৩. সম্বরিমাযাসুত্তৰণ্ণনা

২৬৯. ততিযে আবাধিকোতি ইসিগণেন অভিসপকালে উপ্পন্নাবাধেন আবাধিকো. ৰাচেহি মন্তি সচে মং সম্বরিমাযং ৰাচেসি, এৰমহং তম্পি তিকিচ্ছিস্সামীতি ৰদতি. মা খো ত্ৰং, মারিস, ৰাচেসীতি ৰিনাপি তাৰ সম্বরিমাযং সক্কো অম্হে বাধতি, যদি পন তং জানিস্সতি, নট্ঠা মযং, মা অত্তনো একস্স অত্থায অম্হে নাসেহীতি ৰত্ৰা নিৰারযিংসু. সম্বরোৰ সতং সমন্তি যথা সম্বরো অসুরিন্দো মাযাৰী মাযং পযোজেত্ৰা ৰস্সসতং নিরযে পক্কো, এৰং পচ্চতি. তুম্হে ধম্মিকাৰ, অলং ৰো মাযাযাতি ৰদতি. কিং পন সক্কো তস্স কোধং তিকিচ্ছিতুং সক্কুণেয্যাতি? আম সক্কুণেয্য. কথং? তদা কির সো ইসিগণো ধরতিযেৰ, তস্মা নং ইসীনং সন্তিকং নেত্ৰা খমাপেয্য, এৰমস্স ফাসু ভৰেয্য. তেন পন ৰঞ্চিতত্তা তথা অকত্ৰা পক্কন্তোৰ. ততিযং.