১১. সক্কসংযুত্তং

১. পঠমৰগ্গো

১. সুৰীরসুত্তৰণ্ণনা

২৪৭. সক্কসংযুত্তস্স পঠমে অভিযংসূতি কদা অভিযংসু? যদা বলৰন্তো অহেসুং, তদা. তত্রাযং অনুপুব্বিকথা – সক্কো কির মগধরট্ঠে মচলগামকে মঘো নাম মাণৰো হুত্ৰা তেত্তিংস পুরিসে গহেত্ৰা কল্যাণকম্মং করোন্তো সত্ত ৰতপদানি পূরেত্ৰা তত্থ কালঙ্কতো দেৰলোকে নিব্বত্তি. তং বলৰকম্মানুভাৰেন সপরিসং সেসদেৰতা দসহি ঠানেহি অধিগণ্হন্তং দিস্ৰা ‘‘আগন্তুকদেৰপুত্তা আগতা’’তি নেৰাসিকা গন্ধপানং সজ্জযিংসু. সক্কো সকপরিসায সঞ্ঞং অদাসি – ‘‘মারিসা মা গন্ধপানং পিৰিত্থ, পিৰনাকারমত্তমেৰ দস্সেথা’’তি. তে তত্থ অকংসু. নেৰাসিকদেৰতা সুৰণ্ণসরকেহি উপনীতং গন্ধপানং যাৰদত্থং পিৰিত্ৰা মত্তা তত্থ তত্থ সুৰণ্ণপথৰিযং পতিত্ৰা সযিংসু. সক্কো ‘‘গণ্হথ পুত্তহতায পুত্তে’’তি তে পাদেসু গহেত্ৰা সিনেরুপাদে খিপাপেসি. সক্কস্স পুঞ্ঞতেজেন তদনুৰত্তকাপি সব্বে তত্থেৰ পতিংসু. তে সিনেরুৰেমজ্ঝকালে সঞ্ঞং লভিত্ৰা, ‘‘তাতা ন সুরং পিৰিম্হ, ন সুরং পিৰিম্হা’’তি আহংসু. ততো পট্ঠায অসুরা নাম জাতা. অথ নেসং কম্মপচ্চযউতুসমুট্ঠানং সিনেরুস্স হেট্ঠিমতলে দসযোজনসহস্সং অসুরভৰনং নিব্বত্তি. সক্কো তেসং নিৰত্তেত্ৰা অনাগমনত্থায আরক্খং ঠপেসি, যং সন্ধায ৰুত্তং –

‘‘অন্তরা দ্ৰিন্নং অযুজ্ঝপুরানং,

পঞ্চৰিধা ঠপিতা অভিরক্খা;

উদকং করোটি-পযস্স চ হারী,

মদনযুতা চতুরো চ মহত্থা’’তি.

দ্ৰে নগরানি হি যুদ্ধেন গহেতুং অসক্কুণেয্যতায অযুজ্ঝপুরানি নাম জাতানি দেৰনগরঞ্চ অসুরনগরঞ্চ. যদা হি অসুরা বলৰন্তো হোন্তি, অথ দেৰেহি পলাযিত্ৰা দেৰনগরং পৰিসিত্ৰা দ্ৰারে পিদহিতে অসুরানং সতসহস্সম্পি কিঞ্চি কাতুং ন সক্কোতি. যদা দেৰা বলৰন্তো হোন্তি, অথাসুরেহি পলাযিত্ৰা অসুরনগরস্স দ্ৰারে পিদহিতে সক্কানং সতসহস্সম্পি কিঞ্চি কাতুং ন সক্কোতি. ইতি ইমানি দ্ৰে নগরানি অযুজ্ঝপুরানি নাম. নেসং অন্তরা এতেসু উদকাদীসু পঞ্চসু ঠানেসু সক্কেন আরক্খা ঠপিতা. তত্থ উদকসদ্দেন নাগা গহিতা. তে হি উদকে বলৰন্তো হোন্তি. তস্মা সিনেরুস্স পঠমালিন্দে তেসং আরক্খা. করোটিসদ্দেন সুপণ্ণা গহিতা. তেসং কির করোটি নাম পানভোজনং, তেন তং নামং লভিংসু. দুতিযালিন্দে তেসং আরক্খা. পযস্সহারীসদ্দেন কুম্ভণ্ডা গহিতা. দানৰরক্খসা কির তে. ততিযালিন্দে তেসং আরক্খা. মদনযুতসদ্দেন যক্খা গহিতা. ৰিসমচারিনো কিরতে যুজ্ঝসোণ্ডা. চতুত্থালিন্দে তেসং আরক্খা. চতুরো চ মহন্তাতি চত্তারো মহারাজানো ৰুত্তা. পঞ্চমালিন্দে তেসং আরক্খা. তস্মা যদি অসুরা কুপিতাৰিলচিত্তা দেৰপুরং উপযন্তি যুদ্ধেসূ, যং গিরিনো পঠমং পরিভণ্ডং, তং উরগা পটিবাহন্তি এৰং সেসেসু সেসা.

তে পন অসুরা আযুৰণ্ণরসইস্সরিযসম্পত্তীহি তাৰতিংসসদিসাৰ. তস্মা অন্তরা অত্তানং অজানিত্ৰা পাটলিযা পুপ্ফিতায, ‘‘ন ইদং দেৰনগরং, তত্থ পারিচ্ছত্তকো পুপ্ফতি, ইধ পন চিত্তপাটলী, জরসক্কেনাম্হাকং সুরং পাযেত্ৰা ৰঞ্চিতা, দেৰনগরঞ্চ নো গহিতং, গচ্ছাম তেন সদ্ধিং যুজ্ঝিস্সামা’’তি হত্থিঅস্সরথে আরুয্হ সুৰণ্ণরজতমণিফলকানি গহেত্ৰা, যুদ্ধসজ্জা হুত্ৰা, অসুরভেরিযো ৰাদেন্তা মহাসমুদ্দে উদকং দ্ৰিধা ভেত্ৰা উট্ঠহন্তি. তে দেৰে ৰুট্ঠে ৰম্মিকমক্খিকা ৰম্মিকং ৰিয সিনেরুং অভিরুহিতু আরভন্তি. অথ নেসং পঠমং নাগেহি সদ্ধিং যুদ্ধং হোতি. তস্মিং খো পন যুদ্ধে ন কস্সচি ছৰি ৰা চম্মং ৰা ছিজ্জতি, ন লোহিতং উপ্পজ্জতি, কেৰলং কুমারকানং দারুমেণ্ডকযুদ্ধং ৰিয অঞ্ঞমঞ্ঞং সন্তাসনমত্তমেৰ হোতি. কোটিসতাপি কোটিসহস্সাপি নাগা তেহি সদ্ধিং যুজ্ঝিত্ৰা তে অসুরপুরংযেৰ পৰেসেত্ৰা নিৰত্তন্তি.

