৭. সপ্পাণকৰগ্গো

১. সঞ্চিচ্চপাণসিক্খাপদৰণ্ণনা

৩৮২. সপ্পাণকৰগ্গস্স পঠমসিক্খাপদে – ইস্সাসো হোতীতি গিহিকালে ধনুগ্গহাচরিযো হোতি. জীৰিতা ৰোরোপিতাতি জীৰিতা ৰিযোজিতা.

সিক্খাপদেপি ৰোরোপেয্যাতি ৰিযোজেয্য. যস্মা পন ৰোহারমত্তমেৰেতং; ন হেত্থ কিঞ্চি ৰিযোজিতে সীসালঙ্কারে সীসং ৰিয জীৰিতা ৰোরোপিতে পাণেপি জীৰিতং নাম ৰিসুং তিট্ঠতি, অঞ্ঞদত্থু অন্তরধানমেৰ গচ্ছতি, তস্মা তমত্থং দস্সেতুং পদভাজনে ‘‘জীৰিতিন্দ্রিযং উপচ্ছিন্দতী’’তিআদি ৰুত্তং. ইমস্মিঞ্চ সিক্খাপদে তিরচ্ছানগতোযেৰ ‘‘পাণো’’তি ৰেদিতব্বো. তং খুদ্দকম্পি মহন্তম্পি মারেন্তস্স আপত্তিনানাকরণং নত্থি. মহন্তে পন উপক্কমমহন্তত্তা অকুসলমহত্তং হোতি. পাণে পাণসঞ্ঞীতি অন্তমসো মঞ্চপীঠং সোধেন্তো মঙ্গুলবীজকেপি পাণসঞ্ঞী নিক্কারুণিকতায তং ভিন্দন্তো অপনেতি, পাচিত্তিযং. তস্মা এৰরূপেসু ঠানেসু কারুঞ্ঞং উপট্ঠপেত্ৰা অপ্পমত্তেন ৰত্তং কাতব্বং. সেসং মনুস্সৰিগ্গহে ৰুত্তনযেনেৰ ৰেদিতব্বং সদ্ধিং সমুট্ঠানাদীহীতি.

সঞ্চিচ্চপাণসিক্খাপদং পঠমং.

২. সপ্পাণকসিক্খাপদৰণ্ণনা

৩৮৭. দুতিযে – সপ্পাণকন্তি যে পাণকা পরিভোগেন মরন্তি, তেহি পাণকেহি সপ্পাণকং, তাদিসঞ্হি জানং পরিভুঞ্জতো পযোগে পযোগে পাচিত্তিযং. পত্তপূরম্পি অৰিচ্ছিন্দিত্ৰা একপযোগেন পিৰতো একা আপত্তি. তাদিসেন উদকেন সামিসং পত্তং আৰিঞ্ছিত্ৰা ধোৰতোপি তাদিসে উদকে উণ্হযাগুপত্তং নিব্বাপযতোপি তং উদকং হত্থেন ৰা উল়ুঙ্কেন ৰা গহেত্ৰা ন্হাযতোপি পযোগে পযোগে পাচিত্তিযং. উদকসোণ্ডিং ৰা পোক্খরণিং ৰা পৰিসিত্ৰা বহিনিক্খমনত্থায ৰীচিং উট্ঠাপযতোপি. সোণ্ডিং ৰা পোক্খরণিং ৰা সোধেন্তেহি ততো গহিতউদকং উদকেযেৰ আসিঞ্চিতব্বং. সমীপম্হি উদকে অসতি কপ্পিযউদকস্স অট্ঠ ৰা দস ৰা ঘটে উদকসণ্ঠানকপ্পদেসে আসিঞ্চিত্ৰা তত্থ আসিঞ্চিতব্বং. ‘‘পৰট্টিত্ৰা উদকে পতিস্সতী’’তি উণ্হপাসাণে উদকং নাসিঞ্চিতব্বং. কপ্পিযউদকেন পন পাসাণং নিব্বাপেত্ৰা আসিঞ্চিতুং ৰট্টতি. সেসমেত্থ উত্তানমেৰ.

