

পহারসিক্খাপদং চতুত্থং.