৮. অট্ঠকনিপাতো

১. মহাকচ্চাযনত্থেরগাথাৰণ্ণনা

অট্ঠকনিপাতে কম্মং বহুকন্তিআদিকা আযস্মতো মহাকচ্চাযনত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো পদুমুত্তরস্স ভগৰতো কালে গহপতিমহাসালকুলে নিব্বত্তিত্ৰা ৰুদ্ধিপ্পত্তো, একদিৰসং সত্থু সন্তিকে ধম্মং সুণন্তো সত্থারা সংখিত্তেন ভাসিতস্স ৰিত্থারেন অত্থং ৰিভজন্তানং অগ্গট্ঠানে ঠপিযমানং একং ভিক্খুং দিস্ৰা, সযম্পি তং ঠানং পত্থেন্তো পণিধানং কত্ৰা, দানাদীনি পুঞ্ঞানি কত্ৰা, দেৰমনুস্সেসু সংসরন্তো সুমেধস্স ভগৰতো কালে ৰিজ্জাধরো হুত্ৰা আকাসেন গচ্ছন্তো সত্থারং হিমৰন্তপব্বতে একস্মিং ৰনসণ্ডে নিসিন্নং দিস্ৰা পসন্নমানসো কণিকারপুপ্ফেহি পূজং অকাসি.

সো তেন পুঞ্ঞকম্মেন অপরাপরং সুগতীসুযেৰ পরিৰত্তেন্তো কস্সপদসবলস্স কালে বারাণসিযং কুলঘরে নিব্বত্তিত্ৰা পরিনিব্বুতে ভগৰতি সুৰণ্ণচেতিযকরণট্ঠানে সতসহস্সগ্ঘনিকায সুৰণ্ণিট্ঠকায পূজং কত্ৰা, ‘‘ভগৰা ময্হং নিব্বত্তনিব্বত্তট্ঠানে সরীরং সুৰণ্ণৰণ্ণং হোতূ’’তি পত্থনং অকাসি.

ততো যাৰজীৰং কুসলকম্মং কত্ৰা একং বুদ্ধন্তরং দেৰমনুস্সেসু সংসরিত্ৰা ইমস্মিং বুদ্ধুপ্পাদে উজ্জেনিযং রঞ্ঞো চণ্ডপজ্জোতস্স পুরোহিতগেহে নিব্বত্তি. তস্স নামগ্গহণদিৰসে মাতা ‘‘ময্হং পুত্তো সুৰণ্ণৰণ্ণো, অত্তনো নামং গহেত্ৰা আগতো’’তি কঞ্চনমাণৰো ত্ৰেৰ নামং অকাসি. সো ৰুড্ঢিমন্ৰায তযো ৰেদে উগ্গহেত্ৰা পিতু অচ্চযেন পুরোহিতট্ঠানং লভি. সো গোত্তৰসেন কচ্চাযনোতি পঞ্ঞাযিত্থ. তং রাজা চণ্ডপজ্জোতো বুদ্ধুপ্পাদং সুত্ৰা, ‘‘আচরিয, ত্ৰং তত্থ গন্ত্ৰা সত্থারং ইধানেহী’’তি পেসেসি. সো অত্তট্ঠমো সত্থু সন্তিকং উপগতো. তস্স সত্থা ধম্মং দেসেতি. দেসনাপরিযোসানে সো সত্তহি জনেহি সদ্ধিং সহ পটিসম্ভিদাহি অরহত্তে পতিট্ঠাসি. তেন ৰুত্তং অপদানে (অপ. থের ২.৫৪.১-২৭) –

‘‘পদুমুত্তরো নাম জিনো, অনেজো অজিতং জযো;

সতসহস্সে কপ্পানং, ইতো উপ্পজ্জি নাযকো.

‘‘ৰীরো কমলপত্তক্খো, সসঙ্কৰিমলাননো;

কনকাচলসঙ্কাসো, রৰিদিত্তিসমপ্পভো.

‘‘সত্তনেত্তমনোহারী, ৰরলক্খণভূসিতো;

সব্বৰাক্যপথাতীতো, মনুজামরসক্কতো.

‘‘সম্বুদ্ধো বোধযং সত্তে, ৰাগীসো মধুরস্সরো;

করুণানিবন্ধসন্তানো, পরিসাসু ৰিসারদো.

‘‘দেসেতি মধুরং ধম্মং, চতুসচ্চূপসংহিতং;

নিমুগ্গে মোহপঙ্কম্হি, সমুদ্ধরতি পাণিনে.

‘‘তদা একচরো হুত্ৰা, তাপসো হিমৰালযো;

নভসা মানুসং লোকং, গচ্ছন্তো জিনমদ্দসং.

‘‘উপেচ্চ সন্তিকং তস্স, অস্সোসিং ধম্মদেসনং;

ৰণ্ণযন্তস্স ৰীরস্স, সাৰকস্স মহাগুণং.

‘‘সংখিত্তেন মযা ৰুত্তং, ৰিত্থারেন পকাসযং;

পরিসং মঞ্চ তোসেতি, যথা কচ্চাযনো অযং.

‘‘নাহং এৰমিধেকচ্চং, অঞ্ঞং পস্সামি সাৰকং;

তস্মাতদগ্গে এসগ্গো, এৰং ধারেথ ভিক্খৰো.

‘‘তদাহং ৰিম্হিতো হুত্ৰা, সুত্ৰা ৰাক্যং মনোরমং;

হিমৰন্তং গমিত্ৰান, আহিত্ৰা পুপ্ফসঞ্চযং.

‘‘পূজেত্ৰা লোকসরণং, তং ঠানমভিপত্থযিং;

তদা মমাসযং ঞত্ৰা, ব্যাকাসি স রণঞ্জহো.

‘‘পস্সথেতং ইসিৰরং, নিদ্ধন্তকনকত্তচং;

উদ্ধগ্গলোমং পীণংসং, অচলং পঞ্জলিং ঠিতং.

‘‘হাসং সুপুণ্ণনযনং, বুদ্ধৰণ্ণগতাসযং;

ধম্মজং উগ্গহদযং, অমতাসিত্তসন্নিভং.

