৯. ওপম্মসংযুত্তং

১. কূটসুত্তৰণ্ণনা

২২৩. ওপম্মসংযুত্তস্স পঠমে কূটং গচ্ছন্তীতি কূটঙ্গমা. কূটং সমোসরন্তীতি কূটসমোসরণা. কূটসমুগ্ঘাতাতি কূটস্স সমুগ্ঘাতেন. অৰিজ্জাসমুগ্ঘাতাতি অরহত্তমগ্গেন অৰিজ্জায সমুগ্ঘাতেন. অপ্পমত্তাতি সতিযা অৰিপ্পৰাসে ঠিতা হুত্ৰা. পঠমং.

২. নখসিখসুত্তৰণ্ণনা

২২৪. দুতিযে মনুস্সেসু পচ্চাজাযন্তীতি যে মনুস্সলোকতো চুতা মনুস্সেসু জাযন্তি, তে এৰং অপ্পকাতি অধিপ্পাযো. অঞ্ঞত্র মনুস্সেহীতি যে পন মনুস্সলোকতো চুতা ঠপেত্ৰা মনুস্সলোকং চতূসু অপাযেসু পচ্চাজাযন্তি, তে মহাপথৰিযং পংসু ৰিয বহুতরা. ইমস্মিঞ্চ সুত্তে দেৰাপি মনুস্সেহেৰ সঙ্গহিতা. তস্মা যথা মনুস্সেসু জাযন্তা অপ্পকা, এৰং দেৰেসুপীতি ৰেদিতব্বা. দুতিযং.

৩. কুলসুত্তৰণ্ণনা

২২৫. ততিযে সুপ্পধংসিযানীতি সুৰিহেঠিযানি. কুম্ভত্থেনকেহীতি যে পরঘরং পৰিসিত্ৰা দীপালোকেন ওলোকেত্ৰা পরভণ্ডং হরিতুকামা ঘটে দীপং কত্ৰা পৰিসন্তি, তে কুম্ভত্থেনকা নাম, তেহি কুম্ভত্থেনকেহি. সুপ্পধংসিযো হোতি অমনুস্সেহীতি মেত্তাভাৰনারহিতং পংসুপিসাচকা ৰিধংসযন্তি, পগেৰ উল়ারা অমনুস্সা. ভাৰিতাতি ৰড্ঢিতা. বহুলীকতাতি পুনপ্পুনং কতা. যানীকতাতি যুত্তযানং ৰিয কতা. ৰত্থুকতাতি পতিট্ঠানট্ঠেন ৰত্থু ৰিয কতা. অনুট্ঠিতাতি অধিট্ঠিতা. পরিচিতাতি সমন্ততো চিতা সুৰড্ঢিতা. সুসমারদ্ধাতি চিত্তেন সুট্ঠু সমারদ্ধা. ততিযং.

৪. ওক্খাসুত্তৰণ্ণনা

২২৬. চতুত্থে ওক্খাসতন্তি মহামুখউক্খলীনং সতং. দানং দদেয্যাতি পণীতভোজনভরিতানং মহাউক্খলীনং সতং দানং দদেয্য. ‘‘উক্কাসত’’ন্তিপি পাঠো, তস্স দণ্ডদীপিকাসতন্তি অত্থো. একায পন দীপিকায যত্তকে ঠানে আলোকো হোতি, ততো সতগুণং ঠানং সত্তহি রতনেহি পূরেত্ৰা দানং দদেয্যাতি অত্থো. গদ্দুহনমত্তন্তি গোদুহনমত্তং, গাৰিযা একৰারং অগ্গথনাকড্ঢনমত্তন্তি অত্থো. গন্ধঊহনমত্তং ৰা, দ্ৰীহি অঙ্গুলীহি গন্ধপিণ্ডং গহেত্ৰা একৰারং ঘাযনমত্তন্তি অত্থো. এত্তকম্পি হি কালং যো পন গব্ভপরিৰেণৰিহারূপচার পরিচ্ছেদেন ৰা চক্কৰাল়পরিচ্ছেদেন ৰা অপরিমাণাসু লোকধাতূসু ৰা সব্বসত্তেসু হিতফরণং মেত্তচিত্তং ভাৰেতুং সক্কোতি, ইদং ততো একদিৰসং তিক্খত্তুং দিন্নদানতো মহপ্ফলতরং. চতুত্থং.

