৭. অদ্ধৰগ্গো

১. নামসুত্তৰণ্ণনা

৬১. অদ্ধৰগ্গস্স পঠমে নামং সব্বং অদ্ধভৰীতি নামং সব্বং অভিভৰতি অনুপততি. ওপপাতিকেন ৰা হি কিত্তিমেন ৰা নামেন মুত্তো সত্তো ৰা সঙ্খারো ৰা নত্থি. যস্সপি হি রুক্খস্স ৰা পাসাণস্স ৰা ‘‘ইদং নাম নাম’’ন্তি ন জানন্তি, অনামকোত্ৰেৰ তস্স নামং হোতি. পঠমং.

২-৩. চিত্তসুত্তাদিৰণ্ণনা

৬২. দুতিযে সব্বেৰ ৰসমন্ৰগূতি যে চিত্তস্স ৰসং গচ্ছন্তি, তেসংযেৰ অনৰসেসপরিযাদানমেতং. দুতিযং.

৬৩. ততিযেপি এসেৰ নযো. ততিযং.

৪-৫. সংযোজনসুত্তাদিৰণ্ণনা

৬৪. চতুত্থে কিং সু সংযোজনোতি কিং সংযোজনো কিং বন্ধনো? ৰিচারণন্তি ৰিচরণা পাদানি. বহুৰচনে একৰচনং কতং. ৰিতক্কস্স ৰিচারণন্তি ৰিতক্কো তস্স পাদা. চতুত্থং.

৬৫. পঞ্চমেপি এসেৰ নযো. পঞ্চমং.

৬. অত্তহতসুত্তৰণ্ণনা

৬৬. ছট্ঠে কেনস্সুব্ভাহতোতি কেন অব্ভাহতো. সু-কারো নিপাতমত্তং. ইচ্ছাধূপাযিতোতি ইচ্ছায আদিত্তো. ছট্ঠং.

৭-৯. উড্ডিতসুত্তাদিৰণ্ণনা

৬৭. সত্তমে তণ্হায উড্ডিতোতি তণ্হায উল্লঙ্ঘিতো. চক্খুঞ্হি তণ্হারজ্জুনা আৰুনিত্ৰা রূপনাগদন্তে উড্ডিতং, সোতাদীনি সদ্দাদীসূতি তণ্হায উড্ডিতো লোকো. মচ্চুনা পিহিতোতি অনন্তরে অত্তভাৰে কতং কম্মং ন দূরং একচিত্তন্তরং, বলৰতিযা পন মারণন্তিকৰেদনায পব্বতেন ৰিয ওত্থটত্তা সত্তা তং ন বুজ্ঝন্তীতি ‘‘মচ্চুনা পিহিতো লোকো’’তি ৰুত্তং. সত্তমং.

৬৮. অট্ঠমে স্ৰেৰ পঞ্হো দেৰতায হেট্ঠুপরিযাযৰসেন পুচ্ছিতো. অট্ঠমং.

৬৯. নৰমে সব্বং উত্তানমেৰ. নৰমং.

১০. লোকসুত্তৰণ্ণনা

৭০. দসমে কিস্মিং লোকো সমুপ্পন্নোতি কিস্মিং উপ্পন্নে লোকো উপ্পন্নোতি পুচ্ছতি. ছসূতি ছসু অজ্ঝত্তিকেসু আযতনেসু উপ্পন্নেসু উপ্পন্নোতি ৰুচ্চতি. ছসু কুব্বতীতি তেসুযেৰ ছসু সন্থৰং করোতি. উপাদাযাতি তানিযেৰ চ উপাদায আগম্ম পটিচ্চ পৰত্ততি. ৰিহঞ্ঞতীতি তেসুযেৰ ছসু ৰিহঞ্ঞতি পীল়িযতি. ইতি অজ্ঝত্তিকাযতনৰসেন অযং পঞ্হো আগতো, অজ্ঝত্তিকবাহিরানং পন ৰসেন আহরিতুং ৰট্টতি. ছসু হি অজ্ঝত্তিকাযতনেসু উপ্পন্নেসু অযং উপ্পন্নো নাম হোতি, ছসু বাহিরেসু সন্থৰং করোতি, ছন্নং অজ্ঝত্তিকানং উপাদায ছসু বাহিরেসু ৰিহঞ্ঞতীতি. দসমং.

অদ্ধৰগ্গো সত্তমো.