২. নিমোক্খসুত্তৰণ্ণনা

২. ইদানি দুতিযসুত্ততো পট্ঠায পঠমমাগতঞ্চ উত্তানত্থঞ্চ পহায যং যং অনুত্তানং, তং তদেৰ ৰণ্ণযিস্সাম. জানাসি নোতি জানাসি নু. নিমোক্খন্তিআদীনি মগ্গাদীনং নামানি. মগ্গেন হি সত্তা কিলেসবন্ধনতো নিমুচ্চন্তি, তস্মা মগ্গো সত্তানং নিমোক্খোতি ৰুত্তো. ফলক্খণে পন তে কিলেসবন্ধনতো পমুত্তা, তস্মা ফলং সত্তানং পমোক্খোতি ৰুত্তং. নিব্বানং পত্ৰা সত্তানং সব্বদুক্খং ৰিৰিচ্চতি, তস্মা নিব্বানং ৰিৰেকোতি ৰুত্তং. সব্বানি ৰা এতানি নিব্বানস্সেৰ নামানি. নিব্বানঞ্হি পত্ৰা সত্তা সব্বদুক্খতো নিমুচ্চন্তি পমুচ্চন্তি ৰিৰিচ্চন্তি, তস্মা তদেৰ ‘‘নিমোক্খো পমোক্খো ৰিৰেকো’’তি ৰুত্তং. জানামি খ্ৰাহন্তি জানামি খো অহং. অৰধারণত্থো খোকারো. অহং জানামিযেৰ. সত্তানং নিমোক্খাদিজাননত্থমেৰ হি মযা সমতিংস পারমিযো পূরেত্ৰা সব্বঞ্ঞুতঞ্ঞাণং পটিৰিদ্ধন্তি সীহনাদং নদতি. বুদ্ধসীহনাদং নাম কির এতং সুত্তং.

নন্দীভৰপরিক্খযাতি নন্দীমূলকস্স কম্মভৰস্স পরিক্খযেন. নন্দিযা চ ভৰস্স চাতিপি ৰট্টতি. তত্থ হি পুরিমনযে নন্দীভৰেন তিৰিধকম্মাভিসঙ্খারৰসেন সঙ্খারক্খন্ধো গহিতো, সঞ্ঞাৰিঞ্ঞাণেহি তংসম্পযুত্তা চ দ্ৰে খন্ধা. তেহি পন তীহি খন্ধেহি সম্পযুত্তা ৰেদনা তেসং গহণেন গহিতাৰাতি অনুপাদিণ্ণকানং চতুন্নং অরূপক্খন্ধানং অপ্পৰত্তিৰসেন সউপাদিসেসং নিব্বানং কথিতং হোতি. ৰেদনানং নিরোধা উপসমাতি উপাদিণ্ণকৰেদনানং নিরোধেন চ উপসমেন চ. তত্থ ৰেদনাগহণেন তংসম্পযুত্তা তযো খন্ধা গহিতাৰ হোন্তি, তেসং ৰত্থারম্মণৰসেন রূপক্খন্ধোপি. এৰং ইমেসং উপাদিণ্ণকানং পঞ্চন্নং খন্ধানং অপ্পৰত্তিৰসেন অনুপাদিসেসং নিব্বানং কথিতং হোতি. দুতিযনযে পন নন্দিগ্গহণেন সঙ্খারক্খন্ধো গহিতো, ভৰগ্গহণেন উপপত্তিভৰসঙ্খাতো রূপক্খন্ধো, সঞ্ঞাদীহি সরূপেনেৰ তযো খন্ধা. এৰং ইমেসং পঞ্চন্নং খন্ধানং অপ্পৰত্তিৰসেন নিব্বানং কথিতং হোতীতি ৰেদিতব্বং. ইমমেৰ চ নযং চতুনিকাযিকভণ্ডিকত্থেরো রোচেতি. ইতি নিব্বানৰসেনেৰ ভগৰা দেসনং নিট্ঠাপেসীতি.

নিমোক্খসুত্তৰণ্ণনা নিট্ঠিতা.