৬. লাভসক্কারসংযুত্তং

১. পঠমৰগ্গো

১. দারুণসুত্তৰণ্ণনা

১৫৭. লাভসক্কারসংযুত্তস্স পঠমে দারুণোতি থদ্ধো. লাভসক্কারসিলোকোতি এত্থ লাভো নাম চতুপচ্চযলাভো. সক্কারোতি তেসংযেৰ সুকতানং সুসঙ্খতানং লাভো. সিলোকোতি ৰণ্ণঘোসো. কটুকোতি তিখিণো. ফরুসোতি খরো. অন্তরাযিকোতি অন্তরাযকরো. পঠমং.

২. বল়িসসুত্তৰণ্ণনা

১৫৮. দুতিযে বাল়িসিকোতি বল়িসং গহেত্ৰা চরমানো মচ্ছঘাতকো. আমিসগতন্তি আমিসমক্খিতং. আমিসচক্খূতি আমিসে চক্খু দস্সনং অস্সাতি আমিসচক্খু. গিলবল়িসোতি গিলিতবল়িসো. অনযং আপন্নোতি দুক্খং পত্তো. ব্যসনং আপন্নোতি ৰিনাসং পত্তো. যথাকামকরণীযোতি যথাকামেন যথারুচিযা যথেৰ নং বাল়িসিকো ইচ্ছতি, তথেৰস্স কত্তব্বোতি অত্থো. যথাকামকরণীযো পাপিমতোতি যথা কিলেসমারস্স কামো, এৰং কত্তব্বো, নিরযং ৰা তিরচ্ছানযোনিং ৰা পেত্তিৰিসযং ৰা পাপেতব্বো. দুতিযং.

৩-৪. কুম্মসুত্তাদিৰণ্ণনা

১৫৯-১৬০. ততিযে মহাকুম্মকুলন্তি মহন্তং অট্ঠিকচ্ছপকুলং. অগমাসীতি ‘‘এত্থ অদ্ধা কিঞ্চি খাদিতব্বং অত্থি, তং মচ্ছরাযন্তো মং এস নিৰারেতী’’তি সঞ্ঞায অগমাসি. পপতাযাতি পপতা ৰুচ্চতি দীঘরজ্জুকবদ্ধো অযকন্তকোসকে দণ্ডকং পৰেসেত্ৰা গহিতো কণ্ণিকসল্লসণ্ঠানো, অযকণ্টকো, যস্মিং ৰেগেন পতিত্ৰা কটাহে লগ্গমত্তে দণ্ডকো নিক্খমতি, রজ্জুকো একাবদ্ধো গচ্ছতেৰ. সো কুম্মোতি সো ৰিদ্ধকুম্মো. যেন সো কুম্মোতি উদকসদ্দং সুত্ৰা সাসঙ্কট্ঠানং ভৰিস্সতীতি নিৰত্তিত্ৰা যেন সো অত্থকামো কুম্মো. ন দানি ত্ৰং অম্হাকন্তি ইদানি ত্ৰং অমিত্তহত্থং গতো, ন অম্হাকং সন্তকোতি অত্থো. এৰং সল্লপন্তানংযেৰ চ নেসং নাৰায ঠিতো লুদ্দো রজ্জুকং আকড্ঢিত্ৰা কুম্মং গহেত্ৰা যথাকামং অকাসি. সেসমেত্থ ইতো অনন্তরসুত্তে চ উত্তানমেৰ. ততিযচতুত্থানি.

৫. মীল়্হকসুত্তৰণ্ণনা

১৬১. পঞ্চমে মীল়্হকাতি গূথপাণকা. গূথাদীতি গূথভক্খা. গূথপূরাতি অন্তো গূথেন ভরিতা. পুণ্ণা গূথস্সাতি ইদং পুরিমস্সেৰ অত্থদীপনং. অতিমঞ্ঞেয্যাতি পচ্ছিমপাদে ভূমিযং ঠপেত্ৰা পুরিমপাদে গূথস্স উপরি আরোপেত্ৰা ঠিতা ‘‘অহম্হি গূথাদী’’তি ভণন্তী অতিমঞ্ঞেয্য. পিণ্ডপাতো চস্স পূরোতি অপরোপিস্স পত্তপূরো পণীতপিণ্ডপাতো ভৰেয্য. পঞ্চমং.

