১৩. পঠমসুণিসাৰিমানৰণ্ণনা

অভিক্কন্তেন ৰণ্ণেনাতি সুণিসাৰিমানং. তস্স কা উপ্পত্তি? সাৰত্থিযং অঞ্ঞতরস্মিং গেহে একা কুলসুণ্হা গেহং পিণ্ডায পৰিট্ঠং খীণাসৰত্থেরং দিস্ৰা সঞ্জাতপীতিসোমনস্সা ‘‘ইদং ময্হং উত্তমং পুঞ্ঞক্খেত্তং উপট্ঠিত’’ন্তি অত্তনা লদ্ধং পূৰভাগং আদায আদরেন থেরস্স উপনেসি, থেরো তং পটিগ্গহেত্ৰা অনুমোদনং কত্ৰা গতো. সা অপরভাগে কালং কত্ৰা তাৰতিংসভৰনে উপ্পজ্জি. সেসং সব্বং হেট্ঠা ৰুত্তসদিসমেৰ. তেন ৰুত্তং –

১০৮. ‘‘অভিক্কন্তেন ৰণ্ণেন, যা ত্ৰং তিট্ঠসি দেৰতে;

ওভাসেন্তী দিসা সব্বা, ওসধী ৰিয তারকা.

১০৯. ‘‘কেন তেতাদিসো ৰণ্ণো, কেন তে ইধ মিজ্ঝতি;

উপ্পজ্জন্তি চ তে ভোগা, যে কেচি মনসো পিযা.

১১০. ‘‘পুচ্ছামি তং দেৰি মহানুভাৰে, মনুস্সভূতা কিমকাসি পুঞ্ঞং;

কেনাসি এৰং জলিতানুভাৰা, ৰণ্ণো চ তে সব্বদিসা পভাসতী’’তি.

১১১. ‘‘সা দেৰতা অত্তমনা, মোগ্গল্লানেন পুচ্ছিতা;

পঞ্হং পুট্ঠা ৰিযাকাসি, যস্স কম্মস্সিদং ফলং’’.

১১২. ‘‘অহং মনুস্সেসু মনুস্সভূতা, সুণিসা অহোসিং সসুরস্স গেহে.

১১৩. ‘‘অদ্দসং ৰিরজং ভিক্খুং, ৰিপ্পসন্নমনাৰিলং;

তস্স অদাসহং পূৰং, পসন্না সেহি পাণিভি;

ভাগড্ঢভাগং দত্ৰান, মোদামি নন্দনে ৰনে.

১১৪. ‘‘তেন মেতাদিসো ৰণ্ণো, তেন মে ইধ মিজ্ঝতি;

উপ্পজ্জন্তি চ মে ভোগা, যে কেচি মনসো পিযা.

১১৫. ‘‘অক্খামি তে ভিক্খু মহানুভাৰ, মনুস্সভূতা যমকাসি পুঞ্ঞং;

তেনম্হি এৰং জলিতানুভাৰা, ৰণ্ণো চ মে সব্বদিসা পভাসতী’’তি.

১১২. তত্থ সুণিসাতি পুত্তস্স ভরিযা. ইত্থিযা হি সামিকস্স পিতা ‘‘সসুরো’’তি ৰুচ্চতি, তস্স চ সা ‘‘সুণিসা’’তি. তং সন্ধায ‘‘সুণিসা অহোসিং সসুরস্স গেহে’’তি.

১১৩. ভাগড্ঢভাগন্তি অত্তনা লদ্ধপটিৰীসতো উপড্ঢভাগং. মোদামি নন্দনে ৰনেতি থেরেন নন্দনৰনে দিট্ঠতায আহ. সেসং ৰুত্তনযমেৰ.

সুণিসাৰিমানৰণ্ণনা নিট্ঠিতা.