১-৮. চক্খুসুত্তাদিৰণ্ণনা

১৮৮-১৯৫. রাহুলসংযুত্তস্স পঠমে একোতি চতূসু ইরিযাপথেসু একৰিহারী. ৰূপকট্ঠোতি ৰিৰেকট্ঠো নিস্সদ্দো. অপ্পমত্তোতি সতিযা অৰিপ্পৰসন্তো. আতাপীতি ৰীরিযসম্পন্নো. পহিতত্তো ৰিহরেয্যন্তি ৰিসেসাধিগমত্থায পেসিতত্তো হুত্ৰা ৰিহরেয্যং. অনিচ্চন্তি হুত্ৰা অভাৰাকারেন অনিচ্চং. অথ ৰা উপ্পাদৰযৰন্ততায তাৰকালিকতায ৰিপরিণামকোটিযা নিচ্চপটিক্খেপতোতি ইমেহিপি কারণেহি অনিচ্চং. দুক্খন্তি চতূহি কারণেহি দুক্খং দুক্খমনট্ঠেন দুক্খৰত্থুকট্ঠেন সততসম্পীল়নট্ঠেন সুখপটিক্খেপেনাতি. কল্লন্তি যুত্তং. এতং মমাতি তণ্হাগাহো. এসোহমস্মীতি মানগাহো. এসো মে অত্তাতি দিট্ঠিগাহো. তণ্হাগাহো চেত্থ অট্ঠসততণ্হাৰিচরিতৰসেন, মানগাহো নৰৰিধমানৰসেন, দিট্ঠিগাহো দ্ৰাসট্ঠিদিট্ঠিৰসেন ৰেদিতব্বো. নিব্বিন্দং ৰিরজ্জতীতি এত্থ ৰিরাগৰসেন চত্তারো মগ্গা কথিতা, ৰিরাগা ৰিমুচ্চতীতি এত্থ ৰিমুত্তিৰসেন চত্তারি সামঞ্ঞফলানি.

এত্থ চ পঞ্চসু দ্ৰারেসু পসাদাৰ গহিতা, মনোতি ইমিনা তেভূমকং সম্মসনচারচিত্তং. দুতিযে পঞ্চসু দ্ৰারেসু আরম্মণমেৰ. ততিযে পঞ্চসু দ্ৰারেসু পসাদৰত্থুকচিত্তমেৰ, মনোৰিঞ্ঞাণেন তেভূমকং সম্মসনচারচিত্তং গহিতং. এৰং সব্বত্থ নযো নেতব্বো. ছট্ঠে তেভূমকধম্মা. অট্ঠমে পন তণ্হাতি তস্মিং তস্মিং দ্ৰারে জৰনপ্পত্তাৰ লব্ভতি. পঠমাদীনি.