১৩. ৰীসতিনিপাতো
১. অম্বপালীথেরীগাথাৰণ্ণনা
ৰীসতিনিপাতে কাল়কা ভমরৰণ্ণসাদিসাতিআদিকা অম্বপালিযা থেরিযা গাথা. অযম্পি পুরিমবুদ্ধেসু কতাধিকারা তত্থ তত্থ ভৰে ৰিৰট্টূপনিস্সযং কুসলং উপচিনন্তী সিখিস্স ভগৰতো সাসনে পব্বজিত্ৰা উপসম্পন্না হুত্ৰা ভিক্খুনিসিক্খাপদং সমাদায ৰিহরন্তী, একদিৰসং সম্বহুলাহি ভিক্খুনীহি সদ্ধিং চেতিযং ৰন্দিত্ৰা পদক্খিণং করোন্তী পুরেতরং গচ্ছন্তিযা খীণাসৰত্থেরিযা খিপন্তিযা সহসা খেল়পিণ্ডং চেতিযঙ্গণে পতিতং, খীণাসৰত্থেরিযা অপস্সিত্ৰা গতায অযং পচ্ছতো গচ্ছন্তী তং খেল়পিণ্ডং দিস্ৰা ‘‘কা নাম গণিকা ইমস্মিং ঠানে খেল়পিণ্ডং পাতেসী’’তি অক্কোসি. সা ভিক্খুনিকালে সীলং রক্খন্তী গব্ভৰাসং জিগুচ্ছিত্ৰা ওপপাতিকত্তভাৰে চিত্তং ঠপেসি. তেন চরিমত্তভাৰে ৰেসালিযং রাজুয্যানে অম্বরুক্খমূলে ওপপাতিকা হুত্ৰা নিব্বত্তি. তং দিস্ৰা উয্যানপালো নগরং উপনেসি. অম্বরুক্খমূলে নিব্বত্ততায সা অম্বপালীত্ৰেৰ ৰোহরীযিত্থ. অথ নং অভিরূপং দস্সনীযং পাসাদিকং ৰিলাসকন্ততাদিগুণৰিসেসসমুদিতং দিস্ৰা সম্বহুলা রাজকুমারা অত্তনো অত্তনো পরিগ্গহং কাতুকামা অঞ্ঞমঞ্ঞং কলহং অকংসু. তেসং কলহৰূপসমত্থং তস্সা কম্মসঞ্চোদিতা ৰোহারিকা ‘‘সব্বেসং হোতূ’’তি গণিকাট্ঠানে ঠপেসুং. সা সত্থরি পটিলদ্ধসদ্ধা অত্তনো উয্যানে ৰিহারং কত্ৰা বুদ্ধপ্পমুখস্স ভিক্খুসঙ্ঘস্স নিয্যাদেত্ৰা পচ্ছা অত্তনো পুত্তস্স ৰিমলকোণ্ডঞ্ঞত্থেরস্স সন্তিকে ধম্মং সুত্ৰা পব্বজিত্ৰা ৰিপস্সনায কম্মং করোন্তী অত্তনো সরীরস্স জরাজিণ্ণভাৰং নিস্সায সংৰেগজাতা সঙ্খারানং অনিচ্চতং ৰিভাৰেন্তী –
২৫২. ‘‘কাল়কা ভমরৰণ্ণসাদিসা, ৰেল্লিতগ্গা মম মুদ্ধজা অহুং;
তে জরায সাণৰাকসাদিসা, সচ্চৰাদিৰচনং অনঞ্ঞথা.
২৫৩. ‘‘ৰাসিতোৰ সুরভী করণ্ডকো, পুপ্ফপূর মম উত্তমঙ্গজো;
তং জরাযথ সলোমগন্ধিকং, সচ্চৰাদিৰচনং অনঞ্ঞথা.
