৩. পুণ্ণাথেরীগাথাৰণ্ণনা

পুণ্ণে পূরস্সু ধম্মেহীতি পুণ্ণায নাম সিক্খমানায গাথা. অযম্পি পুরিমবুদ্ধেসু কতাধিকারা তত্থ তত্থ ভৰে ৰিৰট্টূপনিস্সযং কুসলং উপচিনন্তী বুদ্ধসুঞ্ঞে লোকে চন্দভাগায নদিযা তীরে কিন্নরযোনিযং নিব্বত্তা. একদিৰসং তত্থ অঞ্ঞতরং পচ্চেকবুদ্ধং দিস্ৰা পসন্নমানসা নল়মালায তং পূজেত্ৰা অঞ্জলিং পগ্গয্হ অট্ঠাসি. সা তেন পুঞ্ঞকম্মেন সুগতীসুযেৰ সংসরন্তী ইমস্মিং বুদ্ধুপ্পাদে সাৰত্থিযং গহপতিমহাসালকুলে নিব্বত্তি. পুণ্ণাতিস্সা নামং অহোসি. সা উপনিস্সযসম্পন্নতায ৰীসতিৰস্সানি ৰসমানা মহাপজাপতিগোতমিযা সন্তিকে ধম্মং সুত্ৰা পটিলদ্ধসদ্ধা পব্বজিত্ৰা সিক্খমানা এৰ হুত্ৰা ৰিপস্সনং আরভি. সত্থা তস্সা গন্ধকুটিযং নিসিন্নো এৰ ওভাসং ৰিস্সজ্জেত্ৰা –

৩. ‘‘পুণ্ণে পূরস্সু ধম্মেহি, চন্দো পন্নরসেরিৰ;

পরিপুণ্ণায পঞ্ঞায, তমোখন্ধং পদালযা’’তি. – ইমং গাথমাহ;

তত্থ পুণ্ণেতি তস্সা আলপনং. পূরস্সু ধম্মেহীতি সত্ততিংসবোধিপক্খিযধম্মেহি পরিপুণ্ণা হোহি. চন্দো পন্নরসেরিৰাতি র-কারো পদসন্ধিকরো. পন্নরসে পুণ্ণমাসিযং সব্বাহি কলাহি পরিপুণ্ণো চন্দো ৰিয. পরিপুণ্ণায পঞ্ঞাযাতি সোল়সন্নং কিচ্চানং পারিপূরিযা পরিপুণ্ণায অরহত্তমগ্গপঞ্ঞায. তমোখন্ধং পদালযাতি মোহক্খন্ধং অনৰসেসতো ভিন্দ সমুচ্ছিন্দ. মোহক্খন্ধপদালনেন সহেৰ সব্বেপি কিলেসা পদালিতা হোন্তীতি.

সা তং গাথং সুত্ৰা ৰিপস্সনং ৰড্ঢেত্ৰা অরহত্তং পাপুণি. তেন ৰুত্তং অপদানে (অপ. থেরী ২.১.৩৭-৪৫) –

‘‘চন্দভাগানদীতীরে, অহোসিং কিন্নরী তদা;

অদ্দসং ৰিরজং বুদ্ধং, সযম্ভুং অপরাজিতং.

‘‘পসন্নচিত্তা সুমনা, ৰেদজাতা কতঞ্জলী;

নল়মালং গহেত্ৰান, সযম্ভুং অভিপূজযিং.

‘‘তেন কম্মেন সুকতেন, চেতনাপণিধীহি চ;

জহিত্ৰা কিন্নরীদেহং, অগচ্ছিং তিদসং গতিং.

‘‘ছত্তিংসদেৰরাজূনং, মহেসিত্তমকারযিং;

দসন্নং চক্কৰত্তীনং, মহেসিত্তমকারযিং;

সংৰেজেত্ৰান মে চিত্তং, পব্বজিং অনগারিযং.

‘‘কিলেসা ঝাপিতা ময্হং, ভৰা সব্বে সমূহতা;

সব্বাসৰপরিক্খীণা, নত্থি দানি পুনব্ভৰো.

‘‘চতুন্নৰুতিতো কপ্পে, যং পুপ্ফমভিপূজযিং;

দুগ্গতিং নাভিজানামি, পুপ্ফপূজাযিদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা সা থেরী তমেৰ গাথং উদানেসি. অযমেৰ চস্সা অঞ্ঞাব্যাকরণগাথা অহোসীতি.

পুণ্ণাথেরীগাথাৰণ্ণনা নিট্ঠিতা.