১১. পঠমপতিব্বতাৰিমানৰণ্ণনা

কোঞ্চা মযূরা দিৰিযা চ হংসাতি পতিব্বতাৰিমানং. তস্স কা উপ্পত্তি? ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তত্থ অঞ্ঞতরা ইত্থী পতিব্বতা অহোসি ভত্তু অনুকূলৰত্তিনী খমা পদক্খিণগ্গাহিনী, ন কুদ্ধাপি পটিপ্ফরতি, অফরুসৰাচা সচ্চৰাদিনী সদ্ধা পসন্না যথাৰিভৰং দানানি চ অদাসি. সা কেনচিদেৰ রোগেন ফুট্ঠা কালং কত্ৰা তাৰতিংসভৰনে নিব্বত্তি. অথাযস্মা মহামোগ্গল্লানো পুরিমনযেনেৰ দেৰচারিকং চরন্তো তং দেৰধীতরং মহতিং সম্পত্তিং অনুভৰন্তিং দিস্ৰা তস্সা সমীপমুপগতো. সা অচ্ছরাসহস্সপরিৰুতা সট্ঠিসকটভারালঙ্কারপটিমণ্ডিতত্তভাৰা থেরস্স পাদেসু সিরসা ৰন্দিত্ৰা একমন্তং অট্ঠাসি. থেরোপি তায কতপুঞ্ঞকম্মং পুচ্ছন্তো –

৯৩. ‘‘কোঞ্চা মযূরা দিৰিযা চ হংসা, ৰগ্গুস্সরা কোকিলা সম্পতন্তি;

পুপ্ফাভিকিণ্ণং রম্মমিদং ৰিমানং, অনেকচিত্তং নরনারিসেৰিতং.

৯৪. ‘‘তত্থচ্ছসি দেৰি মহানুভাৰে, ইদ্ধী ৰিকুব্বন্তি অনেকরূপা;

ইমা চ তে অচ্ছরাযো সমন্ততো, নচ্চন্তি গাযন্তি পমোদযন্তি চ.

৯৫. ‘‘দেৰিদ্ধিপত্তাসি মহানুভাৰে,

মনুস্সভূতা কিমকাসি পুঞ্ঞং;

কেনাসি এৰং জলিতানুভাৰা,

ৰণ্ণো চ তে সব্বদিসা পভাসতী’’তি. – আহ;

৯৬. ‘‘সা দেৰতা অত্তমনা, মোগ্গল্লানেন পুচ্ছিতা;

পঞ্হং পুট্ঠা ৰিযাকাসি, যস্স কম্মস্সিদং ফলং’’.

৯৭. ‘‘অহং মনুস্সেসু মনুস্সভূতা, পতিব্বতানঞ্ঞমনা অহোসিং;

মাতাৰ পুত্তং অনুরক্খমানা, কুদ্ধাপিহং নপ্ফরুসং অৰোচং.

৯৮. ‘‘সচ্চে ঠিতা মোসৰজ্জং পহায, দানে রতা সঙ্গহিতত্তভাৰা;

অন্নঞ্চ পানঞ্চ পসন্নচিত্তা, সক্কচ্চ দানং ৰিপুলং অদাসিং.

৯৯. ‘‘তেন মেতাদিসো ৰণ্ণো, তেন মে ইধ মিজ্ঝতি;

উপ্পজ্জন্তি চ মে ভোগা, যে কেচি মনসো পিযা.

১০০. ‘‘অক্খামি তে ভিক্খু মহানুভাৰ, মনুস্সভূতা যমকাসি পুঞ্ঞং;

তেনম্হি এৰং জলিতানুভাৰা, ৰণ্ণো চ মে সব্বদিসা পভাসতী’’তি. –

সা দেৰতা ৰিস্সজ্জেসি.