যদা পন অসুরা বলৰন্তো হোন্তি, অথ নাগা ওসক্কিত্ৰা দুতিযে আলিন্দে সুপণ্ণেহি সদ্ধিং একতোৰ হুত্ৰা যুজ্ঝন্তি. এস নযো সুপণ্ণাদীসূপি. যদা পন তানি পঞ্চপি ঠানানি অসুরা মদ্দন্তি, তদা একতো সম্পিণ্ডিতানিপি পঞ্চ বলানি ওসক্কন্তি. অথ চত্তারো মহারাজানো গন্ত্ৰা সক্কস্স তং পৰত্তিং আরোচেন্তি. সক্কো তেসং ৰচনং সুত্ৰা দিযড্ঢযোজনসতিকং ৰেজযন্তরথং আরুয্হ সযং ৰা নিক্খমতি, একং ৰা পুত্তং পেসেতি. ইমস্মিং পন কালে পুত্তং পেসেতুকামো, তাত সুৰীরাতিআদিমাহ.

এৰং ভদ্দন্তৰাতি খোতি এৰং হোতু ভদ্দং তৰ ইতি খো. পমাদং আপাদেসীতি পমাদং অকাসি. অচ্ছরাসঙ্ঘপরিৰুতো সট্ঠিযোজনং ৰিত্থারেন সুৰণ্ণমহাৰীথিং ওতরিত্ৰা নক্খত্তং কীল়ন্তো নন্দনৰনাদীসু ৰিচরতীতি অত্থো.

অনুট্ঠহন্তি অনুট্ঠহন্তো. অৰাযামন্তি অৰাযমন্তো. অলস্ৰস্সাতি অলসো অস্স. ন চ কিচ্চানি কারযেতি কিঞ্চি কিচ্চং নাম ন করেয্য. সব্বকামসমিদ্ধস্সাতি সব্বকামেহি সমিদ্ধো অস্স. তং মে, সক্ক, ৰরং দিসাতি, সক্ক দেৰসেট্ঠ, তং মে ৰরং উত্তমং ঠানং ওকাসং দিসং আচিক্খ কথেহীতি ৰদতি. নিব্বানস্স হি সো মগ্গোতি কম্মং অকত্ৰা জীৰিতট্ঠানং নাম নিব্বানস্স মগ্গো. পঠমং.

২. সুসীমসুত্তৰণ্ণনা

২৪৮. দুতিযে সুসীমন্তি অত্তনো পুত্তসহস্সস্স অন্তরে এৰংনামকং একং পুত্তমেৰ. দুতিযং.

৩. ধজগ্গসুত্তৰণ্ণনা

২৪৯. ততিযে সমুপব্যূল়্হোতি সম্পিণ্ডিতো রাসিভূতো. ধজগ্গংউল্লোকেয্যথাতি সক্কস্স কির দিযড্ঢযোজনসতাযামো রথো. তস্স হি পচ্ছিমন্তো পণ্ণাসযোজনো, মজ্ঝে রথপঞ্জরো পণ্ণাসযোজনো, রথসন্ধিতো যাৰ রথসীসা পণ্ণাসযোজনানি. তদেৰ পমাণং দিগুণং কত্ৰা তিযোজনসতাযামোতিপি ৰদন্তিযেৰ. তস্মিং যোজনিকপল্লঙ্কো অত্থতো, তিযোজনিকং সেতচ্ছত্তং মত্থকে ঠপিতং, একস্মিংযেৰ যুগে সহস্সআজঞ্ঞা যুত্তা, সেসালঙ্কারস্স পমাণং নত্থি. ধজো পনস্স অড্ঢতিযানি যোজনসতানি উগ্গতো, যস্স ৰাতাহতস্স পঞ্চঙ্গিকতূরিযস্সেৰ সদ্দো নিচ্ছরতি, তং উল্লোকেয্যাথাতি ৰদতি. কস্মা? তং পস্সন্তানঞ্হি রাজা নো আগন্ত্ৰা পরিসপরিযন্তে নিখাতথম্ভো ৰিয ঠিতো, কস্স মযং ভাযামাতি ভযং ন হোতি. পজাপতিস্সাতি সো কির সক্কেন সমানৰণ্ণো সমানাযুকো দুতিযং আসনং লভতি. তথা ৰরুণো ঈসানো চ. ৰরুণো পন ততিযং আসনং লভতি, ঈসানো চতুত্থং. পলাযীতি অসুরেহি পরাজিতো তস্মিং রথে ঠিতো অপ্পমত্তকম্পি রজধজং দিস্ৰা পলাযনধম্মো.

ইতিপি সো ভগৰাতিআদীনি ৰিসুদ্ধিমগ্গে ৰিত্থারিতানেৰ. ইদমৰোচাতি ইদং ধজগ্গপরিত্তং নাম ভগৰা অৰোচ, যস্স আণাখেত্তে কোটিসতসহস্সচক্কৰাল়ে আনুভাৰো ৰত্ততি. ইদং আৰজ্জেত্ৰা হি যক্খভযচোরভযাদীহি দুক্খেহি মুত্তানং অন্তো নত্থি. তিট্ঠতু অঞ্ঞদুক্খৰূপসমো, ইদং আৰজ্জমানো হি পসন্নচিত্তো আকাসেপি পতিট্ঠং লভতি.

তত্রিদং ৰত্থু – দীঘৰাপিচেতিযম্হি কির সুধাকম্মে কযিরমানে একো দহরো মুদ্ধৰেদিকাপাদতো পতিত্ৰা চেতিযকুচ্ছিযা ভস্সতি. হেট্ঠা ঠিতো ভিক্খুসঙ্ঘো ‘‘ধজগ্গপরিত্তং, আৰুসো, আৰজ্জাহী’’তি আহ. সো মরণভযেন তজ্জিতো ‘‘ধজগ্গপরিত্তং মং রক্খতূ’’তি আহ. তাৰদেৰস্স চেতিযকুচ্ছিতো দ্ৰে ইট্ঠকা নিক্খমিত্ৰা সোপানং হুত্ৰা অট্ঠংসু, উপরিট্ঠিতো ৰল্লিনিস্সেণিং ওতারেসুং. তস্মিং নিস্সেণিযং ঠিতে ইট্ঠকা যথাট্ঠানেযেৰ অট্ঠংসু. ততিযং.

৪. ৰেপচিত্তিসুত্তৰণ্ণনা

২৫০. চতুত্থে ৰেপচিত্তীতি সো কির অসুরানং সব্বজেট্ঠকো. যেনাতি নিপাতমত্তং নন্তি চ. কণ্ঠপঞ্চমেহীতি দ্ৰীসু হত্থেসু পাদেসু কণ্ঠে চাতি এৰং পঞ্চহি বন্ধনেহি. তানি পন নল়িনসুত্তং ৰিয মক্কটকসুত্তং ৰিয চ চক্খুস্সাপাথং আগচ্ছন্তি, ইরিযাপথং রুজ্ঝন্তি. তেহি পন চিত্তেনেৰ বজ্ঝতি, চিত্তেনেৰ মুচ্চতি. অক্কোসতীতি চোরোসি বালোসি মূল়্হোসি থেনোসি ওট্ঠোসি গোণোসি গদ্রভোসি নেরযিকোসি তিরচ্ছানগতোসি, নত্থি তুয্হং সুগতি, দুগ্গতিযেৰ তুয্হং পাটিকঙ্খাতি ইমেহি দসহি অক্কোসৰত্থূহি অক্কোসতি. পরিভাসতীতি, জরসক্ক, ন ত্ৰং সব্বকালং জিনিস্সসি, যদা অসুরানং জযো ভৰিস্সতি, তদা তম্পি এৰং বন্ধিত্ৰা অসুরভৰনস্স দ্ৰারে নিপজ্জাপেত্ৰা পোথাপেস্সামীতি আদীনি ৰত্ৰা তজ্জেতি. সক্কো ৰিজিতৰিজযো ন তং মনসি করোতি, মহাপটিগ্গহণং পনস্স মত্থকে ৰিধুনন্তো সুধম্মদেৰসভং পৰিসতি চেৰ নিক্খমতি চ. অজ্ঝভাসীতি ‘‘কিং নু খো এস সক্কো ইমানি ফরুসৰচনানি ভযেন তিতিক্খতি, উদাহু অধিৰাসনখন্তিযা সমন্নাগতত্তা’’তি? ৰীমংসন্তো অভাসি.

