১. নখসিখাসুত্তৰণ্ণনা

৭৪. অভিসমযসংযুত্তস্স পঠমে নখসিখাযন্তি মংসট্ঠানেন ৰিমুত্তে নখগ্গে. নখসিখা চ নাম লোকিযানং মহতীপি হোতি, সত্থু পন রত্তুপ্পলপত্তকোটি ৰিয সুখুমা. কথং পনেত্থ পংসু পতিট্ঠিতোতি? অধিট্ঠানবলেন. ভগৰতা হি অত্থং ঞাপেতুকামেন অধিট্ঠানবলেন তত্থ পতিট্ঠাপিতো. সতিমং কলন্তি মহাপথৰিযা পংসুং সতকোট্ঠাসে কত্ৰা ততো এককোট্ঠাসং. পরতোপি এসেৰ নযো. অভিসমেতাৰিনোতি পঞ্ঞায অরিযসচ্চানি অভিসমেত্ৰা ঠিতস্স. পুরিমং দুক্খক্খন্ধং পরিক্খীণং পরিযাদিণ্ণং উপনিধাযাতি এতদেৰ বহুতরং দুক্খং, যদিদং পরিক্খীণন্তি এৰং পঠমং ৰুত্তং দুক্খক্খন্ধং উপনিধায, ঞাণেন তং তস্স সন্তিকে ঠপেত্ৰা উপপরিক্খিযমানেতি অত্থো. কতমং পনেত্থ পুরিমদুক্খং নাম? যং পরিক্খীণং. কতমং পন পরিক্খীণং? যং পঠমমগ্গস্স অভাৰিতত্তা উপ্পজ্জেয্য. কতমং পন উপনিধায? যং সত্তসু অত্তভাৰেসু অপাযে অট্ঠমঞ্চ পটিসন্ধিং আদিং কত্ৰা যত্থ কত্থচি উপ্পজ্জেয্য, সব্বং তং পরিক্খীণন্তি ৰেদিতব্বং. সত্তক্খত্তুন্তি সত্ত ৰারে, সত্তসু অত্তভাৰেসূতি অত্থো. পরমতাতি ইদমস্স পরং পমাণন্তি দস্সেতি. মহত্থিযোতি মহতো অত্থস্স নিপ্ফাদকো. পঠমং.