২৫৪. ‘‘কাননংৰ সহিতং সুরোপিতং, কোচ্ছসূচিৰিচিতগ্গসোভিতং;
তং জরায ৰিরলং তহিং তহিং, সচ্চৰাদিৰচনং অনঞ্ঞথা.
২৫৫. ‘‘কণ্হখন্ধকসুৰণ্ণমণ্ডিতং, সোভতে সুৰেণীহিলঙ্কতং;
তং জরায খলিতং সিরং কতং, সচ্চৰাদিৰচনং অনঞ্ঞথা.
২৫৬. ‘‘চিত্তকারসুকতাৰ লেখিকা, সোভরে সু ভমুকা পুরে মম;
তা জরায ৰলিভিপ্পলম্বিতা, সচ্চৰাদিৰচনং অনঞ্ঞথা.
২৫৭. ‘‘ভস্সরা সুরুচিরা যথা মণী, নেত্তহেসুমভিনীলমাযতা;
তে জরাযভিহতা ন সোভরে, সচ্চৰাদিৰচনং অনঞ্ঞথা.
২৫৮. ‘‘সণ্হতুঙ্গসদিসী চ নাসিকা, সোভতে সু অভিযোব্বনং পতি;
সা জরায উপকূলিতা ৰিয, সচ্চৰাদিৰচনং অনঞ্ঞথা.
২৫৯. ‘‘কঙ্কণংৰ সুকতং সুনিট্ঠিতং, সোভরে সু মম কণ্ণপাল়িযো;
তা জরায ৰলিভিপ্পলম্বিতা, সচ্চৰাদিৰচনং অনঞ্ঞথা.
২৬০. ‘‘পত্তলীমকুলৰণ্ণসাদিসা, সোভরে সু দন্তা পুরে মম;
তে জরায খণ্ডিতা চাসিতা, সচ্চৰাদিৰচনং অনঞ্ঞথা.
২৬১. ‘‘কাননম্হি ৰনসণ্ডচারিনী, কোকিলাৰ মধুরং নিকূজিহং;
তং জরায খলিতং তহিং তহিং, সচ্চৰাদিৰচনং অনঞ্ঞথা.
২৬২. ‘‘সণ্হকম্বুরিৰ সুপ্পমজ্জিতা, সোভতে সু গীৰা পুরে মম;
সা জরায ভগ্গা ৰিনামিতা, সচ্চৰাদিৰচনং অনঞ্ঞথা.
২৬৩. ‘‘ৰট্টপলিঘসদিসোপমা উভো, সোভরে সু বাহা পুরে মম;
তা জরায যথা পাটলিব্বলিতা, সচ্চৰাদিৰচনং অনঞ্ঞথা.
২৬৪. ‘‘সণ্হমুদ্দিকসুৰণ্ণমণ্ডিতা, সোভরে সু হত্থা পুরে মম;
তে জরায যথা মূলমূলিকা, সচ্চৰাদিৰচনং অনঞ্ঞথা.
২৬৫. ‘‘পীনৰট্টসহিভুগ্গতা উভো, সোভরে সু থনকা পুরে মম;
থেৰিকীৰ লম্বন্তি নোদকা, সচ্চৰাদিৰচনং অনঞ্ঞথা.
২৬৬. ‘‘কঞ্চনস্স ফলকংৰ সম্মট্ঠং, সোভতে সু কাযো পুরে মম;
সো ৰলীহি সুখুমাহি ওততো, সচ্চৰাদিৰচনং অনঞ্ঞথা.
২৬৭. ‘‘নাগভোগসদিসোপমা উভো, সোভরে সু ঊরূ পুরে মম;
তে জরায যথা ৰেল়ুনাল়িযো, সচ্চৰাদিৰচনং অনঞ্ঞথা.
২৬৮. ‘‘সণ্হনূপুরসুৰণ্ণমণ্ডিতা, সোভরে সু জঙ্ঘা পুরে মম;
তা জরায তিলদণ্ডকারিৰ, সচ্চৰাদিৰচনং অনঞ্ঞথা.