তিসমুট্ঠানং – কিরিযং, সঞ্ঞাৰিমোক্খং, সচিত্তকং, পণ্ণত্তিৰজ্জং, কাযকম্মং,

ৰচীকম্মং, তিচিত্তং, তিৰেদনন্তি. এত্থ চ পটঙ্গপাণকানং পতনং ঞত্ৰাপি সুদ্ধচিত্ততায দীপজালনে ৰিয সপ্পাণকভাৰং ঞত্ৰাপি উদকসঞ্ঞায পরিভুঞ্জিতব্বতো পণ্ণত্তিৰজ্জতা ৰেদিতব্বাতি.

সপ্পাণকসিক্খাপদং দুতিযং.

৩. উক্কোটনসিক্খাপদৰণ্ণনা

৩৯২. ততিযসিক্খাপদে – উক্কোটেন্তীতি তস্স তস্স ভিক্খুনো সন্তিকং গন্ত্ৰা ‘‘অকতং কম্ম’’ন্তিআদীনি ৰদন্তা উচ্চালেন্তি; যথাপতিট্ঠিতভাৰেন পতিট্ঠাতুং ন দেন্তি.

৩৯৩. যথাধম্মন্তি যো যস্স অধিকরণস্স ৰূপসমনায ধম্মো ৰুত্তো, তেনেৰ ধম্মেনাতি অত্থো. নিহতাধিকরণন্তি নিহতং অধিকরণং; সত্থারা ৰুত্তধম্মেনেৰ ৰূপসমিতং অধিকরণন্তি অত্থো.

৩৯৫. ধম্মকম্মে ধম্মকম্মসঞ্ঞীতি যেন কম্মেন তং অধিকরণং ৰূপসমিতং, তঞ্চে ধম্মকম্মং হোতি, তস্মিং ধম্মকম্মে অযম্পি ধম্মকম্মসঞ্ঞী হুত্ৰা যদি উক্কোটেতি, পাচিত্তিযং আপজ্জতীতি অত্থো. এতেন নযেন সেসপদানিপি ৰেদিতব্বানি. অযমেত্থ সঙ্খেপো, ৰিত্থারো পন ‘‘ইমেসং চতুন্নং অধিকরণানং কতি উক্কোটনা’’তিআদিনা নযেন পরিৰারে ৰুত্তো. অট্ঠকথাসু তং সব্বং আহরিত্ৰা তস্সেৰত্থো ৰণ্ণিতো. মযং পন তং তত্থেৰ ৰণ্ণযিস্সাম. ইধ আহরিত্ৰা ৰণ্ণিযমানে হি সুট্ঠুতরং সম্মোহো ভৰেয্যাতি ন ৰণ্ণযিম্হ. সেসমেত্থ উত্তানমেৰ. তিসমুট্ঠানং – কিরিযং, সঞ্ঞাৰিমোক্খং, সচিত্তকং, লোকৰজ্জং, কাযকম্মং, ৰচীকম্মং, অকুসলচিত্তং, দুক্খৰেদনন্তি.

উক্কোটনসিক্খাপদং ততিযং.

