২. অভিসমযসংযুত্তং

১. নখসিখাসুত্তৰণ্ণনা

৭৪. অভিসমযসংযুত্তস্স পঠমে নখসিখাযন্তি মংসট্ঠানেন ৰিমুত্তে নখগ্গে. নখসিখা চ নাম লোকিযানং মহতীপি হোতি, সত্থু পন রত্তুপ্পলপত্তকোটি ৰিয সুখুমা. কথং পনেত্থ পংসু পতিট্ঠিতোতি? অধিট্ঠানবলেন. ভগৰতা হি অত্থং ঞাপেতুকামেন অধিট্ঠানবলেন তত্থ পতিট্ঠাপিতো. সতিমং কলন্তি মহাপথৰিযা পংসুং সতকোট্ঠাসে কত্ৰা ততো এককোট্ঠাসং. পরতোপি এসেৰ নযো. অভিসমেতাৰিনোতি পঞ্ঞায অরিযসচ্চানি অভিসমেত্ৰা ঠিতস্স. পুরিমং দুক্খক্খন্ধং পরিক্খীণং পরিযাদিণ্ণং উপনিধাযাতি এতদেৰ বহুতরং দুক্খং, যদিদং পরিক্খীণন্তি এৰং পঠমং ৰুত্তং দুক্খক্খন্ধং উপনিধায, ঞাণেন তং তস্স সন্তিকে ঠপেত্ৰা উপপরিক্খিযমানেতি অত্থো. কতমং পনেত্থ পুরিমদুক্খং নাম? যং পরিক্খীণং. কতমং পন পরিক্খীণং? যং পঠমমগ্গস্স অভাৰিতত্তা উপ্পজ্জেয্য. কতমং পন উপনিধায? যং সত্তসু অত্তভাৰেসু অপাযে অট্ঠমঞ্চ পটিসন্ধিং আদিং কত্ৰা যত্থ কত্থচি উপ্পজ্জেয্য, সব্বং তং পরিক্খীণন্তি ৰেদিতব্বং. সত্তক্খত্তুন্তি সত্ত ৰারে, সত্তসু অত্তভাৰেসূতি অত্থো. পরমতাতি ইদমস্স পরং পমাণন্তি দস্সেতি. মহত্থিযোতি মহতো অত্থস্স নিপ্ফাদকো. পঠমং.

২. পোক্খরণীসুত্তৰণ্ণনা

৭৫. দুতিযে পোক্খরণীতি ৰাপী. উব্বেধেনাতি গম্ভীরতায. সমতিত্তিকাতি মুখৰট্টিসমা. কাকপেয্যাতি সক্কা হোতি তীরে ঠিতেন কাকেন পকতিযাপি মুখতুণ্ডিকং ওতারেত্ৰা পাতুং. দুতিযং.

৩. সংভেজ্জউদকসুত্তাদিৰণ্ণনা

৭৬-৭৭. ততিযে যত্থিমাতি যস্মিং সম্ভিজ্জট্ঠানে ইমা. সংসন্দন্তীতি সমাগন্ত্ৰা সন্দন্তি. সমেন্তীতি সমাগচ্ছন্তি. দ্ৰে ৰা তি ৰাতি দ্ৰে ৰা তীণি ৰা. উদকফুসিতানীতি উদকবিন্দূনি. সংভেজ্জউদকন্তি অঞ্ঞাহি নদীহি সদ্ধিং সম্ভিন্নট্ঠানে উদকং. চতুত্থং উত্তানত্থমেৰ. ততিযচতুত্থানি.

৫. পথৰীসুত্তাদিৰণ্ণনা

৭৮-৮৪. পঞ্চমে মহাপথৰিযাতি চক্কৰাল়ব্ভন্তরায মহাপথৰিযা উদ্ধরিত্ৰা. কোলট্ঠিমত্তিযোতি পদরট্ঠিপমাণা. গুল়িকাতি মত্তিকগুল়িকা. উপনিক্খিপেয্যাতি একস্মিং ঠানে ঠপেয্য. ছট্ঠাদীসু ৰুত্তনযেনেৰ অত্থো ৰেদিতব্বো. পরিযোসানে পন অঞ্ঞতিত্থিযসমণব্রাহ্মণপরিব্বাজকানং অধিগমোতি বাহিরকানং সব্বোপি গুণাধিগমো পঠমমগ্গেন অধিগতগুণানং সতভাগম্পি সহস্সভাগম্পি সতসহস্সভাগম্পি ন উপগচ্ছতীতি. পঞ্চমাদীনি.

অভিসমযসংযুত্তৰণ্ণনা নিট্ঠিতা.