২৬৯. ‘‘তূলপুণ্ণসদিসোপমা উভো, সোভরে সু পাদা পুরে মম;
তে জরায ফুটিতা ৰলীমতা, সচ্চৰাদিৰচনং অনঞ্ঞথা.
২৭০. ‘‘এদিসো অহু অযং সমুস্সযো, জজ্জরো বহুদুখানমালযো;
সোপলেপপতিতো জরাঘরো, সচ্চৰাদিৰচনং অনঞ্ঞথা’’তি. –
ইমা গাথাযো অভাসি.
তত্থ কাল়কাতি কাল়কৰণ্ণা. ভমরৰণ্ণসাদিসাতি কাল়কা হোন্তাপি ভমরসদিসৰণ্ণা, সিনিদ্ধনীলাতি অত্থো. ৰেল্লিতগ্গাতি কুঞ্চিতগ্গা, মূলতো পট্ঠায যাৰ অগ্গা কুঞ্চিতা ৰেল্লিতাতি অত্থো. মুদ্ধজাতি কেসা. জরাযাতি জরাহেতু জরায উপহতসোভা. সাণৰাকসাদিসাতি সাণসদিসা ৰাকসদিসা চ, সাণৰাকসদিসা চেৰ মকচিৰাকসদিসা চাতিপি অত্থো. সচ্চৰাদিৰচনং অনঞ্ঞথাতি সচ্চৰাদিনো অৰিতথৰাদিনো সম্মাসম্বুদ্ধস্স ‘‘সব্বং রূপং অনিচ্চং জরাভিভূত’’ন্তিআদিৰচনং অনঞ্ঞথা যথাভূতমেৰ, ন তত্থ ৰিতথং অত্থীতি.
ৰাসিতোৰ সুরভী করণ্ডকোতি পুপ্ফগন্ধৰাসচুণ্ণাদীহি ৰাসিতো ৰাসং গাহাপিতো পসাধনসমুগ্গো ৰিয সুগন্ধি. পুপ্ফপূর মম উত্তমঙ্গজোতি চম্পকসুমনমল্লিকাদীহি পুপ্ফেহি পূরিতো পুব্বে মম কেসকলাপো নিম্মলোতি অত্থো. তন্তি উত্তমঙ্গজং. অথ পচ্ছা এতরহি সলোমগন্ধিকং পাকতিকলোমগন্ধমেৰ জাতং. অথ ৰা সলোমগন্ধিকন্তি মেণ্ডকলোমেহি সমানগন্ধং. ‘‘এল়কলোমগন্ধ’’ন্তিপি ৰদন্তি.
কাননংৰ সহিতং সুরোপিতন্তি সুট্ঠু রোপিতং সহিতং ঘনসন্নিৰেসং উদ্ধমেৰ উট্ঠিতং উজুকদীঘসাখং উপৰনং ৰিয. কোচ্ছসূচিৰিচিতগ্গসোভিতন্তি পুব্বে কোচ্ছেন সুৰণ্ণসূচিযা চ কেসজটাৰিজটনেন ৰিচিতগ্গং হুত্ৰা সোভিতং, ঘনভাৰেন ৰা কোচ্ছসদিসং হুত্ৰা পণদন্তসূচীহি ৰিচিতগ্গতায সোভিতং. তন্তি উত্তমঙ্গজং. ৰিরলং তহিং তহিন্তি তত্থ তত্থ ৰিরলং ৰিলূনকেসং.
কণ্হখন্ধকসুৰণ্ণমণ্ডিতন্তি সুৰণ্ণৰজিরাদীহি ৰিভূসিতং কণ্হকেসপুঞ্জকং. যে পন ‘‘সণ্হকণ্ডকসুৰণ্ণমণ্ডিত’’ন্তি পঠন্তি, তেসং সণ্হাহি সুৰণ্ণসূচীহি জটাৰিজটনেন মণ্ডিতন্তি অত্থো. সোভতে সুৰেণীহিলঙ্কতন্তি সুন্দরেহি রাজরুক্খমালা সদিসেহি কেসৰেণীহি অলঙ্কতং হুত্ৰা পুব্বে ৰিরাজতে. তং জরায খলিতং সিরং কতন্তি তং তথা সোভিতং সিরং ইদানি জরায খলিতং খণ্ডিতাখণ্ডিতং ৰিলূনকেসং কতং.