‘‘কচ্চানস্স গুণং সুত্ৰা, তং ঠানং পত্থযং ঠিতো;

অনাগতম্হি অদ্ধানে, গোতমস্স মহামুনে.

‘‘তস্স ধম্মেসু দাযাদো, ওরসো ধম্মনিম্মিতো;

কচ্চানো নাম নামেন, হেস্সতি সত্থু সাৰকো.

‘‘বহুস্সুতো মহাঞাণী, অধিপ্পাযৰিদূ মুনে;

পাপুণিস্সতি তং ঠানং, যথাযং ব্যাকতো মযা.

‘‘সতসহস্সিতো কপ্পে, যং কম্মমকরিং তদা;

দুগ্গতিং নাভিজানামি, বুদ্ধপূজাযিদং ফলং.

‘‘দুৰে ভৰে সংসরামি, দেৰত্তে অথ মানুসে;

অঞ্ঞং গতিং ন গচ্ছামি, বুদ্ধপূজাযিদং ফলং.

‘‘দুৰে কুলে পজাযামি, খত্তিযে অথ ব্রাহ্মণে;

নীচে কুলে ন জাযামি, বুদ্ধপূজাযিদং ফলং.

‘‘পচ্ছিমে চ ভৰে দানি, জাতো উজ্জেনিযং পুরে;

পজ্জোতস্স চ চণ্ডস্স, পুরোহিতদিজাধিনো.

‘‘পুত্তো তিরিটিৰচ্ছস্স, নিপুণো ৰেদপারগূ;

মাতা চ চন্দিমা নাম, কচ্চানোহং ৰরত্তচো.

‘‘ৰীমংসনত্থং বুদ্ধস্স, ভূমিপালেন পেসিতো;

দিস্ৰা মোক্খপুরদ্ৰারং, নাযকং গুণসঞ্চযং.

‘‘সুত্ৰা চ ৰিমলং ৰাক্যং, গতিপঙ্কৰিসোসনং;

পাপুণিং অমতং সন্তং, সেসেহি সহ সত্তহি.

‘‘অধিপ্পাযৰিদূ জাতো, সুগতস্স মহামতে.

ঠপিতো এতদগ্গে চ, সুসমিদ্ধমনোরথো.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অথ সত্থা ‘‘এথ, ভিক্খৰো’’তি হত্থং পসারেসি. তে তাৰদেৰ দ্ৰঙ্গুলমত্তকেসমস্সুকা ইদ্ধিমযপত্তচীৰরধরা ৰস্সসট্ঠিকত্থেরা ৰিয অহেসুং. এৰং থেরো সদত্থং নিপ্ফাদেত্ৰা, ‘‘ভন্তে, রাজা পজ্জোতো তুম্হাকং পাদে ৰন্দিতুং ধম্মঞ্চ সোতুং ইচ্ছতী’’তি সত্থু আরোচেসি. সত্থা, ‘‘ত্ৰংযেৰ, ভিক্খু, তত্থ গচ্ছ, তযি গতেপি রাজা পসীদিস্সতী’’তি আহ. থেরো সত্থু আণায অত্তট্ঠমো তত্থ গন্ত্ৰা রাজানং পসাদেত্ৰা অৰন্তীসু সাসনং পতিট্ঠাপেত্ৰা পুন সত্থু সন্তিকমেৰ গতো. সো একদিৰসং সম্বহুলে ভিক্খূ সমণধম্মং পহায কম্মারামে সঙ্গণিকারামে রসতণ্হানুগতে চ পমাদৰিহারিনো দিস্ৰা তেসং ওৰাদৰসেন –

৪৯৪. ‘‘কম্মং বহুকং ন কারযে, পরিৰজ্জেয্য জনং ন উয্যমে;

সো উস্সুক্কো রসানুগিদ্ধো, অত্থং রিঞ্চতি যো সুখাধিৰাহো.

৪৯৫. ‘‘পঙ্কোতি হি নং অৰেদযুং, যাযং ৰন্দনপূজনা কুলেসু;

সুখুমং সল্লং দুরুব্বহং, সক্কারো কাপুরিসেন দুজ্জহো’’তি. –

দ্ৰে গাথা অভাসি.

তত্থ কম্মং বহুকং ন কারযেতি নৰাৰাসকারাপনাদিং সমণধম্মকরণস্স পরিবন্ধভূতং মহন্তং নৰকম্মং ন পট্ঠপেয্য, খুদ্দকং অপ্পসমারম্ভং খণ্ডফুল্লপটিসঙ্খরণাদিং সত্থু ৰচনপটিপূজনত্থং কাতব্বমেৰ. পরিৰজ্জেয্য জনন্তি গণসঙ্গণিকৰসেন জনং ৰিৰজ্জেয্য. জনন্তি ৰা যাদিসং সংসেৰতো ভজতো পযিরুপাসতো কুসলা ধম্মা পরিহাযন্তি, অকুসলা ধম্মা অভিৰড্ঢন্তি, তাদিসং অকল্যাণমিত্তভূতং জনং পরিৰজ্জেয্য. ন উয্যমেতি, পচ্চযুপ্পাদনত্থং কুলসঙ্গণ্হনৰসেন ন ৰাযমেয্য, যস্মা সো উস্সুক্কো রসানুগিদ্ধো, অত্থং রিঞ্চতি যো সুখাধিৰাহোতি যো রসানুগিদ্ধো রসতণ্হাৰসিকো ভিক্খু পচ্চযুপ্পাদনপসুতো, সো কুলসঙ্গণ্হনত্থং উস্সুক্কো, তেসু সুখিতেসু সুখিতো, দুক্খিতেসু দুক্খিতো, উপ্পন্নেসু কিচ্চকরণীযেসু অত্তনা যোগং আপজ্জতি, যো সুখাধিৰাহো সমথৰিপস্সনামগ্গফলনিব্বানসুখাৰহো সীলাদিঅত্থো, তং রিঞ্চতি পজহতি একংসেন অত্তানং ততো ৰিৰেচেতীতি অত্থো.