৫. সত্তিসুত্তৰণ্ণনা

২২৭. পঞ্চমে পটিলেণিস্সামীতিআদীসু অগ্গে পহরিত্ৰা কপ্পাসৰট্টিং ৰিয নামেন্তো নিয্যাসৰট্টিং ৰিয চ একতো কত্ৰা অল্লিযাপেন্তো পটিলেণেতি নাম. মজ্ঝে পহরিত্ৰা নামেত্ৰা ধারায ৰা পহরিত্ৰা দ্ৰেপি ধারা একতো অল্লিযাপেন্তো পটিকোট্টেতি নাম. কপ্পাসৰট্টনকরণীযং ৰিয পৰত্তেন্তো চিরকালং সংৰেল্লিতকিলঞ্জং পসারেত্ৰা পুন সংৰেল্লেন্তো ৰিয চ পটিৰট্টেতি নাম. পঞ্চমং.

৬. ধনুগ্গহসুত্তৰণ্ণনা

২২৮. ছট্ঠে দল়্হধম্মা ধনুগ্গহাতি দল়্হধনুনো ইস্সাসা. দল়্হধনু নাম দ্ৰিসহস্সথামং ৰুচ্চতি, দ্ৰিসহস্সথামং নাম যস্স আরোপিতস্স জিযাবদ্ধো লোহসীসাদীনং ভারো দণ্ডে গহেত্ৰা যাৰ কণ্ডপ্পমাণা উক্খিত্তস্স পথৰিতো মুচ্চতি. সুসিক্খিতাতি দসদ্ৰাদসৰস্সানি আচরিযকুলে উগ্গহিতসিপ্পা. কতহত্থাতি যো সিপ্পমেৰ উগ্গণ্হাতি, সো কতহত্থো ন হোতি, ইমে পন কতহত্থা চিণ্ণৰসীভাৰা. কতূপাসনাতি রাজকুলাদীসু দস্সিতসিপ্পা.

তস্স পুরিসস্স জৰোতি এৰরূপো অঞ্ঞো পুরিসো নাম ন ভূতপুব্বো, বোধিসত্তস্সেৰ পন জৰনহংসকালো নাম আসি. তদা বোধিসত্তো চত্তারি কণ্ডানি আহরি. তদা কিরস্স কনিট্ঠভাতরো ‘‘মযং, ভাতিক, সূরিযেন সদ্ধিং জৰিস্সামা’’তি আরোচেসুং. বোধিসত্তো আহ – ‘‘সূরিযো সীঘজৰো, ন সক্খিস্সথ তুম্হে তেন সদ্ধিং জৰিতু’’ন্তি. তে দুতিযং ততিযম্পি তথেৰ ৰত্ৰা একদিৰসং ‘‘গচ্ছামা’’তি যুগন্ধরপব্বতং আরুহিত্ৰা নিসীদিংসু. বোধিসত্তো ‘‘কহং মে ভাতরো’’তি? পুচ্ছিত্ৰা, ‘‘সূরিযেন সদ্ধিং জৰিতুং গতা’’তি ৰুত্তে, ‘‘ৰিনস্সিস্সন্তি তপস্সিনো’’তি তে অনুকম্পমানো সযম্পি গন্ত্ৰা তেসং সন্তিকে নিসীদি. অথ সূরিযে উগ্গচ্ছন্তে দ্ৰেপি ভাতরো সূরিযেন সদ্ধিংযেৰ আকাসং পক্খন্তা, বোধিসত্তোপি তেহি সদ্ধিংযেৰ পক্খন্তো. তেসু একস্স অপত্তেযেৰ অন্তরভত্তসমযে পক্খন্তরেসু অগ্গি উট্ঠহি, সো ভাতরং পক্কোসিত্ৰা ‘‘ন সক্কোমী’’তি আহ. তমেনং বোধিসত্তো ‘‘মা ভাযী’’তি সমস্সাসেত্ৰা পক্খপঞ্জরেন পলিৰেঠেত্ৰা দরথং ৰিনোদেত্ৰা ‘‘গচ্ছা’’তি পেসেসি.

