২. অনাথপিণ্ডিকৰগ্গো

১. চন্দিমসসুত্তৰণ্ণনা

৯২. দুতিযৰগ্গস্স পঠমে কচ্ছেৰাতি কচ্ছে ৰিয. কচ্ছেতি পব্বতকচ্ছেপি নদীকচ্ছেপি. একোদি নিপকাতি একগ্গচিত্তা চেৰ পঞ্ঞানেপক্কেন চ সমন্নাগতা. সতাতি সতিমন্তো. ইদং ৰুত্তং হোতি – যে ঝানানি লভিত্ৰা একোদী নিপকা সতা ৰিহরন্তি, তে অমকসে পব্বতকচ্ছে ৰা নদীকচ্ছে ৰা মগা ৰিয সোত্থিং গমিস্সন্তীতি. পারন্তি নিব্বানং. অম্বুজোতি মচ্ছো. রণঞ্জহাতি কিলেসঞ্জহা. যেপি ঝানানি লভিত্ৰা অপ্পমত্তা কিলেসে জহন্তি, তে সুত্তজালং ভিন্দিত্ৰা মচ্ছা ৰিয নিব্বানং গমিস্সন্তীতি ৰুত্তং হোতি. পঠমং.

২. ৰেণ্ডুসুত্তৰণ্ণনা

৯৩. দুতিযে ৰেণ্ডূতি তস্স দেৰপুত্তস্স নামং. পযিরুপাসিযাতি পরিরুপাসিত্ৰা. অনুসিক্খরেতি সিক্খন্তি. সিট্ঠিপদেতি অনুসিট্ঠিপদে. কালে তে অপ্পমজ্জন্তাতি কালে তে অপ্পমাদং করোন্তা. দুতিযং.

৩. দীঘলট্ঠিসুত্তৰণ্ণনা

৯৪. ততিযে দীঘলট্ঠীতি দেৰলোকে সব্বে সমপ্পমাণা তিগাৰুতিকাৰ হোন্তি, মনুস্সলোকে পনস্স দীঘত্তভাৰতায এৰংনামং অহোসি. সো পুঞ্ঞানি কত্ৰা দেৰলোকে নিব্বত্তোপি তথেৰ পঞ্ঞাযি. ততিযং.

৪. নন্দনসুত্তৰণ্ণনা

৯৫. চতুত্থে গোতমাতি ভগৰন্তং গোত্তেন আলপতি. অনাৰটন্তি তথাগতস্স হি সব্বঞ্ঞুতঞ্ঞাণং পেসেন্তস্স রুক্খো ৰা পব্বতো ৰা আৰরিতুং সমত্থো নাম নত্থি. তেনাহ ‘‘অনাৰট’’ন্তি. ইতি তথাগতং থোমেত্ৰা দেৰলোকে অভিসঙ্খতপঞ্হং পুচ্ছন্তো কথংৰিধন্তিআদিমাহ. তত্থ দুক্খমতিচ্চ ইরিযতীতি দুক্খং অতিক্কমিত্ৰা ৰিহরতি. সীলৰাতি লোকিযলোকুত্তরেন সীলেন সমন্নাগতো খীণাসৰো. পঞ্ঞাদযোপি মিস্সকাযেৰ ৰেদিতব্বা. পূজযন্তীতি গন্ধপুপ্ফাদীহি পূজেন্তি. চতুত্থং.