এৰং পঠমগাথায ‘‘কম্মারামতং সঙ্গণিকারামতং পচ্চযগেধঞ্চ ৰজ্জেথা’’তি ওৰদিত্ৰা ইদানি সক্কারাভিলাসং গরহন্তো দুতিযং গাথমাহ. তস্সত্থো – যা অযং ভিক্খায উপগতানং পব্বজিতানং কুলেসু গেহৰাসীহি গুণসম্ভাৰনায করীযমানা ৰন্দনা পূজনা চ, যস্মা তং অভাৰিতত্তানং ওসীদাপনট্ঠেন মলিনভাৰকরণট্ঠেন চ পঙ্কো কদ্দমোতি বুদ্ধাদযো অরিযা পৰেদযুং অব্ভঞ্ঞংসু পৰেদেসুং ৰা, যস্মা চ অপরিঞ্ঞাতক্খন্ধানং অন্ধপুথুজ্জনানং সক্কারাভিলাসং দুৰিঞ্ঞেয্যসভাৰতায পীল়াজননতো অন্তো তুদনতো দুরুদ্ধরণতো চ সুখুমং সল্লং দুরুব্বহং পৰেদযুং, ততো এৰ সক্কারো কাপুরিসেন দুজ্জহো দুপ্পজহেয্যো তস্স পহানপটিপত্তিযা অপ্পটিপজ্জনতো. সক্কারাভিলাসপ্পহানেন হি সক্কারো পহীনো হোতি, তস্মা তস্স পহানায আযোগো করণীযোতি দস্সেতি –

৪৯৬. ‘‘ন পরস্সুপনিধায, কম্মং মচ্চস্স পাপকং;

অত্তনা তং ন সেৰেয্য, কম্মবন্ধূ হি মাতিযা.

৪৯৭. ‘‘ন পরে ৰচনা চোরো, ন পরে ৰচনা মুনি;

অত্তা চ নং যথা ৰেদি, দেৰাপি নং তথা ৰিদূ.

৪৯৮. ‘‘পরে চ ন ৰিজানন্তি, মযমেত্থ যমামসে;

যে চ তত্থ ৰিজানন্তি, ততো সম্মন্তি মেধগা.

৪৯৯. ‘‘জীৰতে ৰাপি সপ্পঞ্ঞো, অপি ৰিত্তপরিক্খযো;

পঞ্ঞায চ অলাভেন, ৰিত্তৰাপি ন জীৰতি.

৫০০. ‘‘সব্বং সুণাতি সোতেন, সব্বং পস্সতি চক্খুনা;

ন চ দিট্ঠং সুতং ধীরো, সব্বং উজ্ঝিতুমরহতি.

৫০১. ‘‘চক্খুমাস্স যথা অন্ধো, সোতৰা বধিরো যথা;

পঞ্ঞৰাস্স যথা মূগো, বলৰা দুব্বলোরিৰ;

অথ অত্থে সমুপ্পন্নে, সযেথ মতসাযিক’’ন্তি. –

ইমা ছ গাথা রঞ্ঞো পজ্জোতস্স ওৰাদৰসেন অভাসি. সো কির ব্রাহ্মণে সদ্দহিত্ৰা পসুঘাতযঞ্ঞং কারেতি, কম্মং অসোধেত্ৰাৰ অচোরে চোরসঞ্ঞায দণ্ডেসি, অট্টকরণে চ অস্সামিকে সামিকে করোতি, সামিকে চ অস্সামিকে. ততো নং থেরো ৰিৰেচেতুং ‘‘ন পরস্সা’’তিআদিনা ছ গাথা অভাসি.

তত্থ ন পরস্সুপনিধায, কম্মং মচ্চস্স পাপকন্তি পরস্স মচ্চস্স সত্তস্স উপনিধায উদ্দিস্স কারণং কত্ৰা পাপকং ৰধবন্ধাদিকম্মং ন সেৰেয্য, পরেন ন কারাপেয্যাতি অত্থো. অত্তনা তং ন সেৰেয্যাতি অত্তনাপি তং পাপকং ন করেয্য. কস্মা? কম্মবন্ধূ হি মাতিযা ইমে মাতিযা মচ্চা কম্মদাযাদা, তস্মা অত্তনা চ কিঞ্চি পাপকম্মং ন করেয্য, পরেনপি ন কারাপেয্যাতি অত্থো.

ন পরে ৰচনা চোরোতি অত্তনা চোরিযং অকত্ৰা পরৰচনা পরস্স ৰচনমত্তেন চোরো নাম ন হোতি, তথা ন পরে ৰচনা মুনি পরস্স ৰচনমত্তেন মুনি সুৰিসুদ্ধকাযৰচীমনোসমাচারো ন হোতি. এত্থ হি পরেতি ৰিভত্তিঅলোপং কত্ৰা নিদ্দেসো. কেচি পন ‘‘পরেসন্তি ৰত্তব্বে পরেতি সং-কারলোপং কত্ৰা নিদ্দিট্ঠ’’ন্তি ৰদন্তি. অত্তা চ নং যথা ৰেদীতি নং সত্তং তস্স অত্তা চিত্তং যথা ‘‘অহং পরিসুদ্ধো, অপরিসুদ্ধো ৰা’’তি যাথাৰতো অৰেদি জানাতি. দেৰাপি নং তথা ৰিদূতি ৰিসুদ্ধিদেৰা, উপপত্তিদেৰা চ তথা ৰিদূ ৰিদন্তি জানন্তি, তস্মা সযং তাদিসা দেৰা চ পমাণং সুদ্ধাসুদ্ধানং সুদ্ধাসুদ্ধভাৰজাননে, ন যে কেচি ইচ্ছাদোসপরেতা সত্তাতি অধিপ্পাযো.