৪. দুট্ঠুল্লসিক্খাপদৰণ্ণনা

৩৯৯. চতুত্থে – দুট্ঠুল্লা নাম আপত্তীতি এত্থ চত্তারি পারাজিকানি অত্থুদ্ধারৰসেন দস্সিতানি, সঙ্ঘাদিসেসাপত্তি পন অধিপ্পেতা, তং ছাদেন্তস্স পাচিত্তিযং. ধুরং নিক্খিত্তমত্তেতি ধুরে নিক্খিত্তমত্তে. সচেপি ধুরং নিক্খিপিত্ৰা পচ্ছা আরোচেতি, ন রক্খতি; ধুরং নিক্খিত্তমত্তেযেৰ পাচিত্তিযন্তি ৰুত্তং হোতি. সচে পন এৰং ধুরং নিক্খিপিত্ৰা পটিচ্ছাদনত্থমেৰ অঞ্ঞস্স আরোচেতি, সোপি অঞ্ঞস্সাতি এতেনুপাযেন সমণসতম্পি সমণসহস্সম্পি আপত্তিং আপজ্জতিযেৰ তাৰ, যাৰ কোটি ন ছিজ্জতি. কদা পন কোটি ছিজ্জতীতি? মহাসুমত্থেরো তাৰ ৰদতি – ‘‘আপত্তিং আপন্নো একস্স আরোচেতি, সো পটিনিৰত্তিত্ৰা তস্সেৰ আরোচেতি; এৰং কোটি ছিজ্জতী’’তি. মহাপদুমত্থেরো পনাহ – ‘‘অযঞ্হি ৰত্থুপুগ্গলোযেৰ. আপত্তিং আপন্নো পন একস্স ভিক্খুনো আরোচেতি, অযং অঞ্ঞস্স আরোচেতি, সো পটিনিৰত্তিত্ৰা যেনস্স আরোচিতং, তস্সেৰ আরোচেতি; এৰং ততিযেন পুগ্গলেন দুতিযস্স আরোচিতে কোটি ছিন্না হোতী’’তি.

৪০০. অদুট্ঠুল্লং আপত্তিন্তি অৰসেসে পঞ্চাপত্তিক্খন্ধে. অনুপসম্পন্নস্স দুট্ঠুল্লং ৰা অদুট্ঠুল্লং ৰা অজ্ঝাচারন্তি এত্থ অনুপসম্পন্নস্স সুক্কৰিস্সট্ঠি চ কাযসংসগ্গো চাতি অযং দুট্ঠুল্লঅজ্ঝাচারো নাম. সেসমেত্থ উত্তানমেৰাতি. ধুরনিক্খেপসমুট্ঠানং – কাযৰাচাচিত্ততো সমুট্ঠাতি, অকিরিযং, সঞ্ঞাৰিমোক্খং, সচিত্তকং, লোকৰজ্জং, কাযকম্মং, ৰচীকম্মং, অকুসলচিত্তং, দুক্খৰেদনন্তি.

দুট্ঠুল্লসিক্খাপদং চতুত্থং.

৫. ঊনৰীসতিৰস্সসিক্খাপদৰণ্ণনা

৪০২. পঞ্চমসিক্খাপদে – অঙ্গুলিযো দুক্খা ভৰিস্সন্তীতি অক্খরানি লিখন্তস্স অঙ্গুলিযো দুক্খা ভৰিস্সন্তীতি চিন্তেসুং. উরস্স দুক্খোতি গণনং সিক্খন্তেন বহুং চিন্তেতব্বং হোতি, তেনস্স উরো দুক্খো ভৰিস্সতীতি মঞ্ঞিংসু. অক্খীনি দুক্খা ভৰিস্সন্তীতি রূপসুত্তং সিক্খন্তেন কহাপণা পরিৰত্তেত্ৰা পরিৰত্তেত্ৰা পস্সিতব্বা হোন্তি, তেনস্স অক্খীনি দুক্খানি ভৰিস্সন্তীতি মঞ্ঞিংসু. ডংসাদীসু ডংসাতি পিঙ্গলমক্খিকাযো. দুক্খানন্তি দুক্খমানং. তিব্বানন্তি বহলানং. খরানন্তি তিখিণানং. কটুকানন্তি ফরুসানং; অমনাপতায ৰা কটুকরসসদিসানং. অসাতানন্তি অমধুরানং. পাণহরানন্তি জীৰিতহরানং.

