৪. কক্কটকরসদাযকৰিমানৰণ্ণনা

উচ্চমিদং মণিথূণং ৰিমানন্তি কক্কটকরসদাযকৰিমানং. তস্স কা উপ্পত্তি? ভগৰা রাজগহে ৰিহরতি ৰেল়ুৰনে. তেন সমযেন অঞ্ঞতরো ভিক্খু আরদ্ধৰিপস্সকো কণ্ণসূলেন পীল়িতো অকল্লসরীরতায ৰিপস্সনং উস্সুক্কাপেতুং নাসক্খি, ৰেজ্জেহি ৰুত্তৰিধিনা ভেসজ্জে কতেপি রোগো ন ৰূপসমি. সো ভগৰতো এতমত্থং আরোচেসি. অথস্স ভগৰা ‘‘কক্কটকরসভোজনং সপ্পায’’ন্তি ঞত্ৰা আহ ‘‘গচ্ছ ত্ৰং ভিক্খু মগধখেত্তে পিণ্ডায চরাহী’’তি.

সো ভিক্খু ‘‘দীঘদস্সিনা অদ্ধা কিঞ্চি দিট্ঠং ভৰিস্সতী’’তি চিন্তেত্ৰা ‘‘সাধু ভন্তে’’তি ভগৰতো পটিস্সুণিত্ৰা ভগৰন্তং ৰন্দিত্ৰা পত্তচীৰরমাদায মগধখেত্তং গন্ত্ৰা অঞ্ঞতরস্স খেত্তপালস্স কুটিযা দ্ৰারে পিণ্ডায অট্ঠাসি. সো চ খেত্তপালো কক্কটকরসং সম্পাদেত্ৰা ভত্তঞ্চ পচিত্ৰা ‘‘থোকং ৰিস্সমিত্ৰা ভুঞ্জিস্সামী’’তি নিসিন্নো থেরং দিস্ৰা পত্তং গহেত্ৰা কুটিকাযং নিসীদাপেত্ৰা কক্কটকরসভত্তং অদাসি. থেরস্স তং ভত্তং থোকং ভুত্তস্সযেৰ কণ্ণসূলং পটিপ্পস্সম্ভি, ঘটসতেন ন্হাতো ৰিয অহোসি. সো সপ্পাযাহারৰসেন চিত্তফাসুকং লভিত্ৰা ৰিপস্সনাৰসেন চিত্তং অভিনিন্নামেন্তো অপরিযোসিতেযেৰ ভোজনে অনৰসেসতো আসৰে খেপেত্ৰা অরহত্তে পতিট্ঠায খেত্তপালং আহ ‘‘উপাসক, তৰ পিণ্ডপাতভোজনেন ময্হং রোগো ৰূপসন্তো, কাযচিত্তং কল্লং জাতং, ত্ৰম্পি ইমস্স পুঞ্ঞস্স ফলেন ৰিগতকাযচিত্তদুক্খো ভৰিস্সসী’’তি ৰত্ৰা অনুমোদনং কত্ৰা পক্কামি.

খেত্তপালো অপরেন সমযেন কালং কত্ৰা তাৰতিংসভৰনে দ্ৰাদসযোজনিকে মণিথম্ভে কনকৰিমানে সত্তসতকূটাগারপটিমণ্ডিতে ৰেল়ুরিযমযগব্ভে নিব্বত্তি, দ্ৰারে চস্স যথূপচিতকম্মসংসূচকো মুত্তাসিক্কাগতো সুৰণ্ণকক্কটকো ওলম্বমানো অট্ঠাসি. অথাযস্মা মহামোগ্গল্লানো পুব্বে ৰুত্তনযেন তত্থ গতো তং দিস্ৰা ইমাহি গাথাহি পুচ্ছি –

৯১০. ‘‘উচ্চমিদং মণিথূণং ৰিমানং, সমন্ততো দ্ৰাদস যোজনানি;

কূটাগারা সত্তসতা উল়ারা, ৰেল়ুরিযথম্ভা রুচকত্থতা সুভা.