পরেতি পণ্ডিতে ঠপেত্ৰা ততো অঞ্ঞে, কুসলাকুসলসাৰজ্জানৰজ্জং কম্মং কম্মফলং কাযস্স অসুভতং সঙ্খারানং অনিচ্চতং অজানন্তা ইধ পরে নাম. তে মযমেত্থ ইমস্মিং জীৰলোকে যমাম উপরমাম, ‘‘সততং সমিতং মচ্চু সন্তিকং গচ্ছামা’’তি ন জানন্তি. যে চ তত্থ ৰিজানন্তীতি যে চ তত্থ পণ্ডিতা ‘‘মযং মচ্চু সমীপং গচ্ছামা’’তি ৰিজানন্তি. ততো সম্মন্তি মেধগাতি এৰঞ্হি তে জানন্তা মেধগানং পরৰিহিংসনানং ৰূপসমায পটিপজ্জন্তি, অত্তনা পরে চ অঞ্ঞে ন মেধন্তি ন বাধেন্তীতি অত্থো. ত্ৰং পন জীৰিতনিমিত্তং অচোরে চোরে করোন্তোপি দণ্ডনেন সামিকে অস্সামিকে করোন্তোপি ধনজানিযা বাধসি পঞ্ঞাৰেকল্লতো. তথা অকরোন্তোপি জীৰতে ৰাপি সপ্পঞ্ঞো, অপি ৰিত্তপরিক্খযো পরিক্খীণধনোপি সপ্পঞ্ঞজাতিকো ইতরীতরসন্তোসেন সন্তুট্ঠো অনৰজ্জায জীৰিকায জীৰতিযেৰ. তস্স হি জীৰিতং নাম. তেনাহ ভগৰা – ‘‘পঞ্ঞাজীৰিং জীৰিতমাহু সেট্ঠ’’ন্তি (সং. নি. ১.৭৩, ২৪৬; সু. নি. ১৮৪). দুম্মেধপুগ্গলো পন পঞ্ঞায চ অলাভেন দিট্ঠধম্মিকং সম্পরাযিকঞ্চ অত্থং ৰিরাধেন্তো ৰিত্তৰাপি ন জীৰতি গরহাদিপৰত্তিযা জীৰন্তো নাম ন হোতি, অনুপাযঞ্ঞুতায যথাধিগতং ধনং নাসেন্তো জীৰিতম্পি সন্ধারেতুং ন সক্কোতিযেৰ.

ইমা কির চতস্সোপি গাথা থেরো সুপিনন্তেন রঞ্ঞো কথেসি. রাজা সুপিনং দিস্ৰা থেরং নমস্সন্তোযেৰ পবুজ্ঝিত্ৰা পভাতায রত্তিযা থেরং উপসঙ্কমিত্ৰা ৰন্দিত্ৰা অত্তনা দিট্ঠনিযামেন সুপিনং কথেসি. তং সুত্ৰা থেরো তা গাথা পচ্চুনুভাসিত্ৰা ‘‘সব্বং সুণাতী’’তিআদিনা দ্ৰীহি গাথাহি রাজানং ওৰদি. তত্থ সব্বং সুণাতি সোতেনাতি ইধ সোতব্বং সদ্দং আপাথগতং সব্বং সুভাসিতং দুব্ভাসিতঞ্চ অবধিরো সোতেন সুণাতি. তথা সব্বং রূপং সুন্দরং অসুন্দরম্পি চক্খুনা অনন্ধো পস্সতি, অযমিন্দ্রিযানং সভাৰো. তত্থ পন ন চ দিট্ঠং সুতং ধীরো, সব্বং উজ্ঝিতুন্তি চ নিদস্সনমত্তমেতং. যঞ্হি তং দিট্ঠং সুতং ৰা, ন তং সব্বং ধীরো সপ্পঞ্ঞো উজ্ঝিতুং পরিচ্চজিতুং গহেতুং ৰা অরহতি. গুণাগুণং পন তত্থ উপপরিক্খিত্ৰা উজ্ঝিতব্বমেৰ উজ্ঝিতুং গহেতব্বঞ্চ গহেতুং অরহতি, তস্মা চক্খুমাস্স যথা অন্ধো চক্খুমাপি সমানো উজ্ঝিতব্বে দিট্ঠে অন্ধো যথা অস্স অপস্সন্তো ৰিয ভৰেয্য, তথা উজ্ঝিতব্বে সুতে সোতৰাপি বধিরো যথা অস্স অসুণন্তো ৰিয ভৰেয্য. পঞ্ঞৰাস্স যথা মূগোতি ৰিচারণপঞ্ঞায পঞ্ঞৰা ৰচনকুসলোপি অৰত্তব্বে মূগো ৰিয ভৰেয্য. বলৰা থামসম্পন্নোপি অকত্তব্বে দুব্বলোরিৰ, রকারো পদসন্ধিকরো, অসমত্থো ৰিয ভৰেয্য. অথ অত্থে সমুপ্পন্নে, সযেথ মতসাযিকন্তি অত্তনা কাতব্বকিচ্চে উপ্পন্নে উপট্ঠিতে মতসাযিকং সযেথ, মতসাযিকং সযিত্ৰাপি তং কিচ্চং তীরেতব্বমেৰ, ন ৰিরাধেতব্বং. অথ ৰা অথ অত্থে সমুপ্পন্নেতি অত্তনা অকরণীযে অত্থে কিচ্চে উপ্পন্নে উপট্ঠিতে মতসাযিকং সযেথ, মতসাযিকং সযিত্ৰাপি তং ন কাতব্বমেৰ. ন হি পণ্ডিতো অযুত্তং কাতুমরহতীতি এৰং থেরেন ওৰদিতো রাজা অকত্তব্বং পহায কাতব্বেযেৰ যুত্তপ্পযুত্তো অহোসীতি.

মহাকচ্চাযনত্থেরগাথাৰণ্ণনা নিট্ঠিতা.

২. সিরিমিত্তত্থেরগাথাৰণ্ণনা

অক্কোধনোতিআদিকা আযস্মতো সিরিমিত্তত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযং কুসলং উপচিনিত্ৰা ইমস্মিং বুদ্ধুপ্পাদে রাজগহে মহদ্ধনকুটুম্বিকস্স পুত্তো হুত্ৰা নিব্বত্তি, সিরিমিত্তোতি লদ্ধনামো. তস্স কির মাতা সিরিগুত্তস্স ভগিনী. তস্স ৰত্থু ধম্মপদৰণ্ণনাযং (ধ. প. অট্ঠ. ১.গরহদিন্নৰত্থু) আগতমেৰ. সো সিরিগুত্তস্স ভাগিনেয্যো সিরিমিত্তো ৰযপ্পত্তো সত্থু ধনপালদমনে লদ্ধপ্পসাদো পব্বজিত্ৰা ৰিপস্সনায কম্মং করোন্তো নচিরস্সেৰ অরহত্তং পত্তো. একদিৰসং পাতিমোক্খং উদ্দিসিতুং আসনং অভিরুহিত্ৰা চিত্তবীজনিং গহেত্ৰা নিসিন্নো ভিক্খূনং ধম্মং কথেসি. কথেন্তো চ উল়ারতরে গুণে ৰিভজিত্ৰা দস্সেন্তো –

৫০২. ‘‘অক্কোধনোনুপনাহী, অমাযো রিত্তপেসুণো;

স ৰে তাদিসকো ভিক্খু, এৰং পেচ্চ ন সোচতি.