৪০৪. সীমং সম্মন্নতীতি নৰং সীমং বন্ধতি. কুরুন্দিযং পন উদকুক্খেপপরিচ্ছিন্দনেপি দুক্কটং ৰুত্তং. পরিপুণ্ণৰীসতিৰস্সোতি পটিসন্ধিগ্গহণতো পট্ঠায পরিপুণ্ণৰীসতিৰস্সো; গব্ভৰীসোপি হি পরিপুণ্ণৰীসতিৰস্সোত্ৰেৰ সঙ্খ্যে গচ্ছতি. যথাহ –

‘‘তেন খো পন সমযেন আযস্মা কুমারকস্সপো গব্ভৰীসো উপসম্পন্নো হোতি. অথ খো আযস্মতো কুমারকস্সপস্স এতদহোসি – ‘ভগৰতা পঞ্ঞত্তং, ন ঊনৰীসতিৰস্সো পুগ্গলো উপসম্পাদেতব্বোতি. অহঞ্চম্হি গব্ভৰীসো উপসম্পন্নো. উপসম্পন্নো নুখোম্হি, ননু খো উপসম্পন্নো’তি. ভগৰতো এতমত্থং আরোচেসুং. যং ভিক্খৰে মাতুকুচ্ছিম্হি পঠমং চিত্তং উপ্পন্নং, পঠমং ৰিঞ্ঞাণং পাতুভূতং তদুপাদায সাৰস্স জাতি. অনুজানামি, ভিক্খৰে, গব্ভৰীসং উপসম্পাদেতু’’ন্তি (মহাৰ. ১২৪).

তত্থ যো দ্ৰাদসমাসে মাতুকুচ্ছিস্মিং ৰসিত্ৰা মহাপৰারণায জাতো, সো ততো পট্ঠায যাৰ একূনৰীসতিমে ৰস্সে মহাপৰারণা, তং অতিক্কমিত্ৰা পাটিপদে উপসম্পাদেতব্বো. এতেনুপাযেন হাযনৰড্ঢনং ৰেদিতব্বং.

পোরাণকত্থেরা পন একূনৰীসতিৰস্সং সামণেরং নিক্খমনীযপুণ্ণমাসিং অতিক্কম্ম পাটিপদদিৰসে উপসম্পাদেন্তি, তং কস্মাতি? ৰুচ্চতে – একস্মিং ৰস্সে ছ চাতুদ্দসিকউপোসথা হোন্তি. ইতি ৰীসতিযা ৰস্সেসু চত্তারো মাসা পরিহাযন্তি. রাজানো ততিযে ততিযে ৰস্সে ৰস্সং উক্কড্ঢন্তি. ইতি অট্ঠারসসু ৰস্সেসু ছ মাসা ৰড্ঢন্তি, ততো উপোসথৰসেন পরিহীনে চত্তারো মাসে অপনেত্ৰা দ্ৰে মাসা অৰসেসা হোন্তি, তে দ্ৰে মাসে গহেত্ৰা ৰীসতিৰস্সানি পরিপুণ্ণানি হোন্তীতি নিক্কঙ্খা হুত্ৰা নিক্খমনীযপুণ্ণমাসিং অতিক্কম্ম পাটিপদে উপসম্পাদেন্তি. এত্থ পন যো পৰারেত্ৰা ৰীসতিৰস্সো ভৰিস্সতি, তং সন্ধায ‘‘একূনৰীসতিৰস্স’’ন্তি ৰুত্তং. তস্মা যো মাতুকুচ্ছিস্মিং দ্ৰাদসমাসে ৰসি, সো একৰীসতিৰস্সো হোতি. যো সত্তমাসে ৰসি, সো সত্তমাসাধিকৰীসতিৰস্সো. ছমাসজাতো পন ন জীৰতি.

৪০৬. অনাপত্তি ঊনৰীসতিৰস্সং পরিপুণ্ণৰীসতিৰস্সসঞ্ঞীতি এত্থ কিঞ্চাপি উপসম্পাদেন্তস্স অনাপত্তি, পুগ্গলো পন অনুপসম্পন্নোৰ হোতি. সচে পন সো দসৰস্সচ্চযেন অঞ্ঞং উপসম্পাদেতি, তঞ্চে মুঞ্চিত্ৰা গণো পূরতি, সূপসম্পন্নো. সোপি চ যাৰ ন জানাতি, তাৰস্স নেৰ সগ্গন্তরাযো ন মোক্খন্তরাযো, ঞত্ৰা পন পুন উপসম্পজ্জিতব্বং. সেসং উত্তানমেৰ.