৫-৬. চন্দনসুত্তাদিৰণ্ণনা

৯৬. পঞ্চমে অপ্পতিট্ঠে অনালম্বেতি হেট্ঠা অপতিট্ঠে উপরি অনালম্বনে. সুসমাহিতোতি অপ্পনাযপি উপচারেনপি সুট্ঠু সমাহিতো. পহিতত্তোতি পেসিতত্তো. নন্দীরাগপরিক্খীণোতি পরিক্খীণনন্দীরাগো. নন্দীরাগো নাম তযো কম্মাভিসঙ্খারা. ইতি ইমায গাথায কামসঞ্ঞাগহণেন পঞ্চোরম্ভাগিযসংযোজনানি, রূপসংযোজনগহণেন পঞ্চ উদ্ধম্ভাগিযসংযোজনানি, নন্দীরাগেন তযো কম্মাভিসঙ্খারা গহিতা. এৰং যস্স দস সংযোজনানি তযো চ কম্মাভিসঙ্খারা পহীনা, সো গম্ভীরে মহোঘে ন সীদতীতি. কামসঞ্ঞায ৰা কামভৰো, রূপসংযোজনেন রূপভৰো গহিতো, তেসং গহণেন অরূপভৰো গহিতোৰ, নন্দীরাগেন তযো কম্মাভিসঙ্খারা গহিতাতি এৰং যস্স তীসু ভৰেসু তযো সঙ্খারা নত্থি, সো গম্ভীরে ন সীদতীতিপি দস্সেতি. পঞ্চমং.

৯৭. ছট্ঠং ৰুত্তত্থমেৰ. ছট্ঠং.

৭. সুব্রহ্মসুত্তৰণ্ণনা

৯৮. সত্তমে সুব্রহ্মাতি সো কির দেৰপুত্তো অচ্ছরাসঙ্ঘপরিৰুতো নন্দনকীল়িকং গন্ত্ৰা পারিচ্ছত্তকমূলে পঞ্ঞত্তাসনে নিসীদি. তং পঞ্চসতা দেৰধীতরো পরিৰারেত্ৰা নিসিন্না, পঞ্চসতা রুক্খং অভিরুল়্হা. ননু চ দেৰতানং চিত্তৰসেন যোজনসতিকোপি রুক্খো ওনমিত্ৰা হত্থং আগচ্ছতি, কস্মা তা অভিরুল়্হাতি. খিড্ডাপসুততায. অভিরুয্হ পন মধুরস্সরেন গাযিত্ৰা গাযিত্ৰা পুপ্ফানি পাতেন্তি, তানি গহেত্ৰা ইতরা একতোৰণ্টিকমালাদিৰসেন গন্থেন্তি. অথ রুক্খং অভিরুল়্হা উপচ্ছেদককম্মৰসেন একপ্পহারেনেৰ কালং কত্ৰা অৰীচিম্হি নিব্বত্তা মহাদুক্খং অনুভৰন্তি.

অথ কালে গচ্ছন্তে দেৰপুত্তো ‘‘ইমাসং নেৰ সদ্দো সুয্যতি, ন পুপ্ফানি পাতেন্তি. কহং নু খো গতা’’তি? আৰজ্জেন্তো নিরযে নিব্বত্তভাৰং দিস্ৰা পিযৰত্থুকসোকেন রুপ্পমানো চিন্তেসি – ‘‘এতা তাৰ যথাকম্মেন গতা, ময্হং আযুসঙ্খারো কিত্তকো’’তি. সো – ‘‘সত্তমে দিৰসে মযাপি অৰসেসাহি পঞ্চসতাহি সদ্ধিং কালং কত্ৰা তত্থেৰ নিব্বত্তিতব্ব’’ন্তি দিস্ৰা বলৰতরেন সোকেন রুপ্পি. সো – ‘‘ইমং ময্হং সোকং সদেৰকে লোকে অঞ্ঞত্র তথাগতা নিদ্ধমিতুং সমত্থো নাম নত্থী’’তি চিন্তেত্ৰা সত্থু সন্তিকং গন্ত্ৰা নিচ্চং উত্রস্তন্তি গাথমাহ.

তত্থ ইদন্তি অত্তনো চিত্তং দস্সেতি. দুতিযপদং পুরিমস্সেৰ ৰেৰচনং. নিচ্চন্তি চ পদস্স দেৰলোকে নিব্বত্তকালতো পট্ঠাযাতি অত্থো ন গহেতব্বো, সোকুপ্পত্তিকালতো পন পট্ঠায নিচ্চন্তি ৰেদিতব্বং. অনুপ্পন্নেসু কিচ্ছেসূতি ইতো সত্তাহচ্চযেন যানি দুক্খানি উপ্পজ্জিস্সন্তি, তেসু. অথো উপ্পতিতেসু চাতি যানি পঞ্চসতানং অচ্ছরানং নিরযে নিব্বত্তানং দিট্ঠানি, তেসু চাতি এৰং ইমেসু উপ্পন্নানুপ্পন্নেসু দুক্খেসু নিচ্চং মম উত্রস্তং চিত্তং, অব্ভন্তরে ডয্হমানো ৰিয হোমি ভগৰাতি দস্সেতি.