দুতিযো যাৰ অন্তরভত্তা জৰিত্ৰা পক্খন্তরেসু অগ্গিম্হি উট্ঠহিতে তথেৰাহ. তম্পি সো তথেৰ কত্ৰা ‘‘গচ্ছা’’তি পেসেসি. সযং পন যাৰ মজ্ঝন্হিকা জৰিত্ৰা, ‘‘এতে বালাতি মযাপি বালেন ন ভৰিতব্ব’’ন্তি নিৰত্তিত্ৰা – ‘‘অদিট্ঠসহাযকং বারাণসিরাজং পস্সিস্সামী’’তি বারাণসিং অগমাসি. তস্মিং নগরমত্থকে পরিব্ভমন্তে দ্ৰাদসযোজনং নগরং পত্তকটাহেন ওত্থটপত্তো ৰিয অহোসি. অথ পরিব্ভমন্তস্স পরিব্ভমন্তস্স তত্থ তত্থ ছিদ্দানি পঞ্ঞাযিংসু. সযম্পি অনেকহংসসহস্সসদিসো পঞ্ঞাযি. সো ৰেগং পটিসংহরিত্ৰা রাজগেহাভিমুখো অহোসি. রাজা ওলোকেত্ৰা – ‘‘আগতো কির মে পিযসহাযো জৰনহংসো’’তি ৰাতপানং ৰিৰরিত্ৰা রতনপীঠং পঞ্ঞাপেত্ৰা ওলোকেন্তো অট্ঠাসি. বোধিসত্তো রতনপীঠে নিসীদি.

অথস্স রাজা সহস্সপাকেন তেলেন পক্খন্তরানি মক্খেত্ৰা, মধুলাজে চেৰ মধুরপানকঞ্চ অদাসি. ততো নং কতপরিভোগং ‘‘সম্ম, কহং অগমাসী’’তি? পুচ্ছি. সো তং পৰত্তিং আরোচেত্ৰা ‘‘অথাহং, মহারাজ, যাৰ মজ্ঝন্হিকা জৰিত্ৰা – ‘নত্থি জৰিতেন অত্থো’তি নিৰত্তো’’তি আচিক্খি. অথ রাজা আহ – ‘‘অহং, সামি, তুম্হাকং সূরিযেন সদ্ধিং জৰনৰেগং পস্সিতুকামো’’তি. দুক্করং, মহারাজ, ন সক্কা তযা পস্সিতুন্তি. তেন হি, সামি, সরিক্খকমত্তম্পি দস্সেহীতি. আম, মহারাজ, ধনুগ্গহে সন্নিপাতেহীতি. রাজা সন্নিপাতেসি. হংসো ততো চত্তারো গহেত্ৰা নগরমজ্ঝে তোরণং কারেত্ৰা অত্তনো গীৰায ঘণ্ডং পিল়ন্ধাপেত্ৰা তোরণস্স উপরি নিসীদিত্ৰা – ‘‘চত্তারো জনা তোরণং নিস্সায চতুদিসাভিমুখা একেকং কণ্ডং খিপন্তূ’’তি ৰত্ৰা, সযং পঠমকণ্ডেনেৰ সদ্ধিং উপ্পতিত্ৰা, তং কণ্ডং অগ্গহেত্ৰাৰ, দক্খিণাভিমুখং গতকণ্ডং ধনুতো রতনমত্তাপগতং গণ্হি. দুতিযং দ্ৰিরতনমত্তাপগতং, ততিযং তিরতনমত্তাপগতং, চতুত্থং ভূমিং অপ্পত্তমেৰ গণ্হি. অথ নং চত্তারি কণ্ডানি গহেত্ৰা তোরণে নিসিন্নকালেযেৰ অদ্দসংসু. সো রাজানং আহ – ‘‘পস্স, মহারাজ, এৰংসীঘো অম্হাকং জৰো’’তি. এৰং বোধিসত্তেনেৰ জৰনহংসকালে তানি কণ্ডানি আহরিতানীতি ৰেদিতব্বানি.