৬. অসনিসুত্তৰণ্ণনা

১৬২. ছট্ঠে কং, ভিক্খৰে, অসনিৰিচক্কন্তি, ভিক্খৰে, কং পুগ্গলং মত্থকে পতিত্ৰা মদ্দমানং সুক্কাসনিচক্কং আগচ্ছতু. অপ্পত্তমানসন্তি অনধিগতারহত্তং. ইতি ভগৰা ন সত্তানং দুক্খকামতায, আদীনৰং পন দস্সেতুং এৰমাহ. অসনিচক্কঞ্হি মত্থকে পতিতং একমেৰ অত্তভাৰং নাসেতি, লাভসক্কারসিলোকেন পরিযাদিণ্ণচিত্তো নিরযাদীসু অনন্তদুক্খং অনুভোতি. ছট্ঠং.

৭. দিদ্ধসুত্তৰণ্ণনা

১৬৩. সত্তমে দিদ্ধগতেনাতি গতদিদ্ধেন. ৰিসল্লেনাতি ৰিসমক্খিতেন. সল্লেনাতি সত্তিযা. সত্তমং.

৮. সিঙ্গালসুত্তৰণ্ণনা

১৬৪. অট্ঠমে সিঙ্গালোতি জরসিঙ্গালো. যথা হি সুৰণ্ণৰণ্ণোপি কাযো পূতিকাযো ত্ৰেৰ, তংখণং গল়িতম্পি চ মুত্তং পূতিমুত্তন্ত্ৰেৰ ৰুচ্চতি, এৰং তদহুজাতোপি সিঙ্গালো জরসিঙ্গালোত্ৰেৰ ৰুচ্চতি. উক্কণ্টকেন নামাতি এৰংনামকেন রোগেন. সো কির সীতকালে উপ্পজ্জতি. তস্মিং উপ্পন্নে সকলসরীরতো লোমানি পতন্তি, সকলসরীরং নিল্লোমং হুত্ৰা, সমন্ততো ফুটতি, ৰাতব্ভাহতা ৰণা রুজ্জন্তি. যথা উম্মত্তকসুনখেন দট্ঠো পুরিসো অনৰট্ঠিতোৰ ভমতি, এৰং তস্মিং উপ্পন্নে ভমিতব্বো হোতি, অসুকট্ঠানে সোত্থি ভৰিস্সতীতি ন পঞ্ঞাযতি. অট্ঠমং.

৯. ৰেরম্ভসুত্তৰণ্ণনা

১৬৫. নৰমে ৰেরম্ভৰাতাতি এৰংনামকা মহাৰাতা. কীদিসে পন ঠানে তে ৰাতা ৰাযন্তীতি? যত্থ ঠিতস্স চত্তারো দীপা উপ্পলিনিপত্তমত্তা হুত্ৰা পঞ্ঞাযন্তি. যো পক্খী গচ্ছতীতি নৰৰুট্ঠে দেৰে ৰিরৰন্তো ৰাতসকুণো তত্থ গচ্ছতি, তং সন্ধাযেতং ৰুত্তং. অরক্খিতেনেৰ কাযেনাতিআদীসু হত্থপাদে কীল়াপেন্তো খন্ধট্ঠিং ৰা নামেন্তো কাযং ন রক্খতি নাম, নানাৰিধং দুট্ঠুল্লকথং কথেন্তো ৰাচং ন রক্খতি নাম, কামৰিতক্কাদযো ৰিতক্কেন্তো চিত্তং ন রক্খতি নাম. অনুপট্ঠিতায সতিযাতি কাযগতাসতিং অনুপট্ঠপেত্ৰা. নৰমং.

১০. সগাথকসুত্তৰণ্ণনা

১৬৬. দসমে অসক্কারেন চূভযন্তি অসক্কারেন চ উভযেন. সমাধীতি অরহত্তফলসমাধি. সো হি তেন ন ৰিকম্পতি. অপ্পমাণৰিহারিনোতি অপ্পমাণেন ফলসমাধিনা ৰিহরন্তস্স. সাততিকন্তি সততকারিং. সুখুমংদিট্ঠিৰিপস্সকন্তি অরহত্তমগ্গদিট্ঠিযা সুখুমদিট্ঠিফলসমাপত্তিঅত্থায ৰিপস্সনং পট্ঠপেত্ৰা আগতত্তা ৰিপস্সকং. উপাদানক্খযারামন্তি উপাদানক্খযসঙ্খাতে নিব্বানে রতং. আহু সপ্পুরিসো ইতীতি সপ্পুরিসোতি কথেন্তীতি. দসমং.