দুব্বল্যা নোতি দুব্বলভাৰেন নু. পটিসংযুজেতি পটিসংযুজেয্য পটিপ্ফরেয্য. পভিজ্জেয্যুন্তি ৰিরজ্জেয্যুং. পকুজ্ঝেয্যুন্তিপি পাঠো. পরন্তি পচ্চত্থিকং. যো সতো উপসম্মতীতি যো সতিমা হুত্ৰা উপসম্মতি, তস্স উপসমংযেৰাহং বালস্স পটিসেধনং মঞ্ঞেতি অত্থো. যদা নং মঞ্ঞতীতি যস্মা তং মঞ্ঞতি. অজ্ঝারুহতীতি অজ্ঝোত্থরতি. গোৰ ভিয্যো পলাযিনন্তি যথা গোযুদ্ধে তাৰদেৰ দ্ৰে গাৰো যুজ্ঝন্তে গোগণো ওলোকেন্তো তিট্ঠতি, যদা পন একো পলাযতি, অথ নং পলাযন্তং সব্বো গোগণো ভিয্যো অজ্ঝোত্থরতি. এৰং দুম্মেধো খমন্তং ভিয্যো অজ্ঝোত্থরতীতি অত্থো.

সদত্থপরমাতি সকত্থপরমা. খন্ত্যা ভিয্যো ন ৰিজ্জতীতি তেসু সকঅত্থপরমেসু অত্থেসু খন্তিতো উত্তরিতরো অঞ্ঞো অত্থো ন ৰিজ্জতি. তমাহু পরমং খন্তিন্তি যো বলৰা তিতিক্খতি, তস্স তং খন্তিং পরমং আহু. বালবলং নাম অঞ্ঞাণবলং. তং যস্স বলং, অবলমেৰ তং বলন্তি আহু কথেন্তীতি দীপেতি. ধম্মগুত্তস্সাতি ধম্মেন রক্খিতস্স, ধম্মং ৰা রক্খন্তস্স. পটিৰত্তাতি পটিপ্ফরিত্ৰা ৰত্তা, পটিপ্ফরিত্ৰা ৰা বালবলন্তি ৰদেয্যাপি, ধম্মট্ঠং পন চালেতুং সমত্থো নাম নত্থি. তস্সেৰ তেন পাপিযোতি তেন কোধেন তস্সেৰ পুগ্গলস্স পাপং. কতরস্স? যো কুদ্ধং পটিকুজ্ঝতি. তিকিচ্ছন্তানন্তি একৰচনে বহুৰচনং, তিকিচ্ছন্তন্তি অত্থো. জনা মঞ্ঞন্তীতি এৰরূপং অত্তনো চ পরস্স চাতি উভিন্নং অত্থং তিকিচ্ছন্তং নিপ্ফাদেন্তং পুগ্গলং ‘‘অন্ধবালো অয’’ন্তি অন্ধবালপুথুজ্জনাৰ এৰং মঞ্ঞন্তি. ধম্মস্স অকোৰিদাতি চতুসচ্চধম্মে অছেকা. ইধাতি ইমস্মিং সাসনে. খোতি নিপাতমত্তং. চতুত্থং.

৫. সুভাসিতজযসুত্তৰণ্ণনা

২৫১. পঞ্চমে অসুরিন্দং এতদৰোচাতি ছেকতায এতং অৰোচ. এৰং কিরস্স অহোসি ‘‘পরস্স নাম গাহং মোচেত্ৰা পঠমং ৰত্তুং গরু. পরস্স ৰচনং অনুগন্ত্ৰা পন পচ্ছা সুখং ৰত্তু’’ন্তি. পুব্বদেৰাতি দেৰলোকে চিরনিৰাসিনো পুব্বসামিকা, তুম্হাকং তাৰ পৰেণিআগতং ভণথাতি. অদণ্ডাৰচরাতি দণ্ডাৰচরণরহিতা, দণ্ডং ৰা সত্থং ৰা গহেতব্বন্তি এৰমেত্থ নত্থীতি অত্থো. পঞ্চমং.

৬. কুলাৰকসুত্তৰণ্ণনা

২৫২. ছট্ঠে অজ্ঝভাসীতি তস্স কির সিম্বলিৰনাভিমুখস্স জাতস্স রথসদ্দো চ আজানীযসদ্দো ধজসদ্দো চ সমন্তা অসনিপাতসদ্দো ৰিয অহোসি. তং সুত্ৰা সিম্বলিৰনে বলৰসুপণ্ণা পলাযিংসু, জরাজিণ্ণা চেৰ রোগদুব্বলা চ অসঞ্জাতপক্খপোতকা চ পলাযিতুং অসক্কোন্তা, মরণভযেন তজ্জিতা একপ্পহারেনেৰ মহাৰিরৰং ৰিরৰিংসু. সক্কো তং সুত্ৰা ‘‘কস্স সদ্দো, তাতা’’তি? মাতলিং পুচ্ছি. রথসদ্দং, তে দেৰ, সুত্ৰা সুপণ্ণা পলাযিতুং অসক্কোন্তা ৰিরৰন্তীতি. তং সুত্ৰা করুণাসমাৰজ্জিতহদযো অভাসি. ঈসামুখেনাতি রথস্স ঈসামুখেন. যথা কুলাৰকে ঈসামুখং ন সঞ্চুণ্ণেতি, এৰং ইমিনা ঈসামুখেন তে পরিৰজ্জয. সো হি রথো পুঞ্ঞপচ্চযনিব্বত্তো চক্কৰাল়পব্বতেপি সিনেরুম্হিপি সম্মুখীভূতে ৰিনিৰিজ্ঝিত্ৰাৰ গচ্ছতি ন সজ্জতি, আকাসগতসদিসেনেৰ গচ্ছতি. সচে তেন সিম্বলিৰনেন গতো ভৰেয্য, যথা মহাসকটে কদলিৰনমজ্ঝেন ৰা এরণ্ডৰনমজ্ঝেন ৰা গচ্ছন্তে সব্বৰনং ৰিভগ্গং নিম্মথিতং হোতি, এৰং তম্পি সিম্বলিৰনং ভৰেয্য. ছট্ঠং.

