৯. পাতিমোক্খট্ঠপনক্খন্ধকং

পাতিমোক্খুদ্দেসযাচনকথা

৩৮৩. পাতিমোক্খট্ঠপনক্খন্ধকে – (নন্দিমুখিযা রত্তিযাতি অরুণুট্ঠিতকালেপি হি নন্দিমুখা ৰিয রত্তি খাযতি. তেনাহ ‘‘নন্দিমুখিযা রত্তিযা’’তি. অন্তোপূতিন্তি অত্তচিত্তসন্তানে কিলেসপূতিভাৰেন অন্তোপূতিং. অৰস্সুতন্তি কিলেসৰস্সনৰসেন অৰস্সুতং. কসম্বুকজাতন্তি আকিণ্ণদোসতায সংকিলিট্ঠজাতং.) যাৰ বাহাগহণাপি নামাতি ‘‘অপরিসুদ্ধা আনন্দ পরিসা’’তি ৰচনং সুত্ৰাযেৰ হি তেন পক্কমিতব্বং সিযা, এৰং অপক্কমিত্ৰা যাৰ বাহাগহণাপি নাম সো মোঘপুরিসো আগমেস্সতি, অচ্ছরিযমিদন্তি দস্সেতি.

৩৮৪. ন আযতকেনেৰ পপাতোতি ন পঠমমেৰ গম্ভীরো; অনুপুব্বেন গম্ভীরোতি অত্থো. ঠিতধম্মো ৰেলং নাতিৰত্ততীতি ৰীচীনং ওসক্কনকন্দরং মরিযাদৰেলং নাতিক্কমতি. তীরং ৰাহেতীতি তীরতো অপ্পেতি; উস্সারেতীতি অত্থো. অঞ্ঞাপটিৰেধোতি অরহত্তপ্পত্তি.

৩৮৫. ছন্নমতিৰস্সতীতি আপত্তিং আপজ্জিত্ৰা পটিচ্ছাদেন্তো অঞ্ঞং নৰং আপত্তিং আপজ্জতি ইদমেতং সন্ধায ৰুত্তং. ৰিৰটং নাতিৰস্সতীতি আপত্তিং আপজ্জিত্ৰা ৰিৰরন্তো অঞ্ঞং নাপজ্জতি ইদমেতং সন্ধায ৰুত্তং.

পাতিমোক্খুদ্দেসযাচনকথা নিট্ঠিতা.

পাতিমোক্খসৰনারহকথা

৩৮৬. ঠপিতং হোতি পাতিমোক্খন্তি এত্থ পুরে ৰা পচ্ছা ৰা ঠপিতম্পি অট্ঠপিতং হোতি, খেত্তে ঠপিতমেৰ পন ঠপিতং নাম হোতি. তস্মা ‘‘সুণাতু মে, ভন্তে সঙ্ঘো, অজ্জুপোসথো পন্নরসো, যদি সঙ্ঘস্স পত্তকল্লং, সঙ্ঘো উপোসথং করেয্যা’’তি এত্থ যাৰ রে-কারং ভণতি, তাৰ ঠপেতব্বং, ইদঞ্হি খেত্তং. য্য-কারে পন ৰুত্তে ঠপেন্তেন পচ্ছা ঠপিতং নাম হোতি. ‘‘সুণাতু মে’’তি অনারদ্ধেযেৰ ঠপেন্তেন পুরে ঠপিতং হোতি.

পাতিমোক্খসৰনারহকথা নিট্ঠিতা.

ধম্মিকাধম্মিকপাতিমোক্খট্ঠপনকথা

৩৮৭. অমূলিকায সীলৰিপত্তিযা পাতিমোক্খং ঠপেতি অকতাযাতি তেন পুগ্গলেন সা ৰিপত্তি কতা ৰা হোতু অকতা ৰা, পাতিমোক্খট্ঠপনকস্স সঞ্ঞাঅমূলিকৰসেন অমূলিকা হোতি. কতাকতাযাতি কতঞ্চ অকতঞ্চ উভযং গহেত্ৰা ৰুত্তং.

ধম্মিকং সামগ্গিং ন উপেতীতি কম্মং কোপেতুকামতায সঙ্ঘস্স কম্মে করীযমানে নেৰ আগচ্ছতি, ন ছন্দং দেতি, সম্মুখীভূতোৰ পটিক্কোসতি, তেন দুক্কটং আপজ্জতি. ইচ্চস্সাপি সাপত্তিকস্সেৰ পাতিমোক্খং ঠপিতং হোতি. পচ্চাদিযতীতি ‘‘পুন কাতব্বং কম্ম’’ন্তি পচ্চাদিযতি, তেন উক্কোটনকেন পাচিত্তিযং আপজ্জতি. ইচ্চস্সাপি সাপত্তিকস্সেৰ পাতিমোক্খং ঠপিতং হোতি.