পঠমো ৰগ্গো.

২. দুতিযৰগ্গো

১-২. সুৰণ্ণপাতিসুত্তাদিৰণ্ণনা

১৬৭-১৬৮. দুতিযৰগ্গস্স পঠমে সম্পজানমুসা ভাসন্তন্তি অপ্পমত্তকেনপি কারণেন সম্পজানমেৰ মুসা ভাসন্তং. ‘‘সীলং পূরেস্সামী’’তি সংৰিহিতভিক্খুং সিনেরুমত্তোপি পচ্চযরাসি চালেতুং ন সক্কোতি. যদা পন সীলং পহায সক্কারনিস্সিতো হোতি, তদা কুণ্ডকমুট্ঠিহেতুপি মুসা ভাসতি, অঞ্ঞং ৰা অকিচ্চং করোতি. দুতিযং উত্তানমেৰাতি. পঠমদুতিযানি.

৩-১০. সুৰণ্ণনিক্খসুত্তাদিৰণ্ণনা

১৬৯. ততিযাদীসু সুৰণ্ণনিক্খস্সাতি একস্স কঞ্চননিক্খস্স. সিঙ্গীনিক্খস্সাতি সিঙ্গীসুৰণ্ণনিক্খস্স. পথৰিযাতি চক্কৰাল়ব্ভন্তরায মহাপথৰিযা. আমিসকিঞ্চিক্খহেতূতি কস্সচিদেৰ আমিসস্স হেতু অন্তমসো কুণ্ডকমুট্ঠিনোপি. জীৰিতহেতূতি অটৰিযং চোরেহি গহেত্ৰা জীৰিতে ৰোরোপিযমানে তস্সপি হেতু. জনপদকল্যাণিযাতি জনপদে উত্তমিত্থিযা. ততিযাদীনি.

দুতিযো ৰগ্গো.

৩. ততিযৰগ্গো

১-২. মাতুগামসুত্তাদিৰণ্ণনা

১৭০-১৭১. ততিযৰগ্গস্স পঠমে ন তস্স, ভিক্খৰে, মাতুগামোতি ন তস্স রহো এককস্স নিসিন্নস্স তেন ধম্মেন অত্থিকোপি মাতুগামো চিত্তং পরিযাদাতুং সক্কোতি, যস্স লাভসক্কারসিলোকো চিত্তং পরিযাদাতুং সক্কোতীতি, অত্থো. দুতিযং উত্তানমেৰাতি. পঠমদুতিযানি.

৩-৬. একপুত্তকসুত্তাদিৰণ্ণনা

১৭২-১৭৫. ততিযে সদ্ধাতি সোতাপন্না. সেসমেত্থ উত্তানমেৰ. তথা চতুত্থে পঞ্চমে ছট্ঠে চ. ততিযাদীনি.

৭. ততিযসমণব্রাহ্মণসুত্তৰণ্ণনা

১৭৬. সত্তমে সমুদযন্তিআদীসু সহ পুব্বকম্মেন অত্তভাৰো কোলপুত্তিযং ৰণ্ণপোক্খরতা কল্যাণৰাক্করণতা ধুতগুণাৰীকরণং চীৰরধারণং পরিৰারসম্পত্তীতি এৰমাদি লাভসক্কারস্স সমুদযো নাম, তং সমুদযসচ্চৰসেন নপ্পজানাতি, নিরোধো চ পটিপদা চ নিরোধসচ্চমগ্গসচ্চৰসেনেৰ ৰেদিতব্বা. সত্তমং.

৮. ছৰিসুত্তৰণ্ণনা

১৭৭. অট্ঠমে যস্মা লাভসক্কারসিলোকো নরকাদীসু, নিব্বত্তেন্তো সকলম্পি ইমং অত্তভাৰং নাসেতি, ইধাপি মরণম্পি মরণমত্তম্পি দুক্খং আৰহতি, তস্মা ছৰিং ছিন্দতীতিআদি ৰুত্তং. অট্ঠমং.