৭. নদুব্ভিযসুত্তৰণ্ণনা

২৫৩. সত্তমে উপসঙ্কমীতি ‘‘অযং সক্কো ‘যোপি মে অস্স সুপচ্চত্থিকো, তস্স পাহং ন দুব্ভেয্য’ন্তি চিন্তেতি, মযা তস্স পচ্চত্থিকতরো নাম নত্থি, ৰীমংসিস্সামি তাৰ নং, কিং নু খো মং পস্সিত্ৰা দুব্ভতি, ন দুব্ভতী’’তি চিন্তেত্ৰা উপসঙ্কমি. তিট্ঠ ৰেপচিত্তি গহিতোসীতি ৰেপচিত্তি, এত্থেৰ তিট্ঠ, গহিতো ত্ৰং মযাতি ৰদতি. সহ ৰচনেনেৰস্স সো কণ্ঠপঞ্চমেহি বন্ধনেহি বদ্ধোৰ অহোসি. সপস্সু চ মেতি মযি অদুব্ভত্থায সপথং করোহীতি ৰদতি. যং মুসাভণতো পাপন্তি ইমস্মিং কপ্পে পঠমকপ্পিকেসু চেতিযরঞ্ঞো পাপং সন্ধাযাহ. অরিযূপৰাদিনোতি কোকলিকস্স ৰিয পাপং. মিত্তদ্দুনো চ যং পাপন্তি মহাকপিজাতকে মহাসত্তে দুট্ঠচিত্তস্স পাপং. অকতঞ্ঞুনোতি দেৰদত্তসদিসস্স অকতঞ্ঞুনো পাপং. ইমানি কির ইমস্মিং কপ্পে চত্তারি মহাপাপানি. সত্তমং.

৮. ৰেরোচনঅসুরিন্দসুত্তৰণ্ণনা

২৫৪. অট্ঠমে অট্ঠংসূতি দ্ৰারপালরূপকানি ৰিয ঠিতা. নিপ্ফদাতি নিপ্ফত্তি, যাৰ অত্থো নিপ্ফজ্জতি, তাৰ ৰাযমেথেৰাতি ৰদতি. দুতিযগাথা সক্কস্স. তত্থ খন্ত্যা ভিয্যোতি নিপ্ফন্নসোভনেসু অত্থেসু খন্তিতো উত্তরিতরো অত্থো নাম নত্থি. অত্থজাতাতি কিচ্চজাতা. সোণসিঙ্গালাদযোপি হি উপাদায অকিচ্চজাতো সত্তো নাম নত্থি. ইতো এত্তো গমনমত্তম্পি কিচ্চমেৰ হোতি. সংযোগপরমা ত্ৰেৰ, সম্ভোগা সব্বপাণিনন্তি পারিৰাসিকওদনাদীনি হি অসম্ভোগারহানি হোন্তি, তানি পুন উণ্হাপেত্ৰা ভজ্জিত্ৰা সপ্পিমধুফাণিতাদীহি সংযোজিতানি সম্ভোগারহানি হোন্তি. তেনাহ ‘‘সংযোগপরমা ত্ৰেৰ, সম্ভোগা সব্বপাণিন’’ন্তি. নিপ্ফন্নসোভনো অত্থোতি ইমে অত্থা নাম নিপ্ফন্নাৰ সোভন্তি. পুন চতুত্থগাথা সক্কস্স. তত্থাপি ৰুত্তনযেনেৰ অত্থো ৰেদিতব্বো. অট্ঠমং.

৯. অরঞ্ঞাযতনইসিসুত্তৰণ্ণনা

২৫৫. নৰমে পণ্ণকুটীসু সম্মন্তীতি হিমৰন্তপদেসে রমণীযে অরঞ্ঞাযতনে রত্তিট্ঠানদিৰাট্ঠানচঙ্কমনাদীহি সম্পন্নাসু পণ্ণসালাসু ৰসন্তি. সক্কো চ দেৰানমিন্দো ৰেপচিত্তি চাতি ইমে দ্ৰে জনা জামাতিকসসুরা কালেন কলহং করোন্তি, কালেন একতো চরন্তি, ইমস্মিং পন কালে একতো চরন্তি. পটলিযোতি গণঙ্গণূপাহনা. খগ্গং ওলগ্গেত্ৰাতি খগ্গং অংসে ওলগ্গেত্ৰা. ছত্তেনাতি দিব্বসেতচ্ছত্তেন মত্থকে ধারযমানেন. অপব্যামতো করিত্ৰাতি ব্যামতো অকত্ৰা. চিরদিক্খিতানন্তি চিরসমাদিণ্ণৰতানং. ইতো পটিক্কম্মাতি ‘‘ইতো পক্কম পরিৰজ্জয, মা উপরিৰাতে তিট্ঠা’’তি ৰদন্তি. ন হেত্থ দেৰাতি এতস্মিং সীলৰন্তানং গন্ধে দেৰা ন পটিক্কূলসঞ্ঞিনো, ইট্ঠকন্তমনাপসঞ্ঞিনোযেৰাতি দীপেতি. নৰমং.

১০. সমুদ্দকসুত্তৰণ্ণনা

২৫৬. দসমে সমুদ্দতীরে পণ্ণকুটীসূতি চক্কৰাল়মহাসমুদ্দপিট্ঠিযং রজতপট্টৰণ্ণে ৰালুকপুল়িনে ৰুত্তপ্পকারাসু পণ্ণসালাসু ৰসন্তি. সিযাপি নোতি সিযাপি অম্হাকং. অভযদক্খিণং যাচেয্যামাতি অভযদানং যাচেয্যাম. যেভুয্যেন কির দেৰাসুরসঙ্গামো মহাসমুদ্দপিট্ঠে হোতি. অসুরানং ন সব্বকালং জযো হোতি, বহুৰারে পরাজযোৰ হোতি. তে দেৰেহি পরাজিতা পলাযন্তা ইসীনং অস্সমপদেন গচ্ছন্তা ‘‘সক্কো ইমেহি সদ্ধিং মন্তেত্ৰা অম্হে নাসেতি, গণ্হথ পুত্তহতায পুত্তে’’তি কুপিতা অস্সমপদে পানীযঘটচঙ্কমনসালাদীনি ৰিদ্ধংসেন্তি. ইসযো অরঞ্ঞতো ফলাফলং আদায আগতা নং দিস্ৰা পুন দুক্খেন পটিপাকতিকং করোন্তি. তেপি পুনপ্পুনং তথেৰ ৰিনাসেন্তি. তস্মা ‘‘ইদানি তেসং সঙ্গামো পচ্চুপট্ঠিতো’’তি সুত্ৰা এৰং চিন্তযিংসু.

কামংকরোতি ইচ্ছিতকরো. ভযস্স অভযস্স ৰাতি ভযং ৰা অভযং ৰা. ইদং ৰুত্তং হোতি – সচে ত্ৰং অভযং দাতুকামো, অভযং দাতুং পহোসি. সচে ভযং দাতুকামো. ভযং দাতুং পহোসি. অম্হাকং পন অভযদানং দেহীতি. দুট্ঠানন্তি ৰিরুদ্ধানং. পৰুত্তন্তি খেত্তে পতিট্ঠাপিতং.