৫০৩. ‘‘অক্কোধনোনুপনাহী, অমাযো রিত্তপেসুণো;

গুত্তদ্ৰারো সদা ভিক্খু, এৰং পেচ্চ ন সোচতি.

৫০৪. ‘‘অক্কোধনোনুপনাহী, অমাযো রিত্তপেসুণো;

কল্যাণসীলো সো ভিক্খু, এৰং পেচ্চ ন সোচতি.

৫০৫. ‘‘অক্কোধনোনুপনাহী, অমাযো রিত্তপেসুণো;

কল্যাণমিত্তো সো ভিক্খু, এৰং পেচ্চ ন সোচতি.

৫০৬. ‘‘অক্কোধনোনুপনাহী, অমাযো রিত্তপেসুণো;

কল্যাণপঞ্ঞো সো ভিক্খু, এৰং পেচ্চ ন সোচতি.

৫০৭. ‘‘যস্স সদ্ধা তথাগতে, অচলা সুপ্পতিট্ঠিতা;

সীলঞ্চ যস্স কল্যাণং, অরিযকন্তং পসংসিতং.

৫০৮. ‘‘সঙ্ঘে পসাদো যস্সত্থি, উজুভূতঞ্চ দস্সনং;

অদলিদ্দোতি তং আহু, অমোঘং তস্স জীৰিতং.

৫০৯. ‘‘তস্মা সদ্ধঞ্চ সীলঞ্চ, পসাদং ধম্মদস্সনং;

অনুযুঞ্জেথ মেধাৰী, সরং বুদ্ধান সাসন’’ন্তি. – ইমা গাথা অভাসি;

তত্থ অক্কোধনোতি অকুজ্ঝনসীলো. উপট্ঠিতে হি কোধুপ্পত্তিনিমিত্তে অধিৰাসনখন্তিযং ঠত্ৰা কোপস্স অনুপ্পাদকো. অনুপনাহীতি ন উপনাহকো, পরেহি কতং অপরাধং পটিচ্চ ‘‘অক্কোচ্ছি মং অৰধি মং, অজিনি মং অহাসি মে’’তিআদিনা (ধ. প. ৩; মহাৰ. ৪৬৪; ম. নি. ৩.২৩৭) কোধস্স অনুপনয্হনসীলো. সন্তদোসপটিচ্ছাদনলক্খণায মাযায অভাৰতো অমাযো. পিসুণৰাচাৰিরহিততো রিত্তপেসুণো, স ৰে তাদিসকো ভিক্খূতি সো তথারূপো তথাজাতিকো যথাৰুত্তগুণসমন্নাগতো ভিক্খু. এৰং যথাৰুত্তপটিপত্তিযা পেচ্চ পরলোকে ন সোচতি সোকনিমিত্তস্স অভাৰতো. চক্খুদ্ৰারাদযো কাযদ্ৰারাদযো চ গুত্তা পিহিতা সংৰুতা এতস্সাতি গুত্তদ্ৰারো. কল্যাণসীলোতি সুন্দরসীলো সুৰিসুদ্ধসীলো. কল্যাণমিত্তোতি –

‘‘পিযো গরুভাৰনিযো, ৰত্তা চ ৰচনক্খমো;

গম্ভীরঞ্চ কথং কত্তা, নো চট্ঠানে নিযোজযে’’তি. (অ. নি. ৭.৩৭) –

এৰং ৰিভাৰিতলক্খণো কল্যাণমিত্তো এতস্সাতি কল্যাণমিত্তো. কল্যাণপঞ্ঞোতি সুন্দরপঞ্ঞো. যদিপি পঞ্ঞা নাম অসুন্দরা নত্থি, নিয্যানিকায পন পঞ্ঞায ৰসেন এৰং ৰুত্তং

এৰমেত্থ কোধাদীনং ৰিক্খম্ভনৰসেন সমুচ্ছেদৰসেন চ অক্কোধনাদিমুখেন, পুগ্গলাধিট্ঠানায গাথায সম্মাপটিপত্তিং দস্সেত্ৰা ইদানি নিপ্ফত্তিতলোকুত্তরসদ্ধাদিকে উদ্ধরিত্ৰা পুগ্গলাধিট্ঠানায এৰ গাথায সম্মাপটিপত্তিং দস্সেন্তো ‘‘যস্স সদ্ধা’’তিআদিমাহ. তস্সত্থো – যস্স পুগ্গলস্স তথাগতে সম্মাসম্বুদ্ধে ‘‘ইতিপি সো ভগৰা’’তিআদিনযপ্পৰত্তা মগ্গেনাগতসদ্ধা, ততো এৰ অচলা অৰিকম্পা সুট্ঠু পতিট্ঠিতা. ‘‘অত্থী’’তি, পদং আনেত্ৰা সম্বন্ধিতব্বং. অরিযকন্তন্তি অরিযানং কন্তং পিযাযিতং ভৰন্তরেপি অৰিজহনতো. পসংসিতন্তি বুদ্ধাদীহি পসট্ঠং, ৰণ্ণিতং থোমিতং অত্থীতি যোজনা. তং পনেতং সীলং গহট্ঠসীলং পব্বজিতসীলন্তি দুৰিধং. তত্থ গহট্ঠসীলং নাম পঞ্চসিক্খাপদসীলং, যং গহট্ঠেন রক্খিতুং সক্কা. পব্বজিতসীলং নাম দসসিক্খাপদসীলং উপাদায সব্বং চতুপারিসুদ্ধিসীলং, তযিদং সব্বম্পি অখণ্ডাদিভাৰেন অপরামট্ঠতায ‘‘কল্যাণ’’ন্তি ৰেদিতব্বং.

