২. অনোত্তপ্পীসুত্তৰণ্ণনা

১৪৫. দুতিযে অনাতাপীতি যং ৰীরিযং কিলেসে আতপতি, তেন রহিতো. অনোত্তপ্পীতি নিব্ভযো কিলেসুপ্পত্তিতো কুসলানুপ্পত্তিতো চ ভযরহিতো. সম্বোধাযাতি সম্বুজ্ঝনত্থায. নিব্বানাযাতি নিব্বানসচ্ছিকিরিযায. অনুত্তরস্স যোগক্খেমস্সাতি অরহত্তস্স তঞ্হি অনুত্তরঞ্চেৰ চতূহি চ যোগেহি খেমং.

অনুপ্পন্নাতিআদীসু যে পুব্বে অপ্পটিলদ্ধপুব্বং চীৰরাদিং ৰা পচ্চযং উপট্ঠাকসদ্ধিৰিহারিক-অন্তেৰাসীনং ৰা অঞ্ঞতরতো মনুঞ্ঞৰত্থুং পটিলভিত্ৰা তং সুভং সুখন্তি অযোনিসো গণ্হন্তস্স অঞ্ঞতরং ৰা পন অননুভূতপুব্বং আরম্মণং যথা তথা ৰা অযোনিসো আৰজ্জেন্তস্স লোভাদযো পাপকা অকুসলা ধম্মা উপ্পজ্জন্তি, তে অনুপ্পন্নাতি ৰেদিতব্বা. অঞ্ঞথা হি অনমতগ্গে সংসারে অনুপ্পন্না নাম পাপকা ধম্মা নত্থি. অনুভূতপুব্বেপি চ ৰত্থুম্হি আরম্মণে ৰা যস্স পকতিবুদ্ধিযা ৰা উদ্দেসপরিপুচ্ছায ৰা পরিযত্তিনৰকম্মযোনিসোমনসিকারানং ৰা অঞ্ঞতরৰসেন পুব্বে অনুপ্পজ্জিত্ৰা পচ্ছা তাদিসেন পচ্চযেন সহসা উপ্পজ্জন্তি, ইমেপি ‘‘অনুপ্পন্না উপ্পজ্জমানা অনত্থায সংৰত্তেয্যু’’ন্তি ৰেদিতব্বা. তেসুযেৰ পন ৰত্থারম্মণেসু পুনপ্পুনং উপ্পজ্জমানা নপ্পহীযন্তি নাম, তে ‘‘উপ্পন্না অপ্পহীযমানা অনত্থায সংৰত্তেয্যু’’ন্তি ৰেদিতব্বা. অযমেত্থ সঙ্খেপো, ৰিত্থারতো পন উপ্পন্নানুপ্পন্নভেদো চ পহানপ্পহানৰিধানঞ্চ সব্বং ৰিসুদ্ধিমগ্গে ঞাণদস্সনৰিসুদ্ধিনিদ্দেসে কথিতং.

অনুপ্পন্না মে কুসলা ধম্মাতি অপ্পটিলদ্ধাপি সীলসমাধিমগ্গফলসঙ্খাতা অনৰজ্জধম্মা. উপ্পন্নাতি তেযেৰ পটিলদ্ধা. নিরুজ্ঝমানা অনত্থায সংৰত্তেয্যুন্তি তে সীলাদিধম্মা পরিহানিৰসেন পুন অনুপ্পত্তিযা নিরুজ্ঝমানা অনত্থায সংৰত্তেয্যুন্তি ৰেদিতব্বা. এত্থ চ লোকিযা পরিহাযন্তি, লোকুত্তরানং পরিহানি নত্থীতি. ‘‘উপ্পন্নানং কুসলানং ধম্মানং ঠিতিযা’’তি ইমস্স পন সম্মপ্পধানস্স ৰসেনাযং দেসনা কতা. দুতিযমগ্গো ৰা সীঘং অনুপ্পজ্জমানো, পঠমমগ্গো নিরুজ্ঝমানো অনত্থায সংৰত্তেয্যাতি এৰম্পেত্থ অত্থো দট্ঠব্বো. ইতি ইমস্মিং সুত্তে ইমে চত্তারো সম্মপ্পধানা পুব্বভাগৰিপস্সনাৰসেন কথিতাতি. দুতিযং.