তিক্খত্তুং উব্বিজ্জীতি সাযমাসভত্তং ভুঞ্জিত্ৰা সযনং অভিরুয্হ নিপন্নো নিদ্দায ওক্কন্তমত্তায সমন্তা ঠত্ৰা সত্তিসতেন পহটো ৰিয ৰিরৰন্তো উট্ঠহতি, দসযোজনসহস্সং অসুরভৰনং ‘‘কিমিদ’’ন্তি সঙ্খোভং আপজ্জতি. অথ নং আগন্ত্ৰা ‘‘কিমিদ’’ন্তি পুচ্ছন্তি. সো ‘‘ন কিঞ্চী’’তি ৰদতি. দুতিযযামাদীসুপি এসেৰ নযো. ইতি অসুরানং ‘‘মা ভাযি, মহারাজা’’তি তং অস্সাসেন্তানংযেৰ অরুণং উগ্গচ্ছতি. এৰমস্স ততো পট্ঠায গেলঞ্ঞজাতং চিত্তং ৰেপতি. তেনেৰ চস্স ‘‘ৰেপচিত্তী’’তি অপরং নামং উদপাদীতি. দসমং.

পঠমো ৰগ্গো.

২. দুতিযৰগ্গো

১. ৰতপদসুত্তৰণ্ণনা

২৫৭. দুতিযৰগ্গস্স পঠমে ৰতপদানীতি ৰতকোট্ঠাসানি. সমত্তানীতি পরিপুণ্ণানি. সমাদিন্নানীতি গহিতানি. কুলে জেট্ঠাপচাযীতি কুলজেট্ঠকানং মহাপিতা মহামাতা চূল়পিতা চূল়মাতা মাতুলো মাতুলানীতিআদীনং অপচিতিকারকো. সণ্হৰাচোতি পিযমুদুমধুরৰাচো. মুত্তচাগোতি ৰিস্সট্ঠচাগো. পযতপাণীতি দেয্যধম্মদানত্থায সদা ধোতহত্থো. ৰোস্সগ্গরতোতি ৰোস্সজ্জনে রতো. যাচযোগোতি পরেহি যাচিতব্বারহো, যাচযোগোতি ৰা যাচযোগেনেৰ যুত্তো. দানসংৰিভাগরতোতি দানে চ সংৰিভাগে চ রতো. পঠমং.

২. সক্কনামসুত্তৰণ্ণনা

২৫৮. দুতিযে মনুস্সভূতোতি মগধরট্ঠে মচলগামে মনুস্সভূতো. আৰসথং অদাসীতি চতুমহাপথে মহাজনস্স আৰসথং কারেত্ৰা অদাসি. সহস্সম্পি অত্থানন্তি সহস্সম্পি কারণানং, জনসহস্সেন ৰা ৰচনসহস্সেন ৰা ওসারিতে ‘‘অযং ইমস্স অত্থো, অযং ইমস্স অত্থো’’তি একপদে ঠিতোৰ ৰিনিচ্ছিনতি. দুতিযং.

৩. মহালিসুত্তৰণ্ণনা

২৫৯. ততিযে উপসঙ্কমীতি ‘‘সক্কো দেৰরাজাতি কথেন্তি, অত্থি নু খো সো সক্কো, যেন সো দিট্ঠপুব্বোতি ইমমত্থং দসবলং পুচ্ছিস্সামী’’তি উপসঙ্কমি. তঞ্চ পজানামীতি বহুৰচনে একৰচনং, তে চ ধম্মে পজানামীতি অত্থো. সক্কো কির অনন্তরে অত্তভাৰে মগধরট্ঠে মচলগামে মঘো নাম মাণৰো অহোসি পণ্ডিতো ব্যত্তো, বোধিসত্তচরিযা ৰিয চ তস্স চরিযা অহোসি. সো তেত্তিংস পুরিসে গহেত্ৰা কল্যাণমকাসি. একদিৰসং অত্তনোৰ পঞ্ঞায উপপরিক্খিত্ৰা গামমজ্ঝে মহাজনস্স সন্নিপতিতট্ঠানে কচৰরং উভতোপস্সেসু অপব্যূহিত্ৰা তং ঠানং রমণীযং অকাসি. পুন তত্থেৰ মণ্ডপং কারেসি. পুন গচ্ছন্তে কালে সালং কারেসি. গামতো চ নিক্খমিত্ৰা গাৰুতম্পি অড্ঢযোজনম্পি তিগাৰুতম্পি যোজনম্পি ৰিচরিত্ৰা তেহি সহাযেহি সদ্ধিং ৰিসমং সমং অকাসি. তে সব্বেৰ একচ্ছন্দা তত্থ তত্থ সেতুযুত্তট্ঠানে সেতুং, মণ্ডপসালাপোক্খরণিমালাৰচ্ছরোপনপদীনং যুত্তট্ঠানেসু মণ্ডপসালাপোক্খরণিমালাৰচ্ছরোপনাদীনি করোন্তা বহুং পুঞ্ঞমকংসু. মঘো সত্ত ৰতপদানি পূরেত্ৰা কাযস্স ভেদা সদ্ধিং সহাযেহি তাৰতিংসভৰনে নিব্বত্তি. তং সব্বং ভগৰা জানাতি. তেনাহ – যেসং ধম্মানং সমাদিন্নত্তা সক্কো সক্কত্তং অজ্ঝগা, তঞ্চ পজানামীতি. অযং সক্কস্স সক্কত্তাধিগমে সঙ্খেপকথা, ৰিত্থারো পন সুমঙ্গলৰিলাসিনিযা দীঘনিকাযট্ঠকথায সক্কপণ্হৰণ্ণনাযং ৰুত্তো. ততিযং.