৯. রজ্জুসুত্তৰণ্ণনা

১৭৮. নৰমে ৰাল়রজ্জুযাতি সুত্তাদিমযা রজ্জু মুদুকা হোতি ৰাল়রজ্জু খরা ফরুসা, তস্মা অযমেৰ গহিতা. নৰমং.

১০. ভিক্খুসুত্তৰণ্ণনা

১৭৯. দসমে দিট্ঠধম্মসুখৰিহারাতি ফলসমাপত্তিসুখৰিহারা. তেসাহমস্সাতি তেসং অহং অস্স. খীণাসৰো হি লাভী পুঞ্ঞসম্পন্নো যাগুখজ্জকাদীনি গহেত্ৰা আগতাগতানং অনুমোদনং করোন্তো ধম্মং দেসেন্তো পঞ্হং ৰিস্সজ্জেন্তো ফলসমাপত্তিং অপ্পেত্ৰা নিসীদিতুং ওকাসং ন লভতি, তং সন্ধায ৰুত্তন্তি. দসমং.

ততিযো ৰগ্গো.

৪. চতুত্থৰগ্গো

১-৪. ভিন্দিসুত্তাদিৰণ্ণনা

১৮০-১৮৩. চতুত্থৰগ্গস্স পঠমং উত্তানমেৰ. দুতিযাদীসু কুসলমূলন্তি অলোভাদিতিৰিধকুসলধম্মো. সুক্কো ধম্মোতি তস্সেৰ পরিযাযদেসনা. অযং পনেত্থ সঙ্খেপত্থো – যস্স কুসলমূলাদিসঙ্খাতস্স অনৰজ্জধম্মস্স অসমুচ্ছিন্নত্তা দেৰদত্তো সগ্গে ৰা নিব্বত্তেয্য, মগ্গফলানি ৰা অধিগচ্ছেয্য, স্ৰাস্স সমুচ্ছেদমগমা সব্বসো সমুচ্ছিন্নো ৰিনট্ঠো. পঠমাদীনি.

৫. অচিরপক্কন্তসুত্তৰণ্ণনা

১৮৪. পঞ্চমে পরাভৰাযাতি অৰড্ঢিযা ৰিনাসায. অস্সতরীতি ৰল়ৰায কুচ্ছিস্মিং গদ্রভস্স জাতা. অত্তৰধায গব্ভং গণ্হাতীতি তং অস্সেন সদ্ধিং সম্পযোজেন্তি, সা গব্ভং গণ্হিত্ৰা কালে সম্পত্তে ৰিজাযিতুং ন সক্কোতি, পাদেহি ভূমিযং পহরন্তী তিট্ঠতি, অথস্সা চত্তারো পাদে চতূসু খাণুকেসু বন্ধিত্ৰা কুচ্ছিং ফালেত্ৰা পোতং নীহরন্তি, সা তত্থেৰ মরতি. তেনেতং ৰুত্তং. পঞ্চমং.

৬. পঞ্চরথসতসুত্তৰণ্ণনা

১৮৫. ছট্ঠে ভত্তাভিহারোতি অভিহরিতব্বং ভত্তং. তস্স পন পমাণং দস্সেতুং পঞ্চ চ থালিপাকসতানীতি ৰুত্তং. তত্থ একো থালিপাকো দসন্নং পুরিসানং ভত্তং গণ্হাতি. নাসায পিত্তং ভিন্দেয্যুন্তি অচ্ছপিত্তং ৰা মচ্ছপিত্তং ৰাস্স নাসপুটে পক্খিপেয্যং. ছট্ঠং.

৭-১৩. মাতুসুত্তাদিৰণ্ণনা

১৮৬-১৮৭. সত্তমে মাতুপি হেতূতি ‘‘সচে মুসা ভণসি, মাতরং তে ৰিস্সজ্জেস্সাম. নো চে ভণসি, ন ৰিস্সজ্জেস্সামা’’তি এৰং চোরেহি অটৰিযং পুচ্ছমানো তস্সা চোরহত্থগতায মাতুযাপি হেতু সম্পজানমুসা ন ভাসেয্যাতি অত্থো. ইতো পরেসুপি এসেৰ নযোতি. সত্তমাদীনি.

লাভসক্কারসংযুত্তৰণ্ণনা নিট্ঠিতা.