সঙ্ঘে পসাদো যস্সত্থীতি ‘‘সুপ্পটিপন্নো ভগৰতো সাৰকসঙ্ঘো’’তিআদিনা অরিযসঙ্ঘে পসাদো সদ্ধা যস্স পুগ্গলস্স অত্থি অচলো সুপ্পতিট্ঠিতোতি আনেত্ৰা যোজেতব্বং. উজুভূতঞ্চ দস্সনন্তি দিট্ঠিৰঙ্কাভাৰতো কিলেসৰঙ্কাভাৰতো চ উজুভূতং. অকুটিলং অজিম্হং কম্মস্সকতাদস্সনঞ্চেৰ সপ্পচ্চযনামরূপদস্সনঞ্চাতি দুৰিধম্পি দস্সনং যস্স অত্থি অচলং সুপ্পতিট্ঠিতন্তি যোজনা. অদলিদ্দোতি তং আহু সদ্ধাধনং, সীলধনং, সুতধনং, চাগধনং, পঞ্ঞাধনন্তি ইমেসং সুৰিসুদ্ধানং ধনানং অত্থিতায ‘‘অদলিদ্দো’’তি তং তাদিসং পুগ্গলং বুদ্ধাদযো অরিযা আহু. অমোঘং তস্স জীৰিতং তস্স তথারূপস্স জীৰিতং দিট্ঠধম্মিকাদিঅত্থাধিগমেন অমোঘং অৰঞ্ঝং সফলমেৰাতি আহূতি অত্থো.

তস্মাতি, যস্মা যথাৰুত্তসদ্ধাদিগুণসমন্নাগতো পুগ্গলো ‘‘অদলিদ্দো অমোঘজীৰিতো’’তি ৰুচ্চতি, তস্মা অহম্পি তথারূপো ভৰেয্যন্তি. সদ্ধঞ্চ…পে… সাসনন্তি ‘‘সব্বপাপস্স অকরণ’’ন্তিআদিনা (ধ. প. ১৮৩; দী. নি. ২.৯০) ৰুত্তং বুদ্ধানং সাসনং অনুস্সরন্তো কুলপুত্তো ৰুত্তপ্পভেদং সদ্ধঞ্চেৰ সীলঞ্চ ধম্মদস্সনহেতুকং ধম্মে সুনিচ্ছযা ৰিমোক্খভূতং পসাদঞ্চ অনুযুঞ্জেয্য ৰড্ঢেয্যাতি.

এৰং থেরো ভিক্খূনং ধম্মদেসনামুখেন অত্তনি ৰিজ্জমানে গুণে পকাসেন্তো অঞ্ঞং ব্যাকাসি.

সিরিমিত্তত্থেরগাথাৰণ্ণনা নিট্ঠিতা.

৩. মহাপন্থকত্থেরগাথাৰণ্ণনা

যদা পঠমমদ্দক্খিন্তিআদিকা আযস্মতো মহাপন্থকত্থেরস্স গাথা. কা উপ্পত্তি? অযং কির পদুমুত্তরস্স ভগৰতো কালে হংসৰতীনগরে ৰিভৰসম্পন্নো কুটুম্বিযো হুত্ৰা একদিৰসং সত্থু সন্তিকে ধম্মং সুণন্তো সত্থারং একং ভিক্খুং সঞ্ঞাৰিৰট্টকুসলানং অগ্গট্ঠানে ঠপেন্তং দিস্ৰা সযম্পি তং ঠানন্তরং পত্থেন্তো বুদ্ধপ্পমুখস্স ভিক্খুসঙ্ঘস্স সত্তাহং মহাদানং পৰত্তেত্ৰা, ‘‘ভন্তে, যং ভিক্খুং তুম্হে ইতো সত্তদিৰসমত্থকে – ‘সঞ্ঞাৰিৰট্টকুসলানং অযং মম সাসনে অগ্গো’তি এতদগ্গে ঠপযিত্থ, অহম্পি ইমস্স অধিকারকম্মস্স বলেন সো ভিক্খু ৰিয অনাগতে একস্স বুদ্ধস্স সাসনে অগ্গো ভৰেয্য’’ন্তি পত্থনং অকাসি. কনিট্ঠভাতা পনস্স তথেৰ ভগৰতি অধিকারকম্মং কত্ৰা মনোমযস্স কাযস্সাভিনিম্মানং চেতোৰিৰট্টকোসল্লন্তি দ্ৰিন্নং অঙ্গানং ৰসেন ৰুত্তনযেনেৰ পণিধানং অকাসি. ভগৰা দ্ৰিন্নম্পি পত্থনং অনন্তরাযেন সমিজ্ঝনভাৰং দিস্ৰা ‘‘অনাগতে কপ্পসতসহস্সমত্থকে গোতমস্স নাম সম্মাসম্বুদ্ধস্স সাসনে তুম্হাকং পত্থনা সমিজ্ঝিস্সতী’’তি ব্যাকাসি.

তে উভোপি জনা তত্থ যাৰজীৰং পুঞ্ঞানি কত্ৰা ততো চুতো দেৰলোকে নিব্বত্তিংসু. তত্থ মহাপন্থকস্স অন্তরাকতং কল্যাণধম্মং ন কথীযতি. চূল়পন্থকো পন কস্সপস্স ভগৰতো সাসনে পব্বজিত্ৰা ৰীসতি ৰস্সসহস্সানি ওদাতকসিণকম্মং কত্ৰা দেৰপুরে নিব্বত্তি. অপদানে পন ‘‘চূল়পন্থকো পদুমুত্তরস্স ভগৰতো কালে তাপসো হুত্ৰা হিমৰন্তে ৰসন্তো তত্থ ভগৰন্তং দিস্ৰা পুপ্ফচ্ছত্তেন পূজং অকাসী’’তি আগতং. তেসং দেৰমনুস্সেসু সংসরন্তানংযেৰ কপ্পসতসহস্সং অতিক্কন্তং. অথ অম্হাকং সত্থা অভিসম্বোধিং পত্ৰা পৰত্তিতৰরধম্মচক্কো রাজগহং উপনিস্সায ৰেল়ুৰনে মহাৰিহারে ৰিহরতি.

