৬. নজীরতিসুত্তৰণ্ণনা

৭৬. ছট্ঠে নামগোত্তং ন জীরতীতি অতীতবুদ্ধানং যাৰজ্জদিৰসা নামগোত্তং কথিযতি, তস্মা ন জীরতীতি ৰুচ্চতি. পোরাণা পন ‘‘অদ্ধানে গচ্ছন্তে ন পঞ্ঞাযিস্সতি, জীরণসভাৰো পন ন হোতিযেৰা’’তি ৰদন্তি. আলস্যন্তি আলসিযং, যেন ঠিতট্ঠানে ঠিতোৰ, নিসিন্নট্ঠানে নিসিন্নোৰ হোতি, তেলেপি উত্তরন্তে ঠিতিং ন করোতি. পমাদোতি নিদ্দায ৰা কিলেসৰসেন ৰা পমাদো. অনুট্ঠানন্তি কম্মসমযে কম্মকরণৰীরিযাভাৰো. অসংযমোতি সীলসঞ্ঞমাভাৰো ৰিস্সট্ঠাচারতা. নিদ্দাতি সোপ্পবহুলতা. তায গচ্ছন্তোপি ঠিতোপি নিসিন্নোপি নিদ্দাযতি, পগেৰ নিপন্নো. তন্দীতি অতিচ্ছাতাদিৰসেন আগন্তুকালসিযং. তে ছিদ্দেতি তানি ছ ছিদ্দানি ৰিৰরানি. সব্বসোতি সব্বাকারেন. তন্তি নিপাতমত্তং. ৰিৰজ্জযেতি ৰজ্জেয্য জহেয্য. ছট্ঠং.