৫-৬. চন্দনসুত্তাদিৰণ্ণনা

৯৬. পঞ্চমে অপ্পতিট্ঠে অনালম্বেতি হেট্ঠা অপতিট্ঠে উপরি অনালম্বনে. সুসমাহিতোতি অপ্পনাযপি উপচারেনপি সুট্ঠু সমাহিতো. পহিতত্তোতি পেসিতত্তো. নন্দীরাগপরিক্খীণোতি পরিক্খীণনন্দীরাগো. নন্দীরাগো নাম তযো কম্মাভিসঙ্খারা. ইতি ইমায গাথায কামসঞ্ঞাগহণেন পঞ্চোরম্ভাগিযসংযোজনানি, রূপসংযোজনগহণেন পঞ্চ উদ্ধম্ভাগিযসংযোজনানি, নন্দীরাগেন তযো কম্মাভিসঙ্খারা গহিতা. এৰং যস্স দস সংযোজনানি তযো চ কম্মাভিসঙ্খারা পহীনা, সো গম্ভীরে মহোঘে ন সীদতীতি. কামসঞ্ঞায ৰা কামভৰো, রূপসংযোজনেন রূপভৰো গহিতো, তেসং গহণেন অরূপভৰো গহিতোৰ, নন্দীরাগেন তযো কম্মাভিসঙ্খারা গহিতাতি এৰং যস্স তীসু ভৰেসু তযো সঙ্খারা নত্থি, সো গম্ভীরে ন সীদতীতিপি দস্সেতি. পঞ্চমং.

৯৭. ছট্ঠং ৰুত্তত্থমেৰ. ছট্ঠং.