তিসমুট্ঠানং – কিরিযং, সঞ্ঞাৰিমোক্খং, সচিত্তকং, পণ্ণত্তিৰজ্জং, কাযকম্মং,

ৰচীকম্মং, তিচিত্তং, তিৰেদনন্তি.

ঊনৰীসতিৰস্সসিক্খাপদং পঞ্চমং.

৬. থেয্যসত্থসিক্খাপদৰণ্ণনা

৪০৭. ছট্ঠে – পটিযালোকন্তি সূরিযালোকস্স পটিমুখং; পচ্ছিমদিসন্তি অত্থো. কম্মিযাতি সুঙ্কট্ঠানে কম্মিকা.

৪০৯. রাজানং ৰা থেয্যং গচ্ছন্তীতি রাজানং ৰা থেনেত্ৰা ৰঞ্চেত্ৰা রঞ্ঞো সন্তকং কিঞ্চি গহেত্ৰা ইদানি ন তস্স দস্সামাতি গচ্ছন্তি.

৪১১. ৰিসঙ্কেতেনাতি কালৰিসঙ্কেতেন দিৰসৰিসঙ্কেতেন চ গচ্ছতো অনাপত্তি. মগ্গৰিসঙ্কেতেন পন অটৰিৰিসঙ্কেতেন ৰা আপত্তিযেৰ. সেসমেত্থ ভিক্খুনিৰগ্গে ৰুত্তনযত্তা উত্তানত্থমেৰ. থেয্যসত্থসমুট্ঠানং – কাযচিত্ততো কাযৰাচাচিত্ততো চ সমুট্ঠাতি, কিরিযং, সঞ্ঞাৰিমোক্খং, সচিত্তকং, পণ্ণত্তিৰজ্জং, কাযকম্মং, ৰচীকম্মং, তিচিত্তং, তিৰেদনন্তি.

থেয্যসত্থসিক্খাপদং ছট্ঠং.

৭. সংৰিধানসিক্খাপদৰণ্ণনা

৪১২. সত্তমে – পধূপেন্তো নিসীদীতি পজ্ঝাযন্তো অত্তানংযেৰ পরিভাসন্তো নিসীদি. নায্যো সো ভিক্খু মং নিপ্পাতেসীতি অয্যো অযং ভিক্খু মং ন নিক্খামেসি; ন মং গহেত্ৰা অগমাসীতি অত্থো. সেসমেত্থ ভিক্খুনিযা সদ্ধিং সংৰিধানসিক্খাপদে ৰুত্তনযেনেৰ ৰেদিতব্বং সদ্ধিং সমুট্ঠানাদীহীতি.

সংৰিধানসিক্খাপদং সত্তমং.

৮. অরিট্ঠসিক্খাপদৰণ্ণনা

৪১৭. অট্ঠমে – গদ্ধে বাধযিংসূতি গদ্ধবাধিনো; গদ্ধবাধিনো পুব্বপুরিসা অস্সাতি গদ্ধবাধিপুব্বো, তস্স গদ্ধবাধিপুব্বস্স গিজ্ঝঘাতককুলপ্পসুতস্সাতি অত্থো.

সগ্গমোক্খানং অন্তরাযং করোন্তীতি অন্তরাযিকা. তে কম্মকিলেসৰিপাকউপৰাদআণাৰীতিক্কমৰসেন পঞ্চৰিধা. তত্থ পঞ্চানন্তরিযকম্মা কম্মন্তরাযিকা নাম. তথা ভিক্খুনীদূসককম্মং, তং পন মোক্খস্সেৰ অন্তরাযং করোতি, ন সগ্গস্স. নিযতমিচ্ছাদিট্ঠিধম্মা কিলেসন্তরাযিকা নাম. পণ্ডকতিরচ্ছানগতউভতোব্যঞ্জনকানং পটিসন্ধিধম্মা ৰিপাকন্তরাযিকা নাম. অরিযূপৰাদা উপৰাদন্তরাযিকা নাম, তে পন যাৰ অরিযে ন খমাপেন্তি তাৰদেৰ, ন ততো পরং. সঞ্চিচ্চ আপন্না আপত্তিযো আণাৰীতিক্কমন্তরাযিকা নাম, তাপি যাৰ ভিক্খুভাৰং ৰা পটিজানাতি, ন ৰুট্ঠাতি ৰা ন দেসেতি ৰা তাৰদেৰ, ন ততো পরং.