নাঞ্ঞত্র বোজ্ঝা তপসাতি বোজ্ঝঙ্গভাৰনঞ্চ তপোগুণঞ্চ অঞ্ঞত্র মুঞ্চিত্ৰা সোত্থিং ন পস্সামীতি অত্থো. সব্বনিস্সগ্গাতি নিব্বানতো. এত্থ কিঞ্চাপি বোজ্ঝঙ্গভাৰনা পঠমং গহিতা, ইন্দ্রিযসংৰরো পচ্ছা, অত্থতো পন ইন্দ্রিযসংৰরোৰ পঠমং ৰেদিতব্বো. ইন্দিযসংৰরে হি গহিতে চতুপারিসুদ্ধিসীলং গহিতং হোতি. তস্মিং পতিট্ঠিতো ভিক্খু নিস্সযমুত্তকো ধুতঙ্গসঙ্খাতং তপোগুণং সমাদায অরঞ্ঞং পৰিসিত্ৰা কম্মট্ঠানং ভাৰেন্তো সহ ৰিপস্সনায বোজ্ঝঙ্গে ভাৰেতি. তস্স অরিযমগ্গো যং নিব্বানং আরম্মণং কত্ৰা উপ্পজ্জতি, সো ‘‘সব্বনিস্সগ্গো’’তি ভগৰা চতুসচ্চৰসেন দেসনং ৰিনিৰত্তেসি. দেৰপুত্তো দেসনাপরিযোসানে সোতাপত্তিফলে পতিট্ঠহীতি. সত্তমং.

৮-১০. ককুধসুত্তাদিৰণ্ণনা

৯৯. অট্ঠমে ককুধো দেৰপুত্তোতি অযং কির কোলনগরে মহামোগ্গল্লানত্থেরস্স উপট্ঠাকপুত্তো দহরকালেযেৰ থেরস্স সন্তিকে ৰসন্তো ঝানং নিব্বত্তেত্ৰা কালঙ্কতো, ব্রহ্মলোকে উপ্পজ্জি. তত্রাপি নং ককুধো ব্রহ্মাত্ৰেৰ সঞ্জানন্তি. নন্দসীতি তুস্সসি. কিং লদ্ধাতি তুট্ঠি নাম কিঞ্চি মনাপং লভিত্ৰা হোতি, তস্মা এৰমাহ. কিং জীযিত্থাতি যস্স হি কিঞ্চি মনাপং চীৰরাদিৰত্থু জিণ্ণং হোতি, সো সোচতি, তস্মা এৰমাহ. অরতী নাভিকীরতীতি উক্কণ্ঠিতা নাভিভৰতি. অঘজাতস্সাতি দুক্খজাতস্স, ৰট্টদুক্খে ঠিতস্সাতি অত্থো. নন্দীজাতস্সাতি জাততণ্হস্স. অঘন্তি এৰরূপস্স হি ৰট্টদুক্খং আগতমেৰ হোতি. ‘‘দুক্খী সুখং পত্থযতী’’তি হি ৰুত্তং. ইতি অঘজাতস্স নন্দী হোতি, সুখৰিপরিণামেন দুক্খং আগতমেৰাতি নন্দীজাতস্স অঘং হোতি. অট্ঠমং.

১০০. নৰমং ৰুত্তত্থমেৰ. নৰমং.

১০১. দসমে আনন্দত্থেরস্স অনুমানবুদ্ধিযা আনুভাৰপ্পকাসনত্থং অঞ্ঞতরোতি আহ. দসমং.

দুতিযো ৰগ্গো.