চিত্তকারসুকতাৰ লেখিকাতি চিত্তকারেন সিপ্পিনা নীলায ৰণ্ণধাতুযা সুট্ঠু কতা লেখা ৰিয সোভতে. সু ভমুকা পুরে মমাতি সুন্দরা ভমুকা পুব্বে মম সোভনং গতা. ৰলিভিপ্পলম্বিতাতি নলাটন্তে উপ্পন্নাহি ৰলীহি পলম্বন্তা ঠিতা.
ভস্সরাতি ভাসুরা. সুরুচিরাতি সুট্ঠু রুচিরা. যথা মণীতি মণিমুদ্দিকা ৰিয. নেত্তহেসুন্তি সুনেত্তা অহেসুং. অভিনীলমাযতাতি অভিনীলা হুত্ৰা আযতা. তেতি নেত্তা. জরাযভিহতাতি জরায অভিহতা.
সণ্হতুঙ্গসদিসী চাতি সণ্হা তুঙ্গা সেসমুখাৰযৰানং অনুরূপা চ. সোভতেতি ৰট্টেত্ৰা ঠপিতহরিতালৰট্টি ৰিয মম নাসিকা সোভতে. সু অভিযোব্বনং পতীতি সুন্দরে অভিনৰযোব্বনকালে সা নাসিকা ইদানি জরায নিৰারিতসোভতায পরিসেদিতা ৰিয ৰরত্তা ৰিয চ জাতা.
কঙ্কণংৰ সুকতং সুনিট্ঠিতন্তি সুপরিকম্মকতং সুৰণ্ণকঙ্কণং ৰিয ৰট্টুলভাৰং সন্ধায ৰদতি. সোভরেতি সোভন্তে. ‘‘সোভন্তে’’তি ৰা পাঠো. সুইতি নিপাতমত্তং. কণ্ণপাল়িযোতি কণ্ণগন্ধা. ৰলিভিপ্পলম্বিতাতি তহিং তহিং উপ্পন্নৰলীহি ৰলিতা হুত্ৰা ৰট্টনিযা পণামিতৰত্থখন্ধা ৰিয ভস্সন্তা ওলম্বন্তি.
পত্তলীমকুলৰণ্ণসাদিসাতি কদলিমকুলসদিসৰণ্ণসণ্ঠানা. খণ্ডিতাতি ভেদনপতনেহি খণ্ডিতা খণ্ডভাৰং গতা. অসিতাতি ৰণ্ণভেদেন অসিতভাৰং গতা.
কাননম্হি ৰনসণ্ডচারিনী, কোকিলাৰ মধুরং নিকূজিহন্তি ৰনসণ্ডে গোচরচরণেন ৰনসণ্ডচারিনী কাননে অনুসংগীতনিৰাসিনী কোকিলা ৰিয মধুরালাপং নিকূজিহং. তন্তি নিকূজিতং আলাপং. খলিতং তহিং তহিন্তি খণ্ডদন্তাদিভাৰেন তত্থ তত্থ পক্খলিতং জাতং.
সণ্হকম্বুরিৰ সুপ্পমজ্জিতাতি সুট্ঠু পমজ্জিতা সণ্হা সুৰণ্ণসঙ্খা ৰিয. ভগ্গা ৰিনামিতাতি মংসপরিক্খযেন ৰিভূতসিরাজালতায ভগ্গা হুত্ৰা ৰিনতা.
ৰট্টপলিঘসদিসোপমাতি ৰট্টেন পলিঘদণ্ডেন সমসমা. তাতি তা উভোপি বাহাযো. যথা পাটলিব্বলিতাতি জজ্জরভাৰেন পলিতপাটলিসাখাসদিসা.
