৯. অরঞ্ঞাযতনইসিসুত্তৰণ্ণনা

২৫৫. নৰমে পণ্ণকুটীসু সম্মন্তীতি হিমৰন্তপদেসে রমণীযে অরঞ্ঞাযতনে রত্তিট্ঠানদিৰাট্ঠানচঙ্কমনাদীহি সম্পন্নাসু পণ্ণসালাসু ৰসন্তি. সক্কো চ দেৰানমিন্দো ৰেপচিত্তি চাতি ইমে দ্ৰে জনা জামাতিকসসুরা কালেন কলহং করোন্তি, কালেন একতো চরন্তি, ইমস্মিং পন কালে একতো চরন্তি. পটলিযোতি গণঙ্গণূপাহনা. খগ্গং ওলগ্গেত্ৰাতি খগ্গং অংসে ওলগ্গেত্ৰা. ছত্তেনাতি দিব্বসেতচ্ছত্তেন মত্থকে ধারযমানেন. অপব্যামতো করিত্ৰাতি ব্যামতো অকত্ৰা. চিরদিক্খিতানন্তি চিরসমাদিণ্ণৰতানং. ইতো পটিক্কম্মাতি ‘‘ইতো পক্কম পরিৰজ্জয, মা উপরিৰাতে তিট্ঠা’’তি ৰদন্তি. ন হেত্থ দেৰাতি এতস্মিং সীলৰন্তানং গন্ধে দেৰা ন পটিক্কূলসঞ্ঞিনো, ইট্ঠকন্তমনাপসঞ্ঞিনোযেৰাতি দীপেতি. নৰমং.