৯৩. তত্থ কোঞ্চাতি কোঞ্চসকুণা, যে ‘‘সারসা’’তিপি ৰুচ্চন্তি. মযূরাতি মোরা. দিৰিযাতি দিব্বানুভাৰা. ইদঞ্হি পদং ‘‘দিৰিযা কোঞ্চা, দিৰিযা মযূরা’’তিআদিনা চতূহিপি পদেহি যোজেতব্বং. হংসাতি সুৰণ্ণহংসাদিহংসা. ৰগ্গুস্সরাতি মধুরস্সরা. কোকিলাতি কাল়কোকিলা চেৰ সুক্ককোকিলা চ. সম্পতন্তীতি দেৰতায অভিরমণত্থং কীল়ন্তা লল়ন্তা সমন্ততো পতন্তি ৰিচরন্তি. কোঞ্চাদিরূপেন হি দেৰতায রতিজননত্থং পরিৰারভূতা দেৰতা কীল়ন্তা লল়ন্তা ‘‘কোঞ্চা’’তিআদিনা ৰুত্তা. পুপ্ফাভিকিণ্ণন্তি গন্থিতাগন্থিতেহি নানাৰিধরতনকুসুমেহি ওকিণ্ণং. রম্মন্তি রমণীযং, মনোরমন্তি অত্থো. অনেকচিত্তন্তি অনেকেহি উয্যানকপ্পরুক্খপোক্খরণিআদীহি ৰিমানেসু চ অনেকেহি ভিত্তিৰিসেসাদীহি চিত্তং. নরনারিসেৰিতন্তি পরিৰারভূতেহি দেৰপুত্তেহি দেৰধীতাহি চ উপসেৰিতং.

৯৪. ইদ্ধী ৰিকুব্বন্তি অনেকরূপাতি নানারূপানং ৰিদংসনেন অনেকরূপা কম্মানুভাৰসিদ্ধা ইদ্ধী ৰিকুব্বন্তী ৰিকুব্বনিদ্ধিযো ৰলঞ্জেন্তী অচ্ছসীতি যোজনা.

৯৭. অনঞ্ঞমনাতি পতিব্বতা, পতিতো অঞ্ঞস্মিং মনো এতিস্সাতি অঞ্ঞমনা, ন অঞ্ঞমনাতি অনঞ্ঞমনা, ময্হং সামিকতো অঞ্ঞস্মিং পুরিসে পাপকং চিত্তং ন উপ্পাদেসিন্তি অত্থো. মাতাৰ পুত্তং অনুরক্খমানাতি যথা মাতা পুত্তং, এৰং ময্হং সামিকং, সব্বেপি ৰা সত্তে হিতেসিতায অহিতাপনযনকামতায চ অনুদ্দযমানা. কুদ্ধাপিহং নপ্ফরুসং অৰোচন্তি পরেন কতং অফাসুকং পটিচ্চ কুদ্ধাপি সমানা অহং ফরুসৰচনং ন কথেসিং, অঞ্ঞদত্থু পিযৰচনমেৰ অভাসিন্তি অধিপ্পাযো.

৯৮. সচ্চে ঠিতাতি সচ্চে পতিট্ঠিতা. যস্মা মুসাৰাদা ৰেরমণিযা সচ্চে পতিট্ঠিতা নাম হোতি, ন কদাচি সচ্চৰচনমত্তেনাতি আহ – মোসৰজ্জং পহাযাতি মুসাৰাদং পহায. দানে রতাতি দানে অভিরতা, যুত্তপ্পযুত্তাতি অত্থো. সঙ্গহিতত্তভাৰাতি সঙ্গহৰত্থূহি অত্তানং ৰিয সভাৰেনেৰ পরেসং সঙ্গণ্হনসীলা অন্নঞ্চ পানঞ্চ কম্মফলসদ্ধায পসন্নচিত্তা সক্কচ্চং চিত্তীকারেন অদাসিং, অঞ্ঞঞ্চ ৰত্থাদিদানং ৰিপুলং উল়ারং অদাসিন্তি যোজনা. সেসং ৰুত্তনযমেৰ.

পতিব্বতাৰিমানৰণ্ণনা নিট্ঠিতা.