ধম্মিকাধম্মিকপাতিমোক্খট্ঠপনকথা নিট্ঠিতা.

ধম্মিকপাতিমোক্খট্ঠপনকথা

৩৮৮. যেহি আকারেহি যেহি লিঙ্গেহি যেহি নিমিত্তেহীতি এত্থ মগ্গেনমগ্গপটিপাদনাদীসু আকারাদিসঞ্ঞা ৰেদিতব্বা. তেন দিট্ঠেন তেন সুতেন তায পরিসঙ্কাযাতি এত্থ দিট্ঠঞ্চ সুতঞ্চ পাল়িযং আগতমেৰ. সচে পন তেহি দিট্ঠসুতেহি পরিসঙ্কং উপ্পাদেয্য, তং সন্ধায ৰুত্তং ‘‘তায পরিসঙ্কাযা’’তি.

ধম্মিকপাতিমোক্খট্ঠপনকথা নিট্ঠিতা.

অত্তাদানঅঙ্গকথা

৩৯৮. অত্তাদানং আদাতুকামেনাতি এত্থ সাসনং সোধেতুকামো ভিক্খু যং অধিকরণং অত্তনা আদিযতি, তং অত্তাদানন্তি ৰুচ্চতি. অকালো ইমং অত্তাদানং আদাতুন্তি এত্থ রাজভযং চোরভযং দুব্ভিক্খভযং ৰস্সারত্তোতি অযং অকালো, ৰিপরীতো কালো.

অভূতং ইদং অত্তাদানন্তি অসন্তমিদং, মযা অধম্মো ৰা ধম্মোতি, ধম্মো ৰা অধম্মোতি, অৰিনযো ৰা ৰিনযোতি, ৰিনযো ৰা অৰিনযোতি, দুস্সীলো ৰা পুগ্গলো সীলৰাতি, সীলৰা ৰা দুস্সীলোতি গহিতোতি অত্থো; ৰিপরিযাযেন ভূতং ৰেদিতব্বং. অনত্থসংহিতং ইদং অত্তাদানন্তি এত্থ যং জীৰিতন্তরাযায ৰা ব্রহ্মচরিযন্তরাযায ৰা সংৰত্ততি, ইদং অনত্থসংহিতং, ৰিপরীতং অত্থসংহিতং নাম.

ন লভিস্সামি সন্দিট্ঠে সম্ভত্তে ভিক্খূতি অপ্পেকদা হি রাজভযাদীসু এৰরূপা অত্তনো পক্খস্স উপত্থম্ভকা ভিক্খূ লদ্ধুং ন সক্কা হোন্তি, তং সন্ধায ৰুত্তং ‘‘ন লভিস্সামী’’তি. অপ্পেকদা পন খেমসুভিক্খাদীসু লদ্ধুং সক্কা হোন্তি, তং সন্ধায ‘‘লভিস্সামী’’তি ৰুত্তং.

ভৰিস্সতি সঙ্ঘস্স ততোনিদানং ভণ্ডনন্তি কোসম্বকানং ৰিয ভণ্ডনং কলহো ৰিগ্গহো ৰিৰাদো সঙ্ঘভেদো চ ভৰিস্সতীতি. পচ্ছাপি অৰিপ্পটিসারকরং ভৰিস্সতীতি সুভদ্দং ৰুড্ঢপব্বজিতং নিগ্গহেত্ৰা পঞ্চসতিকসঙ্গীতিং করোন্তস্স মহাকস্সপত্থেরস্সেৰ, দসৰত্থুকে অধিকরণে দসভিক্খুসহস্সানি নিগ্গহেত্ৰা সত্তসতিকসঙ্গীতিং করোন্তস্স আযস্মতো যসস্সেৰ, সট্ঠিভিক্খুসহস্সানি নিগ্গহেত্ৰা সহস্সিকসঙ্গীতিং করোন্তস্স মোগ্গলিপুত্ততিস্সত্থেরস্সেৰ চ পচ্ছা সমনুস্সরণকরণং হোতি, সাসনস্স চ ৰিগতুপক্কিলেসচন্দিমসূরিযসস্সিরিকতায সংৰত্ততি.

অত্তাদানঅঙ্গকথা নিট্ঠিতা.