তেন চ সমযেন রাজগহে ধনসেট্ঠিস্স ধীতা অত্তনো দাসেন সদ্ধিং সন্থৰং কত্ৰা ঞাতকেহি ভীতা হত্থসারং গহেত্ৰা তেন সদ্ধিং পলাযিত্ৰা অঞ্ঞত্থ ৰসন্তী তং পটিচ্চ গব্ভং লভিত্ৰা পরিপক্কগব্ভা ‘‘ঞাতিঘরং গন্ত্ৰা ৰিজাযিস্সামী’’তি গচ্ছন্তী অন্তরামগ্গেযেৰ পুত্তং ৰিজাযিত্ৰা সামিনা নিৰত্তিতা পুব্বে ৰসিতট্ঠানে ৰসন্তী পুত্তস্স পন্থে জাতত্তা পন্থকোতি, নামং অকাসি. তস্মিং আধাৰিত্ৰা ৰিধাৰিত্ৰা ৰিচরণকালে তমেৰ পটিচ্চ দুতিযং গব্ভং পটিলভিত্ৰা পরিপক্কগব্ভা পুব্বে ৰুত্তনযেনেৰ অন্তরামগ্গে পুত্তং ৰিজাযিত্ৰা সামিনা নিৰত্তিতা জেট্ঠপুত্তস্স মহাপন্থকোতি কনিট্ঠস্স চূল়পন্থকোতি নামং কত্ৰা যথাৰসিতট্ঠানেযেৰ ৰসন্তী অনুক্কমেন দারকেসু ৰড্ঢন্তেসু তেহি, ‘‘অম্ম, অয্যককুলং নো দস্সেহী’’তি নিবুন্ধিযমানা দারকে মাতাপিতূনং সন্তিকং পেসেসি. ততো পট্ঠায দারকা ধনসেট্ঠিনো গেহে ৰড্ঢন্তি. তেসু চূল়পন্থকো অতিদহরো. মহাপন্থকো পন অয্যকেন সদ্ধিং ভগৰতো সন্তিকং গতো সত্থারং দিস্ৰা সহ দস্সনেন পটিলদ্ধসদ্ধো ধম্মং সুত্ৰা উপনিস্সযসম্পন্নতায পব্বজিতুকামো হুত্ৰা পিতামহং আপুচ্ছি. সো সত্থু তমত্থং আরোচেত্ৰা তং পব্বাজেসি. সো পব্বজিত্ৰা বহুং বুদ্ধৰচনং উগ্গণ্হিত্ৰা পরিপুণ্ণৰস্সো উপসম্পজ্জিত্ৰা যোনিসোমনসিকারে কম্মং করোন্তো ৰিসেসতো চতুন্নং অরূপজ্ঝানানং লাভী হুত্ৰা ততো ৰুট্ঠায ৰিপস্সনং উস্সুক্কাপেত্ৰা অরহত্তং পাপুণি. ইতি সো সঞ্ঞাৰিৰট্টকুসলানং অগ্গো জাতো. সো ঝানসুখেন ফলসুখেন ৰীতিনামেন্তো একদিৰসং অত্তনো পটিপত্তিং পচ্চৰেক্খিত্ৰা অধিগতসম্পত্তিং পটিচ্চ সঞ্জাতসোমনস্সো সীহনাদং নদন্তো –

৫১০. ‘‘যদা পঠমমদ্দক্খিং, সত্থারমকুতোভযং;

ততো মে অহু সংৰেগো, পস্সিত্ৰা পুরিসুত্তমং.

৫১১. ‘‘সিরিং হত্থেহি পাদেহি, যো পণামেয্য আগতং;

এতাদিসং সো সত্থারং, আরাধেত্ৰা ৰিরাধযে.

৫১২. ‘‘তদাহং পুত্তদারঞ্চ, ধনধঞ্ঞঞ্চ ছড্ডযিং;

কেসমস্সূনি ছেদেত্ৰা, পব্বজিং অনগারিযং.

৫১৩. ‘‘সিক্খাসাজীৰসম্পন্নো, ইন্দ্রিযেসু সুসংৰুতো;

নমস্সমানো সম্বুদ্ধং, ৰিহাসিং অপরাজিতো.

৫১৪. ‘‘ততো মে পণিধী আসি, চেতসো অভিপত্থিতো;

ন নিসীদে মুহুত্তম্পি, তণ্হাসল্লে অনূহতে.

৫১৫. ‘‘তস্স মেৰং ৰিহরতো, পস্স ৰীরিযপরক্কমং;

তিস্সো ৰিজ্জা অনুপ্পত্তা, কতং বুদ্ধস্স সাসনং.

৫১৬. ‘‘পুব্বেনিৰাসং জানামি, দিব্বচক্খু ৰিসোধিতং;

অরহা দক্খিণেয্যোম্হি, ৰিপ্পমুত্তো নিরূপধি.

৫১৭. ‘‘ততো রত্যাৰিৰসানে, সূরিযুগ্গমনং পতি;

সব্বং তণ্হং ৰিসোসেত্ৰা, পল্লঙ্কেন উপাৰিসি’’ন্তি. – ইমা গাথা অভাসি;

