৪. ৰিজযাসুত্তৰণ্ণনা

১৬৫. চতুত্থে পঞ্চঙ্গিকেনাতি আততং ৰিততং আততৰিততং ঘনং সুসিরন্তি এৰং পঞ্চঙ্গসমন্নাগতেন. নিয্যাতযামি তুয্হেৰাতি সব্বে তুয্হংযেৰ দেমি. নাহং তেনত্থিকাতি নাহং তেন অত্থিকা. পূতিকাযেনাতি সুৰণ্ণৰণ্ণোপি কাযো নিচ্চং উগ্ঘরিতপগ্ঘরিতট্ঠেন পূতিকাযোৰ, তস্মা এৰমাহ. ভিন্দনেনাতি ভিজ্জনসভাৰেন. পভঙ্গুনাতি চুণ্ণৰিচুণ্ণং আপজ্জনধম্মেন. অট্টীযামীতি অট্টা পীল়িতা হোমি. হরাযামীতি লজ্জামি. সন্তা সমাপত্তীতি অট্ঠৰিধা লোকিযসমাপত্তি আরম্মণসন্ততায অঙ্গসন্ততায চ সন্তাতি ৰুত্তা. সব্বত্থাতি সব্বেসু রূপারূপভৰেসু, তেসং দ্ৰিন্নং ভৰানং গহিতত্তা গহিতে কামভৰে অট্ঠসু চ সমাপত্তীসূতি এতেসু সব্বেসু ঠানেসু ময্হং অৰিজ্জাতমো ৰিহতোতি ৰদতি. চতুত্থং.