৯১১. ‘‘তত্থচ্ছসি পিৰসি খাদসি চ, দিব্বা চ ৰীণা পৰদন্তি ৰগ্গুং;

দিব্বা রসা কামগুণেত্থ পঞ্চ, নারিযো চ নচ্চন্তি সুৰণ্ণছন্না.

৯১২. ‘‘কেন তেতাদিসো ৰণ্ণো, কেন তে ইধ মিজ্ঝতি;

উপ্পজ্জন্তি চ তে ভোগা, যে কেচি মনসো পিযা.

৯১৩. ‘‘পুচ্ছামি তং দেৰ মহানুভাৰ, মনুস্সভূতো কিমকাসি পুঞ্ঞং;

কেনাসি এৰং জলিতানুভাৰো, ৰণ্ণো চ তে সব্বদিসা পভাসতী’’তি.

সোপিস্স ব্যাকাসি, তং দস্সেতুং –

৯১৪. ‘‘সো দেৰপুত্তো অত্তমনো, মোগ্গল্লানেন পুচ্ছিতো;

পঞ্হং পুট্ঠো ৰিযাকাসি, যস্স কম্মস্সিদং ফল’’ন্তি. – ৰুত্তং;

৯১৫. ‘‘সতিসমুপ্পাদকরো, দ্ৰারে কক্কটকো ঠিতো;

নিট্ঠিতো জাতরূপস্স, সোভতি দসপাদকো.

৯১৬. ‘‘তেন মেতাদিসো ৰণ্ণো, তেন মে ইধ মিজ্ঝতি;

উপ্পজ্জন্তি চ মে ভোগা, যে কেচি মনসো পিযা.

৯১৭. ‘‘অক্খামি তে ভিক্খু মহানুভাৰ, মনুস্সভূতো যমকাসি পুঞ্ঞং;

তেনম্হি এৰং জলিতানুভাৰো, ৰণ্ণো চ মে সব্বদিসা পভাসতী’’তি.

৯১০. তত্থ উচ্চন্তি অচ্চুগ্গতং. মণিথূণন্তি পদুমরাগাদিমণিমযথম্ভং. সমন্ততোতি চতূসুপি পস্সেসু. রুচকত্থতাতি তস্সং তস্সং ভূমিযং সুৰণ্ণফলকেহি অত্থতা.

৯১১. পিৰসি খাদসি চাতি কালেন কালং উপযুজ্জমানং গন্ধপানং সুধাভোজনঞ্চ সন্ধায ৰদতি. পৰদন্তীতি পৰজ্জন্তি. দিব্বা রসা কামগুণেত্থ পঞ্চাতি দিব্বা রসা অনপ্পকা পঞ্চ কামগুণা এত্থ এতস্মিং তৰ ৰিমানে সংৰিজ্জন্তীতি অত্থো. সুৰণ্ণছন্নাতি হেমাভরণৰিভূসিতা.

৯১৫. সতিসমুপ্পাদকরোতি সতুপ্পাদকরো, যেন পুঞ্ঞকম্মেন অযং দিব্বসম্পত্তি মযা লদ্ধা, তত্থ সতুপ্পাদস্স কারকো, ‘‘কক্কটকরসদানেন অযং তযা সম্পত্তি লদ্ধা’’তি এৰং সতুপ্পাদং করোন্তোতি অত্থো. নিট্ঠিতো জাতরূপস্সাতি জাতরূপেন সিদ্ধো জাতরূপমযো. একমেকস্মিং পস্সে পঞ্চ পঞ্চ কত্ৰা দস পাদা এতস্সাতি দসপাদকো দ্ৰারে কক্কটকো ঠিতো সোভতি. সো এৰ মম পুঞ্ঞকম্মং তাদিসানং মহেসীনং ৰিভাৰেতি, ন এত্থ মযা ৰত্তব্বং অত্থীতি অধিপ্পাযো. তেনাহ ‘‘তেন মেতাদিসো ৰণ্ণো’’তিআদি. সেসং ৰুত্তনযমেৰ.

কক্কটকরসদাযকৰিমানৰণ্ণনা নিট্ঠিতা.