৪. দলিদ্দসুত্তৰণ্ণনা

২৬০. চতুত্থে মনুস্সদলিদ্দোতি মনুস্সঅধনো. মনুস্সকপণোতি মনুস্সকারুঞ্ঞতং পত্তো. মনুস্সৰরাকোতি মনুস্সলামকো. তত্রাতি তস্মিং ঠানে, তস্মিং ৰা অতিরোচনে. উজ্ঝাযন্তীতি অৰজ্ঝাযন্তি লামকতো চিন্তেন্তি. খিযন্তীতি কথেন্তি পকাসেন্তি. ৰিপাচেন্তীতি তত্থ তত্থ কথেন্তি ৰিত্থারেন্তি. এসো খো মারিসাতি এত্থ অযমনুপুব্বিকথা – সো কির অনুপ্পন্নে বুদ্ধে কাসিরট্ঠে বারাণসিরাজা হুত্ৰা সমুস্সিতদ্ধজপটাকনানালঙ্কারেন সুট্ঠু অলঙ্কতং নগরং পদক্খিণং অকাসি অত্তনো সিরিসম্পত্তিযা সমাকড্ঢিতনেত্তেন জনকাযেন সমুল্লোকিযমানো. তস্মিঞ্চ সমযে একো পচ্চেকবুদ্ধো গন্ধমাদনপব্বতা আগম্ম তস্মিং নগরে পিণ্ডায চরতি, সন্তিন্দ্রিযো সন্তমানসো উত্তমদমথসমন্নাগতো. মহাজনোপি রাজগতং চিত্তীকারং পহায পচ্চেকবুদ্ধমেৰ ওলোকেসি. রাজা – ‘‘ইদানি ইমস্মিং জনকাযে একোপি মং ন ওলোকেতি. কিং নু খো এত’’ন্তি? ওলোকেন্তো পচ্চেকবুদ্ধং অদ্দস. সোপি পচ্চেকবুদ্ধো মহল্লকো হোতি পচ্ছিমৰযে ঠিতো. চীৰরানিপিস্স জিণ্ণানি, ততো ততো সুত্তানি গল়ন্তি. রঞ্ঞো সতসহস্সাধিকানি দ্ৰে অসঙ্খ্যেয্যানি পূরিতপারমিং পচ্চেকবুদ্ধং দিস্ৰা চিত্তপসাদমত্তং ৰা হত্থং পসারেত্ৰা ৰন্দনমত্তং ৰা নাহোসি. সো রাজা ‘‘পব্বজিতো মঞ্ঞে এস উসূযায মং ন ওলোকেতী’’তি কুজ্ঝিত্ৰা ‘‘ক্ৰাযং কুট্ঠিচীৰরানি পারুতো’’তি নিট্ঠুভিত্ৰা পক্কামি. তস্স কম্মস্স ৰিপাকেন মহানিরযে নিব্বত্তিত্ৰা ৰিপাকাৰসেসেন মনুস্সলোকং আগচ্ছন্তো রাজগহে পরমকপণায ইত্থিযা কুচ্ছিম্হি পটিসন্ধিং গণ্হি. গহিতকালতো পট্ঠায সা ইত্থী কঞ্জিকমত্তম্পি উদরপূরং নালত্থ. তস্স কুচ্ছিগতস্সেৰ কণ্ণনাসা ৰিলীনা, সঙ্খপলিতকুট্ঠী হুত্ৰা মাতুকুচ্ছিতো নিক্খন্তো. মাতাপিতরো নাম দুক্করকারিকা হোন্তি, তেনস্স মাতা যাৰ কপালং গহেত্ৰা চরিতুং ন সক্কোতি, তাৰস্স কঞ্জিকম্পি উদকম্পি আহরিত্ৰা অদাসি. ভিক্খায চরিতুং সমত্থকালে পনস্স কপালং হত্থে দত্ৰা ‘‘পঞ্ঞাযিস্সসি সকেন কম্মেনা’’তি পক্কামি.

অথস্স ততো পট্ঠায সকলসরীরতো মংসানি ছিজ্জিত্ৰা ছিজ্জিত্ৰা পতন্তি, যূসং পগ্ঘরতি, মহাৰেদনা ৰত্তন্তি. যং যং রচ্ছং নিস্সায সযতি, সব্বরত্তিং মহারৰেন রৰতি. তস্স কারুঞ্ঞপরিদেৰিতসদ্দেন সকলৰীথিযং মনুস্সা সব্বরত্তিং নিদ্দং ন লভন্তি. তস্স ততো পট্ঠায সুখসযিতে পবোধেতীতি সুপ্পবুদ্ধোত্ৰেৰ নামং উদপাদি. অথাপরেন সমযেন ভগৰতি রাজগহং সম্পত্তে নাগরা সত্থারং নিমন্তেত্ৰা নগরমজ্ঝে মহামণ্ডপং কত্ৰা দানং অদংসু. সুপ্পবুদ্ধোপি কুট্ঠী গন্ত্ৰা দানগ্গমণ্ডপস্স অৰিদূরে নিসীদি. নাগরা বুদ্ধপ্পমুখং ভিক্খুসঙ্ঘং পণীতেন খাদনীযেন ভোজনীযেন পরিৰিসন্তা তস্সাপি যাগুভত্তং অদংসু. তস্স পণীতভোজনং ভুত্তস্স চিত্তং একগ্গং অহোসি. সত্থা ভত্তকিচ্চাৰসানে অনুমোদনং কত্ৰা সচ্চানি দীপেসি, সুপ্পবুদ্ধো নিসিন্নট্ঠানে নিসিন্নোৰ দেসনানুসারেন ঞাণং পেসেত্ৰা সোতাপত্তিফলে পতিট্ঠিতো. সত্থা উট্ঠায ৰিহারং গতো. সোপি চুম্বটং আরুয্হ কপালমাদায দণ্ডমোলুব্ভ অত্তনো ৰসনট্ঠানং গচ্ছন্তো ৰিব্ভন্তায গাৰিযা জীৰিতা ৰোরোপিতো মত্তিকপাতিং ভিন্দিত্ৰা সুৰণ্ণপাতিং পটিলভন্তো ৰিয দুতিযচিত্তৰারে দেৰলোকে নিব্বত্তো অত্তনো পুঞ্ঞং নিস্সায অঞ্ঞে দেৰে অতিক্কম্ম ৰিরোচিত্থ. তং কারণং দস্সেন্তো সক্কো দেৰানমিন্দো এসো খো মারিসাতিআদিমাহ.

সদ্ধাতি মগ্গেনাগতসদ্ধা. সীলঞ্চ যস্স কল্যাণন্তি কল্যাণসীলং নাম অরিযসাৰকস্স অরিযকন্তসীলং ৰুচ্চতি. তত্থ কিঞ্চাপি অরিযসাৰকস্স একসীলম্পি অকন্তং নাম নত্থি, ইমস্মিং পনত্থে ভৰন্তরেপি অপ্পহীনং পঞ্চসীলং অধিপ্পেতং. চতুত্থং.

৫. রামণেয্যকসুত্তৰণ্ণনা

২৬১. পঞ্চমে আরামচেত্যাতি আরামচেতিযানি. ৰনচেত্যাতি ৰনচেতিযানি. উভযত্থাপি চিত্তীকতট্ঠেন চেত্যং ৰেদিতব্বং. মনুস্সরামণেয্যস্সাতি মনুস্সরমণীযভাৰস্স. ইদানি মনুস্সরমণীযকৰসেন ভূমিরমণীযকং দস্সেন্তো গামে ৰাতিআদিমাহ. পঞ্চমং.