পুরতো ধাৰন্তীতি অগ্গতো জৰন্তি. ন পনেতা সব্বকালং পুরতোৰ হোন্তি, কদাচি পুরতো, কদাচি পচ্ছতো হোন্তি. আকাসট্ঠকৰিমানেসু হি উয্যানানিপি হোন্তি পোক্খরণিযোপি, তা তত্থ নহাযন্তি, উদককীল়ং কীল়মানা পচ্ছতোপি হোন্তি, ৰেগেন পন গন্ত্ৰা পুন পুরতোৰ ধাৰন্তি. আযুসঙ্খারাতি রূপজীৰিতিন্দ্রিযং সন্ধায ৰুত্তং. তঞ্হি ততো সীঘতরং খীযতি. অরূপধম্মানং পন ভেদো ন সক্কা পঞ্ঞাপেতুং. ছট্ঠং.

৭. আণিসুত্তৰণ্ণনা

২২৯. সত্তমে দসারহানন্তি এৰংনামকানং খত্তিযানং. তে কির সততো দসভাগং গণ্হিংসু, তস্মা ‘‘দসারহা’’তি পঞ্ঞাযিংসু. আনকোতি এৰংলদ্ধনামো মুদিঙ্গো. হিমৰন্তে কির মহাকুল়ীরদহো অহোসি. তত্থ মহন্তো কুল়ীরো ওতিণ্ণোতিণ্ণং হত্থিং খাদতি. অথ হত্থী উপদ্দুতা একং করেণুং সক্করিংসু ‘‘ইমিস্সা পুত্তং নিস্সায অম্হাকং সোত্থি ভৰিস্সতী’’তি. সাপি মহেসক্খং পুত্তং ৰিজাযি. তে তম্পি সক্করিংসু. সো ৰুদ্ধিপ্পত্তো মাতরং পুচ্ছি, ‘‘কস্মা মং এতে সক্করোন্তী’’তি? সা তং পৰত্তিমাচিক্খি. সো ‘‘কিং ময্হং কুল়ীরো পহোতি? এথ গচ্ছামা’’তি মহাহত্থিপরিৰারো তত্থ গন্ত্ৰা পঠমমেৰ ওতরি. কুল়ীরো উদকসদ্দেনেৰ আগন্ত্ৰা তং অগ্গহেসি. মহন্তো কুল়ীরস্স অল়ো, সো তং ইতো ৰা এত্তো ৰা চালেতুং অসক্কোন্তো মুখে সোণ্ডং পক্খিপিত্ৰা ৰিরৰি. হত্থিনো ‘‘যংনিস্সায মযং ‘সোত্থি ভৰিস্সতী’তি অমঞ্ঞিম্হা, সো পঠমতরং গহিতো’’তি ততো ততো পলাযিংসু.

অথস্স মাতা অৰিদূরে ঠত্ৰা ‘‘মযং থলনাগা, তুম্হে উদকনাগা নাম, নাগেহি নাগো ন ৰিহেঠেতব্বো’’তি কুল়ীরং পিযৰচনেন ৰত্ৰা ইমং গাথমাহ –

‘‘যে কুল়ীরা সমুদ্দস্মিং, গঙ্গায যমুনায চ;

তেসং ত্ৰং ৰারিজো সেট্ঠো, মুঞ্চ রোদন্তিযা পজ’’ন্তি.

মাতুগামসদ্দো নাম পুরিসে খোভেত্ৰা তিট্ঠতি, তস্মা সো গহণং সিথিলমকাসি. হত্থিপোতো ৰেগেন উভো পাদে উক্খিপিত্ৰা তং পিট্ঠিযং অক্কমি. সহ অক্কমনা পিট্ঠি মত্তিকভাজনং ৰিয ভিজ্জি. অথ নং দন্তেহি ৰিজ্ঝিত্ৰা উক্খিপিত্ৰা থলে ছড্ডেত্ৰা তুট্ঠরৰং রৰি. অথ নং হত্থী ইতো চিতো চ আগন্ত্ৰা মদ্দিংসু. তস্স একো অল়ো পটিক্কমিত্ৰা পতি, তং সক্কো দেৰরাজা গহেত্ৰা গতো.