সণ্হমুদ্দিকসুৰণ্ণমণ্ডিতাতি সুৰণ্ণমযাহি মট্ঠভাসুরাহি মুদ্দিকাহি ৰিভূসিতা. যথা মূলমূলিকাতি মূলককণ্ডসদিসা.
পীনৰট্টসহিতুগ্গতাতি পীনা ৰট্টা অঞ্ঞমঞ্ঞং সহিতাৰ হুত্ৰা উগ্গতা উদ্ধমুখা. সোভতে সু থনকা পুরে মমাতি মম উভোপি থনা যথাৰুত্তরূপা হুত্ৰা সুৰণ্ণকলসিযো ৰিয সোভিংসু. পুথুত্তে হি ইদং একৰচনং, অতীতত্থে চ ৰত্তমানৰচনং. থেৰিকীৰ লম্বন্তি নোদকাতি তে উভোপি মে থনা নোদকা গলিতজলা ৰেণুদণ্ডকে ঠপিতউদকভস্মা ৰিয লম্বন্তি.
কঞ্চনফলকংৰ সম্মট্ঠন্তি জাতিহিঙ্গুলকেন মক্খিত্ৰা চিরপরিমজ্জিতসোৰণ্ণফলকং ৰিয সোভতে. সো ৰলীহি সুখুমাহি ওততোতি সো মম কাযো ইদানি সুখুমাহি ৰলীহি তহিং তহিং ৰিততো ৰলিত্তচতং আপন্নো.
নাগভোগসদিসোপমাতি হত্থিনাগস্স হত্থেন সমসমা. হত্থো হি ইধ ভুঞ্জতি এতেনাতি ভোগোতি ৰুত্তো. তেতি ঊরুযো. যথা ৰেল়ুনাল়িযোতি ইদানি ৰেল়ুপব্বসদিসা অহেসুং.
সণ্হনূপুরসুৰণ্ণমণ্ডিতাতি সিনিদ্ধমট্ঠেহি সুৰণ্ণনূপুরেহি ৰিভূসিতা. জঙ্ঘাতি অট্ঠিজঙ্ঘাযো. তাতি তা জঙ্ঘাযো. তিলদণ্ডকারিৰাতি অপ্পমংসলোহিতত্তা কিসভাৰেন লূনাৰসিট্ঠৰিসুক্খতিলদণ্ডকা ৰিয অহেসুং. র-কারো পদসন্ধিকরো.
তূলপুণ্ণসদিসোপমাতি মুদুসিনিদ্ধভাৰেন সিম্বলিতূলপুণ্ণপলিগুণ্ঠিতউপাহনসদিসা. তে মম পাদা ইদানি ফুটিতা ফলিতা, ৰলীমতা ৰলিমন্তো জাতা.
এদিসোতি এৰরূপো. অহু অহোসি যথাৰুত্তপ্পকারো. অযং সমুস্সযোতি অযং মম কাযো. জজ্জরোতি সিথিলাবন্ধো. বহুদুখানমালযোতি জরাদিহেতুকানং বহূনং দুক্খানং আলযভূতো. সোপলেপপতিতোতি সো অযং সমুস্সযো অপলেপপতিতো অভিসঙ্খারালেপপরিক্খযেন পতিতো পাতাভিমুখোতি অত্থো. সোপি অলেপপতিতোতি ৰা পদৰিভাগো, সো এৰত্থো. জরাঘরোতি জিণ্ণঘরসদিসো. জরায ৰা ঘরভূতো অহোসি. তস্মা সচ্চৰাদিনো ধম্মানং যথাভূতং সভাৰং সম্মদেৰ ঞত্ৰা কথনতো অৰিতথৰাদিনো সম্মাসম্বুদ্ধস্স মম সত্থুৰচনং অনঞ্ঞথা.