তত্রাযং ভিক্খু বহুস্সুতো ধম্মকথিকো সেসন্তরাযিকে জানাতি, ৰিনযে পন অকোৰিদত্তা পণ্ণত্তিৰীতিক্কমন্তরাযিকে ন জানাতি, তস্মা রহোগতো এৰং চিন্তেসি – ‘‘ইমে আগারিকা পঞ্চ কামগুণে পরিভুঞ্জন্তা সোতাপন্নাপি সকদাগামিনোপি অনাগামিনোপি হোন্তি, ভিক্খূপি মনাপিকানি চক্খুৰিঞ্ঞেয্যানি রূপানি পস্সন্তি…পে… কাযৰিঞ্ঞেয্যে ফোট্ঠব্বে ফুসন্তি, মুদুকানি অত্থরণপাৰুরণাদীনি পরিভুঞ্জন্তি, এতং সব্বং ৰট্টতি. কস্মা ইত্থিরূপা…পে… ইত্থিফোট্ঠব্বা এৰ ন ৰট্টন্তি, এতেপি ৰট্টন্তী’’তি. এৰং রসেন রসং সংসন্দিত্ৰা সচ্ছন্দরাগপরিভোগঞ্চ নিচ্ছন্দরাগপরিভোগঞ্চ একং কত্ৰা থূলৰাকেহি সদ্ধিং অতিসুখুমসুত্তং ঘটেন্তো ৰিয সাসপেন সদ্ধিং সিনেরুং উপসংহরন্তো ৰিয পাপকং দিট্ঠিগতং উপ্পাদেত্ৰা ‘‘কিং ভগৰতা মহাসমুদ্দং বন্ধন্তেন ৰিয মহতা উস্সাহেন পঠমপারাজিকং পঞ্ঞত্তং, নত্থি এত্থ দোসো’’তি সব্বঞ্ঞুতঞ্ঞাণেন সদ্ধিং পটিৰিরুজ্ঝন্তো ভব্বপুগ্গলানং আসং ছিন্দন্তো জিনস্স আণাচক্কে পহারমদাসি. তেনাহ – ‘‘তথাহং ভগৰতা ধম্মং দেসিতং আজানামী’’তিআদি.

অট্ঠিকঙ্কলূপমাতিআদিম্হি অট্ঠিকঙ্কলূপমা অপ্পস্সাদট্ঠেন. মংসপেসূপমা বহুসাধারণট্ঠেন. তিণুক্কূপমা অনুদহনট্ঠেন. অঙ্গারকাসূপমা মহাভিতাপনট্ঠেন. সুপিনকূপমা ইত্তরপচ্চুপট্ঠানট্ঠেন. যাচিতকূপমা তাৰকালিকট্ঠেন. রুক্খফলূপমা সব্বঙ্গপচ্চঙ্গপলিভঞ্জনট্ঠেন. অসিসূনূপমা অধিকুট্টনট্ঠেন. সত্তিসূলূপমা ৰিনিৰিজ্ঝনট্ঠেন. সপ্পসিরূপমা সাসঙ্কসপ্পটিভযট্ঠেনাতি অযমেত্থ সঙ্খেপো. ৰিত্থারো পন পপঞ্চসূদনিযং মজ্ঝিমট্ঠকথাযং (ম. নি. ১.২৩৪ আদযো; ২.৪২ আদযো) গহেতব্বো. এৰং ব্যাখোতি এৰং ৰিয খো. সেসমেত্থ পুব্বে ৰুত্তনযত্তা উত্তানমেৰ.