৬. যজমানসুত্তৰণ্ণনা

২৬২. ছট্ঠে যজমানানন্তি যজন্তানং. তদা কির অঙ্গমগধৰাসিকা মনুস্সা অনুসংৰচ্ছরং সপ্পিমধুফাণিতাদীসু অগ্গং গহেত্ৰা একস্মিং ঠানে দারূনং সট্ঠিমত্তে সকটভারে রাসিং কত্ৰা অগ্গিং দত্ৰা পজ্জলিতকালে ‘‘মহাব্রহ্মুনো যজামা’’তি তং সব্বং পক্খিপন্তি. ‘‘একৰারং পক্খিত্তং সহস্সগুণফলং দেতী’’তি নেসং লদ্ধি. সক্কো দেৰরাজা ‘‘সব্বেপিমে সব্বঅগ্গানি গহেত্ৰা ‘মহাব্রহ্মুনো যজামা’তি অগ্গিম্হি ঝাপেন্তি. অফলং করোন্তি, মযি পস্সন্তে মা নস্সন্তু, যথা বুদ্ধস্স চেৰ সঙ্ঘস্স চ দত্ৰা বহুং পুঞ্ঞং পসৰন্তি, এৰং করিস্সামী’’তি দারুরাসিং জলাপেত্ৰা ওলোকেন্তেসু মনুস্সেসু পুণ্ণমদিৰসে ব্রহ্মত্তভাৰং মাপেত্ৰা মহাজনস্স পস্সন্তস্সেৰ চন্দমণ্ডলং ভিন্দিত্ৰা নিক্খন্তো ৰিয অহোসি. মহাজনো দিস্ৰা ‘‘ইমং যঞ্ঞং পটিগ্গহেতুং মহাব্রহ্মা আগচ্ছতী’’তি জণ্ণুকেহি ভূমিযং পতিট্ঠায, অঞ্জলিং পগ্গয্হ নমস্সমানো অট্ঠাসি. ব্রাহ্মণা আহংসু ‘‘তুম্হে ‘মযং তক্কেন কথেমা’তি মঞ্ঞথ, ইদানি পস্সথ, অযং ৰো ব্রহ্মা সহত্থা যঞ্ঞং পটিগ্গহেতুং আগচ্ছতী’’তি. সক্কো আগন্ত্ৰা দারুচিতকমত্থকে আকাসে ঠত্ৰা ‘‘কস্সাযং সক্কারো’’তি পুচ্ছি? তুম্হাকং, ভন্তে, পটিগ্গণ্হথ নো যঞ্ঞন্তি. তেন হি আগচ্ছথ, মা তুলং ছড্ডেত্ৰা হত্থেন তুলযিত্থ, অযং সত্থা ধুরৰিহারে ৰসতি, তং পুচ্ছিস্সাম ‘‘কস্স দিন্নং মহপ্ফলং হোতী’’তি? উভযরট্ঠৰাসিনো গহেত্ৰা সত্থু সন্তিকং গন্ত্ৰা পুচ্ছন্তো এৰমাহ.

তত্থ পুঞ্ঞপেক্খানন্তি পুঞ্ঞং ইচ্ছন্তানং পুঞ্ঞত্থিকানং. ওপধিকং পুঞ্ঞন্তি উপধিৰিপাকং পুঞ্ঞং. সঙ্ঘে দিন্নং মহপ্ফলন্তি অরিযসঙ্ঘে দিন্নং ৰিপ্ফারৰন্তং হোতি. দেসনাৰসানে চতুরাসীতিপাণসহস্সানি অমতপানং পিৰিংসু. ততো পট্ঠায মনুস্সা সব্বানি অগ্গদানানি ভিক্খুসঙ্ঘস্স অদংসু. ছট্ঠং.

৭. বুদ্ধৰন্দনাসুত্তৰণ্ণনা

২৬৩. সত্তমে উট্ঠেহীতি উট্ঠহ, ঘট, ৰাযম. ৰিজিতসঙ্গামাতি রাগাদীনঞ্চেৰ দ্ৰাদসযোজনিকস্স চ মারবলস্স জিতত্তা ভগৰন্তং এৰং আলপতি. পন্নভারাতি ওরোপিতখন্ধকিলেসাভিসঙ্খারভার. পন্নরসায রত্তিন্তি পন্নরসায পুণ্ণমায রত্তিং. সত্তমং.

৮. গহট্ঠৰন্দনাসুত্তৰণ্ণনা

২৬৪. অট্ঠমে পুথুদ্দিসাতি চতস্সো দিসা চতস্সো অনুদিসা চ. ভুম্মাতি ভূমিৰাসিনো. চিররত্তসমাহিতেতি উপচারপ্পনাহি চিররত্তসমাহিতচিত্তে. ৰন্দেতি ৰন্দামি. ব্রহ্মচরিযপরাযণেতি দসপি ৰস্সানি ৰীসতিপি ৰস্সানি…পে… সট্ঠিপি ৰস্সানি আপাণকোটিকং একসেয্যং একভত্তন্তিআদিকং সেট্ঠচরিযং ব্রহ্মচরিযং চরমানেতি অত্থো. পুঞ্ঞকরাতি চতুপচ্চযদানং কুসুম্ভসুমনপূজা দীপসহস্সজালন্তি এৰমাদিপুঞ্ঞকারকা. সীলৰন্তোতি উপাসকত্তে পতিট্ঠায পঞ্চহিপি দসহিপি সীলেহি সমন্নাগতা. ধম্মেন দারং পোসেন্তীতি উমঙ্গভিন্দনাদীনি অকত্ৰা ধম্মিকেহি কসিগোরক্খৰণিজ্জাদীহি পুত্তদারং পোসেন্তি. পমুখো রথমারুহীতি দেৰানং পমুখো সেট্ঠো রথং আরুহি. অট্ঠমং.

৯. সত্থারৰন্দনাসুত্তৰণ্ণনা

২৬৫. নৰমে ভগৰন্তং নমস্সতীতি একংসং উত্তরিযং দুকুলং কত্ৰা, ব্রহ্মজাণুকো হুত্ৰা সিরসি অঞ্জলিং ঠপেত্ৰা নমস্সতি. সো যক্খোতি সো সক্কো. অনোমনামন্তি সব্বগুণেহি ওমকভাৰস্স নত্থিতায সব্বগুণনেমিত্তকেহি নামেহি অনোমনামং. অৰিজ্জাসমতিক্কমাতি চতুসচ্চপটিচ্ছাদিকায ৰট্টমূলকঅৰিজ্জায সমতিক্কমেন. সেক্খাতি সত্ত সেক্খা. অপচযারামাতি ৰট্টৰিদ্ধংসনে রতা. সিক্খরেতি সিক্খন্তি. নৰমং.

১০. সঙ্ঘৰন্দনাসুত্তৰণ্ণনা

২৬৬. দসমে অজ্ঝভাসীতি কস্মা এস পুনপ্পুনং এৰং ভাসতীতি? সক্কস্স কির দেৰরঞ্ঞো সদ্দো মধুরো, সুফসিতং দন্তাৰরণং, কথনকালে সুৰণ্ণকিঙ্কিণিকসদ্দো ৰিয নিচ্ছরতি. তং পুনপ্পুনং সোতুং লভিস্সামীতি ভাসতি. পূতিদেহসযাতি পূতিম্হি মাতুসরীরে ৰা, অত্তনোযেৰ ৰা সরীরং অৰত্থরিত্ৰা সযনতো পূতিদেহসযা. নিমুগ্গা কুণপম্হেতেতি দসমাসে মাতুকুচ্ছিসঙ্খাতে কুণপস্মিং এতে নিমুগ্গা. এতং তেসং পিহযামীতি এতেসং এতং পিহযামি পত্থযামি. ন তে সং কোট্ঠে ওপেন্তীতি ন তে সং সন্তকং ধঞ্ঞং কোট্ঠে পক্খিপন্তি. ন হি এতেসং ধঞ্ঞং অত্থি. ন কুম্ভীতি ন কুম্ভিযং. ন কল়োপিযন্তি ন পচ্ছিযং. পরনিট্ঠিতমেসানাতি পরেসং নিট্ঠিতং পরঘরে পক্কং ভিক্খাচারৰত্তেন এসমানা গৰেসমানা. তেনাতি এৰং পরিযিট্ঠেন. সুব্বতাতি দসপি…পে… সট্ঠিপি ৰস্সানি সুসমাদিন্নসুন্দরৰতা.