এৰং অযং থেরী অত্তনো অত্তভাৰে অনিচ্চতায সল্লক্খণমুখেন সব্বেসুপি তেভূমকধম্মেসু অনিচ্চতং উপধারেত্ৰা তদনুসারেন তত্থ দুক্খলক্খণং অনত্তলক্খণঞ্চ আরোপেত্ৰা ৰিপস্সনং উস্সুক্কাপেন্তী মগ্গপটিপাটিযা অরহত্তং পাপুণি. তেন ৰুত্তং অপদানে (অপ. থেরী ২.৪.২০৪-২১৯) –
‘‘যো রংসিফুসিতাৰেল়ো, ফুস্সো নাম মহামুনি;
তস্সাহং ভগিনী আসিং, অজাযিং খত্তিযে কুলে.
‘‘তস্স ধম্মং সুণিত্ৰাহং, ৰিপ্পসন্নেন চেতসা;
মহাদানং দদিত্ৰান, পত্থযিং রূপসম্পদং.
‘‘একতিংসে ইতো কপ্পে, সিখী লোকগ্গনাযকো;
উপ্পন্নো লোকপজ্জোতো, তিলোকসরণো জিনো.
‘‘তদারুণপুরে রম্মে, ব্রহ্মঞ্ঞকুলসম্ভৰা;
ৰিমুত্তচিত্তং কুপিতা, ভিক্খুনিং অভিসাপযিং.
‘‘ৰেসিকাৰ অনাচারা, জিনসাসনদূসিকা;
এৰং অক্কোসযিত্ৰান, তেন পাপেন কম্মুনা.
‘‘দারুণং নিরযং গন্ত্ৰা, মহাদুক্খসমপ্পিতা;
ততো চুতা মনুস্সেসু, উপপন্না তপস্সিনী.
‘‘দসজাতিসহস্সানি, গণিকত্তমকারযিং;
তম্হা পাপা ন মুচ্চিস্সং, ভুত্ৰা দুট্ঠৰিসং যথা.
‘‘ব্রহ্মচরিযমসেৰিস্সং, কস্সপে জিনসাসনে;
তেন কম্মৰিপাকেন, অজাযিং তিদসে পুরে.
‘‘পচ্ছিমে ভৰে সম্পত্তে, অহোসিং ওপপাতিকা;
অম্বসাখন্তরে জাতা, অম্বপালীতি তেনহং.
‘‘পরিৰুতা পাণকোটীহি, পব্বজিং জিনসাসনে;
পত্তাহং অচলং ঠানং, ধীতা বুদ্ধস্স ওরসা.
‘‘ইদ্ধীসু চ ৰসী হোমি, সোতধাতুৰিসুদ্ধিযা;
চেতোপরিযঞাণস্স, ৰসী হোমি মহামুনি.
‘‘পুব্বেনিৰাসং জানামি, দিব্বচক্খু ৰিসোধিতং;
সব্বাসৰপরিক্খীণা, নত্থি দানি পুনব্ভৰো.
‘‘অত্থধম্মনিরুত্তীসু, পটিভানে তথেৰ চ;
ঞাণং মে ৰিমলং সুদ্ধং, বুদ্ধসেট্ঠস্স ৰাহসা.
‘‘কিলেসা ঝাপিতা ময্হং, ভৰা সব্বে সমূহতা;
নাগীৰ বন্ধনং ছেত্ৰা, ৰিহরামি অনাসৰা.
‘‘স্ৰাগতং ৰত মে আসি, বুদ্ধসেট্ঠস্স সন্তিকে;
তিস্সো ৰিজ্জা অনুপ্পত্তা, কতং বুদ্ধস্স সাসনং.
‘‘পটিসম্ভিদা চতস্সো, ৰিমোক্খাপি চ অট্ঠিমে;
ছল়ভিঞ্ঞা সচ্ছিকতা, কতং বুদ্ধস্স সাসন’’ন্তি.