তত্থ যদাতি যস্মিং কালে. পঠমন্তি আদিতো. অদ্দক্খিন্তি পস্সিং, সত্থারন্তি, ভগৰন্তং. অকুতোভযন্তি নিব্ভযং. অযঞ্হেত্থ অত্থো – সব্বেসং ভযহেতূনং বোধিমূলেযেৰ পহীনত্তা কুতোচিপি ভযাভাৰতো অকুতোভযং নিব্ভযং, চতুৰেসারজ্জৰিসারদং দিট্ঠধম্মিকসম্পরাযিকপরমত্থেহি ৰেনেয্যানং যথারহমনুসাসনতো সত্থারং সম্মাসম্বুদ্ধং ময্হং পিতামহেন সদ্ধিং গন্ত্ৰা যায ৰেলায সব্বপঠমং পস্সিং, তং পুরিসুত্তমং সদেৰকে লোকে অগ্গপুগ্গলং পস্সিত্ৰা ততো দস্সনহেতু ততো দস্সনতো পচ্ছা ‘‘এত্তকং কালং সত্থারং দট্ঠুং ধম্মঞ্চ সোতুং নালত্থ’’ন্তি ময্হং সংৰেগো অহু সহোত্তপ্পং ঞাণং উপ্পজ্জি. উপ্পন্নসংৰেগো পনাহং এৰং চিন্তেসিন্তি দস্সেতি সিরিং হত্থেহীতি গাথায. তস্সত্থো – যো ৰিভৰত্থিকো পুরিসো ‘‘উপট্ঠাযিকো হুত্ৰা তৰ সন্তিকে ৰসিস্সামী’’তি সৰিগ্গহং সিরিং সযনে উপগতং হত্থেহি চ পাদেহি চ কোট্টেন্তো পণামেয্য নীহরেয্য, সো তথারূপো অলক্খিকপুরিসো এতাদিসং সত্থারং সম্মাসম্বুদ্ধং আরাধেত্ৰা ইমস্মিং নৰমে খণে পটিলভিত্ৰা ৰিরাধযে তস্স ওৰাদাকরণেন তং ৰিরজ্ঝেয্য, অহং পনেৰং ন করোমীতি অধিপ্পাযো. তেনাহ ‘‘তদাহং…পে… অনগারিয’’ন্তি. তত্থ ছড্ডযিন্তি, পজহিং. ‘‘ছড্ডিয’’ন্তিপি পাঠো. ননু অযং থেরো দারপরিগ্গহং অকত্ৰাৰ পব্বজিতো, সো কস্মা ‘‘পুত্তদারঞ্চ ছড্ডযি’’ন্তি অৰোচাতি? যথা নাম পুরিসো অনিব্বত্তফলমেৰ রুক্খং ছিন্দন্তো অচ্ছিন্নে ততো লদ্ধফলেহি পরিহীনো নাম হোতি. এৰংসম্পদমিদং দট্ঠব্বং.

সিক্খাসাজীৰসমাপন্নোতি যা অধিসীলসিক্খা, তায চ, যত্থ ভিক্খূ সহ জীৰন্তি, একজীৰিকা সভাগৰুত্তিনো হোন্তি, তেন ভগৰতা পঞ্ঞত্তসিক্খাপদসঙ্খাতেন সাজীৰেন চ সমন্নাগতো সিক্খনভাৰেন সমঙ্গীভূতো, সিক্খং পরিপূরেন্তো সাজীৰঞ্চ অৰীতিক্কমন্তো হুত্ৰা তদুভযং সম্পাদেন্তোতি অত্থো. তেন সুৰিসুদ্ধে পাতিমোক্খে সীলে পতিট্ঠিতভাৰং দস্সেতি. ইন্দ্রিযেসু সুসংৰুতোতি মনচ্ছট্ঠেসু ইন্দ্রিযেসু সুট্ঠু সংৰুতো. রূপাদিৰিসযেসু উপ্পজ্জনকানং অভিজ্ঝাদীনং পৰত্তিনিৰারণৰসেন সতিকৰাটেন সুপিহিতচক্খাদিদ্ৰারোতি অত্থো. এৰং পাতিমোক্খসংৰরইন্দ্রিযসংৰরসীলসম্পত্তিদস্সনেন ইতরসীলম্পি অত্থতো দস্সিতমেৰ হোতীতি থেরো অত্তনো চতুপারিসুদ্ধিসীলসম্পদং দস্সেত্ৰা ‘‘নমস্সমানো সম্বুদ্ধ’’ন্তি ইমিনা বুদ্ধানুস্সতিভাৰনানুযোগমাহ. ৰিহাসিং অপরাজিতোতি কিলেসমারাদীহি অপরাজিতো এৰ হুত্ৰা ৰিহরিং, যাৰ অরহত্তপ্পত্তি, তাৰ তেহি অনভিভূতো, অঞ্ঞদত্থু তে অভিভৰন্তো এৰ ৰিহাসিন্তি অত্থো.

ততোতি তস্মা, যস্মা সুৰিসুদ্ধসীলো সত্থরি অভিপ্পসন্নো কিলেসাভিভৰনপটিপত্তিযঞ্চ ঠিতো, তস্মা. পণিধীতি পণিধানং. ততো ৰা চিত্তাভিনীহারো. আসীতি অহোসি. চেতসো অভিপত্থিতোতি, মম চিত্তেন ইচ্ছিতো. কীদিসো পন সোতি আহ ‘‘ন নিসীদে মুহুত্তম্পি, তণ্হাসল্লে অনূহতে’’তি. ‘‘অগ্গমগ্গসণ্ডাসেন মম হদযতো তণ্হাসল্লে অনুদ্ধটে মুহুত্তম্পি ন নিসীদে, নিসজ্জং ন কপ্পেয্য’’ন্তি এৰং মে চিত্তাভিনীহারো অহোসীতি অত্থো.

এৰং পন চিত্তং অধিট্ঠায ভাৰনং ভাৰযিত্ৰা ঠানচঙ্কমেহেৰ রত্তিং ৰীতিনামেন্তো অরূপসমাপত্তিতো ৰুট্ঠায ঝানঙ্গমুখেন ৰিপস্সনং পট্ঠপেত্ৰা অরহত্তং সচ্ছাকাসি. তেন ৰুত্তং ‘‘তস্স মে’’তিআদি. নিরূপধীতি কিলেসুপধিআদীনং অভাৰেন নিরুপধি. রত্যাৰিৰসানেতি রত্তিভাগস্স ৰিগমনে ৰিভাতায রত্তিযা. সূরিযুগ্গমনং পতীতি সূরিযুগ্গমনং লক্খণং কত্ৰা. সব্বং তণ্হন্তি কামতণ্হাদিভেদং সব্বং তণ্হাসোতং অগ্গমগ্গেন ৰিসোসেত্ৰা সুক্খাপেত্ৰা ‘‘তণ্হাসল্লে অনূহতে ন নিসীদে’’তি, পটিঞ্ঞায মোচিতত্তা. পল্লঙ্কেন উপাৰিসিন্তি পল্লঙ্কং আভুজিত্ৰা নিসীদিন্তি. সেসং উত্তানত্থমেৰ.

মহাপন্থকত্থেরগাথাৰণ্ণনা নিট্ঠিতা.

অট্ঠকনিপাতৰণ্ণনা নিট্ঠিতা.