ইতরো পন অল়ো ৰাতাতপেন সুক্খিত্ৰা পক্কলাখারসৰণ্ণো অহোসি, সো দেৰে ৰুট্ঠে উদকোঘেন ৰুয্হন্তো দসভাতিকানং রাজূনং উপরিসোতে জালং পসারাপেত্ৰা গঙ্গায কীল়ন্তানং আগন্ত্ৰা জালে লগ্গি. তে কীল়াপরিযোসানে জালম্হি উক্খিপিযমানে তং দিস্ৰা পুচ্ছিংসু ‘‘কিং এত’’ন্তি? ‘‘কুল়ীরঅল়ো সামী’’তি. ‘‘ন সক্কা এস আভরণত্থায উপনেতুং, পরিযোনন্ধাপেত্ৰা ভেরিং করিস্সামা’’তি? পরিযোনন্ধাপেত্ৰা পহরিংসু. সদ্দো দ্ৰাদসযোজনং নগরং অৰত্থরি. ততো আহংসু – ‘‘ন সক্কা ইদং দিৰসে দিৰসে ৰাদেতুং, ছণদিৰসত্থায মঙ্গলভেরী হোতূ’’তি মঙ্গলভেরিং অকংসু. তস্মিং ৰাদিতে মহাজনো অন্হাযিত্ৰা অপিল়ন্ধিত্ৰা হত্থিযানাদীনি আরুয্হ সীঘং সন্নিপতন্তি. ইতি মহাজনং পক্কোসিত্ৰা ৰিয আনেতীতি আনকো ত্ৰেৰস্স নামং অহোসি.

অঞ্ঞং আণিং ওদহিংসূতি অঞ্ঞং সুৰণ্ণরজতাদিমযং আণিং ঘটযিংসু. আণিসঙ্ঘাটোৰ অৰসিস্সীতি সুৰণ্ণাদিমযানং আণীনং সঙ্ঘাটমত্তমেৰ অৰসেসং অহোসি. অথস্স দ্ৰাদসযোজনপ্পমাণো সদ্দো অন্তোসালাযম্পি দুক্খেন সুয্যিত্থ.

গম্ভীরাতি পাল়িৰসেন গম্ভীরা সল্লসুত্তসদিসা. গম্ভীরত্থাতি অত্থৰসেন গম্ভীরা মহাৰেদল্লসুত্তসদিসা (ম. নি. ১.৪৪৯ আদযো). লোকুত্তরাতি লোকুত্তরঅত্থদীপকা. সুঞ্ঞতপ্পটিসংযুত্তাতি সত্তসুঞ্ঞতধম্মমত্তমেৰ পকাসকা সংখিত্তসংযুত্তসদিসা. উগ্গহেতব্বং পরিযাপুণিতব্বন্তি উগ্গহেতব্বে চ পরিযাপুণিতব্বে চ. কৰিকতাতি কৰীহি কতা. ইতরং তস্সেৰ ৰেৰচনং. চিত্তক্খরাতি ৰিচিত্রঅক্খরা. ইতরং তস্সেৰ ৰেৰচনং. বাহিরকাতি সাসনতো বহিভূতা. সাৰকভাসিতাতি তেসং তেসং সাৰকেহি ভাসিতা. সুস্সূসিস্সন্তীতি অক্খরচিত্ততায চেৰ সৰনসম্পত্তিযা চ অত্তমনা হুত্ৰা সামণেরদহরভিক্খুমাতুগামমহাগহপতিকাদযো ‘‘এস ধম্মকথিকো’’তি সন্নিপতিত্ৰা সোতুকামা ভৰিস্সন্তি. তস্মাতি যস্মা তথাগতভাসিতা সুত্তন্তা অনুগ্গয্হমানা অন্তরধাযন্তি, তস্মা. সত্তমং.