অরহত্তং পন পত্ৰা অত্তনো পটিপত্তিং পচ্চৰেক্খিত্ৰা উদানৰসেন তা এৰ গাথা পচ্চুদাহাসীতি.
অম্বপালীথেরীগাথাৰণ্ণনা নিট্ঠিতা.
২. রোহিনীথেরীগাথাৰণ্ণনা
সমণাতি ভোতি সুপীতিআদিকা রোহিনিযা থেরিযা গাথা. অযম্পি পুরিমবুদ্ধেসু কতাধিকারা তত্থ তত্থ ভৰে ৰিৰট্টূপনিস্সযং কুসলং উপচিনন্তী ইতো একনৰুতিকপ্পে ৰিপস্সিস্স ভগৰতো কালে কুলগেহে নিব্বত্তিত্ৰা ৰিঞ্ঞুতং পত্ৰা, একদিৰসং বন্ধুমতীনগরে ভগৰন্তং পিণ্ডায চরন্তং দিস্ৰা পত্তং গহেত্ৰা পূৰস্স পূরেত্ৰা ভগৰতো দত্ৰা পীতিসোমনস্সজাতা পঞ্চপতিট্ঠিতেন ৰন্দি. সা তেন পুঞ্ঞকম্মেন দেৰমনুস্সেসু সংসরন্তী অনুক্কমেন উপচিতৰিমোক্খসম্ভারা হুত্ৰা ইমস্মিং বুদ্ধুপ্পাদে ৰেসালিযং মহাৰিভৰস্স ব্রাহ্মণস্স গেহে নিব্বত্তিত্ৰা রোহিনীতি লদ্ধনামা ৰিঞ্ঞুতং পত্ৰা, সত্থরি ৰেসালিযং ৰিহরন্তে ৰিহারং গন্তৰা ধম্মং সুত্ৰা সোতাপন্না হুত্ৰা মাতাপিতূনং ধম্মং দেসেত্ৰা সাসনে পসাদং উপ্পাদেত্ৰা তে অনুজানাপেত্ৰা সযং পব্বজিত্ৰা ৰিপস্সনায কম্মং করোন্তী ন চিরস্সেৰ সহ পটিসম্ভিদাহি অরহত্তং পাপুণি. তেন ৰুত্তং –
‘‘নগরে বন্ধুমতিযা, ৰিপস্সিস্স মহেসিনো;
পিণ্ডায ৰিচরন্তস্স, পূৰেদাসিমহং তদা.
‘‘তেন কম্মেন সুকতেন, চেতনাপণিধীহি চ;
তত্থ চিত্তং পসাদেত্ৰা, তাৰতিংসমগচ্ছহং.
‘‘ছত্তিংসদেৰরাজূনং, মহেসিত্তমকারযিং;
পঞ্ঞাসচক্কৰত্তীনং, মহেসিত্তমকারযিং.
‘‘মনসা পত্থিতা নাম, সব্বা ময্হং সমিজ্ঝথ;
সম্পত্তিং অনুভোত্ৰান, দেৰেসু মনুজেসু চ.
‘‘পচ্ছিমে ভৰসম্পত্তে, জাতো ৰিপ্পকুলে অহং;
রোহিনী নাম নামেন, ঞাতকেহি পিযাযিতা.
‘‘ভিক্খূনং সন্তিকং গন্ত্ৰা, ধম্মং সুত্ৰা যথাতথং;
সংৰিগ্গমানসা হুত্ৰা, পব্বজিং অনগারিযং.
‘‘যোনিসো পদহন্তীনং, অরহত্তমপাপুণিং;
একনৰুতিতো কপ্পে, যং দানমদদিং তদা;
দুগ্গতিং নাভিজানামি, পূৰদানস্সিদং ফলং.
‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.