সমনুভাসনসমুট্ঠানং – কাযৰাচাচিত্ততো সমুট্ঠাতি, অকিরিযং, সঞ্ঞাৰিমোক্খং, সচিত্তকং, লোকৰজ্জং, কাযকম্মং, ৰচীকম্মং, অকুসলচিত্তং, দুক্খৰেদনন্তি.

অরিট্ঠসিক্খাপদং অট্ঠমং.

৯. উক্খিত্তসম্ভোগসিক্খাপদৰণ্ণনা

৪২৪-৫. নৰমে – অকটানুধম্মেনাতি অনুধম্মো ৰুচ্চতি আপত্তিযা অদস্সনে ৰা অপ্পটিকম্মে ৰা পাপিকায দিট্ঠিযা অপ্পটিনিস্সগ্গে ৰা ধম্মেন ৰিনযেন সত্থুসাসনেন উক্খিত্তকস্স অনুলোমৰত্তং দিস্ৰা কতা ওসারণা; সো ওসারণসঙ্খাতো অনুধম্মো যস্স ন কতো, অযং অকটানুধম্মো নাম, তাদিসেন সদ্ধিন্তি অত্থো. তেনেৰস্স পদভাজনে ‘‘অকটানুধম্মো নাম উক্খিত্তো অনোসারিতো’’তি ৰুত্তং.

দেতি ৰা পটিগ্গণ্হাতি ৰাতি একপযোগেন বহুম্পি দদতো ৰা গণ্হতো ৰা একং পাচিত্তিযং. ৰিচ্ছিন্দিত্ৰা ৰিচ্ছিন্দিত্ৰা দেন্তস্স চ গণ্হন্তস্স চ পযোগগণনায পাচিত্তিযানি. সেসমেত্থ উত্তানমেৰ. তিসমুট্ঠানং – কিরিযং, সঞ্ঞাৰিমোক্খং, সচিত্তকং, পণ্ণত্তিৰজ্জং, কাযকম্মং, ৰচীকম্মং, তিচিত্তং, তিৰেদনন্তি.

উক্খিত্তসম্ভোগসিক্খাপদং নৰমং.

১০. কণ্টকসিক্খাপদৰণ্ণনা

৪২৮. দসমে – দিট্ঠিগতং উপ্পন্নন্তি অরিট্ঠস্স ৰিয এতস্সাপি অযোনিসো উম্মুজ্জন্তস্স উপ্পন্নং. নাসেতূতি এত্থ তিৰিধা নাসনা – সংৰাসনাসনা, লিঙ্গনাসনা, দণ্ডকম্মনাসনাতি. তত্থ আপত্তিযা অদস্সনাদীসু উক্খেপনা সংৰাসনাসনা নাম. ‘‘দূসকো নাসেতব্বো (পারা. ৬৬) মেত্তিযং ভিক্খুনিং নাসেথা’’তি (পারা. ৩৮৪) অযং লিঙ্গনাসনা নাম. ‘‘অজ্জতগ্গে তে আৰুসো সমণুদ্দেস ন চেৰ সো ভগৰা সত্থা অপদিসিতব্বো’’তি অযং দণ্ডকম্মনাসনা নাম. অযং ইধ অধিপ্পেতা. তেনাহ – ‘‘এৰঞ্চ পন ভিক্খৰে নাসেতব্বো…পে… ৰিনস্সা’’তি. তত্থ চরাতি গচ্ছ. পিরেতি পর অমামক. ৰিনস্সাতি নস্স; যত্থ তে ন পস্সাম, তত্থ গচ্ছাতি.

৪২৯. উপলাপেয্যাতি সঙ্গণ্হেয্য. উপট্ঠাপেয্যাতি তেন অত্তনো উপট্ঠানং কারাপেয্য. সেসং অরিট্ঠসিক্খাপদে ৰুত্তনযেনেৰ ৰেদিতব্বং সদ্ধিং সমুট্ঠানাদীহীতি.

কণ্টকসিক্খাপদং দসমং.

সমত্তো ৰণ্ণনাক্কমেন সপ্পাণকৰগ্গো সত্তমো.