৮. কলিঙ্গরসুত্তৰণ্ণনা

২৩০. অট্ঠমে কলিঙ্গরূপধানাতি কলিঙ্গরঘটিকং সীসূপধানঞ্চেৰ পাদূপধানঞ্চ কত্ৰা. অপ্পমত্তাতি সিপ্পুগ্গহণে অপ্পমত্তা. আতাপিনোতি উট্ঠানৰীরিযাতাপেন যুত্তা. উপাসনস্মিন্তি সিপ্পানং অভিযোগে আচরিযানঞ্চ পযিরুপাসনে. তে কির তদা পাতোৰ উট্ঠায সিপ্পসালং গচ্ছন্তি, তত্থ সিপ্পং উগ্গহেত্ৰা সজ্ঝাযাদীহি অভিযোগং কত্ৰা মুখং ধোৰিত্ৰা যাগুপানায গচ্ছন্তি. যাগুং পিৰিত্ৰা পুন সিপ্পসালং গন্ত্ৰা সিপ্পং গণ্হিত্ৰা সজ্ঝাযং করোন্তা পাতরাসায গচ্ছন্তি. কতপাতরাসা সমানা ‘‘মা পমাদেন চিরং নিদ্দোক্কমনং অহোসী’’তি খদিরঘটিকাসু সীসে চ পাদে চ উপদহিত্ৰা থোকং নিপজ্জিত্ৰা পুন সিপ্পসালং গন্ত্ৰা সিপ্পং গহেত্ৰা সজ্ঝাযন্তি. সাযং সজ্ঝাযং করোন্তা চ গেহং গন্ত্ৰা ভুত্তসাযমাসা পঠমযামং সজ্ঝাযং কত্ৰা সযনকালে তথেৰ কলিঙ্গরং উপধানং কত্ৰা সযন্তি. এৰং তে অক্খণৰেধিনো ৰালৰেধিনো চ অহেসুং. ইদং সন্ধাযেতং ৰুত্তং.

ওতারন্তি ৰিৰরং. আরম্মণন্তি পচ্চযং. পধানস্মিন্তি পধানভূমিযং ৰীরিযং কুরুমানা. পঠমবোধিযং কির ভিক্খূ ভত্তকিচ্চং কত্ৰাৰ কম্মট্ঠানং মনসি করোন্তি. তেসং মনসিকরোন্তানংযেৰ সূরিযো অত্থং গচ্ছতি. তে ন্হাযিত্ৰা পুন চঙ্কমং ওতরিত্ৰা পঠমযামং চঙ্কমন্তি. ততো ‘‘মা চিরং নিদ্দাযিম্হা’’তি সরীরদরথৰিনোদনত্থং নিপজ্জন্তা কট্ঠখণ্ডং উপদহিত্ৰা নিপজ্জন্তি, তে পুন পচ্ছিমযামে ৰুট্ঠায চঙ্কমং ওতরন্তি. তে সন্ধায ইদং ৰুত্তং. অযম্পি দীপো তিণ্ণং রাজূনং কালে একঘণ্ডিনিগ্ঘোসো একপধানভূমি অহোসি. নানামুখে পহটঘণ্ডি পিলিচ্ছিকোল়িযং ওসরতি, কল্যাণিযং পহটঘণ্ডি নাগদীপে ওসরতি. ‘‘অযং ভিক্খু পুথুজ্জনো, অযং পুথুজ্জনো’’তি অঙ্গুলিং পসারেত্ৰা দস্সেতব্বো অহোসি. একদিৰসং সব্বে অরহন্তোৰ অহেসুং. তস্মাতি যস্মা কলিঙ্গরূপধানানং মারো আরম্মণং ন লভতি, তস্মা. অট্ঠমং.