অরহত্তং পন পত্ৰা অত্তনো পটিপত্তিং পচ্চৰেক্খিত্ৰা পুব্বে সোতাপন্নকালে পিতরা অত্তনা চ ৰচনপটিৰচনৰসেন ৰুত্তগাথা উদানৰসেন ভাসন্তী –
২৭১. ‘‘সমণাতি ভোতি সুপি, সমণাতি পবুজ্ঝসি;
সমণানেৰ কিত্তেসি, সমণী নূন ভৰিস্সসি.
২৭২. ‘‘ৰিপুলং অন্নঞ্চ পানঞ্চ, সমণানং পৰেচ্ছসি;
রোহিনী দানি পুচ্ছামি, কেন তে সমণা পিযা.
২৭৩. ‘‘অকম্মকামা অলসা, পরদত্তূপজীৰিনো;
আসংসুকা সাদুকামা, কেন তে সমণা পিযা.
২৭৪. ‘‘চিরস্সং ৰত মং তাত, সমণানং পরিপুচ্ছসি;
তেসং তে কিত্তযিস্সামি, পঞ্ঞাসীলপরক্কমং.
২৭৫. ‘‘কম্মকামা অনলসা, কম্মসেট্ঠস্স কারকা;
রাগং দোসং পজহন্তি, তেন মে সমণা পিযা.
২৭৬. ‘‘তীণি পাপস্স মূলানি, ধুনন্তি সুচিকারিনো;
সব্বং পাপং পহীনেসং, তেন মে সমণা পিযা.
২৭৭. ‘‘কাযকম্মং সুচি নেসং, ৰচীকম্মঞ্চ তাদিসং;
মনোকম্মং সুচি নেসং, তেন মে সমণা পিযা.
২৭৮. ‘‘ৰিমলা সঙ্খমুত্তাৰ, সুদ্ধা সন্তরবাহিরা;
পুণ্ণা সুক্কান ধম্মানং, তেন মে সমণা পিযা.
২৭৯. ‘‘বহুস্সুতা ধম্মধরা, অরিযা ধম্মজীৰিনো;
অত্থং ধম্মঞ্চ দেসেন্তি, তেন মে সমণা পিযা.
২৮০. ‘‘বহুস্সুতা ধম্মধরা, অরিযা ধম্মজীৰিনো;
একগ্গচিত্তা সতিমন্তো, তেন মে সমণা পিযা.
২৮১. ‘‘দূরঙ্গমা সতিমন্তো, মন্তভাণী অনুদ্ধতা;
দুক্খস্সন্তং পজানন্তি, তেন মে সমণা পিযা.
২৮২. ‘‘যস্মা গামা পক্কমন্তি, ন ৰিলোকেন্তি কিঞ্চনং;
অনপেক্খাৰ গচ্ছন্তি, তেন মে সমণা পিযা.
২৮৩. ‘‘ন তে সং কোট্ঠে ওপেন্তি, ন কুম্ভিং ন খল়োপিযং;
পরিনিট্ঠিতমেসানা, তেন মে সমণা পিযা.
২৮৪. ‘‘ন তে হিরঞ্ঞং গণ্হন্তি, ন সুৰণ্ণং ন রূপিযং;
পচ্চুপ্পন্নেন যাপেন্তি, তেন মে সমণা পিযা.
২৮৫. ‘‘নানাকুলা পব্বজিতা, নানাজনপদেহি চ;
অঞ্ঞমঞ্ঞং পিহযন্তি, তেন মে সমণা পিযা.
২৮৬. ‘‘অত্থায ৰত নো ভোতি, কুলে জাতাসি রোহিনী;
সদ্ধা বুদ্ধে চ ধম্মে চ, সঙ্ঘে চ তিব্বগারৰা.
২৮৭. ‘‘তুৰঞ্হেতং পজানাসি, পুঞ্ঞক্খেত্তং অনুত্তরং;
অম্হম্পি এতে সমণা, পটিগ্গণ্হন্তি দক্খিণং.
২৮৮. ‘‘পতিট্ঠিতো হেত্থ যঞ্ঞো, ৰিপুলো নো ভৰিস্সতি;