সুমন্তমন্তিনোতি ধম্মং সজ্ঝাযিস্সাম, ধুতঙ্গং সমাদিযিস্সাম, অমতং পরিভুঞ্জিস্সাম, সমণধম্মং করিস্সামাতি এৰং সুভাসিতভাসিনো. তুণ্হীভূতা সমঞ্চরাতি তিযামরত্তিং অসনিঘোসেন ঘোসিতা ৰিয ধম্মং কথেন্তাপি তুণ্হীভূতা সমং চরন্তিযেৰ নাম. কস্মা? নিরত্থকৰচনস্সাভাৰা. পুথুমচ্চা চাতি বহুসত্তা চ অঞ্ঞমঞ্ঞং ৰিরুদ্ধা. অত্তদণ্ডেসু নিব্বুতাতি পরৰিহেঠনত্থং গহিতদণ্ডেসু সত্তেসু নিব্বুতা ৰিস্সট্ঠদণ্ডা. সাদানেসু অনাদানাতি সগহণেসু সত্তেসু চ ভৰযোনিআদীনং এককোট্ঠাসস্সাপি অগহিতত্তা অগহণা. দসমং.

দুতিযো ৰগ্গো.

৩. ততিযৰগ্গো

১. ছেত্ৰাসুত্তৰণ্ণনা

২৬৭. ততিযৰগ্গস্স পঠমং ৰুত্তত্থমেৰ. পঠমং.

২. দুব্বণ্ণিযসুত্তৰণ্ণনা

২৬৮. দুতিযে দুব্বণ্ণোতি ঝামখাণুৰণ্ণো. ওকোটিমকোতি লকুণ্ডকো মহোদরো. আসনেতি পণ্ডুকম্বলসিলাযং. কোধভক্খোতি সক্কেন গহিতনামমেৰেতং. সো পন একো রূপাৰচরব্রহ্মা, ‘‘সক্কো কির খন্তিবলেন সমন্নাগতো’’তি সুত্ৰা ৰীমংসনত্থং আগতো. অৰরুদ্ধকযক্খা পন এৰরূপং সংৰিহিতারক্খং ঠানং পৰিসিতুং ন সক্কোন্তি. উপসঙ্কমীতি দেৰানং সুত্ৰা ‘‘ন সক্কা এস ফরুসেন চালেতুং, নীচৰুত্তিনা পন খন্তিযং ঠিতেন সক্কা পলাপেতু’’ন্তি তথা পলাপেতুকামো উপসঙ্কমি. অন্তরধাযীতি খন্তিযং ঠত্ৰা বলৰচিত্তীকারং পচ্চুপট্ঠপেত্ৰা নীচৰুত্তিযা দস্সিযমানায সক্কাসনে ঠাতুং অসক্কোন্তো অন্তরধাযি. ন সূপহতচিত্তোম্হীতি এত্থ সূতি নিপাতমত্তং, উপহতচিত্তোম্হীতি আহ. নাৰত্তেন সুৰানযোতি ন কোধাৰত্তেন সুআনযো, কোধৰসে ৰত্তেতুং ন সুকরোম্হীতি ৰদতি. ন ৰো চিরাহন্তি ৰোতি নিপাতমত্তং, অহং চিরং ন কুজ্ঝামীতি ৰদতি. দুতিযং.

৩. সম্বরিমাযাসুত্তৰণ্ণনা

২৬৯. ততিযে আবাধিকোতি ইসিগণেন অভিসপকালে উপ্পন্নাবাধেন আবাধিকো. ৰাচেহি মন্তি সচে মং সম্বরিমাযং ৰাচেসি, এৰমহং তম্পি তিকিচ্ছিস্সামীতি ৰদতি. মা খো ত্ৰং, মারিস, ৰাচেসীতি ৰিনাপি তাৰ সম্বরিমাযং সক্কো অম্হে বাধতি, যদি পন তং জানিস্সতি, নট্ঠা মযং, মা অত্তনো একস্স অত্থায অম্হে নাসেহীতি ৰত্ৰা নিৰারযিংসু. সম্বরোৰ সতং সমন্তি যথা সম্বরো অসুরিন্দো মাযাৰী মাযং পযোজেত্ৰা ৰস্সসতং নিরযে পক্কো, এৰং পচ্চতি. তুম্হে ধম্মিকাৰ, অলং ৰো মাযাযাতি ৰদতি. কিং পন সক্কো তস্স কোধং তিকিচ্ছিতুং সক্কুণেয্যাতি? আম সক্কুণেয্য. কথং? তদা কির সো ইসিগণো ধরতিযেৰ, তস্মা নং ইসীনং সন্তিকং নেত্ৰা খমাপেয্য, এৰমস্স ফাসু ভৰেয্য. তেন পন ৰঞ্চিতত্তা তথা অকত্ৰা পক্কন্তোৰ. ততিযং.

৪. অচ্চযসুত্তৰণ্ণনা

২৭০. চতুত্থে সম্পযোজেসুন্তি কলহং অকংসু. অচ্চসরাতি অতিক্কমি, একো ভিক্খু একং ভিক্খুং অতিক্কম্ম ৰচনং অৰোচাতি অত্থো. যথাধম্মং নপ্পটিগ্গণ্হাতীতি ন খমতি. কোধো ৰো ৰসমাযাতূতি কোধো তুম্হাকং ৰসং আগচ্ছতু, মা তুম্হে কোধৰসং গমিত্থাতি দীপেতি. মা চ মিত্তে হি ৰো জরাতি এত্থ হীতি নিপাতমত্তং, তুম্হাকং মিত্তধম্মে জরা নাম মা নিব্বত্তি. ভুম্মত্থে ৰা করণৰচনং, মিত্তেসু ৰো জরা মা নিব্বত্তি, মিত্তভাৰতো অঞ্ঞথাভাৰো মা হোতূতি অত্থো. অগরহিযং মা গরহিত্থাতি অগারয্হং খীণাসৰপুগ্গলং মা গরহিত্থ. চতুত্থং.

৫. অক্কোধসুত্তৰণ্ণনা

২৭১. পঞ্চমে মা ৰো কোধো অজ্ঝভৰীতি কোধো তুম্হে মা অভিভৰি, তুম্হেৰ কোধং অভিভৰথ. মা চ কুজ্ঝিত্থ কুজ্ঝিতন্তি কুজ্ঝন্তানং মা পটিকুজ্ঝিত্থ. অক্কোধোতি মেত্তা চ মেত্তাপুব্বভাগো চ. অৰিহিংসাতি করুণা চ করুণাপুব্বভাগো চ. অথ পাপজনং কোধো, পব্বতোৰাভিমদ্দতীতি লামকজনং পব্বতো ৰিয কোধো অভিমদ্দতীতি. পঞ্চমং.

ততিযো ৰগ্গো.

সক্কসংযুত্তৰণ্ণনা নিট্ঠিতা.

ইতি সারত্থপ্পকাসিনিযা সংযুত্তনিকায-অট্ঠকথায

সগাথাৰগ্গৰণ্ণনা নিট্ঠিতা.

সংযুত্তনিকায-অট্ঠকথায পঠমো ভাগো.