৯. নাগসুত্তৰণ্ণনা

২৩১. নৰমে অতিৰেলন্তি অতিক্কন্তৰেলং কালং অতিক্কন্তপ্পমাণং কালং. কিমঙ্গং পনাহন্তি অহং পন কিংকারণা ন উপসঙ্কমিস্সামি? ভিসমুল়ালন্তি ভিসঞ্চেৰ মুল়ালঞ্চ. অব্বুহেত্ৰাতি উদ্ধরিত্ৰা. ভিঙ্কচ্ছাপাতি হত্থিপোতকা. তে কির অভিণ্হং ভিঙ্কারসদ্দং করোন্তি, তস্মা ভিঙ্কচ্ছাপাতি ৰুচ্চন্তি. পসন্নাকারং করোন্তীতি পসন্নেহি কত্তব্বাকারং করোন্তি, চত্তারো পচ্চযে দেন্তি. ধম্মং ভাসন্তীতি একং দ্ৰে জাতকানি ৰা সুত্তন্তে ৰা উগ্গণ্হিত্ৰা অসম্ভিন্নেন সরেন ধম্মং দেসেন্তি. পসন্নাকারং করোন্তীতি তেসং তায দেসনায পসন্না গিহী পচ্চযে দেন্তি. নেৰ ৰণ্ণায হোতি ন বলাযাতি নেৰ গুণৰণ্ণায, ন ঞাণবলায হোতি, গুণৰণ্ণে পন পরিহাযন্তে সরীরৰণ্ণোপি সরীরবলম্পি পরিহাযতি, তস্মা সরীরস্স নেৰ ৰণ্ণায ন বলায হোতি. নৰমং.

১০. বিল়ারসুত্তৰণ্ণনা

২৩২. দসমে সন্ধিসমলসংকটীরেতি এত্থ সন্ধীতি ভিন্নঘরানং সন্ধি, সমলোতি গামতো গূথনিক্খমনমগ্গো, সংকটীরন্তি সঙ্কারট্ঠানং. মুদুমূসিন্তি মুদুকং মূসিকং. ৰুট্ঠানং পঞ্ঞাযতীতি দেসনা পঞ্ঞাযতি. দসমং.

১১. সিঙ্গালসুত্তৰণ্ণনা

২৩৩. একাদসমে যেন যেন ইচ্ছতীতি সো জরসিঙ্গালো ইচ্ছিতিচ্ছিতট্ঠানে ইরিযাপথকপ্পনেন সীতৰাতূপৰাযনেন চ অন্তরন্তরা চিত্তস্সাদম্পি লভতীতি দস্সেতি. সক্যপুত্তিযপটিঞ্ঞোতি ইদং দেৰদত্তং সন্ধায ৰুত্তং. সো হি এত্তকম্পি চিত্তস্সাদং অনাগতে অত্তভাৰে ন লভিস্সতীতি. একাদসমং.

১২. দুতিযসিঙ্গালসুত্তৰণ্ণনা

২৩৪. দ্ৰাদসমে কতঞ্ঞুতাতি কতজাননং. কতৰেদিতাতি কতৰিসেসজাননং. তত্রিদং জরসিঙ্গালস্স কতঞ্ঞুতায ৰত্থু – সত্ত কির ভাতরো খেত্তং কসন্তি. তেসং সব্বকনিট্ঠো খেত্তপরিযন্তে ঠত্ৰা গাৰো রক্খতি. অথেকং জরসিঙ্গালং অজগরো গণ্হি, সো তং দিস্ৰা যট্ঠিযা পোথেত্ৰা ৰিস্সজ্জাপেসি. অজগরো সিঙ্গালং ৰিস্সজ্জেত্ৰা তমেৰ গণ্হি. সিঙ্গালো চিন্তেসি – ‘‘ময্হং ইমিনা জীৰিতং দিন্নং, অহম্পি ইমস্স দস্সামী’’তি যাগুঘটস্স উপরি ঠপিতং ৰাসিং মুখেন ডংসিত্ৰা তস্স সন্তিকং অগমাসি. ইতরে ভাতরো দিস্ৰা, ‘‘সিঙ্গালো ৰাসিং হরতী’’তি অনুবন্ধিংসু. সো তেহি দিট্ঠভাৰং ঞত্ৰা ৰাসিং তস্স সন্তিকে ছড্ডেত্ৰা পলাযি. ইতরে আগন্ত্ৰা কনিট্ঠং অজগরেন গহিতং দিস্ৰা ৰাসিযা অজগরং ছিন্দিত্ৰা তং গহেত্ৰা অগমংসু. এৰং জরসিঙ্গালে সিযা যা কাচি কতঞ্ঞুতা কতৰেদিতা. সক্যপুত্তিযপটিঞ্ঞেতি ইদম্পি দেৰদত্তস্স আচারমেৰ সন্ধায ৰুত্তন্তি. দ্ৰাদসমং.

ওপম্মসংযুত্তৰণ্ণনা নিট্ঠিতা.