৮. হিরীসুত্তৰণ্ণনা

১৮. অট্ঠমে হিরীনিসেধোতি হিরিযা অকুসলে ধম্মে নিসেধেতীতি হিরীনিসেধো. কোচি লোকস্মিং ৰিজ্জতীতি কোচি এৰরূপো ৰিজ্জতীতি পুচ্ছতি. যো নিন্দং অপবোধতীতি যো গরহং অপহরন্তো বুজ্ঝতি. অস্সো ভদ্রো কসামিৰাতি যথা ভদ্রো অস্সাজানীযো কসং অপহরন্তো বুজ্ঝতি, পতোদচ্ছাযং দিস্ৰা সংৰিজ্ঝন্তো ৰিয কসায অত্তনি নিপাতং ন দেতি, এৰমেৰ যো ভিক্খু ভূতস্স দসঅক্কোসৰত্থুনো অত্তনি নিপাতং অদদন্তো নিন্দং অপবোধতি অপহরন্তো বুজ্ঝতি, এৰরূপো কোচি খীণাসৰো ৰিজ্জতীতি পুচ্ছতি. অভূতক্কোসেন পন পরিমুত্তো নাম নত্থি. তনুযাতি তনুকা, হিরিযা অকুসলে ধম্মে নিসেধেত্ৰা চরন্তা খীণাসৰা নাম অপ্পকাতি অত্থো. সদা সতাতি নিচ্চকালং সতিৰেপুল্লেন সমন্নাগতা. অন্তং দুক্খস্স পপ্পুয্যাতি ৰট্টদুক্খস্স কোটিং অন্তভূতং নিব্বানং পাপুণিত্ৰা. সেসং ৰুত্তনযমেৰাতি.

হিরীসুত্তৰণ্ণনা নিট্ঠিতা.