চোদকেনপচ্চৰেক্খিতব্বধম্মকথা

৩৯৯. অচ্ছিদ্দেন অপ্পটিমংসেনাতিআদীসু যেন গহট্ঠপব্বজিতেসু যো কোচি পহটো ৰা হোতি, গিহীনং গণ্ডফালনাদীনি ৰেজ্জকম্মানি ৰা কতানি, তস্স কাযসমাচারো উপচিকাহি খাযিততালপণ্ণমিৰ ছিদ্দো চ পটিমাসিতুং যত্থ কত্থচি গহেত্ৰা আকড্ঢিতুং সক্কুণেয্যতায সপ্পটিমংসো চ হোতি, ৰিপরীতো অচ্ছিদ্দো অপ্পটিমংসোতি ৰেদিতব্বোতি. ৰচীসমাচারো পন মুসাৰাদওমসৰাদপেসুঞ্ঞঅমূলকানুদ্ধংসনাদীহি ছিদ্দো চ সপ্পটিমংসো চ হোতি, ৰিপরীতো অচ্ছিদ্দো অপ্পটিমংসো.

মেত্তং নু খো মে চিত্তন্তি পলিবোধে ছিন্দিত্ৰা কম্মট্ঠানভাৰনানুযোগেন অধিগতং মেত্তচিত্তং. অনাঘাতন্তি আঘাতৰিরহিতং, ৰিক্খম্ভনৰসেন ৰিহতাঘাতন্তি অত্থো. ইদং পনাৰুসো কত্থ ৰুত্তং ভগৰতাতি ইদং সিক্খাপদং কতরস্মিং নগরে ৰুত্তন্তি অত্থো.

চোদকেনপচ্চৰেক্খিতব্বধম্মকথা নিট্ঠিতা.

চোদকেনউপট্ঠাপেতব্বকথা

৪০০. কালেন ৰক্খামীতিআদীসু একো একং ওকাসং কারেত্ৰা চোদেন্তো কালেন ৰদতি নাম. সঙ্ঘমজ্ঝগণমজ্ঝসলাকগ্গযাগুঅগ্গৰিতক্কমাল়কভিক্খাচারমগ্গআসনসালাদীসু উপট্ঠাকেহি পরিৰারিতক্খণে ৰা চোদেন্তো অকালেন ৰদতি নাম. তচ্ছেন ৰদন্তো ভূতেন ৰদতি নাম. ‘‘অম্ভো মহল্লক, পরিসাৰচর, পংসুকূলিক, ধম্মকথিক, পতিরূপং তৰ ইদ’’ন্তি ৰদন্তো ফরুসেন ৰদতি নাম. কারণনিস্সিতং পন কত্ৰা ‘‘ভন্তে মহল্লকত্থ, পরিসাৰচরা, পংসুকূলিকা, ধম্মকথিকত্থ, পতিরূপং তুম্হাকং ইদ’’ন্তি ৰদন্তো সণ্হেন ৰদতি নাম. কারণনিস্সিতং কত্ৰা ৰদন্তো অত্থসংহিতেন ৰদতি নাম. মেত্তচিত্তো ৰক্খামি নো দোসন্তরোতি মেত্তচিত্তং উপট্ঠপেত্ৰা ৰক্খামি, ন দুট্ঠচিত্তো হুত্ৰা.

চোদকেনউপট্ঠাপেতব্বকথা নিট্ঠিতা.

চোদকচুদিতকপটিসংযুত্তকথা

৪০১. অজ্ঝত্তং মনসিকরিত্ৰাতি অত্তনো চিত্তে উপ্পাদেত্ৰা. কারুঞ্ঞতাতি করুণাভাৰো. ইমিনা করুণঞ্চ করুণাপুব্বভাগঞ্চ দস্সেতি. হিতেসিতাতি হিতগৰেসনতা. অনুকম্পিতাতি তেন হিতেন সংযোজনতা. দ্ৰীহিপি মেত্তঞ্চ মেত্তাপুব্বভাগঞ্চ দস্সেতি. আপত্তিৰুট্ঠানতাতি আপত্তিতো ৰুট্ঠাপেত্ৰা সুদ্ধন্তে পতিট্ঠাপনা. ৰত্থুং চোদেত্ৰা সারেত্ৰা পটিঞ্ঞং আরোপেত্ৰা যথাপটিঞ্ঞায কম্মকরণং ৰিনযপুরেক্খারতা নাম. ইমে পঞ্চ ধম্মেতি যে এতে কারুঞ্ঞতাতিআদিনা নযেন ৰুত্তা, ইমে পঞ্চ ধম্মে অজ্ঝত্তং মনসি করিত্ৰা পরো চোদেতব্বোতি.

সচ্চে চ অকুপ্পে চাতি ৰচীসচ্চে চ অকুপ্পনতায চ. চুদিতকেন হি সচ্চঞ্চ ৰত্তব্বং, কোপো চ ন কাতব্বো. নেৰ অত্তনা কুজ্ঝিতব্বো, ন পরো ঘট্টেতব্বোতি অত্থো. সেসং সব্বত্থ উত্তানমেৰাতি.

চোদকচুদিতকপটিসংযুত্তকথা নিট্ঠিতা.

পাতিমোক্খট্ঠপনক্খন্ধকৰণ্ণনা নিট্ঠিতা.