৭. রাহুলসংযুত্তং

১. পঠমৰগ্গো

১-৮. চক্খুসুত্তাদিৰণ্ণনা

১৮৮-১৯৫. রাহুলসংযুত্তস্স পঠমে একোতি চতূসু ইরিযাপথেসু একৰিহারী. ৰূপকট্ঠোতি ৰিৰেকট্ঠো নিস্সদ্দো. অপ্পমত্তোতি সতিযা অৰিপ্পৰসন্তো. আতাপীতি ৰীরিযসম্পন্নো. পহিতত্তো ৰিহরেয্যন্তি ৰিসেসাধিগমত্থায পেসিতত্তো হুত্ৰা ৰিহরেয্যং. অনিচ্চন্তি হুত্ৰা অভাৰাকারেন অনিচ্চং. অথ ৰা উপ্পাদৰযৰন্ততায তাৰকালিকতায ৰিপরিণামকোটিযা নিচ্চপটিক্খেপতোতি ইমেহিপি কারণেহি অনিচ্চং. দুক্খন্তি চতূহি কারণেহি দুক্খং দুক্খমনট্ঠেন দুক্খৰত্থুকট্ঠেন সততসম্পীল়নট্ঠেন সুখপটিক্খেপেনাতি. কল্লন্তি যুত্তং. এতং মমাতি তণ্হাগাহো. এসোহমস্মীতি মানগাহো. এসো মে অত্তাতি দিট্ঠিগাহো. তণ্হাগাহো চেত্থ অট্ঠসততণ্হাৰিচরিতৰসেন, মানগাহো নৰৰিধমানৰসেন, দিট্ঠিগাহো দ্ৰাসট্ঠিদিট্ঠিৰসেন ৰেদিতব্বো. নিব্বিন্দং ৰিরজ্জতীতি এত্থ ৰিরাগৰসেন চত্তারো মগ্গা কথিতা, ৰিরাগা ৰিমুচ্চতীতি এত্থ ৰিমুত্তিৰসেন চত্তারি সামঞ্ঞফলানি.

এত্থ চ পঞ্চসু দ্ৰারেসু পসাদাৰ গহিতা, মনোতি ইমিনা তেভূমকং সম্মসনচারচিত্তং. দুতিযে পঞ্চসু দ্ৰারেসু আরম্মণমেৰ. ততিযে পঞ্চসু দ্ৰারেসু পসাদৰত্থুকচিত্তমেৰ, মনোৰিঞ্ঞাণেন তেভূমকং সম্মসনচারচিত্তং গহিতং. এৰং সব্বত্থ নযো নেতব্বো. ছট্ঠে তেভূমকধম্মা. অট্ঠমে পন তণ্হাতি তস্মিং তস্মিং দ্ৰারে জৰনপ্পত্তাৰ লব্ভতি. পঠমাদীনি.

৯. ধাতুসুত্তৰণ্ণনা

১৯৬. নৰমে ৰিঞ্ঞাণধাতুৰসেন নামং, সেসাহি রূপন্তি নামরূপং কথিতং. নৰমং.

১০. খন্ধসুত্তৰণ্ণনা

১৯৭. দসমে রূপক্খন্ধো কামাৰচরো, সেসা চত্তারো সব্বসঙ্গাহিকপরিচ্ছেদেন চতুভূমকা. ইধ পন তেভূমকাতি গহেতব্বা. দসমং.

পঠমো ৰগ্গো.

২. দুতিযৰগ্গো

১-১০. চক্খুসুত্তাদিৰণ্ণনা

১৯৮-১৯৯. দুতিযে দস উত্তানত্থানেৰ. পঠমাদীনি.

১১. অনুসযসুত্তৰণ্ণনা

২০০. একাদসমে ইমস্মিঞ্চ সৰিঞ্ঞাণকে কাযেতি অত্তনো সৰিঞ্ঞাণককাযং দস্সেতি, বহিদ্ধা চাতি পরস্স সৰিঞ্ঞাণকং ৰা অৰিঞ্ঞাণকং ৰা. পুরিমেন ৰা অত্তনো চ পরস্স চ ৰিঞ্ঞাণমেৰ দস্সেতি, পচ্ছিমেন বহিদ্ধা অনিন্দ্রিযবদ্ধরূপং. অহঙ্কারমমঙ্কারমানানুসযাতি অহংকারদিট্ঠি চ মমংকারতণ্হা চ মানানুসযা চ. ন হোন্তীতি এতে কিলেসা কথং জানন্তস্স এতেসু ৰত্থূসু ন হোন্তীতি পুচ্ছতি. সম্মপ্পঞ্ঞায পস্সতীতি সহ ৰিপস্সনায মগ্গপঞ্ঞায সুট্ঠু পস্সতি. একাদসমং.

১২. অপগতসুত্তৰণ্ণনা

২০১. দ্ৰাদসমে অহঙ্কারমমঙ্কারমানাপগতন্তি অহংকারতো চ মমংকারতো চ মানতো চ অপগতং. ৰিধা সমতিক্কন্তন্তি মানকোট্ঠাসে সুট্ঠু অতিক্কন্তং. সন্তং সুৰিমুত্তন্তি কিলেসৰূপসমেন সন্তং, কিলেসেহেৰ সুট্ঠু ৰিমুত্তং. সেসং উত্তানমেৰাতি. দ্ৰাদসমং.

দুতিযো ৰগ্গো.

দ্ৰীসুপি অসেক্খভূমি কথিতা. পঠমো পনেত্থ আযাচন্তস্স দেসিতো, দুতিযো অনাযাচন্তস্স. সকলেপি পন রাহুলসংযুত্তে থেরস্স ৰিমুত্তিপরিপাচনীযধম্মাৰ কথিতাতি.

রাহুলসংযুত্তৰণ্ণনা নিট্ঠিতা.